Juan 6
6
Cosharoꞌ anaꞌatërinsoꞌ
(Mateo 14.13-21; Marcos 6.30-44; Lucas 9.10-17)
1Ina quëran Cariria sonoꞌ aquëtëran pëntonai. Ina sonosoꞌ, Tipiriasë itopi antaꞌ. 2Notohuaroꞌ piyapiꞌsaꞌ imasarinacoi. Naꞌa caniaꞌpiroꞌsaꞌ Quisosori aꞌnaroáchin anoyatërin. Ina nicatonaꞌ, imasapi. 3Nonshirahuatoi, aꞌna motopiaꞌhuaquë pomosocontarai. Inaquë huënsëconai. 4Pascoa tahuëri naniriarin. Naporoꞌ cotioroꞌsaꞌ niyontonpi Yosë yonquicaiso marëꞌ. 5Quisoso natanacaiso marëꞌ notohuaroꞌ piyapiꞌsaꞌ canquirapi. Inapita quënanahuaton, Quisosori Pinipi itapon:
—¿Intohuacha cosharoꞌ paꞌanë isopita capacaiso marëꞌ nicaya? itërin.
6Nani yonquirin cosharoꞌ anaꞌatacasoꞌ niponahuëꞌ, Pinipi natanin tënicaso marëꞌ.
7—Cato pasa tahuëri sacatatëꞌ canarësoquë paꞌanpirëhuahuëꞌ, co iso nápo piyapiꞌsaꞌ naniitonahuëꞌ, itërin Pinipiri.
8Antërisëntaꞌ yaꞌhuarin. Simon Pitro iin inasoꞌ. Natanahuaton, itapon:
9—Isëquë aꞌna quëmapiaꞌhua yaꞌhuërin. Aꞌnatërapoíchin pan nisahuaton, catoyachin sami yaꞌhuëtërin. Inaíchin nipirinhuëꞌ, ¿iso nápoꞌ piyapi taꞌmaꞌ nanitërëꞌpoya? itërin.
10—Piyapiꞌsaꞌ shaꞌhuitocoꞌ huënsëꞌinaꞌ, itërincoi Quisoso.
Inaquë noya pastoaꞌhuaya yaꞌhuërin. Shaꞌhuitohuatëira, inaquë huënsëpi. Aꞌnatërápo huaranca quëmapiꞌsa pochin yaꞌhuëpi. 11Quisosori aꞌnatërapoya pan masahuaton, Yosë nontërin. “Yosparinquën, Tata,” itahuaton, piyapiꞌsaꞌ quëtërin capacaiso marëꞌ. Samirë chachin quëtëraꞌpiarai. Yaꞌipi piyapiꞌsaꞌ natëaquë huarëꞌ coshatopi. 12Nani natëhuachinara, caꞌtanoꞌsanënpitacoi itaponcoi:
—Pan, sami, inapita pëꞌsotopisoꞌ maconcoꞌ, chiniahuachinaꞌ, itërincoi.
13Napoaton pëꞌsotopisoꞌ masahuatoi, shonca catoꞌ iꞌmëꞌ mëntatërai. 14Ina nápo piyapiꞌsaꞌ capacaiso marëꞌ cosharoꞌ anaꞌatërinsoꞌ niꞌsahuatonaꞌ, piyapiꞌsaꞌ ninontopi:
—Tëhuënchachin iso quëmapi Yosëri aꞌpaimarin. Pënëinpoaso marëꞌ aꞌpaimacaso shaꞌhuirinso chachin, nani oꞌmarin, nitopi.
15“Huëcoꞌ maahuaꞌ, copirno acoaꞌahuaꞌ,” topi aꞌnaquën. Co Quisosori natanaponahuëꞌ, inaora yonquinën quëran nitotërin. Nitotaton, inaora panënquë pantarin.
Iiꞌ aipi iratërinsoꞌ
(Mateo 14.22-27; Marcos 6.45-52)
16Iꞌhuanahuanquë caꞌtanoꞌsanënpitacoisoꞌ, sonoꞌ yonsanquë paꞌmantarai. 17-18Potiquë yaꞌconahuatoi, Capinaomoquë pacaꞌhuaiso marëꞌ pëntonapiraihuëꞌ, huancoanaiꞌ tashitërai. Co Quisoso huëꞌshatërasohuëꞌ, panca ihuan manincoi niꞌton, panca coꞌsacaitërin. 19Saota quiromitro pochin nani maitopiraihuëꞌ, Quisoso huëꞌsarin nicaporaihuëꞌ, co aꞌnaroáchin nohuitëraihuëꞌ. Iiꞌ aipi iꞌnarahuaton, noꞌpa pochin huëꞌshiarin. Poti yaꞌcaririarinsoꞌ niꞌsahuatoi, paꞌyanai.
