Lucas 16
16
Inpriatori nonpintërinsoꞌ
1Ina quëran caꞌtanoꞌsanënpita aꞌchintantaton, itapon: “Aꞌna maꞌhuan yaꞌhuërin. Inpriatonën chiníquën nanan quëtërin piyapinënpita camaicaso marëꞌ. Inari asacatërin. Chiníquën nanantaton, nihuipisoꞌ ninshitërin. Inaso nipirinhuëꞌ, nonpintaton, inaora marëꞌ coriqui masarin niꞌton, shaꞌhuirapipi. 2Maꞌhuansoꞌ natantahuaton, amatërin. ‘Quëmasoꞌ nonpintaranco natantërahuë. Coriqui quëtëranquënsoꞌ quëmaora marëꞌ manan niꞌquëhuarëꞌ, ocoiaranquën. Yaꞌipi nihuirinacosoꞌ ninshitoco nitochi,’ itërin. 3Inpriatonënsoꞌ pipirahuaton, yonquirarin. ‘¿Maꞌcha onpoꞌi nicaya? Huaꞌanëhuë ocoiarinco. Co nanitërahuëꞌ chiníquën sacataꞌhuasoꞌ. Naporahuaton, tapanato, co nohuantërahuëꞌ coriqui topinan maꞌpataꞌhuasoꞌ. 4Naꞌa quëmapiꞌsaꞌ huaꞌanëhuë nihuipi. Iporasoꞌ inapita catahuarahuë. Ina quëran huaꞌanëhuë ocoihuachinco, inahuantaꞌ catahuarinaco nanpicaꞌhuaso marëꞌ,’ tënin yonquiaton. 5Naporahuaton, coꞌhuara huaꞌani ocoiyatërasohuëꞌ, nihuitopisopita amatërin. Aꞌnaya aꞌnaya huëꞌpi. Aꞌnasoꞌ huëꞌpachina, natanin. ‘¿Onpotaꞌ huaꞌan nihuiran?’ itërin. 6‘Pasa rata tomaꞌ maꞌparahuë niꞌton, ina nápoꞌ nihuirahuë,’ itohuachina, ‘Inta nipachin, nihuitëranso quirica masahuaton, aꞌnatërápo shoncaíchin ninshitantaquëꞌ,’ itërin. 7Ina quëran aꞌnantaꞌ huëꞌnin. Huëꞌpachina, ‘¿Onpotaꞌ quëmantaꞌ nihuitëran?’ itërin. ‘Trico maꞌparahuë niꞌton, pasa costaro marëꞌ nihuirahuë,’ tënin. ‘Inta nipachin, Posa shoncaíchin ninshitantaquëꞌ,’ itërin. Inapotëraꞌpiaton, naꞌa amiconënpita catahuarin ama naꞌcon pahuërëtacaiso marëhuëꞌ. 8Huaꞌani natantahuaton, amataantarin. ‘Naquëranchin nonpintantaranco. Nipirinhuëꞌ, “ma noyacha yonquiran paya,” tënahuë,’ itërin huaꞌanëni. Niꞌcoꞌ iyaroꞌsaꞌ. Naꞌa piyapiꞌsaꞌ co noyahuëꞌ nipisopita noya yonquipi inaora canacaiso marëꞌ. Aꞌnaquëmaso nipirinhuëꞌ, imapiramacohuëꞌ, co onpopinchin yonquiramahuëꞌ noya nicacamaso marëꞌ.
9Coriqui yaꞌhuëtohuachinquëmaꞌ, ama canpitaoráchin iꞌquicosohuëꞌ. Aꞌnapita pahuantohuachinaꞌ, quëtocoꞌ. Inapohuatamaꞌ, Yosëꞌpaꞌ noya niꞌsarinquëmaꞌ. Chiminpatamaꞌ, Yosë inápaquë quëpantarinquëmaꞌ. Coriquinëmaꞌ patopiramahuëꞌ, inatohuaꞌ noya noya yaꞌhuëcontaramaꞌ.
