Malaquías 3
3
1Yosë yaꞌipi nanitapaton shaꞌhuitaantarinquëmaꞌ: “Niꞌcoꞌ. Co huaꞌquiya quëranhuëꞌ, comisionëhuë aꞌpararahuë. Inasoꞌ, pënënatënquëma cancanëma anoyatarinquëmaꞌ. Noya ninarëso pochin nicasëmaꞌ, Sinioro oꞌmacaso marëꞌ napoarin. Ina Sinioro huaꞌqui ninarápiramahuëꞌ, aꞌnanaya chinotëramacoso pëiquë yaꞌconarin. Canpitaroꞌco anoyatërahuëso anitotiinquëmaso marëꞌ aꞌparahuësoꞌ, nani oꞌmacaso naniriarin. Ina canpitasoꞌ, naꞌcon nohuantërama niꞌcamasoꞌ. 2Ina oꞌmahuachinso napoaponahuëꞌ, ¡co insoari tërantaꞌ, chinitacaso nanitaponhuëꞌ! ¡Naporosoꞌ, yaꞌipinquëma tëhuëramaso anitotarinquëmaꞌ! Huaꞌna pënquë asoquirahuatonaꞌ, nëꞌhuëtërinso inquitopi. Inapochachin canpitantaꞌ, co noyahuëꞌ ninamaso inquitarinquëmaꞌ. Shapon nëꞌhuë inquitërinso pochin oshanëma inquitarinquëmaꞌ. 3Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco. 4Naporoꞌ Cota huëntonquë, Quirosarinquë, inaquëpita yaꞌhuëpisopitasoꞌ, iráca pochachin noya nininso aꞌnotaponaco. Ina marëꞌ caso Sinioroco, noya cancantarahuë,” itërinquëmaꞌ. 5Naquëranchin Sinioro nontatënquëmaꞌ: “Caso Sinioroco, yaꞌipi nanitapato shaꞌhuitaantaranquëmaꞌ: ‘Naporoꞌ oꞌmahuato, coisë pochin nisarahuë. Noya nipatamaꞌ, noya acoaranquëmaꞌ. Co noyahuëꞌ cancantatona pënotohuachinasoꞌ, anaꞌintarahuë. Nitëhuananpitohuachinaꞌ, Yoscoarëꞌ taponahuë nonpinpachinaꞌ, patronoꞌsa piyapinënapita co noꞌtëquën pahuërëhuachinahuëꞌ, quëyoronoꞌsaꞌ, saꞌahuaroꞌsaꞌ, inapita co nitocatahuahuachinahuëꞌ, nisharoꞌsa aparisitohuachinaꞌ, co tëꞌhuatohuachinacohuëꞌ, inapitanta anaꞌintarahuë,’ tënahuë,” itërinquëmaꞌ.
Diesmo co acoatonaraihuëꞌ, ihuatatë pochin nipisoꞌ
6Naquëranchin Sinioro israiroꞌsanquëma nontatënquëmaꞌ: “Caso Sinioroco niꞌto, co nishatërahuëꞌ. Napoaton canpitaso Cacopo quëran pipiramasopita, co ataꞌhuantëranquëmahuëꞌ. 7Shimashonëmapita aꞌporinacoso pochachin canpitantaꞌ, nanamëhuë aꞌporamaꞌ. Ina anitotopiranquëmahuëꞌ, co yanatëramacohuëꞌ. Caso Sinioroco yaꞌipi nanitapato, shaꞌhuitaranquëmaꞌ: ‘Naquëranchin natëantaco. Inapohuatamaꞌ, carimanta catahuaantaranquëmaꞌ,’ itëranquëmaꞌ. Napotohuatënquëmara: ‘¿Maꞌta onpoatoi natëantaꞌinquën?’ toconamaꞌ. 8Naporama niꞌton, carimanta ayonquiꞌinquëmaꞌ: ‘¡Caso Yosëco niꞌto, co onporonta ihuamacoso yaꞌhuërinhuëꞌ! ¡Canpitaso napoaponahuëꞌ, ihuaramaco!’ Napoapomarahuëꞌ, ‘¿maꞌta onpoatoi ihuarainquënsoꞌ?’ itaantaramaco. ‘Diesmoroꞌsa co quëtatomacohuëꞌ, ihuaramaco. Maꞌpitaso quëtamacoso nininsontaꞌ, co quëtatomacohuëꞌ naporamaꞌ. 9Tëhuënchachin yaꞌipi israiroꞌsanquëma napotëramaco niꞌton, co noyahuëꞌ niꞌnanquëmaꞌ. Napoaton ama huachi noya yaꞌhuëcamaso marëhuëꞌ, shaꞌhuitaranquëmaꞌ.
