Miqueas 5
5
1Naquëranchin Sinioro taantarin:
“Iporaso napoaponahuëꞌ, Quirosarinquë yaꞌhuëramasopita,
inimiconëma chinitamaso yonquicoꞌ.
Inapitaso huëꞌsahuatonaꞌ, ninanonëma tancapitopi.
Inapitari Israiro copirno chiníquën anaꞌintaponaꞌ,” tënin.
Tapi shiin huaꞌanëntacaso shaꞌhuirinsoꞌ
2Naquëranchin Sinioro taantarin:
“Pirin ninanosoꞌ, Iporata itopi antaꞌ.
Inasoꞌ ninanoꞌ, aꞌnapita ninanoroꞌsa Cota huëntonquë yaꞌhuërin quëran
nani naniaꞌhuaya.
Ina niponahuëꞌ, yaꞌipi israiroꞌsa huaꞌanëntacaso marëꞌ
inaquë aꞌnara copirno nasitapon.
Ina shimashonënpitasoꞌ, iráca quëran huarëꞌ yaꞌhuëpi,” tënin.
3Napoaton ipora tananpitopirinpoahuëꞌ, co huaꞌqui napotarinpoahuëꞌ.
Sanapi cayorin quëran huaꞌhuin nasitaquë huarëꞌ
parisirinso pochin canpoanta parisiarëhuaꞌ.
Naporoꞌ quëparitërëhuasopitasoꞌ,
inimicoroꞌsari quëparinsopitarëꞌquënpoa aꞌna huëntoíchin niantarihuaꞌ.
4Ina copirno huaꞌanëntohuachinpoasoꞌ, ohuicaroꞌsa huaꞌanëni aꞌpaiaton
noya quëparinso pochin nitarinpoaꞌ.
Sinioroso Yosënën niꞌton, inari chiníquën nanan quëtapon.
Naporahuaton noya noya huaꞌanëntacaso catahuapon.
Naporoꞌ israiroꞌsanpoasoꞌ, sano cancantarihua huachi.
Sinioronta yaꞌipi isoroꞌpaquë yaꞌhuëpisopitari
tëꞌhuatatona natëpona niꞌton, napoarihuaꞌ.
5-6Ina nohuanton yaꞌipi parti sano yaꞌhuarihua huachi.
Naporoꞌ asiriaroꞌsa huëcapairahuatënënpoaꞌ,
noyápiachin pëinënpoapitaquë yaꞌcontaponënpoaꞌ.
Inapotohuachinënpoa canpoantaꞌ, nanirinso chachin huaꞌanoꞌsaꞌ,
sontaroꞌsaꞌ, inapita aꞌpatarihuaꞌ. Asiriaroꞌsa ahuëcaiso marëꞌ napoarihuaꞌ.
Inapitari asiriaroꞌsa minsërahuatona nichaꞌësarinpoaꞌ.
Naporoꞌ huaꞌanoꞌsa aꞌparëhuasopitasoꞌ, inatohua huaꞌanëntaponaꞌ.
Ina noꞌpa chachin Nimorotontaꞌ, iráca huaꞌanëntërin.
7Naporoꞌ aꞌnapitaso nisha nisha nacionquë quëpapirinahuëꞌ,
yaꞌhuëhuanoꞌsa ahuëaponaꞌ.
Oꞌnan, poroncayo, inapitaso
co piyapiꞌsa nohuantaiquë huarëꞌ anotërinhuëꞌ.
Siniorori aꞌpaimahuachina anotërin.
Inapochachin inapitantaꞌ, yaꞌhuëhuanoꞌsa ahuëatona napotaponaꞌ.
8Naporoꞌ aꞌnapitanta
nisha nisha nacionquë yacapatapirinahuëꞌ,
paꞌpiniꞌ pochin nicaponaꞌ.
Yaꞌipi maꞌsharoꞌsa quëran paꞌpinisoꞌ, chini chiníquën ninin.
Inapochachin inapitanta nicaponaꞌ.
Paꞌpiniri ohuicaroꞌsa yaꞌcontaton, tiquirinso pochin
co aꞌnaya tëranta nichaꞌëponahuëꞌ.
9Ina quëran Sinioro nontato:
“Ina pochin mini Sinioro.
Quëmari inimiconënpita ahuëaton ataꞌhuantaran,” itërahuë.
10Naquëranchin Sinioro taantarin:
“Ina tahuëri nanihuachin,
ahuëtamaso marëꞌ cahuarioroꞌsa yaꞌhuëtërinquëmasopita tiquiapo.
Quira toronanoꞌsanta yaꞌhuëtërinquëmasoꞌ, ataꞌhuantarahuë.
11Ninanonëmapita ataꞌhuantarahuë.
Noyá niacorapipiramahuëꞌ, inapotarahuë.
12Pënotatoma naporamasopitantaꞌ, acopitarahuë.
Ninotonaꞌpiroꞌsantaꞌ, co huachi yaꞌhuëtarinquëmahuëꞌ.
13Mamanshinëmapita ataꞌhuantarahuë.
Naꞌpiroꞌsanta moshacamaso marëꞌ acoramasopita, inapotarahuë.
Inapitasoꞌ canpitaora chachin nicapomarahuëꞌ, mosharamaꞌ.
14Chinotacamaso marëꞌ nararoꞌsanta acoramasoꞌ,
huaꞌtahuatë tëꞌyatërëso pochin nitarahuë.
Ninanonëmapitantaꞌ, ataꞌhuantarahuë.
15Nacionoꞌsantaꞌ co natërinacosopitahuëꞌ,
paꞌpi noꞌhuitato iꞌhuërëtarahuë,” tënin.
Currently Selected:
Miqueas 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