10Niꞌcoꞌ iyaroꞌsaꞌ. Huaꞌanëmaꞌ shaꞌhuitohuachinquëmaꞌ, natëcamasoꞌ yaꞌhuërin. Piꞌpian tërantaꞌ shaꞌhuitopirinquëmahuëꞌ, natëhuatamaꞌ, noya niꞌsarinquëmaꞌ. Chini chiníquën nanan quëtarinquëmaꞌ. Coꞌsoꞌ natëhuatamahuëꞌ, co chiníquën nanan quëtarinquëmahuëꞌ. ‘Nonpintarinco,’ taꞌton, co huachi natëarinquëmahuëꞌ. 11Yaꞌipi coriquinëmaꞌ canpitaora marëꞌ iꞌquihuatamaꞌ, co insontaꞌ inápaquë acanarinquëmahuëꞌ. 12Iporasoꞌ Yosë nohuanton, maꞌsha, coriqui, inapita yaꞌhuëtarinquëmaꞌ. Aꞌnaninquëmaso pochin quëtërinquëmaꞌ. Topinan quëran iꞌquihuatamaꞌ, co mantaꞌ Yosëꞌpaꞌ canamiataramahuëꞌ.
13Catoꞌ patron camaihuachinquëmaꞌ, co nanitëramahuëꞌ cato chachin natëcamasoꞌ. Aꞌnasoꞌ nohuantatomaꞌ, noya natëaramaꞌ. Aꞌnaso nipirinhuëꞌ co onpopinchin nohuantatomahuëꞌ co natëaramahuëꞌ. Inapochachin canacamasoáchin yonquihuatamaꞌ, co nanitaramahuëꞌ Yosë natëcamasoꞌ. Coriquiráchin cancantohuatamaꞌ, co Yosë natëaramahuëꞌ,” itërin Quisosori.
14Parisioroꞌsaꞌ coriquiráchin cancantopi. Napoaton Quisoso aꞌchininsoꞌ natanahuatonaꞌ, tëhuapi. 15Tëhuapirinahuëꞌ, Quisosori itërin: “Canpitasoꞌ Yosë imaramaso pochin nipomarahuëꞌ, co tëhuënchachin imaramahuëꞌ. Nonpinamaꞌ. Yonquiramaso chachin Yosë nitotërin. Piyapiꞌsaꞌ noya niꞌpirinënquëmahuëꞌ. Cancanëma quëranso yanonpinamaꞌ niꞌton, Yosë co piꞌpian tërantaꞌ noya niꞌsarinquëmahuëꞌ,” itërin.
Yosë quiricanën quëran pënëninpoasoꞌ
16Ina quëran tantarin: “Iráca Moisësë, pënëntonaꞌpiroꞌsaꞌ, inapita pënëntopi nani maꞌsha natëcasoꞌ. Ina quëran Coansha Paotista huëꞌpachina, noya nanan shaꞌhuirin Yosë huaꞌanëntërinquë yaꞌconacaiso marëꞌ. Yayaꞌconpisopitasoꞌ chiníquën cancantatonaꞌ, yaꞌconapi. 17Quiricanën quëran Yosë noꞌtëquën pënëninpoaꞌ. Isoroꞌpaꞌ, piꞌiroꞌtëꞌ, inapita taꞌhuantapirinahuëꞌ, yaꞌipi Yosë nanamënsoꞌ yaꞌhuëmiatápon. Co aꞌna huiꞌsharinso tërantaꞌ topinan quëran ninshitopihuëꞌ niꞌton, yaꞌipi naniarin,” tënin.
Saꞌahuanoꞌsaꞌ pënëninsoꞌ
(Mateo 19.1-12; Marcos 10.1-12)
18Ina quëran Quisosori pënëantarin: “Co saꞌamaꞌ tëꞌyatamasoꞌ yaꞌhuërinhuëꞌ. Noya nichinpitacasoꞌ yaꞌhuërin. Napoaton saꞌamaꞌ tëꞌyatatomaꞌ, aꞌna sanapi maantahuatamaꞌ, oshahuanaramaꞌ. Monshihuaninso pochin Yosë niꞌsarinquëmaꞌ. Insosona ina sanapi soꞌini tëꞌyatërinso chachin maantahuachina, inantaꞌ monshihuaninso pochin Yosëri niꞌsarin,” itërin.