20Napopiraihuëꞌ:
—¡Coꞌta ca huëꞌsarahuë! ¡Ama paꞌyancosohuëꞌ! itërincoi. 21Ina quëran noya cancantatoi: “Yaꞌconquiquëꞌ,” itohuatoira, yaꞌconin. Yaꞌconpachina, aꞌnaroáchin Capinaomo yonsanquë canconai.
Quisoso yonípisoꞌ
22Piyapiꞌsaso nipirinhuëꞌ ina quëranchin quëparitopi. Tahuëririnquë Quisoso yonisápirinahuëꞌ. Co quënanatonahuëꞌ, ninontopi. “¿Intohuasoꞌ paꞌmara? Iꞌhuara aꞌnaíchin poti yaꞌhuëpirinhuëꞌ. Inaquë caꞌtanoꞌsanënpita yaꞌconahuatonaꞌ, paꞌpi. Quisososo nipirinhuëꞌ co paꞌninhuëꞌ,” nitopi. 23Napoasoi, potiroꞌsanta Tipiriasë quëran huëꞌpisoꞌ canquirapi quënanpi. Quisoso cosharoꞌ anaꞌataton piyapiꞌsaꞌ aꞌcarinsoꞌ yaꞌcari nonshiipi. 24Co caꞌtanoꞌsanënpitacoi tërantaꞌ yaꞌhuëraihuëꞌ niꞌton, “Huëcoꞌ paꞌahuaꞌ, Quisoso yoniahuaꞌ,” nitatonaꞌ, potiroꞌsaquë yaꞌconpi. Yaꞌconahuatonaꞌ, Capinaomoquë paꞌpi Quisoso yoníponaꞌ.
Cosharo pochin nininsoꞌ
25Inaquë nonshirahuatonaꞌ, Quisoso quënanconpi huachi.
—¿Onporotaꞌ Maistro isëquë huënan? itopirinahuëꞌ.
26—Noꞌtëquën shaꞌhuitaranquëmaꞌ. Iꞌhuara cosharoꞌ anaꞌatërahuë nohuitamacoso marëꞌ nipirinhuëꞌ, co yanohuitëramacohuëꞌ. Natëaquë huarëꞌ coshatëramaꞌ niꞌton, yoniramaco. 27Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.
28—¿Maꞌtaꞌ Yosë nohuantërin nicaꞌhuaisoꞌ? itopi.
29—Tëhuënchachin Yosë yanatëhuatamaꞌ, ca imaco. Ina aꞌpaimarinco niꞌton, cancanëma quëran huarëꞌ imaco. Ina Yosë nohuantërin, itërin Quisosori.
30—Inta nipachin, Yosë pochin niquëꞌ. Ina nicatoi, natëꞌinquën. Co topinan natëaꞌhuainquënsoꞌ yaꞌhuërinhuëꞌ. 31Iráca shimashonënpoapita Moisësëri Iquipito quëran quëcapon, noya cosharoꞌ mana itopisoꞌ quëtërin. “Cosharoꞌ inápa quëran oꞌmarinsoꞌ quëtërin capacaiso marëꞌ,” tënin Yosë quiricanënquë. Inotëro parti napopi, itopi.
32—Noꞌtëquën itëranquëmaꞌ. Cosharoꞌ inápa quëran oꞌmarinsoꞌ co Moisësëri quëtërinhuëꞌ. Tata Yosëri quëtërinsoꞌ. Iporasoꞌ noya noya nininsoꞌ quëtarinquëmaꞌ. 33Inápa quëran aꞌpatimarinquëmaꞌ piyapiꞌsaꞌ ina pochin nanpicaiso marëꞌ, itërin.
34—Inanpi cosharoꞌ, Sinioro, quëtocoi nani tahuëri capatoi, noya nanpii, itopi.
