1 Timoteo 1
1
Uandajperata
1Páblu, Jesukristueri uandakua pári, juchari Diósïri ka Acha Jesukristueri juramukua jimbo ima enga juchari míntsikueka, 2Timoteuni karakuxaka, enga jakajkukua jimbo jucheti uátsïtika, juchari Diósï Táte ka Acha Jesukristu t'úngeni jinguni jaue ka íntskuekini sési jakua ka p'amojkperakua ka újchakurekini.
Jinguntku je máteru jásï arhijtsïkperatecha jinguni
3Engani Masedonia nirani jámempka, kómarhispkakini eskari Éfesu pakarapiringa arhiani imani engaksï ísku ambe ma újtsïkpeni jaka, 4ka ísku kurha je tua anapuecheri uandantskuechani, enga uarhiperata k'amarhujka, ka no jarhojpesïndi ambe enga Diósï uékani jaka enga jakajkukuarhu irenhajka.
5Jimbokinisï ísï juramucheni jaka, jimbokani uéksïnga eskajsï xénhchperaaka, sési jásï mintsita jinguni ka sési jásï eratsekua jinguni ka sési jimbo jakajkuparini. 6Máruksï támu ísï nirastia ka ísku ambeksï uandaparini jámsïndi. 7Uéksïndiksï juramukua jurhentpiri úkorheni, ka jiniksï no jamberi mítesti ambeksïsï uinhatsïtajki uandani.
8Mítetixakachi eska juramukua sési ambeska, niárani sési úranhania. 9Mítetixakachi eska kaxumbiticha no uétarhenchasïnga juramukuani, ariksïsï juramukuani uétarhenchajti: Engaksï no ambarhati k'uiripueka ka engaksï k'amanharhintstika ka engaksï nósesi ambe úrika, ka iámendu engaksï Diósïni no janhanharhijka ka engaksï amambani o tátjembani uándikujka ka ístu iámendu atajpiticha, 10ka ísku jándichani ka imechani engaksï no újka jánhaskani imaksï tatakeski óksï nanakeski ka k'uiripu atarantsticha ka chkuándirechani ka engaksï ísku aiatspejka ambe, ka iámendu imechani engaksï no ísï irekaka eska ambakiti jurhentperakua námendu arhijka. 11Íni ambesï arhijti Diósïri ambakiti aiangperakua engarini Diósï jíndeni mintsikaka aiangpentani.
Páblueri úkua
12Diósïmaiamu arhintasïnga juchari Acha Jesukristuni, engarini uinhaperantaka, ka íni ánchekorhetarini míndani. 13Nájkirukani ji urhetku ísï Jesukristuni uánekua ambe arhiparhatempka ka ístuni jámsïrempka jupikatarkorheni, k'órurini Diósï p'amojkusti jimbokani ji no mítespka ambesïni xáni nósesi ambe úempki engani nótkini jakajkuempka. 14Acha Jesukristurini tekajchentasti ka kánekuamendurini kóndesti ka íntskustirini jakajkukua ka xénhchperata enga Acha Jesukrituni jinguni újka p'inhani.
15Iámenduecha jakajku je, i ambe ísïsti, Jesukristu jurhasti íni parhakpeni k'amanharhintstichani p'ímutantaani, ka ji sánderu nósesi úrispka iámenduecha jinguni. 16K'óru Acha Diósïrini jíndeni tekachentasti, ka Jesukristu jindeni jimbo xarhatasti eska kánekua tekantskua jatsiska, ka eskaksï máteruecha exepiringa ka eskaksï Jesusini jakajkupiringa ka méntku ísï anapu irekuaksï jatsini. 17¡Imani enga méntkisï irecheka, méntku ísï k'eri ambe arhi je, enga nómeni uarhiaka, ka enga nónema újka exeni, imajkusï Diósïti! Ka ísïsti.
18Timoteo, jucheti uatsïti, ísïkini arhixaka eskari jakajkukua jimbo sési uarhipeaka, ísï eska chéti ambe na uandakata jápkia. 19Mintsika Diósïni ka sési eratseparini ambe u, máruksï nósesi eratseparini, jakajkukuanksï tsîtastia, 20Imeneo ima ma ísïsti ka ístu Alejandru, jimbosïni Nóambakitini intsïnharhitaaka, nandikaksï ísï jámani Diósïni nóteru nósesi ambe arhiakia.
Currently Selected:
1 Timoteo 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.