TIT 1
1
Ji haŋ
1I ya Pol, gawla ngi Buymisemuŋ, mislin ngi Yesu Kristu, matoho ɗerewol hana, ɓa ngi jina mizli Buymisemuŋ muwuna taŋ, ɓa a tiɓam, waɗ ɓa a sinaka ɓi mikaslsla ngi misikristuhoy masipaka na, 2ɓa a njaham hiri njah ar siifa ngi sete, Buymisemuŋ magi slir ta, miɓa ɗaˀ le zleˀe dumbuŋ angi gwatay gar na. 3Yo angi hin naŋ misla na, a njika ɓi nah le ar mingiɓi naŋ, i ɓi naŋ mupula asi haŋ ɗu, ya matil di mi kasl kasl ka Buymisemuŋ Milih ndra miɓiy di na. 4I ra tuhuw ɗerewol hana da ka Tit, ka mangal ɗu migisiŋ gisiŋ ar tiɓi misi purla. Anja Cine ndra Buymisemuŋ ati Milih ndra Yesu Kristu, a gukuw mezle, a vulukuw zuy.
Slra ngi Tit miga a Kret
5Ya mupuluw a Kret na, ɓa gwatay mindiram manja gi na, ki kiɗa mi ngi ɗiy taŋ, yo ar walahay madiɗa madiɗahay gar na, ki cifi mizli micawwahay ar Cikil ngi misikristuhoyo ti jiviɗ ya muɓuw di na. 6Anja mbur micawwa na, i mbur manja ɓi ngi mbiɗaŋ hirnga, i mbur misi ngwas purla. Anja ziri naŋhay i mitiɓihey, i migi lambaˀ lambaˀhay ta, yo i micina mihey, ɓa mizli a mbiɗaka taŋ hirnga gu ta. 7Asi mike na, mbur madiɗa ngir Cikil ngi misikristuhoy na, a gi di i slra ngi Buymisemuŋ. Vurˀe, anja a lumam ɓi ava ngi mbiɗaŋ hirnga ta. Anja ko i mbur mahuhum vu ta, a slikiɗ himaˀ ta, a si mbaazla haɗa ta, a wuɗ kiɗa vu ta, a lum gwata ti jiviɗ malambaˀ ta. 8Sey a tiɓi mulakay a hay naŋ, a wuɗ gi gwat mezleŋ, i mbur misi lesl, mbur mijeŋŋe, i mbur mipal, i mbur majigina vu naŋ. 9Ɓi mikaslsla ngi tiɓi, kaɓa mudubunakaŋ di na, sey a ja ɓi nah gidaŋ gidaŋ. Ɓa kahana na, a sa vula gidaŋ gu da mizli mekelemeye ti ɓi mijeŋŋe, yo mingila mihey na, a sa biga taŋ di, a zluɓaka le. 10Asi mike na, mizli ada haɗi, anta hinam hirnga ta, wãˀ naŋ na, a wuzla Yude misikristuhoy, a gam gilaw da mizli ti mingiɓi kwiliŋ kwiliŋ lambaˀ. 11Anja ki guco taŋ mi, asi ara mbiɗaka lesl da hay ngi mizli keɗeɗe, yo ara dubunaka taŋ luuma dala ti jiviɗ mijeŋ ta. 12Mbur Kret pal ar wala taŋ tehhe, i mijiviɗ, a ɓi na: «Kretey i misi slirey ngi sete, i gwat miji vuhoy, i masafaya misi may kwacayay.» 13Ɓi naŋ miɓa nah na, naŋ kaslsla, vurˀe, mbura taŋ himaˀ kuy kuy, ɓa a tiɓam ti jiviɗ mijeŋŋe. 14Mambaˀ ngi Yudehey ati ɓi ngi mizli muɗuvaka na, anja a jaka ɓi nah a hirnga ta. 15Gwat gar i manja dili avu mizli manja diliheye. Amma mizli misi dilihey, mangumam tiɓi ta na, gwat manja dili anta avu taŋ ta, asi lesl taŋ ati wuluk ngir mevel taŋ, naŋ ti dili. 16A gam kaɓa a sinaka Buymisemuŋ le, amma avu gwat ngi gi taŋ na, ko a sinakaŋ ta. Taŋ i malambaˀhay wãˀ, i mislikiɗa ɓihey, gwat mezle gar na, a ndilaka gi nah ta.
Currently Selected:
TIT 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.