Filipenses 3

Yosëri noya niꞌninsopita

1Iporasoꞌ iyaroꞌsaꞌ Quisocristo yonquiatomaꞌ, nóya cancantocoꞌ. Iráca quëran huarëꞌ inachachin inachachin pënënápiranquëmahuëꞌ, co amirahuëꞌ. Naquëranchachin natantahuatamaꞌ, yonquiantaramaꞌ. Ina quëran noya noya imasaramaꞌ, tënahuë. 2Aꞌnaquënsoꞌ nonpin nanan aꞌchinapi. “Co marca niacotohuatamahuëꞌ, co Yosë piyapinënquëmaꞌ nisaramahuëꞌ,” topi nonpinatonaꞌ. Niꞌnira pochin paꞌpi co noyahuëꞌ cancantatonaꞌ, napopi. Niꞌcona, nonpintochinënquëmaꞌ. Inapitasoꞌ co noyahuëꞌ nisapi. 3Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ. 4“Moisësë pënëntërinsoꞌ noꞌtëquën natërahuë niꞌton, Yosë noya niꞌsarinco,” topi aꞌnaquën. Caso nipirinhuëꞌ naꞌcon naꞌcon natërahuë. Ina marëꞌ Yosë nichaꞌërinpoaꞌ naporini, ca noya noya chaꞌëitohuëꞌ. 5Casoꞌ Israiro piyapico. Mincamin huënton quëmapico. Posa tahuëritahuasoꞌ, marca acotërinaco. Tatahuë, mamahuë Israiro piyapiráchin. Co nishahuëꞌ. Israiro huaꞌan yaꞌconahuë, parisioroꞌsaꞌ itopisoꞌ. Yaꞌconato, yaꞌipi Moisësë pënëntërinsoꞌ imarahuë. 6Inasáchin imato, Quisocristo imapisopita chiníquën aparisitërahuë. “Iráca pënëntërinsoꞌ noꞌtëquën natërahuë,” taꞌto, noya piyapico, topirahuëꞌ. 7Ina marëꞌ Yosë noya niꞌsarinco, tënahuë iráca. Iporaso nipirinhuëꞌ iráca yonquirahuësoꞌ aꞌporahuë Quisocristo imacaꞌhuaso marëꞌ. 8Ina naꞌcon naꞌcon nohuantato, inasáchin yonquirahuë. Iráca cotioroꞌsaꞌ noya niꞌninaco. Huaꞌanoꞌsaquë huarëꞌ noya niꞌpirinacohuëꞌ, Quisocristo imapatëra, aꞌporinaco. Noꞌhuipirinacohuëꞌ, co ina yonquirahuëꞌ. Iráca yonquirahuësoꞌ amoro pochin nicato, co piꞌpisha tërantaꞌ nohuantërahuëꞌ. Quisocristo nohuitaꞌhuasoráchin nohuantërahuë. Ina nohuitacasoꞌ noya noya, tënahuë. Inasáchin huaꞌanëntërinco. 9Quisocristoíchin imasarahuë huachi. Co caora noya nicato chaꞌërahuëꞌ. Co pënëntërinsoꞌ natëto, chaꞌërahuëꞌ. Quisocristoíchin anoyacancantërinco, taꞌto, ina imarahuë. Imapatora, oshanëhuë inquitatonco, anoyacancantërinco. Ina quëran Yosë catahuarinco noya nicaꞌhuasoꞌ. Ina marëꞌ noya niꞌninco. 10Aquë aquëtëꞌ Quisocristo yanohuitërahuë. Iráca nanpiantarahuaton, chini chiníquën nanantërin. Yaꞌipi nanitaparin niꞌton, catahuaincosoꞌ nohuantërahuë. Noya noya nicaꞌhuaso marëꞌ catahuainco, tënahuë. Iráca Yosë natëton, parisitërin. Canpoa marëꞌ chiminin. Iporasoꞌ cantaꞌ aparisitopirinacohuëꞌ, Quisocristo pochin Yosë natëi. Chimininso pochin yaꞌipi co noyahuëꞌ yonquirahuësoꞌ naniantato, noyápiachin cancanchi, tënahuë. 11Ina pochin cancantato, imamiachi aꞌna tahuërintaꞌ ananpitaantaincoso marëꞌ.

