Mateo 6

Aꞌnapita catahuacasoꞌ yaꞌhuërinsoꞌ

1Naquëranchin Quisoso pënëntaantarin:

“Aꞌnaquënsoꞌ piyapiꞌsari noya nicacaiso marëꞌ noya Yosë imapisopita pochin yaꞌnopirinahuëꞌ, co tëhuënchachin cancanëna quëran huarëꞌ Yosë yonquipihuëꞌ. Ina pochin nipatamaꞌ, co inápaquë Tata Yosë acanaarinquëmahuëꞌ. Ama iyaroꞌsaꞌ inapita pochin nicosohuëꞌ. 2Maꞌsha saꞌahuaroꞌsaꞌ quëtohuatamaꞌ, ama aꞌninquëchin quëtocosohuëꞌ. Aꞌnaquën niyontonpiso pëiquë yaꞌconahuatonaꞌ, coriqui saꞌahuaroꞌsa marëꞌ quëtopirinahuëꞌ, aꞌninquëchin quëtopi. ‘Ina marëꞌ noya niꞌsarinacoi,’ taꞌtonaꞌ, napopi. Cachiquëntaꞌ coriqui quëtopi piyapiꞌsari nicacaiso marëꞌ. Co tëhuënchachin nosoroaponaraihuëꞌ, napopi. Piyapiꞌsarisoꞌ noya niꞌpirinahuëꞌ, Yosërisoꞌ co noyahuëꞌ niꞌnin. Co inápaquë acanaarinhuëꞌ, tënahuë. 3Canpitaso nipirinhuëꞌ, saꞌahuaroꞌsaꞌ maꞌsha quëtohuatamaꞌ, ama aꞌninquëchin quëtocosohuëꞌ. Ama nipayaramaso tërantaꞌ shaꞌhuitocosohuëꞌ. 4Co piyapiꞌsaꞌ nitotopirinahuëꞌ, Tata inápaquë yaꞌhuërinsoꞌ niꞌsarinquëmaꞌ. Ina acanaarinquëmaꞌ,” itërin.

Yosë nontacasoꞌ aꞌchininsoꞌ

(Lucas 11.2-4)

5Ina quëran itaantarin:

“Yosë nontohuatamaꞌ, ama nonpinaꞌpiroꞌsa pochin nicosohuëꞌ. Inapitasoꞌ niyontonpiso pëiquë huanirahuatonaꞌ, naꞌcon Yosë nontopirinahuëꞌ, co cancanëna quëran huarëꞌ nontopihuëꞌ. Cachiquëntaꞌ aꞌninquëchin Yosë nontopirinahuëꞌ, piyapiꞌsari noya nicacaiso marëꞌ napopi. Co tëhuënchachin Yosë yonquipihuëꞌ. Piyapiꞌsari noya niꞌpirinahuëꞌ, Yosërisoꞌ co acanaarinhuëꞌ. 6Canpitaso nipirinhuëꞌ Yosë yanontohuatamaꞌ, canpitaoráchin onpopiyanquë tërantaꞌ Yosë nontacasoꞌ yaꞌhuërin. Quëmaoraíchin Yosë nontëquëꞌ. Co quënanpiranhuëꞌ, nataninquën. Co piyapiꞌsaꞌ natanpirinënquënhuëꞌ, Yosësoꞌ noya natanatënquën, acanaarinquën.

7Yosë nontohuatamaꞌ, ama inachin inachin nontocosohuëꞌ. Co Yosë imapisopitahuëꞌ ina pochin yonquipi. ‘Huaꞌquiꞌ nontohuato, natanatonco catahuarinco,’ topirinahuëꞌ. Co Yosë nohuitatonahuëꞌ, napopi. 8Ama inapita pochin cancantocohuëꞌ. Coꞌhuara Yosë nonchátërasënquëmahuëꞌ, yaꞌipi pahuantërinquëmasopita nitotërin. 9Napoaton Yosë yanontohuatamaꞌ, iso pochin nontocoꞌ:

‘Tata Yosë, quëmaso inápaquë yaꞌhuaponahuëꞌ, natanancoi.

Quëmasáchin noya noyanquën niꞌton, yaꞌipi piyapiꞌsaꞌ chinochinënquën.

10Chini chiníquën nanantëran niꞌton, yaꞌipicoi natëiinquën.

Inápaquë noꞌtëquën natërinënquënso pochachin

catahuacoi quëma nohuantëransoráchin nii.

11Nani tahuëri catahuacoi cosharoꞌ yaꞌhuëchincoi.

12Co noyahuëꞌ nicatoi, oshahuanai. Nosoroatoncoi, oshanëhuëi inquitocoi.

Aꞌnapita maꞌsha onpotohuachincoi, nanan anoyatëraiso pochachin

oshanëhuëi inquitatoncoi, anoyacancantocoi.

13Co noyahuëꞌ yonquihuatoi, catahuacoi aꞌnaroáchin nanianchii.

