Levítico 16
16
Nanan anoyatacaso tahuëri nininsoꞌ
1-2Aaron huiꞌninpita naꞌcon naꞌcon Sinioro yaꞌcariatonaꞌ, chiminpi. Ina piquëran Siniorori, Moisësë itapon: “Iya masho Aaron shaꞌhuitëquëꞌ nitochin. Chinotamacoso pëiquë noya noya patoana nininquësoꞌ, co topinan tahuëri yaꞌconaramahuëꞌ. Co anoyatërëhuaso caposonën aꞌtanamën notënanquë tëranta huanicaiso yaꞌhuërinhuëꞌ. Ina aipi, chitoroquë yáyaꞌnorahuë niꞌton, topinan tahuëri yaꞌconpatamaꞌ, chiminaramaꞌ, itëquëꞌ,” itërin.
3Ina quëran itaantarin: “Nani piꞌiquë inaquësoꞌ, aꞌnaroíchin Aaron yaꞌcoanin. Nanan anoyatacaso tahuëri itopiquëáchin, yaꞌcoanin. Inaquë Aaron yaꞌconpachin, aꞌnara toroaꞌhua chinotamacoso pëiquë oshanën marëꞌ quëcapon. Aꞌnara carnirontaꞌ, yaꞌipi ahuiquitacaso marëꞌ quëcapon. 4Nani cato chachin quëpachin, iꞌnanpirarahuaton, amapon. Ina quëran corto huaꞌan aꞌmocaso marëꞌ acopisoꞌ aꞌmosarin huachi. Carsonsicho sariotahuaton, aꞌmocaso nininso aꞌmoanin. Ina aipi sintoronquë nitonporahuaton, nitonpomototërinso yancopon. Yaꞌipi corto huaꞌan aꞌmocaso marëꞌ acopisosoꞌ, rino piꞌshi quëráchin nipi.
5Yaꞌipi israiroꞌsa oshanëna marëntaꞌ, cato chipo Aaron quëshiapi. Naporahuaton yaꞌipi ahuiquitacaso marëꞌ aꞌna carnirontaꞌ, quëshiapi. 6Inaora toroaꞌhuanënso nipirinhuëꞌ, oshanën marëꞌ Aaroni ahuiquitarin. Inapotohuachin, oshanën inquitarahuë. Saꞌin, huiꞌninpita, inapitanta co noyahuëꞌ nipisoꞌ, inquitarahuë. 7Ina quëran cato chiporoꞌsanta ca marëꞌ quëpisoꞌ, quëcapon. Noya patoana yaꞌcoananën notënanquë huarëꞌ aꞌnotiincoso marëꞌ quëcapon. 8Inaquë nicanatona ocoipiso pochin chiporoꞌsa nitarin. Cato naꞌpitëaꞌhuayaquë, inquënsona nicacaso ninshitapon. Aꞌnaquë: ‘Sinioronquën,’ taꞌton, ninshitarin. Aꞌnaquëso nipirinhuëꞌ: ‘Asasironquën#16.8 Asasirosoꞌ: Inaso maꞌsona nininso nisha nisha yonquirapipi. Napoaponahuë inasoꞌ, chipo israiroꞌsa oshanën quëpanaꞌpi ninin.,’ taꞌton ninshitarin. 9Insosona chipo ca marëꞌ nininsoꞌ capainchinpachin, Aaroni quëcaton aꞌnotaponco. Ina piquëran israiroꞌsa oshanën inquitaꞌhuaso marëꞌ inari chachin tëpapon. 10Aꞌnantaꞌ, Asasironquën nininsoꞌ, co tëpaponahuëꞌ, quëshiponco. Israiroꞌsa oshanën inquitaꞌhuaso marëꞌ quëshiponco. Ina piquëran inotëro parti, Asasiro yaꞌhuërintaquëchin aꞌpapona huachi.
