Mateo 25

Sanapi nipayarinsopita

1Naquëranchin Quisosori pënëantarin:

“Yosë huaꞌanëntërinsoꞌ aꞌchintantaꞌinquëmaꞌ, noya natanco. Huaꞌan saꞌarinso pochin ninin. Inaso aquë quëran huëꞌsarin. Onporosona canquicasoꞌ co nitotopihuëꞌ. Tahuëri nanihuachina, sanapi nipayarinsopita ninarapi huaꞌan huëcacasoꞌ. ‘Huaꞌqui quëran canquipon nimara,’ taꞌtonaꞌ, shonca nanoꞌsaꞌ nanparinënarë chachin ninarapi. 2-4Aꞌnatërápo sanapiíchin noya yonquipi. Quirosin pochin orotërinsoꞌ taꞌpantatonaꞌ, mëntaiquë huarëꞌ quëpapi. Naporahuatonaꞌ, aꞌnaya aꞌnaya potiriaquë quëpapi. Aꞌnatërápo sanapiꞌsaso nipirinhuëꞌ co yonquiatonahuëꞌ, co aquëtëꞌ quëpapihuëꞌ. 5Huaꞌan huaꞌquirin niꞌton, tashitopi. Yahuëꞌëtonaꞌ, yaꞌipimiáchin huëꞌëpi. 6Huëꞌësoiꞌ, yono tashiꞌ aꞌnanaya chiníquën noninsoꞌ natanpi. ‘¡Maꞌtana, huëꞌsarin huachi! ¡Huënsëcoꞌ paꞌahuaꞌ nacapiaꞌahuaꞌ!’ nitopi. 7Aꞌnaroáchin shonca nanoꞌsa chachin capayatahuatonaꞌ, nanparinënapita taparapi noya orotacaso marëꞌ. 8Noya yonquirinsopitasoꞌ taꞌpantohuachinara, noya orotërin. Aꞌnapitaso nipirinhuëꞌ iꞌchinpitopirinahuëꞌ, yatacopiconpi. Napohuachinara: ‘Taꞌpantocoi quiyantaꞌ iꞌchinpiꞌi. Nani quiyasoꞌ tacopiarin,’ topirinahuëꞌ. 9‘Coꞌchi nanitëraihuëꞌ taꞌpantaꞌhuainquëmaso paya. Inapohuatoi, co huachi quiyantaꞌ orotarinhuëꞌ. Yaꞌipinpoaꞌ tacopianarihuaꞌ. Manóton paatomaꞌ, paꞌanconcoꞌ,’ itopi. 10Napotohuachinara, aꞌnatërápo chachin manotona paꞌpi quirosin pochin nininsoꞌ paꞌanaponaꞌ. Paꞌpirinahuëꞌ, coꞌhuara huëntayátërasoihuëꞌ, huaꞌan canquirin. Aꞌnatërápo nanoꞌsaꞌ noya yonquirinsopitasoꞌ imatonaꞌ, pëiquë yaꞌconpi. Inaquë saꞌacaso marëꞌ pita nisapi. Nani yaꞌconpachinara, oncotopi. 11Ina quëran co yonquirinsopitasohuëꞌ huënantatonaꞌ: ‘¡Iꞌsoatocoi sinioro quiyantaꞌ yaꞌcoin!’ itopirinahuëꞌ. 12Huaꞌani co nohuantërinhuëꞌ. ‘Co canpitasoꞌ piyapinëhuëpitanquëmahuëꞌ. Co nohuitëranquëmahuëꞌ,’ taꞌton co ayaꞌconinhuëꞌ.

13Napoaton canpitantaꞌ noya yonquiatomaꞌ, oꞌmantaꞌhuasoꞌ tahuëri ninacoꞌ. Onporosoꞌ nanipon nimara, co nitotëramahuëꞌ. Niꞌcona patontatënquëmaꞌ,” itërin.

Canacaso marëꞌ coriqui quëtërinsoꞌ

(Lucas 19.11-27)

