Zaŋ 12
12
Mariya ma mbəɗafama wurdey ka sek ma Yezu
1Andza Pak a zarawa meney mukwa na, Yezu me husey a Betani a wuraw ma Lazar, na ŋga ma lətsadərawa da walaŋ ma ndaw ma mətsa na hay ana. 2Ma tam tek haɗadzidzay ma kadama magurlam ma vəday ŋga. Marta na a həladatərawa ha, Lazar na, ma ndza ha da walaŋ ma ndaw ma wuna na hay. 3Mariya na me zəgey rita ma liter ma wurdey hayna, ma sumko haɗadzidzay ana, ma mbəɗadara ka sek ma Yezu, ma takaɗa ta mbez 'ar aŋga na. Arka me zey ŋga na ma rəhada 'ay ana tabiyaha. 4Arka ndaw asləta da walaŋ ma gawla ŋga hay, a zəlamar Zudas Iskariyot, na ŋga na ma da haɗəkada Yezu ba na, me ləvey: 5«Ɗagay ka haɗəkadama wurdey ana gabal temere makar na, a vəladəmatara a ndaw mbarga na hay na, hayaha seŋgey.» 6A tsey andza ha na, ka ləva na ndaw mbarga na hay ma kamar da vaw kakay, a tsey na hərway ŋga mahal aha, sulay ta ma paha na da har aŋga, a huley təŋga hay da huɗa. 7Yezu me ləvey tok: «Mbəkada ŋgwas ana, a ka tek aŋga neney na kassla, a zegweley na ma da pey ɗaw a tsəvay. 8Ndaw mbarga na hay na daha ta kuray ka pas ka pas seŋgey, ama yah na, i daha ta kuray ka pas ka pas kakay.» 9Azlakwa na zuif hay ma kusa hiya haɗadzidzay, ma tsənadama Yezu ŋga daha ka slam ana na, ma səmawa, a səmawa na kavəday ma Yezu ana dada tsa kakay, amana satsa ma da nəkafəraɓa ka Lazar, na ŋga ma lətsadərawa da walaŋ ma ndaw ma mətsa na hay ana. 10Zla da na ŋga na na, baba ɗuhwa na me key kuley ana hay, ma ŋgəlafama mawa ka Lazar ma da kəɗa ba vagay aha tiyatsa. 11hərway kavəday ŋga na, zuif hay haɗadzidzay ma mbəkadəmatərawa ma da pam 'ar ka Yezu.
Yezu a fuləkwey a Zeruzalem
(Mt 21.1-11; Mk 11.1-11; Lk 19.28-40)
12Ma medew ana ndaw ma kusa hiya haɗadzidzay, na ma səmawa a magurlam ana, ma tsənadama waya Yezu a sawa ha a Zeruzalem na; 13ma tsam ɓaslah ma təɓah, ma bəmawa ma da zlam 'ar. Taya ma wudam: «Ozana! Ndaw ma sawa da mezəley ma Bay’ərlam ana na, ma pəsa mey aha ba, bay ɗuhwa na ma Israyel.» 14Yezu me ndzefey bəzey ma zuŋgow, me ndzey ka ’arra andza na ma winda ha da Mewindey Kokwoɗ ana: 15«Ka wesey zlay dem ma Siyoŋ: nəkafa bay ɗek ɗuhwa na a sawa ha, ma ndza ha ka 'ar ma bəzey ma zuŋgow.» 16Da har ana tsəfəmey ana na, gawla ŋga hay a səradama tek ana ma kawa na kakay, ama a dəba ma Yezu me ndzefey maram ba na, taya ma sərafama azlakwa, a windəmərawa na ka ŋga, azlakwa a kəmawa andza ha na ma ŋga. 17Ndaw ma kusa hiya andza da har a zələrawa Lazar ba da tsəvay ana, ŋga ma lətsadərawa ba da walaŋ ma ndaw ma mətsa na hay na, ma kam seydewe ŋga na. 18Akwa a da dam haɗadzidzay ma dazlam 'ar ana na, kavəday taya ma tsənadama ŋga me key zeheɗ ana aŋga na na. 19Fariziyeŋ hay ma ləvam ka 'ar vaw ta na: «Ka nəkadama ha kuray ana ta dey kwar, ka da slafama ha me key tek dakay, nəkafama bəla tabiyaha a səpa aha.»