Catahuacoi ama sopai minsëincoisohuëꞌ. [Quëmasáchin huaꞌanëntarancoi. Yaꞌipi nanitaparan. Ipora quëran huarëꞌ yaꞌipiya natëinënquën. Amen,]’ itocoꞌ Yosë nontohuatamaꞌ.

14Aꞌnaquën maꞌsha onpotopirinquëmaontaꞌ, noya nontacasoꞌ yaꞌhuërin. Nanan anoyatohuatamaꞌ, Tata Yosëntaꞌ canpita oshanëmaꞌ inquitarinquëmaꞌ. 15Co nanan anoyatohuatamahuëꞌ, Yosëntaꞌ co oshanëmaꞌ inquitarinquëmahuëꞌ,” itërin Quisosori.

Co coshatatonaraihuëꞌ, Yosë nontopisoꞌ

16Ina quëran itaantarin:

“Ama nonpinaꞌpiroꞌsa pochin nicosohuëꞌ. Aꞌnaquën Yosë nontacaso marëꞌ yaꞌipi tahuëri co mantaꞌ coshatërinhuëꞌ. Naporahuaton, co nitapamantarinhuëꞌ. Sëtërëso pochin yaꞌnorin aꞌnapita nitotacaiso marëꞌ. Co cancanën quëran chinotaponahuëꞌ, aꞌnapitari nicacaiso marëꞌ naporin. Niꞌpachinara: ‘Ma noya Yosë chinotërin,’ topi. Piyapiꞌsari noya niꞌpirinahuëꞌ, co huachi Yosëri acanaarinhuëꞌ. 17Canpitaso nipirinhuëꞌ Yosë nontacaso marëꞌ co coshatohuatamahuëꞌ, ama piyapiꞌsaꞌ shaꞌhuitocosohuëꞌ. Noya ihuiantahuatomaꞌ, nitapacoꞌ. 18Ama aꞌnapita nitotacaiso marëhuëꞌ inapocoꞌ. Tata Yosëíchin nitotarin. Co quënanpirëhuahuëꞌ, yaꞌipiya niꞌsarinpoaꞌ. Ina marëꞌ inápaquë acanaarinquëmaꞌ,” itërin.

Canamiatërëhuasoꞌ

(Lucas 12.33-34)

19Ina quëran itaantarin:

“Ama iyaroꞌsaꞌ maꞌsharáchin yonquicosohuëꞌ. Ama naꞌcon coriqui, maꞌsha, inapita yontoncosohuëꞌ. Isoroꞌpaquë yaꞌipi maꞌsha aꞌnaroáchin mocarin, chanatërin. Noꞌsoni pëꞌyarin. Chiꞌchirotërin. Ihuatëroꞌsaꞌ yaꞌconatonaꞌ, ihuarinënpoaꞌ. Naporin. Napoaton, isoroꞌpaquë yaꞌhuërinsopita co yaꞌhuëmiatërinhuëꞌ. 20Inápaquë yaꞌhuërinsopitaso nipirinhuëꞌ, yaꞌhuëmiatarin. Yosë naꞌcon yonquiatomaꞌ, noya nicoꞌ. Ina marëꞌ naꞌcon sacatocoꞌ inápaquë acanamiachinquëmaꞌ. Inatohuaꞌ co mantaꞌ mocaponhuëꞌ. Co noꞌsoni pëꞌyaponhuëꞌ. Co chiꞌchirotaponhuëꞌ. Co ihuatëroꞌsaꞌ yaꞌconatonaꞌ ihuaponënpoahuëꞌ. Napoapon. 21Maꞌsharáchin nohuantohuatamaꞌ, co Yosë yonquiaramahuëꞌ. Nipirinhuëꞌ Yosë naꞌcon naꞌcon nohuantohuatamaꞌ, ina naꞌcon naꞌcon yonquiaramaꞌ,” tënin Quisoso.

Nitapicancaninsoꞌ

(Lucas 11.34-36)

22-23Ina quëran aꞌchintaantarin:

“Yaꞌpiranpo quëran maꞌsha quënanëꞌ. Co pëtorayatohuatërahuëꞌ, noya niꞌtërëꞌ. Nitapirayahuatëra, co mantaꞌ quënantërëhuëꞌ. Canpitantaꞌ yaꞌipi cancanëma quëran Yosë yonquihuatamaꞌ, tahuëri pochin cancantaramaꞌ. Nipirinhuëꞌ, maꞌsharáchin yonquihuatamaꞌ, tashi pochin cancantaramaꞌ. Nitapicancanpatamaꞌ, aquë aquëtë co noyahuëꞌ cancantarama huachi,” itërin.