11Aaronsoꞌ, inaora oshanën marëꞌ toroaꞌhua quëninsoꞌ tëparin. Saꞌin, huiꞌninpita, inapitanta oshanëna marëꞌ inapotarin. Inapohuachina, oshanën inquitarahuë. Saꞌin, huiꞌninpita, inapitanta oshanëna inquitarahuë. 12Ina quëran aꞌpëtinan masahuaton, artaroquë pënaya poꞌmochin. Inaso artaro, chinotërinacoso nëꞌmëtë pëi ótënpiso notënanquë yaꞌhuërin. Cato sëꞌtamo yonarin pochin pimóton nininsonta noya noya patoana itopiquë quëpaꞌin. 13Nani acoana nipachin, yonarin pochin pimóton nininsoꞌ, tomontacaso marëꞌ pënsha aipi acoꞌin. Yaꞌnorahuëso patoanaquë tomonchin. Tomontërinsoari anoyatërëhuaso caposonën aꞌtanamën imotapon. Inapotohuachin co Aaron chiminaponhuëꞌ. 14Toroaꞌhua huënainën maninsontaꞌ, piꞌpian main. Masahuaton, piꞌi pipirinso parti quëran caposonëhuë aꞌtanamën taꞌsachin. Ina quëran caposonëhuë aꞌtanamën notënanquëraontaꞌ, imirin quëran canchisëroꞌ taꞌsachin. 15Nani inapotohuachin, chipo israiroꞌsa oshanëna marëꞌ, nininsoꞌ tëpaꞌin. Tëpahuachin, huënainën sënanquë main. Ina huënaiꞌ masahuaton, noya noya patoanaquë quëpapon. Inaquë caposonëhuë aꞌtanamën aipi taꞌsatapon. Ina quëran caposonëhuë aꞌtanamën notënan quërantaꞌ, taꞌsatapon. Toroaꞌhua huënainën quëran napotërinso chachin nitarin. 16Inapotaton, noya noya patoana tapararin. Israiroꞌsa amirotochináchin niꞌnahuësoꞌ nicatona tapipi niꞌton, tapararin. Co natantochináchinhuëꞌ cancantatona chinitërinaco niꞌton, napoarin. Naporahuaton oshahuanpiso marëꞌ, ina pochin tapacaso yaꞌhuërin. Inapochachin yaꞌipi chinotëramacoso nëꞌmëtë pëi nitamaso yaꞌhuërin. Pëinëhuësoꞌ, israiroꞌsa yaꞌhuëpiso huáncana yaꞌhuërin. Napoaton amirotochináchin niꞌnahuësoꞌ nicatonaꞌ, tapipi.
17-18Aaron noya noya patoanaquë israiroꞌsa oshanëna inquitaꞌhuaso marëꞌ camaitërahuëso niin. Inapoasoꞌ, co insonta chinotëramacoso nëꞌmëtë pëiquë yaꞌconacaso yaꞌhuërinhuëꞌ. Ina quëran pipiahuarëꞌ, yaꞌconaponaꞌ. Nani inaoranquën, saꞌin, huiꞌninpita, yaꞌipi israiroꞌsaꞌ, inapita Siniorori oshanën inquitohuachin, Aaron pipiarin. Pipirahuaton artaro yaꞌhuërëꞌ tapaarin. Inasoꞌ artaro chinotëramacoso nëꞌmëtë pëi ótënpiso notënanquë yaꞌhuërin. Toroaꞌhua, chipo, inapita huënainën piꞌpian masahuaton, artaro pomonënpita pashitarin. Naporahuaton yaꞌipi tahuirinquë pashitarin. 19Ina quëran ina huënaiquë chachin, imirin quëran iꞌcomiitahuaton, artaro aipi canchisëroꞌ taꞌsatarin. Israiroꞌsari oshahuanatona tapipirinahuëꞌ, inapo taparahuaton chinotamacoso marëꞌ acoantarin.
20Chinotamacoso marëꞌ nëꞌmëtë pëiꞌ acoramasoꞌ yaꞌipi taparahuaton, artaronta nani tapahuachin, aꞌna chipo yaꞌhuërëꞌ quëcacaiso camaitapon. 21Nani quëpachinaꞌ, ina sëꞌhuamotorahuaton israiroꞌsa yaꞌipi co noyahuëꞌ nipiso shaꞌhuitarin. Yaꞌipi co natantochináchinhuëꞌ nicatonaꞌ, chinitatë pochin nitërinacosopita shaꞌhuitarin. Inapoaton yaꞌipi oshahuanpiso shaꞌhuitarin. Inapo shaꞌhuitaton, israiroꞌsa oshahuaninsoꞌ, chipo motënquë acoatë pochin nitarin. Nani yaꞌipi shaꞌhuitohuachin, aꞌna quëmapiri inotëro parti quëpaton, inaquë aꞌpapon. 22Inapotohuachin, chipo inotëro parti chihuëaton, israiroꞌsa oshanëna co piyapi yaꞌhuërinquëhuëꞌ quëpatapon.