Caso Sinioroco yaꞌipi nanitapato, shaꞌhuitaantaꞌinquëmaꞌ: 10Nani maꞌsha yaꞌhuëtërinquëma quëran diesmo ocoirahuatomaꞌ, chinotëramacoso pëiquë quëcoꞌ. Inaquë maꞌsha tapatërinacosopita yaꞌhuërin niꞌton, quëcoꞌ. Inapohuatamaꞌ, corto huaꞌanoꞌsaꞌ, Nihuiroꞌsaꞌ, inapita cosharo yaꞌhuëtapi. Inta inapoatoma tënirico. Napohuatamaꞌ, noya noya catahuararanquëmaꞌ. Piꞌiroꞌtë huintananënpita iꞌsoatahuato, notohuaroꞌ maꞌsha noya nininsopita aꞌpatimatë pochin nitaranquëmaꞌ. 11Shaꞌtohuatamara, nisha nisha nipisopitari shaꞌtëramasopita tapirin. Oparonëmantaꞌ, napotërin. Napotëranquëmaso chachin nipatamaꞌ, co huachi inapita apiponquëmahuëꞌ. 12Paꞌpi noyápiachin yaꞌhuarama niꞌton, yaiꞌpi nacionquë yaꞌhuëpisopita, paꞌyatatënëmaꞌ: “¡Ma noyacha inapitaso yaꞌhuëpi paya!” tëcaponaꞌ.’ Ca Sinioroco yaꞌipi nanitapato, napotaranquëmaꞌ,” itërinquëmaꞌ.
Sinioro co noyahuëꞌ yonquirapipisoꞌ
13Naquëranchin Siniorori piyapinënpita nontaton: “Canpitaso israiroꞌsanquëmaꞌ, co noyahuëꞌ yonquirapitomaco pinoramaco. Napoapomarahuëꞌ, ‘¿maꞌta itatëinquën pinorainquënsoꞌ?’ itëramaco. 14Naporamaꞌ: ‘Topinan quëran Yosë imarai. Noya natëpiraihuëꞌ, co manta canaraihuëꞌ. Co noyahuëꞌ ninëhuaso aꞌpocaso marëꞌ Yosë chinotohuatëhuara, sëtohuachinara aꞌmopiso aꞌmorëhuaꞌ. Ina pochin aꞌmotëhua canpoantaꞌ, Yosë chinotopirëhuahuëꞌ, topinan quëran napoarëhuaꞌ. 15Nocantonoꞌsasoꞌ, co Yosë imaponaraihuëꞌ, noya noya yaꞌhuëpi. Co noyahuëꞌ nipisopitantaꞌ, noya noyatopi. Inapitaso Yosë tënipirinahuëꞌ, co manta onpotërinhuëꞌ,’ taꞌtomaꞌ, co noyahuëꞌ yonquirapiramaco,” itërin.
Anaꞌintacaso tahuëri naniarinsoꞌ
16Sinioro noya nicatona natëpisopitasoꞌ, Sinioro naporinso natanpi. Ina natanatonaꞌ, niachinicancanacaiso marëꞌ noya ninontopi. Napopiso Sinioronta noya natanaton, nininëna aꞌna quiricaquë aninshitërin: “Isopitasoꞌ, paꞌyatërinaco. Naporahuatonaꞌ, noya nicatonaco natërinaco. Ina marëꞌ, co onporontaꞌ naniantacaso yaꞌhuërinhuëꞌ,” tënin aninshitaton.
17Inapita yonquiaton Sinioro tapon: “Inapitaso noya yonquirinaco niꞌton, noya nicato piyapinëhuëpita pochachin niantarahuë. Anaꞌintaꞌhuaso tahuëri nanihuachin, inapitaso noya noya nicato, nichaꞌësarahuë. Huiꞌnini noya natëhuachin, paꞌpini nosororinso pochachin inapitantaꞌ, nosoroarahuë. 18Noya nipisopitasoꞌ, noya nicato nichaꞌësarahuë. Co noyahuëꞌ nipisopitasoꞌ, noꞌtëquën anaꞌintarahuë. Ina nicatoma canpitasoꞌ: ‘Yosësoꞌ, co napopináchin piyapinpoa niꞌninpoahuëꞌ. Ina chinotohuatëhuaꞌ, noya acoarinpoaꞌ. Coꞌsoꞌ chinotohuatëhuahuëꞌ, noꞌtëquën anaꞌintarinpoaꞌ,’ tosarama huachi,” tënin.