Maꞌhuan parisitërinsoꞌ
19Ina quëran itaantapon: “Aꞌna maꞌhuan yaꞌhuërin. Nani maꞌsha yaꞌhuëtërin. Morin paꞌton nininsoꞌ aꞌmorin. Noyápiachin aꞌmoton, nani tahuëri pita pochin nicaton, nóya coshatërin. Co mantaꞌ pahuantërinhuëꞌ. 20-21Aꞌna quëmapintaꞌ inaquë yaꞌhuërin, saꞌahua nininsoꞌ. Nasaro itopi. Apia niꞌton, co nanitërinhuëꞌ sacatacasoꞌ. Maꞌsha topinan maꞌpataton, nanpirin. Maꞌhuan pëinën aipiran acopi. Yaꞌcoanaquë huënsëarin. Tanaton, maꞌhuan pëꞌsotërinso tërantaꞌ nayapirinhuëꞌ, co mantaꞌ quëtopihuëꞌ. Taꞌtaráchin niconin niꞌton, niꞌniraroꞌsari huëcatonaꞌ, irotiipi. 22Napoin quëran Nasaro chiminin huachi. Chiminpachina, Yosëꞌpaꞌ anquëniroꞌsari quëparin. Apraan pantarinquë chachin pantarin. Ina quëran maꞌhuaontaꞌ chimininpachina, paꞌpitopi.
23Parisitopiquë paaton, parisitárin. Nëꞌpërahuaton, aquë quëran Nasaro quënanin. Tata Apraanëꞌ yaꞌhuëarin. 24Napoaton chiníquën përarin: ‘¡Tata Apraan, nosoroco cantaꞌ! Pënquë parisitárahuë. Nasaro aꞌpatimaco iꞌsha piꞌpian tërantaꞌ apiꞌnichinco,’ itopirinhuëꞌ. 25‘Coꞌchi nanitërahuë paya. Niꞌquëꞌ. Quëmasoꞌ nanpipon, nani maꞌsha yaꞌhuëtopirinquënhuëꞌ, inasáchin yonquiran niꞌton, iporasoꞌ parisitáran. Nasaroso nipirinhuëꞌ nanpipon, parisitápirinhuëꞌ, iporasoꞌ noya yaꞌhuarin huachi. 26Naporahuaton, Yosëꞌpaꞌ paꞌpatëra, co onporontaꞌ pipirëhuëꞌ. Inapochachin parisitopiquëntaꞌ paꞌpatëra, co onporontaꞌ Yosëꞌpaꞌ paꞌnëhuëꞌ. Panca tahuan yaꞌcopitërinso pochin niꞌton, co nanitërëhuëꞌ pëntonacasoꞌ,’ itërin.
27-28Napotopirinhuëꞌ, itantarin: ‘Aꞌnatërápo iyahuëpita ipora yaꞌhuërapi. Nasaro aꞌpaquëꞌ tatahuë pëinënquë iyahuëpita pënënacaso marëꞌ. Casoꞌ parisitápato, co nohuantërahuëꞌ isëquë huëcacaisoꞌ,’ itërin. 29Napotohuachina, Apraani itërin: ‘Coꞌta Yosë quiricanën yaꞌhuëtopi. Inaquë Moisësë, pënëntonaꞌpiroꞌsaꞌ, inapita ninshitopi nontatonaꞌ nitotacaiso marëꞌ. Inapita natëinaꞌ,’ itërin Apraani. 30‘Nani nontaponaraihuëꞌ, co natëpihuëꞌ. Nipirinhuëꞌ, chimininsoꞌ nanpiantahuaton, pënënconpachin, natëponaꞌ nimara. Co noyahuëꞌ yonquipisopita naniantatonaꞌ, Yosë tahuërëtantaponaꞌ nimara, topirahuëꞌ,’ tënin. 31‘Co Yosë quiricanën natëhuachinahuëꞌ, chimininsontaꞌ nanpiantapirinhuëꞌ, co onporontaꞌ natëapihuëꞌ,’ itërin Apraani,” tënin Quisoso.
Currently Selected:
Lucas 16: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.