1 S 11
11
Laj Saúl kixq'ax ruheb' laj Amón
1Jun pohaq chik a'an, laj Najás, awab'ej re Amón, koho Yabés re Galahad ut kixkawresiheb' laj puub' re yalok rik'in li tenamit. Ab'an chixjunileb' laj Yabés ke'xye re laj Najás: “B'aanu jun sumwank qik'in ut laa'o took'anjelaq chawu”. 2Kichaq'ok laj Najás aj Amón ut kixye reheb': “Tinb'aanu jun sumwank eerik'in, ab'an tento xb'enwa twisi xsa' leeru li wank sa' leenim chejunjunqal. Chi jo'kan te'kanaaq sa' xutaanal chixjunileb' laj Israel”.
3Toja' naq li xcheekelaleb' laj Yabés ke'xye re: “Kuyo wan wuqub'aq kutan re naq tqataqla aj esil sa' xsutam Israel, ut wi maajun traj qatenq'ankil, tojo' tqaq'axtesi qib' rub'el aawankil”, chankeb'.
4Naq eb' li taql ke'wulak Kibehá, b'arwi' wank laj Saúl, ut ke'xye a'in reheb' li poyanam, chixjunileb' ke'xjap re chi yaab'ak. 5Sa' li honal a'an laj Saúl yo chaq chi sutq'iik sa' k'aleb'aal chirixeb' li xb'ooyx, ut kixpatz': “K'aru xe'xk'ul li tenamit naq yookeb' chi yaab'ak?”, chan. Ut ke'xye re li raatineb' laj Yabés. 6Naq laj Saúl kirab'i a'an, ki'eechaniik xb'aan li xmusiq' li Yos ut k'ajo' naq kichalk xjosq'il. 7Kixchap jun sumal chi b'ooyx ut kixkamsiheb'; kixxeri ut kixjek'i li tib' sa' xteepal chixjunil Israel chirixeb' aj esil: “Jo'ka'in taa'uxq reheb' li xb'ooyx li ink'a' taaxik chirix laj Saúl ut laj Samuel”, chankeb' laj esil.
K'ajo' naq ke'xiwak li poyanam, ut junajeb' xch'ool koheb' chi yalok. 8Laj Saúl kirajlaheb' aran Bések: o'lajuk'aal mileb' (300,000) laj Israel, ut eb' laj Judá lajeeb' xka'k'aal mileb' (30,000). 9Chirix chik a'an kixye reheb' li taql li ke'chalk chaq Yabés re Galahad: “Jo'ka'in teeye re leetenamit: «Wulaj sa' wa'leb' texqakol»”.
Koheb' li taql ut koxe'xye resil reheb' laj Yabés, li ke'saho'k sa' xch'ool. 10Toja' naq eb' laj Yabés ke'xye reheb' laj Najás: “Wulaj tqaq'axtesi qib' sa' eeruq' ut b'aanuhomaq qik'in li k'aru us cheru”.
11Wulajaq chik a'an, laj Saúl kixk'eheb' laj puub' sa' oxib' tzol, ut eb' a'an koxe'xkut rib' sa' xb'eeneb' laj Amón toj hik'ho ut ke'xsach ruheb' toj kiwa'leb'o'k. Ut eb' li ink'a' ke'kamsiik, ke'elelik ut ke'xcha'cha'i rib'eb'.
12Toja' naq li tenamit ke'xye re laj Samuel: “Aniheb' li ke'xye naq laj Saúl ink'a' taa'awab'ejinq sa' qab'een? Q'axtesihomaqeb' qe li winq a'an ut te'qakamsi”. 13Ab'an laj Saúl kixye: “Maajun chikamq anaqwan, xb'aan naq li Qaawa' xooxkol laa'o aj Israel sa' li kutan a'in”.
14Ut laj Samuel kixye re li tenamit: “Yo'qeb' chiqajunilo aran Kilkal ut tqaninq'ehi aran li rokik laj Saúl cho'q awab'ej”.
15Toja' naq chixjunil li tenamit koheb' Kilkal ut aran, chiru li Qaawa', ke'xxaqab' laj Saúl cho'q awab'ej ut ke'xyeechi'i mayej re k'amok ib' sa' usilal rik'in li Yos. K'ajo' naq ke'saho'k sa' xch'ool laj Saúl jo'wi' chixjunileb' laj Israel!
Currently Selected:
1 S 11: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