Currently Selected:
Malaquías 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Malaquías 3
3
1Yosë yaꞌipi nanitapaton shaꞌhuitaantarinquëmaꞌ: “Niꞌcoꞌ. Co huaꞌquiya quëranhuëꞌ, comisionëhuë aꞌpararahuë. Inasoꞌ, pënënatënquëma cancanëma anoyatarinquëmaꞌ. Noya ninarëso pochin nicasëmaꞌ, Sinioro oꞌmacaso marëꞌ napoarin. Ina Sinioro huaꞌqui ninarápiramahuëꞌ, aꞌnanaya chinotëramacoso pëiquë yaꞌconarin. Canpitaroꞌco anoyatërahuëso anitotiinquëmaso marëꞌ aꞌparahuësoꞌ, nani oꞌmacaso naniriarin. Ina canpitasoꞌ, naꞌcon nohuantërama niꞌcamasoꞌ. 2Ina oꞌmahuachinso napoaponahuëꞌ, ¡co insoari tërantaꞌ, chinitacaso nanitaponhuëꞌ! ¡Naporosoꞌ, yaꞌipinquëma tëhuëramaso anitotarinquëmaꞌ! Huaꞌna pënquë asoquirahuatonaꞌ, nëꞌhuëtërinso inquitopi. Inapochachin canpitantaꞌ, co noyahuëꞌ ninamaso inquitarinquëmaꞌ. Shapon nëꞌhuë inquitërinso pochin oshanëma inquitarinquëmaꞌ. 3Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco. 4Naporoꞌ Cota huëntonquë, Quirosarinquë, inaquëpita yaꞌhuëpisopitasoꞌ, iráca pochachin noya nininso aꞌnotaponaco. Ina marëꞌ caso Sinioroco, noya cancantarahuë,” itërinquëmaꞌ. 5Naquëranchin Sinioro nontatënquëmaꞌ: “Caso Sinioroco, yaꞌipi nanitapato shaꞌhuitaantaranquëmaꞌ: ‘Naporoꞌ oꞌmahuato, coisë pochin nisarahuë. Noya nipatamaꞌ, noya acoaranquëmaꞌ. Co noyahuëꞌ cancantatona pënotohuachinasoꞌ, anaꞌintarahuë. Nitëhuananpitohuachinaꞌ, Yoscoarëꞌ taponahuë nonpinpachinaꞌ, patronoꞌsa piyapinënapita co noꞌtëquën pahuërëhuachinahuëꞌ, quëyoronoꞌsaꞌ, saꞌahuaroꞌsaꞌ, inapita co nitocatahuahuachinahuëꞌ, nisharoꞌsa aparisitohuachinaꞌ, co tëꞌhuatohuachinacohuëꞌ, inapitanta anaꞌintarahuë,’ tënahuë,” itërinquëmaꞌ.
Diesmo co acoatonaraihuëꞌ, ihuatatë pochin nipisoꞌ
6Naquëranchin Sinioro israiroꞌsanquëma nontatënquëmaꞌ: “Caso Sinioroco niꞌto, co nishatërahuëꞌ. Napoaton canpitaso Cacopo quëran pipiramasopita, co ataꞌhuantëranquëmahuëꞌ. 7Shimashonëmapita aꞌporinacoso pochachin canpitantaꞌ, nanamëhuë aꞌporamaꞌ. Ina anitotopiranquëmahuëꞌ, co yanatëramacohuëꞌ. Caso Sinioroco yaꞌipi nanitapato, shaꞌhuitaranquëmaꞌ: ‘Naquëranchin natëantaco. Inapohuatamaꞌ, carimanta catahuaantaranquëmaꞌ,’ itëranquëmaꞌ. Napotohuatënquëmara: ‘¿Maꞌta onpoatoi natëantaꞌinquën?’ toconamaꞌ. 8Naporama niꞌton, carimanta ayonquiꞌinquëmaꞌ: ‘¡Caso Yosëco niꞌto, co onporonta ihuamacoso yaꞌhuërinhuëꞌ! ¡Canpitaso napoaponahuëꞌ, ihuaramaco!’ Napoapomarahuëꞌ, ‘¿maꞌta onpoatoi ihuarainquënsoꞌ?’ itaantaramaco. ‘Diesmoroꞌsa co quëtatomacohuëꞌ, ihuaramaco. Maꞌpitaso quëtamacoso nininsontaꞌ, co quëtatomacohuëꞌ naporamaꞌ. 9Tëhuënchachin yaꞌipi israiroꞌsanquëma napotëramaco niꞌton, co noyahuëꞌ niꞌnanquëmaꞌ. Napoaton ama huachi noya yaꞌhuëcamaso marëhuëꞌ, shaꞌhuitaranquëmaꞌ.