14Ina quëran itaantarin: “Isontaꞌ iyaroꞌsaꞌ aꞌchinchinquëmaꞌ Yosë huaꞌanëntërinsoꞌ nitotamaso marëꞌ. Aꞌna quëmapi aquë yapaꞌsarinso pochin ninin. Yapaꞌpachina, inpriatonënpita amatërin camaicaso marëꞌ. Huëꞌpachinara, itapon: ‘Aquë paꞌpato, oshaquëran huënantarahuë. Inatohuaꞌ yaꞌhuasoco, noya sacatocoꞌ. Apira coriqui quëchinquëmaꞌ ina quëran naꞌcon naꞌcon canacaꞌhuaso marëꞌ. Maꞌsha paꞌanatomaꞌ, oshaquëran anaꞌatocoꞌ,’ itërin. 15Itahuaton, aꞌnaya aꞌnaya quëtëraꞌpiarin. Co napopianachin quëtërinhuëꞌ. Nanitinpichin tantiaton, nisha nisha quëtërin. Aꞌnasoꞌ aꞌnatërápo huaranca coriqui oro quëran nininsoꞌ quëtërin. Aꞌnasoꞌ cato huaranca quëtërin. Aꞌnantaꞌ huaranca quëtërin. Nani inpriatonënpita quëtahuaton, paꞌnin huachi. 16Aꞌnatërápo huaranca maꞌpatonaꞌpisoꞌ aꞌnaroáchin natërin. Paaton, naꞌa maꞌsha paꞌanin. Ina quëran inapita paꞌanaton, naꞌcon naꞌcon coriqui canarin. Nani tahuëri inapoaton, oshaquëran aꞌnatërápo huaranca aquëtëꞌ canaantarin. 17Cato huaranca quëtërinsontaꞌ noya sacatërin. Inantaꞌ maꞌsha paꞌanahuaton, cato huaranca aquëtëꞌ canantarin. 18Huaranca maꞌparinsosoꞌ nipirinhuëꞌ, co yanatërinhuëꞌ. Noꞌpaquë ihuatahuaton, coriquinën paꞌpitërin inaquë tapacaso marëꞌ.

19Huaꞌqui quëran huaꞌanëna huënantarahuaton, inpriatonënpita amataantarin nontacaso marëꞌ. 20Aꞌnatërápo huaranca maꞌpatonaꞌpiso huëꞌsahuaton, coriqui aꞌnotiirin. ‘Niꞌquëꞌ sinioro, aꞌnatërápo huaranca quëtopirancohuëꞌ, ina quëran aꞌnatërápo huaranca aquëtëꞌ nani canarahuë,’ itiirin. 21‘¡Ma noyacha sacatëran paya! Natëranco niꞌquëhuarëꞌ, chiníquën nanan quëchinquën naꞌcon huaꞌanëntamaso marëꞌ. Pëinëhuëquë huëquëꞌ, noya cancantahuaꞌ,’ itërin huaꞌanëni. 22Ina quëran aꞌnantaꞌ huëꞌnin: ‘Niꞌquëꞌ sinioro, cato huaranca quëtopirancohuëꞌ, nani cato huaranca aquëtëꞌ canarahuë,’ itiirin. 23‘¡Ma noyacha quëmantaꞌ sacatëran paya! Natëranco niꞌquëhuarëꞌ, nanan quëchinquën naꞌcon huaꞌanëntacaso marëꞌ. Pëinëhuëquë huëquëꞌ, noya cancantahuaꞌ,’ itërin inantaꞌ huaꞌanëni.

24Piquëran quëtërinsoso nipirinhuëꞌ, huëꞌsahuaton itiirin: ‘Quëmasoꞌ sinioro co nosororancoihuëꞌ. Co quëmaora shacaponahuëꞌ, nitërinsoꞌ manan. Co sacataponahuëꞌ, canaran. 25Napoaton tëꞌhuatatënquën, co sacatërahuëꞌ. Coriqui quëtërancosoꞌ acoporoquë poꞌorahuë. Maꞌtana yaꞌhuarin,’ itahuaton, coriqui aꞌnotërin. 26Napotohuachina, co noya niꞌninhuëꞌ. ‘Quëmasoꞌ co noyanquënhuëꞌ. Chiroton, co natërancohuëꞌ. Co noꞌtëquën yonquiranhuëꞌ. “Co sacataponahuëꞌ canaran,” ¿itëranco ti? 27¿Onpoatontaꞌ nipachin, co bancoquë acoranhuëꞌ? Inaquë acoran naporini, piꞌpian tërantaꞌ canaitohuëꞌ,’ itërin. 28Ina quëran aꞌna piyapinën shaꞌhuitërin. ‘Iso quëmapi topinan quëran coriqui quëtërahuë. Osërëtahuaton, pasoꞌ quëmapi naꞌcon naꞌcon canarinsoꞌ, quëtëquëꞌ. 29Noya natërinco niꞌton, naꞌcon naꞌcon quëtantarahuë. Co mantaꞌ pahuantarinhuëꞌ. Aꞌnaso nipirinhuëꞌ co natërincohuëꞌ niꞌton, piꞌpian yaꞌhuëtërinso tërantaꞌ osërëtarahuë. 30Naporahuaton co noyahuëꞌ niꞌton, aipiran tashinantërinquë tëꞌyatocoꞌ. Inatohua co napion ancantaton naꞌnërápon,’ tënin,” itërin Quisosori.