Grek hay daha a səpam ma nəkada Yezu
20Grek hay daha nekəɗey ma tsəlam ma da nawa dəba da har ma magurlam. 21Taya ma tsəhafama ka Filip ndaw Betəsayda da Galiley, ma ləvamar: «Bay, la wuɗam la ka nəkadama Yezu.» 22Filip ma daw ma ɓadara a Andrey, arka ka masləta ha na, ma dam ma tsadəmara a Yezu. 23Yezu ma mbəɗatar kava andza neney: «Har ma Bəzey ma Ndaw ma da ndzefey maram ka slawa tsoy. 24Dərka dərka na, i ɓadakwar, haɗaw bəzey ma daw ka kəley ka dala, ka mətsey kakay na, a ndzey re ŋga aslətaa, ama haɗaw dzadzak ka mətsey ba na, a yey bəzey kava haɗadzidzay. 25Ndaw me wuɗey mendzey aŋga na, a da zəɗada, ndaw mendzey aŋga ma kar da 'ar kakay ka bəla neney tey na, a da wafa vaw a mendzey me ndəvey kakay ana. 26Haɗaw ndaw a wuɗey ma kaya mber na, ka səpaya bəzay, ka slam a ɗaw i kava na na, gawla ma 'ay ɗaw a da key ŋga kava tey. Haɗaw ndaw a kaya ha mber na, Baba a da vəlar a da hasəkadara bəzay. 27Ekəɗey na, mezek aɗaw ma dawara ha, ana i da ləvey teŋgey? Baba, buiyaɓa da har a neney ana tsukuɗu? Ama dzadzak i sawa ɗerre na ma har a neney ana. 28Baba, hasəkadara bəzay a Mezəley ɗek.» Arka vəɗe ma ɗay ma tsənawa da 'ərlam: «I ka hasəkadara bəzay ba, i da hasəkadara sa.» 29Ndaw na andza ma kusa hiya ka slam ana, ma tsənadama guma na na, ma ləvam waya: «Yam me rəvey», sa na hay waya: «Madurlam ka tsərawa guma ba.» 30Yezu me tsey guma, me ləvey: «Vəɗe ma ɗay neney a tsənawa na hərway ɗaw kakay, ama a tsənawa na mavəday kwar.» 31Ekəɗey na, sariya ma bəla neney, ekəɗey na bay ma bəla neney a da kəladama a bəla. 32Na ŋga ɗaw na, aza ka da tsakafadəmaya ba tsaŋ ka dala na, i da kavatsatərawa ndaw hay tabiyaha ka tsakay ɗaw.» 33Ta guma neney na, a ɓada a da mətsey na ta memətsey waray. 34Ndaw na ma kusa hiya na hay tabiyaha ma mbəɗafəmara kava: «La tsənadama da Mewey na, Kriste na, a da ndzey ma kozaha. Azlakwa ekəɗey ka ləvey a dafa ka tsakafadama Bəzey ma Ndaw na teŋgey? Ɗagay Bəzey ma Ndaw ana na way?» 35Yezu ma mbəɗatar kava: «Waw me nəkey dey ŋga daha da walaŋ a kwar mba me mendzey nekəɗey na, halam da har waw me nəkey dey kwar daha na, ma ləvaŋ ka da zəgakwar zlay, hərway ndaw me heley da ləvaŋ na, a sərada a daw na a may kakay. 36Da har waw me nəkey dey kwar daha na pam 'ar ka waw me nəkey dey ana, ma aza kuray ka təram bəzey ma waw me nəkey dey ahiya.» Andza ŋga ma tsatar guma na hay ba andza neney na, Yezu me wurzley ŋga, ma kəzlafata vaw ba.
Zuif hay a pam 'ar ka guma ma Yezu kakay
37Kwa andza ka key zeheɗ hay ba haɗadzidzay ka slam dey ta na, re a pam 'ar ka ŋga kakay təŋga. 38Akwa, a da key andza neney na andza ma ndaw sek Ezayi ma tsawa na: ‹Bay’ərlam, me pey 'ar ka guma la ma tsawa na na way? Gədaŋ ma har ma Bay’ərlam ana na, a da ɓadəmərawa na a way?› 39Akwa na ndaw sek Ezayi ana ka tsawa ba kava sa, a da slafama ma pam 'ar kakay ana na: 40‹Ŋga ka wuləfadatara dey ta ba, ma təradatara mevel ata ba təɗo təɗo, ma ka nəkadama ta dey ta zlay, ma mevel ata ka sərada tek zlay, ka mbəɗadama mendzey ta zlay, dakay na i ka ndaladata ba!› 41Ezayi a da tsey andza ha na, mavəday ka nəkada maram aŋga ba, arka a tsawa na ka ŋga. 42Akwa na, da walaŋ ma bay ana hay tekeɗe na, ndaw hay haɗzadzidzay ka pam 'ar ba ka ŋga. Ama hərway ma Fariziyeŋ hay na, a slafa ma me wurey mey, ma ɓada kakay, hərway a wasam a da warzləmatərawa ba da ’ay me ɗuley mey. 43A hiyam na maram ma sawa da ndaw hay ta maram na ma sawa da Bay ma Bəla ana. 44Arka Yezu ma tələkey mey: «Ndaw me pey 'ar ka yah na, a pey 'ar na ka yah dada kakay, ama na ka Ndaw ma sləradiyawa na. 45Ndaw ma nəkadaya na, a nəkey na Ndaw ma sləradiyawa na tiyatsa. 46Yah na, waw me nəkey dey, i sawa ka bəla na, ma aza kwa way way me pey 'ar ka yah na, ka da ndzey da ləvaŋ zlay. 47Ndaw ma tsənada guma ɗaw hay, ma wafata vaw kakay na, ma da kafa sariya na yah kakay, hərway i sawa na, ma da kafa sariya ka bəla kakay, i sawa na ma da buwa bəla. 48Ndaw ma kəladaya, ma təɓa guma ɗaw kakay na, ndaw ma key sariya ŋga na daha: guma ɗaw ana i me tsey ana na, a da kadara sariya ŋga na ta pas madakwaydok ana na ŋga. 49I tsey guma na na, ma 'ar a ɗaw ana kakay, amana, Baba ma sləradiyawa na, ma ɓadaya guma na i me tsey ana ta na i ma tələkada mey ana. 50I sərada ha, mey ma mewey ŋga na na, mendzey me ndəvey kakay ana. Guma i me tsey ana na, i tsa na, andza ma Baba ɗaw ma tsadiyawa na.»
Currently Selected:
Zaŋ 12: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun