Lucas 3
3
Coansha Paotista pënëntërinsoꞌ
(Mateo 3.1-12; Marcos 1.1-8; Juan 1.19-28)
1Naporo tahuëriꞌsaꞌ Tipirio itopisoꞌ, Noma copirno yaꞌconin. Nani shonca aꞌnatërápo piꞌipi huaꞌanëntarin. Ponsio Piratontaꞌ Cotia parti huaꞌanëntarin. Irotisësoꞌ, Cariria parti huaꞌanëntarin. Iin Pinipi itopisontaꞌ, Itoria parti, Traconiti parti, inapita parti huaꞌanëntarin. Nisaniasësoꞌ nipirinhuëꞌ, Apirinia parti huaꞌanëntarin. 2Anasë, Caihuasë, inapita corto huaꞌan chini chiníquën nanantërinsoꞌ yaꞌconpi. Naporoꞌ Coansha pënëntarin. Sacariasë huiꞌnin inasoꞌ. Inotëroꞌ parti yaꞌhuasoꞌ, Yosëri shaꞌhuitërin paaton pënëntacaso marëꞌ. 3Napoaton yaꞌipi Cortaniiꞌ parti paꞌtaton, pënëntárin.
—Co noyahuëꞌ yonquiramasopita naniantatomaꞌ, Yosë tahuërëtantacoꞌ oshanëmaꞌ inquichinquëmaꞌ. Ina quëran aporintaranquëmaꞌ, itëraꞌpiarin. 4Iráca Isaiasë ninorin. Ninshitaton, naporin:
“Inotëro parti aꞌna quëmapi pënëntápon.
‘Sinioro oꞌmacasoꞌ tahuëri yonquicoꞌ. Niꞌcoꞌ. Huaꞌan chiníquën nanantonaꞌpi niꞌton, aꞌna parti yapaꞌpachina, comisionën aꞌparin ira tapatacaso marëꞌ.
Ira otëërin noya paꞌtacaso marëꞌ.
5Iconantëroꞌsaꞌ amëntarotarin. Panënoꞌsaꞌ taparoarin. Coꞌshoninsopita otëarin.
Tomashin acoarin. Ira noya tapahuachina, huaꞌan paꞌnin huachi.
Inapochachin iporasoꞌ co noyahuëꞌ yonquiramasopita naniantatomaꞌ, cancanëmaꞌ anoyatocoꞌ Sinioro oꞌmain.
6Yaꞌipi piyapinpoaꞌ nichaꞌëinpoaso marëꞌ oꞌmararin,’ tapon ina quëmapi pënëntohuachin,” tënin Isaiasë iráca ninoton.
Naporinso chachin Coansha pënëntarin.
7Aꞌnaquën aporihuanacaiso marëꞌ huëꞌpirinahuëꞌ, Coansharisoꞌ, co yaaporintërinhuëꞌ:
—Canpitasoꞌ yaꞌhuan pochin cancantatomaꞌ, yanonpinamaꞌ. “Yosë isoroꞌpaꞌ anaꞌintohuachin, chaꞌëpoi quiyantaꞌ,” ¿topiramahuë ti? Topinan aporihuanpatamaꞌ, co chaꞌësaramahuëꞌ. 8Co noyahuëꞌ yonquiramasopita naniantatomaꞌ, noya nicoꞌ. Ama ninonpintocosohuëꞌ. “Quiyasoꞌ Apraan shinpitacoi niꞌtoi, Yosë piyapinënpitacoi,” ama tocosohuëꞌ. Yosë nohuantërin naporini, iso naꞌpiroꞌsantaꞌ Apraan shinpita atarantacasoꞌ nanichitonhuëꞌ. 9Nani Yosë yonquirin oshahuanoꞌsaꞌ anaꞌintacasoꞌ. Niꞌcoꞌ. Nararoꞌsaꞌ co noya nitohuachinahuëꞌ, nicosotërëꞌ. Nicosotahuatëꞌ, pënquë tëꞌyatërëꞌ huiquitacaso marëꞌ. Inapochachin canpitantaꞌ co noyahuëꞌ nipatamaꞌ, chiníquën anaꞌintarinquëmaꞌ, tënin.
10—¿Maꞌtaꞌ onpoꞌii nipachin? itopi.