Nisha nisha nananquë nonpisopita anaꞌintërinsoꞌ

31Ina quëran itaantarin: “Yosë quëran quëmapico niꞌto, aꞌna tahuëri oꞌmantararahuë huaꞌanëntaꞌhuaso marëꞌ. Yaꞌipi anquëniroꞌsapitarëꞌco chachin oꞌmantararahuë. Huënaráchin huënaráchin yaꞌnorahuato, huaꞌanëntaꞌhuasoꞌ shiraquë huënsëarahuë coisë pochin nicaꞌhuaso marëꞌ. 32Yosë nohuanton, nisha nisha nananquë nonpisopita niyontonapi. Niyontonpachinaꞌ, pëꞌtahuatonaꞌpi pochin nisarahuë. Niꞌcoꞌ. Tahuëri nipachina, ohuicaroꞌsaꞌ, chiporoꞌsaꞌ napopianachin paꞌsapi coshatacaiso marëꞌ. Inaquëráchin yaꞌhuëpirinahuëꞌ, tashihuachina, nisha nisha acorin huachi. 33Ohuicaroꞌsaꞌ inchinanën quëran acorahuaton, chiporoꞌsasoꞌ ahuënanën quëran acorin. Inapochachin cantaꞌ yaꞌipi piyapiꞌsaꞌ nisha nisha acoarahuë. Noya cancantopisopita inchinanëhuë quëran acoarahuë. Co noyahuëꞌ cancantopisopitaso nipirinhuëꞌ, ahuënanëhuë quëran acoarahuë. 34Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ. 35Canpitasoꞌ noya nosororamaco. Tanahuatëra, aꞌcaramaco. Yamorohuatëra, oꞌshitëramaco. Yaꞌhuëramataquëchi naꞌhuëpatëra, noya nontëramaco. Pëinëmaquë chachin ayaꞌconamaco. 36Capa aꞌmocaꞌhuasoꞌ nipachina, quëtëramaco. Caniohuatërantaꞌ, huëcatomaꞌ, nosoroquiramaco. Tashinan pëiquë yaꞌhuasocontaꞌ, niꞌquiramaco. Napoaton huëco huachi, noya yaꞌhuaꞌahuaꞌ,’ itarahuë. 37Naporoꞌ inapitasoꞌ natanarinaco: ‘¿Onporotaꞌ Sinioro tanaran nicatëinquën, aꞌcarainquën? ¿Onporotaꞌ yamororan niꞌton, oꞌshitërainquën? 38¿Onporotaꞌ pëinëhuëiquë ayaꞌconainquën? ¿Onporotaꞌ aꞌmocamasoꞌ pahuantërinquën niꞌton, quëtërainquën? 39¿Onporotaꞌ canioran niꞌton, nosoroquirainquën? ¿Onporotaꞌ tashinan pëiquë parisitëran, niꞌconainquën? ¿Onpórochana napotërainquën nicaya? Co yonquiraihuëꞌ,’ itarinaco. 40‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

41Ahuënanëhuë quëran acorahuësopitaso nipirinhuëꞌ, shaꞌhuitarahuë: ‘Yaꞌipinquëmaꞌ paco huachi. Tata Yosë co noyahuëꞌ niꞌninquëmaꞌ niꞌton, anaꞌintarinquëma huachi. Panca pën nani acorin sopairoꞌsaꞌ anaꞌintacaso marëꞌ. Inaquë pën co onporontaꞌ tacopiarinhuëꞌ. Inaquë pacoꞌ canpitantaꞌ. 42Tanapirahuëꞌ, co aꞌcaramacohuëꞌ. Yamoropirahuëꞌ, co oꞌshitëramacohuëꞌ. 43Yaꞌhuëramataquëchin naꞌhuëpatëra, co pëinëmaquë ayaꞌconamacohuëꞌ. Capa aꞌmocaꞌhuasontaꞌ nipirinhuëꞌ, co quëtëramacohuëꞌ. Caniopirahuëꞌ, co huëcatomaꞌ nosororamacohuëꞌ. Tashinan pëiquë yaꞌhuëpirahuëꞌ, co niꞌquiramacohuëꞌ,’ itarahuë. 44Ina quëran natanarinaco: ‘¿Onporotaꞌ Sinioro tanapiranhuëꞌ co aꞌcarainquënhuëꞌ? ¿Onporotaꞌ yamoropiranhuëꞌ co oꞌshitërainquënhuëꞌ? ¿Onporotaꞌ co pëinëhuëiquë ayaꞌconainquënhuëꞌ? ¿Onporotaꞌ aꞌmocasoꞌ pahuantopirinquënhuëꞌ, co quëtërainquënhuëꞌ? ¿Onporotaꞌ caniopiranhuëꞌ co nosororainquënhuëꞌ? ¿Onporotaꞌ tashinan pëiquë parisitopiranhuëꞌ co catahuarainquënhuëꞌ? Co onporontaꞌ ina pochin niꞌnainquënhuëꞌ,’ itarinaco. 45‘Coꞌta imarinacosopita parisitopirinahuëꞌ, co catahuaramahuëꞌ. Saꞌahuaroꞌsaꞌ maꞌsha pahuantopirinahuëꞌ, co quëtëramahuëꞌ. Co inapita nosororamahuëꞌ niꞌton, co cantaꞌ nosororamacohuëꞌ,’ itarahuë. Itahuato, aꞌpararahuë huachi. 46Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Currently Selected:

Mateo 25: cbt

Highlight

Copy

Compare