23Ina quëran Aaron chinotëramacoso pëiquë yaꞌcoantarahuaton, rino piꞌshi quëran aꞌmorinso ocoiarin. Inaporahuaton inaquë acoarin. 24Inaranchin amarahuaton, nani tahuëri aꞌmorinso aꞌmoantarin. Ina quëran iꞌiratëquë pipirahuaton, cato carniro nininsoꞌ Sinioro marëꞌ tëparin. Nani tëparahuaton, artaroquë yaꞌipi ahuiquitarin. Inaoranquënꞌton ahuiquitarin. Ina quëran israiroꞌsanquën nininsontaꞌ, ahuiquitarin. Inapohuachin, oshanën inquitarahuë. Israiroꞌsantaꞌ, oshanëna inquitarahuë. 25Toroaꞌhuanta oshanën marëꞌ tëparinso tomaquën, artaroquë chachin ahuiquitarin. Israiroꞌsanquënta oshanëna marëꞌ chipo tëparinso tomaquën, inaquë chachin ahuiquitarin antaꞌ.
26Insosona chipo Asasironquën nininsoꞌ inotëro parti aconpachin, aꞌmorinso pëꞌsapon. Inaporahuaton iꞌquë amapon. Naporo huarëꞌ yaꞌhuëramaquë yaꞌcoantapon.
27Toroaꞌhua, chipo, inapita oshanëna marëꞌ tëpatona huënainën noya noya patoanaquë quëpaapi. Inapitasoꞌ, noshinëna ahuiquitacaiso yaꞌhuërin: Noshinën, shaꞌhuëtën, chiꞌchinën, inapitasoꞌ, yaꞌhuëramaso inton aquëtë ahuiquitaponaꞌ. 28Insosona ahuiquitërinsoꞌ, aꞌmorinso pëꞌsarahuaton, iꞌquë amapon. Naporo huarëꞌ yaꞌhuëramaquë yaꞌcoantapon.
29Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Pascoa tahuëriꞌsa naꞌhuërin quëran huarëꞌ canchisë yoqui pichiaramaꞌ. Naporo yoqui shonca tahuëri nanihuachin, Sinioro marëꞌ chinotaramaꞌ. Co manta sacatamaso yaꞌhuërinhuëꞌ. Co nisharoꞌsa yacaparinquëmasopita tërantaꞌ, sacatapihuëꞌ. Naporo tahuëri co manta coshatapomarahuëꞌ, yonquiaramaco. 30Naporo tahuëri oshanëma inquiaramaꞌ. Ca Sinioroco inquitaranquëmaꞌ. Ina inquitohuatënquëmaꞌ, co huachi ina marëꞌ naꞌinaramahuëꞌ. 31Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Ina tahuëri noya nicatoma canpitasoꞌ, ca marëꞌ chinotaramaꞌ. Co coshatatomarahuëꞌ, chinotaramaco.
32Insosona corto huaꞌan tomaquë opomototatona huayonpachinaꞌ, paꞌpini chachin yaꞌipi camaitërahuësopita nicacaso marëꞌ nanan quëtarin. Rino piꞌshi quëran corto huaꞌan marëꞌ nitopisoꞌ aꞌmosahuaton, maꞌpitaso nicacaisoꞌ camaitërahuëso nisarin. Inapohuachin oshanëna inquitarahuë. 33Noya noya patoana, noya patoana, artaro, inapita oshahuanatoma tapiramasoꞌ, naporo tahuëri anoyatarin. Inapohuachin, corto huaꞌanoꞌsaꞌ, israiroꞌsaꞌ, inapita oshahuanpisoꞌ, inquitarahuë.
34Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Nani piꞌiquë aꞌnarora yaꞌipi camaitërahuëso nicoꞌ. Yaꞌipi israiroꞌsa oshanën inquitaꞌhuaso marëꞌ inapocoꞌ,” itërin Yosëri Moisësë nontaton.
Ina quëran, Siniorori Moisësë camairinso chachin Aaronsoꞌ yaꞌipi ninin.
Currently Selected:
Levítico 16: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
