Saxaria 1
1
ǃKhūb ge ǁaes âba ra ǂgai-oa
1ǁKhaisaǁî ǁkhâb, gao-aob Dariusi ǀgamǁî kurib dib ǃnâs ge ǃKhūb di mîsa kēbo-aob Saxariab, Berekiab ôab, Idob ǁnuriǀgôaba ge hāba: 2“ǃKhūb ge kaise sadu aboxagu ǂama ge ǁaixa 3ǁnā-amaga ǁîna mîba re: ‘Nētib ge ǃKhūb Hoaǀgaixaba ra mî; tita ǁga oa re tib ge ǃKhūb Hoaǀgaixaba ra mî, o ta ge sadu ǁga nî oa tib ra ǃKhūb Hoaǀgaixaba mî. 4Tā sadu aboxan, kēbo-aogu xa gere ǃhoaǀîhe tsî nēti mîbahen khami ī: Nētib ge ǃKhūb Hoaǀgaixaba ra mî, ǃhobasen re sadu di ǂkhaba daogu tsî ǂkhaba dīga xu; on ge ǁnâuǀnam te tama ge i, tib ge ǃKhūba ra mî. 5Sadu aboxaga mâpa gu hâ? Tsî kēbo-aoga ǀamose gu ra ûi? 6Xawe ti mîdi tsî ǂnûiǂgādi ti ǃgāgu, kēbo-aoga ta ge mîmāde sadu aboxaga saoǁae tama di hâ? O gu ge ǃhobasen tsî ge ǂanǃgâ: ǃKhūb Hoaǀgaixab ge sada ǀkhab nî dī tib ge ǂâibasen hâ i khami ge dī-ū da, tsî ge ǁkhara da, sada daogu tsî dīgu ǃoa.’ ”
ǂGuro ais: Hāgu
7ǀGamdisihakaǀaǁî tsēs Sebati, disiǀguiǀaǁî ǁkhâb gao-aob Dariusi ǀgamǁî kurib dib ǃnâs ge dis ǃnâs ge ǃKhūb di mîsa kēbo-aob Saxariab, Berekiab ôab, Idob ǁnuriǀgôaba ge hāba: 8Tsuxub ǃnâ ta ge ai-e ge mû: Khoeb ǀapa hāb ai ǃgapi hâba ta ge ge mû. ǁÎb ge mirtehaidi, ǃgoaǃnāb ǃnâ mâdi ǁaegu ge mâ i. ǁÎb ǃgâb ai gu ge ǀapa, ǂgama tsî ǃuri hāga ge mâ i. 9O ta ge “Nēna kha a tare?” ti ge dî. Ob ge ǃhoa-ū te gere ǀhomǃgāba “Tare-i a ǃkhaisa ta ge nî ǁgau tsi” ti ge ǃeream te. 10Ob ge mirtehaidi ǁaegu mâ khoeba ge ǃeream: “ǃKhūb xa ǃhūbaiba nî ǃgûǃnâǃganuse sîǂuihe hâgu ge ǁîga.”
11O gu ge ǀhomǃgāb ǃKhūb dib, mirtehaidi ǁaegu mâba ge ǃeream: “Sige ge ǃhūbaiba ge ǃgûǃnâǃganu tsîb ge hoaraga ǃhūbaiba ǃnōsa tsî ǂkhîse ǁgoe.”
12Ob ge ǃKhūb di ǀhomǃgāba ge mî: “ǃKhū, Hoaǀgaixatse! Mâǁaeb kōsets kha Jerusalems tsî Judab di ǃāde ǀkhom tide? Sa ǁaixasib ge nēsisa hûdisi kuriga ǁîdi ai hâ.”
13Ob ge ǃKhūba ǃgâi tsî ǁkhaeǂgaoxa mîdi ǀkha tita ǀkha gere ǃhoa ǀhomǃgāba ge ǃeream. 14Ob ge ǀhomǃgāb tita ǀkha gere ǃhoaba ge mîba te: “ǂGaiǂui, îts nēti mî: ‘Nētib ge ǃKhūb Hoaǀgaixaba ra mî: “Kaise ta ge tita Jerusalems tsî Sions ǂama ra tau. 15Tita ge kaise ǁaedi hîa sâsa di ǀkha ǁaixa hâ. Aibe ta ge ǂkharirose ge ǁaixa hâ i, xawen ge ǁîna ǂkhababa ge ǀaro.” ’
16“ǁNā-amagab ge ǃKhūba nēti ra mî: ‘Jerusalems ǁga ta ge ge oa, ǀkhomxaǂgaosigu ǀkha, ti ommi nî ǁnāpa ǁkhawa ǂnubikhâihese,’ tib ge ǃKhūb Hoaǀgaixaba ra mî, tsîb ge ǀnō-ūtsuriba Jerusalems ǁkhawa nî ǂnubikhâihese ǁîs ǂama nî ǂgaekhorahe.
17“ǃAruǀî ǂgaiǂui re: ‘Nētib ge ǃKhūb Hoaǀgaixaba ra mî: Ti ǃādi ge ǁkhawa ǃgâib xa nî dâuǂamhe tsîb ge ǃKhūba ǁkhawa Sionsa nî ǁkhaeǂgao tsîb ge ǁkhawa Jerusalemsa nî ǁhûiǂuibasen.’ ”
ǀGamǁî ais: ǁNâgu
18Kōkhâi ta ge o ta ge haka ǁnâga ge mû. 19O ta ge tita ǀkha gere ǃhoa ǀhomǃgāba ge dî: “Nēna a tare?” Ob ge “Nēgu ge ǁnâgu Judab, Israeli tsî Jerusalems tsîna ge ǀgaruǀgaruga” ti ge ǃeream te.
20Ob ge ǃKhūba haka ǀurikuru-aoga ge ǁgau te. 21O ta ge “Tare-e nî dīse gu go hā?” ti ge dî. Ob ge “Nēgu ge ǁnâgu Judaba ge ǀgaruǀgaruga, khoe-i di mîdi xa ǃaromahe hâseb danas âba ge ūkhâi ǁoa is kōse. O gu ge ǀurikuru-aoga go hā, ǁnâgu Judaba ǂnauǂkhū tsî ǁaesa nî ǀgaruǀgaruse ge hāga gu hoaragase nî ǂnauǁnâse.”
Currently Selected:
Saxaria 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.