11—Piyapiꞌsa maꞌshari pahuantohuachina, ama apiratocosohuëꞌ. Catoꞌ aꞌmocamaso yaꞌhuëtohuachinquëmaꞌ, aꞌnaraꞌ quëtocoꞌ aꞌmoꞌin. Tanahuachinaꞌ, aꞌcacoꞌ caꞌin, itërin Coanshari. 12Aꞌnapitantaꞌ aporihuanacaiso marëꞌ huëꞌpi. Inapitasoꞌ coriqui copirno marëꞌ maꞌpatonaꞌpiroꞌsaꞌ.
—¿Maꞌtaꞌ maistro quiyasoꞌ onpoꞌii? itiipi.
13—Noꞌtëquën coriqui maꞌpatocoꞌ. Ama nonpinatomaꞌ, naꞌcon naꞌcon maꞌpatocosohuëꞌ, itërin.
14Sontaroꞌsantaꞌ huëꞌpi.
—¿Maꞌtaꞌ quiyantaꞌ onpoꞌii? itiipi.
—Ama piyapi ahuëatomaꞌ, coriqui matocosohuëꞌ. Ama canacaso marëꞌ nonpinapicosohuëꞌ. Nani pahuërëhuachinquëmaꞌ, ama naꞌcon naꞌcon nohuantocosohuëꞌ, itërin.
15Piyapiꞌsasoꞌ yonquirapirinahuëꞌ. “¡Ma noyacha Coanshasoꞌ pënëntërin paya! Inasoꞌ Cristo nimara. Nichaꞌëinpoaso marëꞌ ¿Yosëri aꞌpaimamara ti?” topi. 16Ina natanahuaton, Coanshari itërin:
—Aporintëranquëma mini nipirinhuëꞌ, co casoꞌ Cristocohuëꞌ. Ca piquëran inasoꞌ huëꞌsarin. Inaso chini chiníquën nanantërin. Casoꞌ co piꞌpisha tërantaꞌ ina pochin chiníquën nanantërahuëꞌ. Co maquëyancohuëꞌ niꞌton, co sapatën iꞌquiritaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ, pënquë chiníquën anaꞌintarinquëmaꞌ. 17Cayarinsoꞌ manëso pochin nisarin. Arosë mapatëra, toꞌnorarëꞌ. Ina quëran pintiarahuatëꞌ, pëiquë acorëꞌ. Shaꞌhuëtënso nipirinhuëꞌ pënquë ahuiquitërëꞌ. Inapochachin anaꞌintohuachinquëmaꞌ, co onporontaꞌ pën tacopiarinhuëꞌ, tënin Coansha. 18Nani tahuëri ina pochin piyapiꞌsaꞌ pënënárin. Yosë nanamën aꞌchintárin.
19Irotisëntaꞌ huaꞌan nipirinhuëꞌ pënënin. “Quëmasoꞌ paꞌpi co noyahuëꞌ ninan. Naporahuaton, iyaparin saꞌin osërëtaton, manan. Pinipi saꞌin chachin manan. Irotiasa itopisoꞌ. Ina marëꞌ oshahuanan,” itërin. 20Napotohuachina, Irotisësoꞌ aquë aquëtëꞌ co noyahuëꞌ yonquiaton, Coansha tashinan pëiquë apoꞌmotërin.
Quisoso aporihuaninsoꞌ
(Mateo 3.13-17; Marcos 1.9-11)
21Coꞌhuara apoꞌmochatërasohuëꞌ, Coanshari piyapiꞌsaꞌ aporintahuachina, Quisosontaꞌ huëꞌnin aporihuanacaso marëꞌ. Nani aporihuanahuaton, Yosë nontërin. Nontasoꞌ, piꞌiroꞌtëꞌ niꞌsoatërin. 22Ispirito Santo nëpë pochin nohuaraimarahuaton, Quisoso yaꞌcoancantomiatërin. Naporoꞌ inápa quëran Yosëri itërin:
—Quëmasoꞌ huiꞌnahuënquën chachin ninan. Naꞌcon nosoroatënquën, nóya niꞌnanquën, itërin.