Caso Sinioroco yaꞌipi nanitapato, shaꞌhuitaantaꞌinquëmaꞌ: 10Nani maꞌsha yaꞌhuëtërinquëma quëran diesmo ocoirahuatomaꞌ, chinotëramacoso pëiquë quëcoꞌ. Inaquë maꞌsha tapatërinacosopita yaꞌhuërin niꞌton, quëcoꞌ. Inapohuatamaꞌ, corto huaꞌanoꞌsaꞌ, Nihuiroꞌsaꞌ, inapita cosharo yaꞌhuëtapi. Inta inapoatoma tënirico. Napohuatamaꞌ, noya noya catahuararanquëmaꞌ. Piꞌiroꞌtë huintananënpita iꞌsoatahuato, notohuaroꞌ maꞌsha noya nininsopita aꞌpatimatë pochin nitaranquëmaꞌ. 11Shaꞌtohuatamara, nisha nisha nipisopitari shaꞌtëramasopita tapirin. Oparonëmantaꞌ, napotërin. Napotëranquëmaso chachin nipatamaꞌ, co huachi inapita apiponquëmahuëꞌ. 12Paꞌpi noyápiachin yaꞌhuarama niꞌton, yaiꞌpi nacionquë yaꞌhuëpisopita, paꞌyatatënëmaꞌ: “¡Ma noyacha inapitaso yaꞌhuëpi paya!” tëcaponaꞌ.’ Ca Sinioroco yaꞌipi nanitapato, napotaranquëmaꞌ,” itërinquëmaꞌ.
Sinioro co noyahuëꞌ yonquirapipisoꞌ
13Naquëranchin Siniorori piyapinënpita nontaton: “Canpitaso israiroꞌsanquëmaꞌ, co noyahuëꞌ yonquirapitomaco pinoramaco. Napoapomarahuëꞌ, ‘¿maꞌta itatëinquën pinorainquënsoꞌ?’ itëramaco. 14Naporamaꞌ: ‘Topinan quëran Yosë imarai. Noya natëpiraihuëꞌ, co manta canaraihuëꞌ. Co noyahuëꞌ ninëhuaso aꞌpocaso marëꞌ Yosë chinotohuatëhuara, sëtohuachinara aꞌmopiso aꞌmorëhuaꞌ. Ina pochin aꞌmotëhua canpoantaꞌ, Yosë chinotopirëhuahuëꞌ, topinan quëran napoarëhuaꞌ. 15Nocantonoꞌsasoꞌ, co Yosë imaponaraihuëꞌ, noya noya yaꞌhuëpi. Co noyahuëꞌ nipisopitantaꞌ, noya noyatopi. Inapitaso Yosë tënipirinahuëꞌ, co manta onpotërinhuëꞌ,’ taꞌtomaꞌ, co noyahuëꞌ yonquirapiramaco,” itërin.
Anaꞌintacaso tahuëri naniarinsoꞌ
16Sinioro noya nicatona natëpisopitasoꞌ, Sinioro naporinso natanpi. Ina natanatonaꞌ, niachinicancanacaiso marëꞌ noya ninontopi. Napopiso Sinioronta noya natanaton, nininëna aꞌna quiricaquë aninshitërin: “Isopitasoꞌ, paꞌyatërinaco. Naporahuatonaꞌ, noya nicatonaco natërinaco. Ina marëꞌ, co onporontaꞌ naniantacaso yaꞌhuërinhuëꞌ,” tënin aninshitaton.
17Inapita yonquiaton Sinioro tapon: “Inapitaso noya yonquirinaco niꞌton, noya nicato piyapinëhuëpita pochachin niantarahuë. Anaꞌintaꞌhuaso tahuëri nanihuachin, inapitaso noya noya nicato, nichaꞌësarahuë. Huiꞌnini noya natëhuachin, paꞌpini nosororinso pochachin inapitantaꞌ, nosoroarahuë. 18Noya nipisopitasoꞌ, noya nicato nichaꞌësarahuë. Co noyahuëꞌ nipisopitasoꞌ, noꞌtëquën anaꞌintarahuë. Ina nicatoma canpitasoꞌ: ‘Yosësoꞌ, co napopináchin piyapinpoa niꞌninpoahuëꞌ. Ina chinotohuatëhuaꞌ, noya acoarinpoaꞌ. Coꞌsoꞌ chinotohuatëhuahuëꞌ, noꞌtëquën anaꞌintarinpoaꞌ,’ tosarama huachi,” tënin.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.