Coriquiráchin yonquipisopita

(Lucas 16.13)

24Ina quëran itaantarin:

“Aꞌna piyapi catoꞌ patron yaꞌhuëtohuachina, nisha nisha camaitopi niꞌton, co nanitërinhuëꞌ cato chachin natëcasoꞌ. Aꞌnasoꞌ nohuantaton, noya natëarin. Aꞌnaso nipirinhuëꞌ co onpopinchin nohuantatonhuëꞌ, co natëarinhuëꞌ. Inapochachin canpitantaꞌ coriquiráchin cancantohuatamaꞌ, co nanitaramahuëꞌ Yosë natëcamasoꞌ,” tënin.

Yosë noya aꞌpairinpoasoꞌ

(Lucas 12.22-31)

25Ina quëran itaantarin:

“Aꞌnaquënsoꞌ maꞌsharáchin yonquipi. Capacaisoꞌ, oꞌocaisoꞌ, aꞌmocaisoꞌ, inasáchin yonquipi. ‘Nani maꞌsha yaꞌhuëtohuachinco, nóya yaꞌhuarahuë huachi,’ topirinahuëꞌ. Ama iyaroꞌsaꞌ ina pochin cancantocosohuëꞌ. Co capacaso marëáchin isoroꞌpaquë acorinpoahuëꞌ. Aꞌmocasontaꞌ, co onpopinchin yonquicaso yaꞌhuërinhuëꞌ. Yosë naꞌcon naꞌcon yonquihuatëhuaꞌ, catahuarinpoa noya yaꞌhuëcasoꞌ. 26Niꞌcoꞌ. Inairaroꞌsaꞌ co mantaꞌ shaꞌpihuëꞌ. Co maꞌsha shaꞌpisoꞌ macatonaꞌ, pëinënaquë acopihuëꞌ. Napoaponahuëꞌ, Tata Yosëri catahuarin. Ina nohuanton, cosharoꞌ quënanpi. ¡Canpitasoꞌ inapita quëran noya noya niꞌninquëmaꞌ! 27Chiminacaso nanihuachin co napion ancantopiramahuëꞌ, co aꞌna tahuëri tërantaꞌ nanitaramahuëꞌ anaꞌhuëcamasoꞌ.

28Nitapacamasontaꞌ, co aquëtë yonquicamaso yaꞌhuërihuëꞌ. Niꞌcoꞌ. Yancoroꞌsaꞌ topinan noya papotopi. Co sacatopihuëꞌ. Co mantaꞌ aꞌmocaiso nipihuëꞌ. Nipirinhuëꞌ, noyápiachin yancotopi. 29Iráca copirno Saromon nani maꞌsha yaꞌhuëtërin. ‘¡Ma noyápiachincha aꞌmorin paya!’ topi. Yancoroꞌsaso nipirinhuëꞌ, ina quëran noya noya yaꞌnopi. 30Pacatoro quëran huarëꞌ Yosëri yonquirin. Aꞌna tahuëríchin yaꞌhuëpirinhuëꞌ, ahuipachina, ahuiquitërë huachi. Co huaꞌquiꞌ yaꞌhuëpirinhuëꞌ, Yosëri yonquirin. Ina nohuanton, noya papotërin. Canpitasoꞌ ina quëran naꞌcon naꞌcon yonquirinquëmaꞌ. ¿Onpoatomataꞌ nipachin, co natëramahuëꞌ? ‘Yosë catahuarinco mini,’ taꞌcaso nipirinhuëꞌ. 31Ama maꞌsha yonquiatomaꞌ, paꞌyancosohuëꞌ. ‘¿Maꞌcha caꞌnëꞌpoya? ¿Maꞌcha oꞌorëꞌpoya? ¿Maꞌcha aꞌmorëꞌpoya?’ ama tocosohuëꞌ. 32Co Yosë imapisopitahuëꞌ ina pochin yonquipi. Maꞌsharáchin yonquipi. Canpitaso nipirinhuëꞌ tatanëmaꞌ inápaquë yaꞌhuërinsoꞌ yonquirinquëmaꞌ. Yaꞌipi pahuantërinquëmasopita nani nitotërin. 33Napoaton Yosë naꞌcon naꞌcon yonquicoꞌ. Aꞌnapitantaꞌ catahuacoꞌ huaꞌanëntërinquë yaꞌconacaiso marëꞌ. Yosë nontocoꞌ noyasáchin yonquicamaso marëꞌ. Ina pochin cancantohuatamaꞌ, catahuarinquëmaꞌ. Ina nohuanton, maꞌsha pahuantërinquëmasopita yaꞌhuëtarinquëmaꞌ. 34Napoaton ama tashiraya maꞌsha onpoamasoꞌ yonquiatomaꞌ, paꞌyancosohuëꞌ. Tashirayantaꞌ maꞌsha onpohuatamaꞌ, paꞌyanacaso yaꞌhuapon niꞌton, co ipora quëranchin ina yonquiatoma co napion ancantápamaso yaꞌhuërinhuëꞌ,” tënin Quisoso.

Currently Selected:

Mateo 6: cbt

Highlight

Copy