Quisoso shimashonënpita yaꞌhuërinsoꞌ
(Mateo 1.1-17)
23Yaꞌnan pënëntapon, Quisoso cara shonca piꞌipitërin. Cosi huiꞌnin, topirinahuëꞌ. Cosi paꞌpinsoꞌ Iri itopi. 24Iri paꞌpintaꞌ Matato itopi. Ina paꞌpinsoꞌ Nihui itopi. Nihui paꞌpintaꞌ Miriqui itopi. Ina paꞌpinsoꞌ Cana itopi. Cana paꞌpintaꞌ Cosi itopi. 25Cosi paꞌpinsoꞌ Matatiasë itopi. Ina paꞌpintaꞌ Amosë itopi. Amosë paꞌpinsoꞌ Naomo itopi. Ina paꞌpintaꞌ Isiri itopi. Isiri paꞌpinsoꞌ Nacai itopi. 26Ina paꞌpintaꞌ Maato itopi. Maato paꞌpinsoꞌ Matatiasë itopi. Ina paꞌpintaꞌ Simi itopi. Simi paꞌpinsoꞌ Cosico itopi. Ina paꞌpintaꞌ Cota itopi. 27Cota paꞌpinsoꞌ Coanan itopi. Ina paꞌpintaꞌ Nisa itopi. Nisa paꞌpinsoꞌ Soropapiro itopi. Ina paꞌpintaꞌ Saratiro itopi. Ina paꞌpinsoꞌ Niri itopi. 28Niri paꞌpintaꞌ Miriqui itopi. Miriqui paꞌpinsoꞌ Ati itopi. Ina paꞌpintaꞌ Cosamo itopi. Cosamo paꞌpinsoꞌ Irmatamo itopi. Ina paꞌpintaꞌ Iri itopi. 29Iri paꞌpinsoꞌ Cosoi itopi. Ina paꞌpintaꞌ Irisiro itopi. Ina paꞌpinsoꞌ Corimo itopi. Ina paꞌpintaꞌ Matato itopi. Ina paꞌpinsoꞌ Nihui itopi. 30Nihui paꞌpintaꞌ Simion itopi. Ina paꞌpinsoꞌ Cota itopi. Ina paꞌpintaꞌ Cosi itopi. Cosi paꞌpinsoꞌ Conamo itopi. Ina paꞌpintaꞌ Iriaquimo itopi. 31Ina paꞌpinsoꞌ Miria itopi. Ina paꞌpintaꞌ Mina itopi. Ina paꞌpinsoꞌ Matata itopi. Ina paꞌpintaꞌ Natano itopi. Ina paꞌpinsoꞌ Tapi itopi. 32Tapi paꞌpintaꞌ Quisi itopi. Ina paꞌpinsoꞌ Opito itopi. Ina paꞌpintaꞌ Pooso itopi. Ina paꞌpinsoꞌ Sara itopi. Sara paꞌpintaꞌ Nasono itopi. 33Nasono paꞌpinsoꞌ Aminatapo itopi. Ina paꞌpintaꞌ Atamino itopi. Ina paꞌpinso Arni itopi. Arni paꞌpintaꞌ Isromo itopi. Isromo paꞌpinsoꞌ Parisë itopi. Ina paꞌpintaꞌ Cota itopi. 34Ina paꞌpinsoꞌ Cacopo itopi. Cacopo paꞌpintaꞌ Isaco itopi. Isaco paꞌpinsoꞌ Apraan itopi. Apraan paꞌpintaꞌ Tari itopi. Ina paꞌpinsoꞌ Nacoro itopi. 35Nacoro paꞌpinsoꞌ Siroco itopi. Ina paꞌpintaꞌ Nacao itopi. Nacao paꞌpinsoꞌ Parico itopi. Ina paꞌpintaꞌ Ipiri itopi. Ipiri paꞌpinsoꞌ Sara itopi. 36Ina paꞌpintaꞌ Cainano itopi. Cainano paꞌpinsoꞌ Arapasato itopi. Ina paꞌpintaꞌ Simo itopi. Simo paꞌpinsoꞌ Noi itopi. Noi paꞌpintaꞌ Namico itopi. 37Namico paꞌpinsoꞌ Matosarino itopi. Ina paꞌpintaꞌ Inoco itopi. Inoco paꞌpinsoꞌ Carito itopi. Ina paꞌpintaꞌ Marariro itopi. Ina paꞌpinsoꞌ Cainano itopi. 38Ina paꞌpintaꞌ Inosë itopi. Inosë paꞌpinsoꞌ Sito itopi. Ina paꞌpintaꞌ Atan itopi. Atansoꞌ Yosëri ninin.
Currently Selected:
Lucas 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.