Juan 13
13
Quisosori caꞌtanoꞌsanënpita paꞌmorantërinsoꞌ
1Aꞌna tahuëríchin pahuanarin Pascoa nanicasoꞌ. Naporoꞌ naniarin Quisoso chiminaton, Tata Yosëꞌpaꞌ panantacasoꞌ. Ina nitotërin. Caꞌtanoꞌsanënpitacoi naꞌcon nosororincoi. Chiminaquë huarëꞌ nosoromiatërincoi.
2Inaroꞌcoi coshatarai. Sopai huaꞌani nani Cotasë ayonquirin Quisoso shaꞌhuirapicaso marëꞌ. Simon Iscarioti huiꞌnin inasoꞌ. 3Quisososo nipirinhuëꞌ yaꞌipi nitotërin. Yosë yaꞌhuërin quëran nani oꞌmarin. Co huaꞌquiya quëranhuëꞌ naquëranchin inatohuaꞌ panantararin. Tata Yosëri chini chiníquën nanan quëtërin yaꞌipiya huaꞌanëntacaso marëꞌ. Inantaꞌ nitotaton, coshatasocoi, 4Quisoso misa quëran huanirin. Aipi aꞌmorinsoꞌ ocoirahuaton, paniocara masahuaton, nisoꞌnantërin. 5Ina quëran iꞌsha panticaquë oporahuaton, nantëhuëi paꞌmorantëraꞌpiarincoi. Aꞌnaya aꞌnaya paꞌmorantëatoncoi, paniocaraquë amirantërincoi.
6Simon Pitrontaꞌ yapaꞌmorantëpirinhuëꞌ, co nohuantërinhuëꞌ.
—Quëma Sinioro, ¿yapaꞌmorantëranco ti? itërin.
7—Maꞌmarësona napotaranquënsoꞌ, co ipora nitochátëraranhuëꞌ. Oshaquëran nitotaran, itërin.
8—Co onporontaꞌ casoꞌ paꞌmorantëarancohuëꞌ, itërin Pitrori.
—Co napotohuatënquënhuëꞌ, co ca pochin cancantaton imamiatarancohuëꞌ, itërin Quisosori.
9—Napoahuarëꞌ, ama Sinioro nantëhuërachin paꞌmotocosohuëꞌ. Imirahuë, motohuë, inapitantaꞌ yaꞌipi paꞌmotoco, itërin.
10—Co ina nohuantërëhuëꞌ. Nani amahuatëra, co huachi nëꞌhuëtërëhuëꞌ. Nantëichin paꞌmorëꞌ. Inapochachin nani anoyacancantëranquëmaꞌ. Ina piquëran co noyahuëꞌ nipatamaꞌ, inantaꞌ inquitaantaranquëmaꞌ. Ina quëran noya cancantaantaramaꞌ. Canpitasoꞌ noyápiachin cancantëramaꞌ. Aꞌnaichinquëmaꞌ co noyápiachin cancantërinhuëꞌ, itërin.
11Cotasëri yashaꞌhuirapirinsoꞌ ninoton, naporin. Napoaton “Aꞌnaichinquëmaꞌ co noyápiachin cancantërinhuëꞌ,” tënin.
12Nani yaꞌipicoi paꞌmorantëraꞌpiatoncoi, aꞌmoantarahuaton, huënsëantarin. Huënsëantarahuaton, aꞌchintërincoi.
—Maꞌtaꞌ tapo napotëranquëmasoꞌ iyaroꞌsaꞌ, ¿nitotëramaꞌ to? Ina aꞌchinchinquëmaꞌ. 13Canpitasoꞌ nontohuatamacora, “Maistro” itëramaco. “Sinioro” itëramaco antaꞌ. Noꞌtëquën yonquiatomaꞌ, napotëramaco. Canpita maistronëmaco mini. Sinioroco niꞌto, natëramaco. 14Canpita maistronëmaco niporahuëꞌ, paꞌmorantëranquëmaꞌ. Napoaton canpita capinintaꞌ ina pochachin cancantocoꞌ. 15Nani paꞌmorantëranquëmaꞌ nonanamacoso marëꞌ. Canpitantaꞌ ca pochin cancantatomaꞌ, ninosoroatomaꞌ nicatahuacoꞌ. 16Tëhuënchachin iyaroꞌsaꞌ patronsoꞌ chiníquën nanantërin. Piyapinënpitaso nipirinhuëꞌ co ina pochin chiníquën nanantopihuëꞌ. Comisionëontaꞌ co huaꞌanën pochin chiníquën nanantërinhuëꞌ. 17Nani nitotëramaꞌ ipora. Ca pochin nipatamaꞌ, nóya cancantaramaꞌ.
18“Co yaꞌipinquëmaꞌ noya cancantëramahuëꞌ. Shonca catoyaꞌpinquëmaꞌ huayonanquëmaꞌ caꞌtanamacoso marëꞌ. Yaꞌipinquëmaꞌ noyá nohuitëranquëmaꞌ. Yosë quiricanënquë iráca naporin: ‘Aꞌnaraꞌ carëꞌ coshataponahuëꞌ, inimicotarinco,’ tënin. Ipora huarëꞌ ina pochin nisarin. 19Apira nitotato, shaꞌhuitëranquëmaꞌ. Maꞌsha onpotohuachinaco, yonquiaramaꞌ. ‘Inasoꞌ tëhuënchachin Cristo niꞌton, ninorin,’ tosaramaꞌ. 20Noꞌtëquën shaꞌhuitëranquëmaꞌ. Carinquëmaꞌ aꞌparanquëmaꞌ piyapiꞌsaꞌ aꞌchintacamaso marëꞌ. Natëhuachinënquëmaꞌ, natëarinaco cantaꞌ. Aꞌparanquëmaꞌ niꞌton, natëinënquëmaꞌ. Insosona natëhuachinco, Yosëntaꞌ natëarin. Ina aꞌpaimarinco,” itërincoi.