Chini chiníquën imacaisoꞌ yaꞌhuërinsoꞌ

12Co yaꞌipi cancanëhuë quëran noya noya cancanchatërarahuëꞌ. Ipora huantaꞌ piꞌpian piꞌpian co noyahuëꞌ yonquirahuë. Co Yosë pochachin cancantopirahuëꞌ, Quisocristo nani acorinco ina pochin cancantaꞌhuaso marëꞌ. Napoaton nani tahuëri yonquiárahuë noya noya nicaꞌhuaso marëꞌ. 13Co iyaroꞌsaꞌ Yosë pochachin cancanchatërarahuëꞌ. Nipirinhuëꞌ, inasáchin nohuantërahuë. Iꞌhua naporahuësopita naniantërahuë. Iporasoꞌ chiníquën Yosë imasarahuë noya noya cancantaꞌhuaso marëꞌ. 14Co nisha nisha yonquirahuëꞌ. Quëmapiꞌsaꞌ nicanatonaꞌ taꞌapiso pochin cancantato, Quisocristoíchin yonquiárahuë ina pochin cancantaꞌhuaso marëꞌ. Nani tahuëri nani tahuëri napoarahuë. Ina quëran aꞌna tahuëri Yosëꞌpaꞌ cancontahuato, noya niꞌsarinco. Quisocristo anoyacancantërinco niꞌton, inápaquë quëpantarinco.

15Yaꞌipi Yosë imarëhuasopita chinoton pochin cancantohuatëhuaꞌ, ina pochin yonquiarëhuaꞌ. Nisha yonquihuatëhuaꞌ, Yosë anitotarinpoaꞌ. “Catahuaco noꞌtëquën yonquiꞌi,” itohuatëhuaꞌ, anitotarinpoaꞌ. 16Anitotohuachinpoaꞌ, ama topinan quëran natahuansohuëꞌ. Naꞌcon yonquiaꞌahuaꞌ natëcaso marëꞌ. Yaꞌipi cancanënpoa quëran huarëꞌ imahuaꞌ.

17Yaꞌipinquëmaꞌ iyaroꞌsaꞌ nonanco. Nicatahuacoꞌ ca pochachin imacamaso marëꞌ. Aꞌnaquën nani quiya pochin cancantapi. Inapitantaꞌ nicatomaꞌ, nonancoꞌ. 18Aꞌnaquënso nipirinhuëꞌ “Yosë imarahuë,” taponaraihuëꞌ, co noyahuëꞌ cancantopi. Quisocristo oshanënpoaꞌ inquitinpoaso marëꞌ corosëquë chiminin. Nipirinhuëꞌ, co inapitasoꞌ ina yonquipihuëꞌ. Ina nanan aꞌchinpatora, noꞌhuitopi. Iporantaꞌ inapita yonquiato, chiníquën sëtato, naꞌnërahuë. Co inapita nonanacasoꞌ yaꞌhuërinhuëꞌ. 19Inapitasoꞌ co Quisocristo nanamën imapihuëꞌ. Maꞌsona tërantaꞌ yanipachinara, nipi. Ina marëꞌ tapanacasoꞌ yaꞌhuëpirinhuëꞌ, co tapanpihuëꞌ. “Nohuantato, napoarahuë,” toconpi. Isoroꞌpaquë yaꞌhuërinsopitaráchin yonquipi. Aꞌna tahuëri pënquë parisitomiatapi. 20Canpoaso nipirinhuëꞌ, inápaquë yaꞌhuërinsoꞌ naꞌcon naꞌcon yonquiaꞌahuaꞌ. Inatohuaꞌ yaꞌhuëmiatarihuasoꞌ. Sinioro Quisocristo nichaꞌërinpoaꞌ niꞌton, ina ninarëhuaꞌ. Aꞌna tahuëri inápa quëran oꞌmantararin. 21Iporasoꞌ nonënpoaꞌ co chinirinhuëꞌ. Yacaniorëhuaꞌ. Chiminacasoꞌ yaꞌhuërin. Nipirinhuëꞌ, Quisocristo oꞌmantahuachin, nonënpoaꞌ anishatarin. Ina pochachin yaꞌnoarihuaꞌ. Nanitaparin niꞌton, yaꞌipi minsërahuaton, ananpitomiatarinpoaꞌ, noya noya acoarinpoaꞌ.

Currently Selected:

Filipenses 3: cbt

Highlight

Copy

Compare