35—Ca inaco. Casoꞌ cosharo pochinco niꞌto, piyapiꞌsaꞌ ananpitomiatarahuë. Imapatamaco, co huachi tanarëso pochin cancantaramahuëꞌ. Natëhuatamaco, co huachi yamororëso pochin cancantaramahuëꞌ. Yosë nohuitohuatamaꞌ, sano cancantaramaꞌ. 36Nipirinhuëꞌ, nani shaꞌhuitëranquëmaꞌ. Ninahuësoꞌ nicapomarahuëꞌ, co natëramacohuëꞌ. 37Aꞌnaquën Tata Yosë nohuanton, imasarinaco. Insosona imapachinaco, co onporontaꞌ aꞌpararahuëꞌ. 38Co caora nohuanto, maꞌsha ninahuëꞌ. Inápa quëran oꞌmarahuë Tata Yosë natëcaꞌhuaso marëꞌ. Ina aꞌpaimarinco. 39Aꞌnaquën Yosë nohuanton, imasarinaco. Inapitasoꞌ noya aꞌpaiarahuë, co aꞌpoarinacohuëꞌ. Ayaroꞌ tahuëri ananpitaantararahuë. Ina Yosë nohuantërin. 40“Quëmasoꞌ tëhuënchachin Yosë huiꞌninquën,” itatomaco imapatamaco, Yosë nohuitatomaꞌ nanpimiatarama huachi. Ayaroꞌ tahuëri ananpitaantaranquëmaꞌ. Ina Yosë nohuantërin, itërin Quisosori.
41Ina natanahuatonaꞌ, cotioroꞌsari noꞌhuipi. “Casoꞌ cosharo pochin ninahuë. Inápa quëran oꞌmarahuë,” tëninso marëꞌ noꞌhuipi. Noꞌhuitonaꞌ, ninontapi.
42—Coꞌta inasoꞌ Quisoso. Cosi huiꞌnin. Aꞌshiontaꞌ nohuitërëhuaꞌ. ¿Onpoatontaꞌ “Inápa quëran oꞌmarahuë,” toconin? nitopi.
43—Ama huachi noꞌhuitomaco, sacaro quëran ninontocosohuëꞌ. 44Co insontaꞌ nanitërinhuëꞌ inaora nohuanton imaincosoꞌ. Tata Yosëri huayoninsopitaráchin imasarinaco. Ayaroꞌ tahuëri inapitasoꞌ ananpitaantararahuë. 45Pënëntonaꞌpiroꞌsaꞌ iráca ninshitopi. “Yaꞌipi piyapiꞌsaꞌ Yosëri aꞌchintarin,” topi, ninshitatonaꞌ. Tatahuë natanatomaꞌ natëhuatamaꞌ, imasaramaco.
46Co insontaꞌ Tata Yosë quënaninhuëꞌ. Casáchin quënanahuë. Ina yaꞌhuërin quëran oꞌmarahuë. 47Noꞌtëquën shaꞌhuitëranquëmaꞌ. Imapatamaco, Yosë nohuitatomaꞌ nanpimiataramaꞌ. 48Ca cosharo pochinco niꞌto piyapiꞌsaꞌ ananpimiatarahuë. 49Shimashonëmapita inotëro parti yaꞌhuasoiꞌ, cosharoꞌ Yosëri quëtërinsoꞌ caꞌpi. Mana itopisoꞌ caꞌpirinahuëꞌ, nani iráca chiminpi. 50Insosona natëhuachinco inápa quëran cosharoꞌ oꞌmarinso capatë pochin nisarin. Napohuachin, Yosërëꞌ yaꞌhuëmiatapon. 51Ca nanpirin cosharo pochinco. Inápa quëran oꞌmato, noya noya ananpiaranquëmaꞌ. Ca nonëhuë chachin quëtarahuë yaꞌipi piyapiꞌsa marëꞌ. Coshatëramaso pochin nitohuatamaco, yaꞌcoancantaranquëmaꞌ, nanpimiatarama huachi, itërin.
52Ina natanahuatonaꞌ, cotioroꞌsaꞌ nisha nisha ninontopi.
—¿Onporahuatontaꞌ nonën chachin caꞌnëso pochin quëtërëꞌponpoa nicaya? nitopi.