Cotasëri shaꞌhuirapicasoꞌ ninorinsoꞌ
(Mateo 26.20-25; Marcos 14.17-21; Lucas 22.21-23)
21Naporoꞌ Quisoso sëtërin. Chiníquën sëtaton, co napion cancantërin.
—Noꞌtëquën shaꞌhuitëranquëmaꞌ. Shonca catonquëmaꞌ caꞌtanpiramacohuëꞌ, aꞌnayanquëmaꞌ shaꞌhuirapiarinco, itërincoi.
22Ina natanahuatoi, aꞌnaya aꞌnayacoi niniꞌnai. “¿Inquënpoacha yashaꞌhuirapirëhuaꞌ nicaya?” tënai, yonquiatoi. 23Casoꞌ Quisoso inchinanën quëran coshatërahuë. Naꞌcon nosororinco niꞌton, inaporahuë. 24Simon Pitro imirin quëran tasatahuatonco, “nataniquëꞌ: ¿Incaritaꞌ shaꞌhuirapiarin?” itërinco. 25Napotohuachincora, amasha yaꞌcarirahuato, natanahuë.
—¿Intaꞌ Sinioro yashaꞌhuirapirinquën? itërahuë.
26—Iso pan, nocaroquë iꞌshirahuato quëtarahuë. Insosona quëtohuato, ina shaꞌhuirapiarinco, itërinco. Ina quëran iꞌshirahuaton, Cotasë quëtërin. Simon Iscarioti huiꞌnin inasoꞌ. 27Ina maꞌpahuachina, sopairi yaꞌcoancantërin huachi. Naporoꞌ Quisosori itapon:
—Maꞌsona yaninansoꞌ manóton niquëꞌ, itërin.
28Napotërinsoꞌ natanpiraihuëꞌ, maꞌmarësona napotërinsoꞌ co nitotëraihuëꞌ. 29Cotasëri coriqui tanpanantëꞌ aꞌpairin niꞌton, maꞌsha pita tahuëri marëꞌ paꞌanapon aꞌpamara, topirinahuëꞌ aꞌnaquën. Saꞌahuaroꞌsaꞌ coriqui quëtacaso marëꞌ aꞌpamara, topirinahuëꞌ aꞌnaquëontaꞌ. 30Cotasëso nipirinhuëꞌ, cosharoꞌ quëtërinsoꞌ maꞌparahuaton, pipirin. Naporoꞌ nani tashirin.
Nasha pochin ninosorocasoꞌ pënëninsoꞌ
31Cotasë nani pipihuachina, Quisoso itantarincoi:
—Yosë quëran quëmapico niꞌto, apira noꞌtëquën Yosë natëarahuë. Napoaton nóya niꞌsarinco. Piyapiꞌsaꞌ niꞌpachinaco: “Ma noyacha Yosësoꞌ niꞌton, naꞌcon catahuarin paya,” tosapi. 32Ina huiꞌninco chachin niꞌton, piyapiꞌsaꞌ nitotatonaꞌ, naꞌcon naꞌcon Yosë yonquiapi. Ina quëran Yosë noya noya acoantarinco. Co huaꞌquiya quëranhuëꞌ inapotarinco. 33Huiꞌnahuëpita pochin niꞌpiranquëmahuëꞌ, co huachi huaꞌquiꞌ yaꞌhuapohuëꞌ. Yonípiramacohuëꞌ, intohuasoꞌ paꞌnahuëquë, co nanitaramahuëꞌ pacacamasoꞌ. Iꞌhua inachachin cotioroꞌsantaꞌ shaꞌhuitërahuë. 34Iporasoꞌ nasha pochin pënënaranquëmaꞌ noya ninosorocamaso marëꞌ. Carinquëma nosororanquëmaso pochachin, imaramacosopita capinintaꞌ ninosorocoꞌ. 35Ninosorohuatamaꞌ, tëhuënchachin imaramacosoꞌ nitotapi. “Quisoso imatonaꞌ, noya noya ninosoroapi,” tosapi, itërin.
Pitrori nonpinapicasoꞌ ninorinsoꞌ
(Mateo 26.31-35; Marcos 14.27-31; Lucas 22.31-34)
36Ina quëran Simon Pitrori itapon:
—¿Intohuataꞌ Sinioro paꞌsaran? itërin.
—Intohuasoꞌ paꞌpato, co ipora nanitëranhuëꞌ imaancosoꞌ. Aꞌna tahuëri imasaranco, itërin. 37—¿Onpoatontaꞌ Sinioro co apira nanitërahuëꞌ imaꞌhuanquënsoꞌ? ¡Imaranquën niꞌton, yatëpapirinacohuëntaꞌ, imamiataranquën! itërin.
38—Yatëpapirinënquënhuëntaꞌ, ¿imamiataranco ti? Noꞌtëquën shaꞌhuitaranquën. Ipora tashi chachin coꞌhuara atari përashatërasohuëꞌ, cararoꞌ nonpinapiaranco. “Co Quisoso nohuitërahuëꞌ,” tosaran, itërin Quisosori.
Currently Selected:
Juan 13: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.