53—Noꞌtëquën itëranquëmaꞌ. Casoꞌ Yosë quëran quëmapico niꞌto, yaꞌipi cancanëma quëran yonquico. Coꞌsoꞌ nonëhuë caꞌnëso pochin nitohuatamahuëꞌ, huënainëhuëntaꞌ co oꞌorëso pochin nitohuatamahuëꞌ, co onporontaꞌ nanpimiataramahuëꞌ. 54Insosona nonëhuë caꞌnëso pochin nipachinaꞌ, huënainëhuëntaꞌ oꞌorëso pochin nipachinaꞌ, nanpimiatarin. Ayaroꞌ tahuëri ananpitaantarahuë. 55Nonëhuë cosharo pochin niꞌton, achinicancanaranquëmaꞌ. Huënainëhuë paꞌsarin niꞌton, imapatamaco, anoyacancantaranquëmaꞌ. 56Tëhuënchachin nonëhuë caꞌnëso pochin nipatamaꞌ, huënainëhuëntaꞌ oꞌorëso pochin nipatamaꞌ, yaꞌcoancantaranquëmaꞌ niꞌton, imamiataramaco. 57Tatahuësoꞌ nanpimiatarin. Ina aꞌpaimarinco. Catahuarinco noya nanpicaꞌhuaso marëꞌ. Inapochachin imamiatohuatamaco, cosharo pochin achinicancanaranquëmaꞌ niꞌton, catahuaranquëmaꞌ Yosë nohuitatomaꞌ nanpimiatacaso marëꞌ. 58Ca cosharo pochinco. Inápa quëran oꞌmarahuë. Shimashonëmapita cosharoꞌ Yosëri aꞌpatimarinsoꞌ caꞌpirinahuëꞌ, iráca chiminpi. Nipirinhuëꞌ, imamiatohuatamaco, nanpimiataramaꞌ, itërin.
59Capinaomo niyontonpiso pëiquë aꞌchintaton naporin.
Quisoso natëhuatëhuaꞌ, nanpimiatacaso yaꞌhuërinsoꞌ
60Naꞌa piyapiꞌsaꞌ Quisoso imasapirinahuëꞌ, ina nanan natanahuatonaꞌ aꞌnaquën nisha yonquipi.
—Aꞌchininsoꞌ sacaiꞌ imacasoꞌ. ¿Incaricha nitotaton, natërëꞌpoya? nitopi.
61Napohuachinara, Quisoso inaora nitotaton, itërin:
—Aꞌchintopiranquëmahuëꞌ, ¿yaaꞌporamaco ti? 62Yosë quëran quëmapico niꞌto, aꞌna tahuëri Yosë yaꞌhuërinꞌpaꞌ panantararahuë. Ina niꞌpatamaꞌ ¿maꞌtaꞌ yonquiaramaꞌ? 63Ispirito Santoráchin ananpimiatarinquëmaꞌ. Piyapiꞌsaꞌ inahuara co nanitapihuëꞌ. Yosë yonquirinso chachin shaꞌhuitëranquëmaꞌ. Ina natëhuatamaꞌ, Yosë nohuitatomaꞌ nanpimiataramaꞌ. 64Nipirinhuëꞌ, aꞌnaquëmaꞌ co natëramacohuëꞌ, itërin. Iráca quëran huarëꞌ yaꞌipi piyapiꞌsaꞌ yonquirinsopita nitotërin. Aꞌnaquën co yanatëtopihuëꞌ. Aꞌnantaꞌ yashaꞌhuirapirin. Inapita nitotaton, napotërin. 65Ina quëran itantarin:
—Napoaton itaranquëmaꞌ. Co Yosëri anitotohuachinhuëꞌ, co insontaꞌ nanitarinhuëꞌ imaincosoꞌ, itërin.
66Naporo quëran huarëꞌ naꞌamiáchin co huachi imapihuëꞌ. Aꞌpopi huachi. 67Napohuachinara, caꞌtanoꞌsanënpitacoi itaponcoi:
—¿Co canpitasoꞌ aꞌpoapomacohuëꞌ to? itërincoi.
68—Co Sinioro aꞌpoarainquënhuëꞌ. Co aꞌna yaꞌhuërinhuëꞌ imacaꞌhuaisoꞌ. Quëma nóya aꞌchintarancoi Yosë nohuitatoi nanpimiataꞌhuaiso marëꞌ. 69Nani natërainquën. Quëmasoꞌ noyasáchin ninan. Yosë aꞌpaimarinquën, tënai, itërin Simon Pitrori.
70—Shonca catonquëmaꞌ acoranquëmaꞌ imacamacoso marëꞌ. Aꞌnaëmaso nipirinhuëꞌ, sopai pochin cancantërin, itërincoi. 71Simon huiꞌnin Cotasë Iscarioti itopiso yonquiaton, naporin. Inarintaꞌ caꞌtanpirinhuëꞌ, yashaꞌhuirapirin.
Currently Selected:
Juan 6: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.