Juan 2
2
Canaquë Yosë pochin nininsoꞌ
1Cara tahuëri quëran aꞌna quëmapi pita nisarin saꞌacaso marëꞌ. Canaquë naporin, Cariria parti yaꞌhuërinsoꞌ. Inatohuaꞌ Quisoso aꞌshin niꞌtapon paꞌnin. 2Quisosontaꞌ amatopi. Paꞌnin inantaꞌ niꞌtapon. Caꞌtanoꞌsanënpitacointaꞌ amatërinacoi. 3Huino taꞌquihuachinara, aꞌshini Quisoso itapon:
—Capa huino taꞌquipi huachi, itërin.
4—¿Maꞌmarëtaꞌ mama napotëranco? Co tahuëri naniyatërarinhuëꞌ nohuitiinacosoꞌ, itërin Quisosori.
5Napotopirinhuëꞌ, inpriatoroꞌsaꞌ quënanconahuaton, aꞌshini itapon:
—Maꞌsona Quisoso shaꞌhuitohuachinquëmaꞌ, natëcoꞌ, itërin.
6Inaquë saota panca orinan yaꞌhuërin, naꞌpi quëran nipisoꞌ. Aꞌna orinanquëáchin catapini rata pochin yaꞌconin. Moisësë pënëntërinsoꞌ natëtonaꞌ oshanëna inquicaiso marëꞌ acopisoꞌ. 7Ina quëran inpriatoroꞌsaꞌ shaꞌhuitërin:
—Iꞌsha amëntaitocoꞌ, itërin Quisosori. Natëtonaꞌ, huirotënquë huarëꞌ iꞌsha amëntaitopi.
8—Piꞌpian macatomaꞌ, pita huaꞌan apiꞌnitoncoꞌ, itaantarin Quisosori.
Napotohuachina, masahuatona apiꞌnitoonpi. 9Orinan quëran mapirinahuëꞌ, pita huaꞌansoꞌ co nitotërinhuëꞌ. Inpriatoroꞌsaráchin nitotopi. Iꞌsharáchin taꞌpanpirinahuëꞌ, nani huino taranin. Napoaton piꞌnirahuaton, saꞌanaꞌpi amatërin. 10Huëꞌpachina, itërin:
—¡Maꞌpitacha ninan paya! Iso huinosoꞌ noya noya, yashin yashin oꞌocasoꞌ. Yaꞌipi piyapiꞌsaꞌ noya noya huino nininsoꞌton oꞌshipi. Ina quëran nani natëhuachinara, co onpopinchin noyahuëꞌ nininsoꞌ oꞌshiantarapi. Quëmaso nipirinhuëꞌ ipora huarëꞌ noya noya huino oꞌshitërancoi, itërin. Quisoso naporinsoꞌ co nitotatonhuëꞌ, naporin.
11Naporoꞌ Quisoso caniaritërin Yosë pochin nicacasoꞌ. Piyapiꞌsari nicatonaꞌ: “Tëhuënchachin Yosëri catahuarin niꞌton, nanitaparin,” topi. Caꞌtanoꞌsanënpitacointa niꞌsahuatoi: “Quisososoꞌ, Yosëri aꞌpaimarinsoꞌ,” tënai. Canaquë naporin. Inaso ninanoꞌ, Cariria parti yaꞌhuërin
12Ina quëran Capinaomoquë paꞌmarin. Aꞌshin, iinpita inapitarë chachin paꞌmarin. Caꞌtanoꞌsanënpitacointaꞌ imarai. Aꞌna simana pochin inaquë yaꞌhuërai.
Nipaꞌantopisopita Yosë chinotopiso pëi quëran aꞌparinsoꞌ
(Mateo 21.12-13; Marcos 11.15-18; Lucas 19.45-46)
13Pascoa tahuëri cotioroꞌsaꞌ niyontonpi Yosëri Iquipito quëran nichaꞌërinsoꞌ yonquiantacaiso marëꞌ. Ina naniriahuachina, Quirosarinquë paantarai. 14Yosë chinotopiso pëiquë paꞌsahuatoi, iꞌiratëquë nipaꞌantopisopita quënanconai. Ohuacaꞌ, ohuica, nëpëꞌ, inapita nipaꞌantapi. Yosë chinotatonaꞌ tëpacaiso marëꞌ paꞌanapi. Aꞌnaquëontaꞌ misanënpitaquë huënsëatonaꞌ, coriqui nicanpiarapi. 15Inapita quënanconahuaton, Quisosori co noyahuëꞌ niꞌnin. Nonin masahuaton, sihuirintahuaton, ohuica, ohuacaꞌ, inapita huënintaton, aꞌparin huachi. Paꞌanpisopitantaꞌ Yosë pëinën quëran aꞌparin. Coriqui nicanpiapisontaꞌ misanënapita quëran taꞌsarin. Coriqui taꞌsarahuaton, misanënapitantaꞌ tëꞌyatërin. 16Nëpëꞌ paꞌanpisopita itapon:
—Isopitantaꞌ quëpacoꞌ. ¡Ama Tatahuë pëinën mircato pochin nitocosohuëꞌ! itërin Quisosori.
17Yosë quiricanënquë ninshitopisoꞌ yonquirai. “Yaꞌipi piyapiꞌsaꞌ Tata, chinochinënquën, tënahuë. Ina naꞌcon yonquiato, quëma pëinën aꞌpitërahuë. Ina marëꞌ noꞌhuiarinaco,” tënin quiricaquë.
18Ina quëran cotioroꞌsari huëcapaipi.
—¿Onpoapontaꞌ huaꞌan pochin nisaran? Chiníquën nanantohuatan, Yosë pochin niquëꞌ quiyantaꞌ nicatoi natëiinquën, itopi.
19—Iso pëiꞌ ataꞌhuantohuatamaꞌ, cara tahuëri quëran anoyataantarahuë, itërin Quisosori.
20—Yosë chinotopiso pëiꞌ catapini shonca saota piꞌipi quëran tinipi. Cara tahuëri quëran naquëranchin ¿anoyataantaran ti? itopi cotioroꞌsari.
21Quisososo nipirinhuëꞌ co ina pëi chachin yonquirinhuëꞌ. Inaora nonën pëi pochin tapon naporin. 22Quisoso nanpiantahuachina, naporinsoꞌ yonquirai. Cara tahuëriya quëran nanpiantarin niꞌton, “Yosë quiricanën quëran noꞌtëquën ninorin,” tënai. Quisoso noninsontaꞌ natërai.
Yonquipisontaꞌ nitotërinsoꞌ
23Pascoa tahuëri inaquë yaꞌhuasocoi, Quisoso Yosë pochachin ninin. Piyapiꞌsaꞌ aꞌnaroáchin anoyatërin. “Yosëri catahuarin,” taꞌtonaꞌ, aꞌnaquën natëpi. 24-25Quisososo nipirinhuëꞌ yaꞌipiya noyá nohuitërin. Co piyapiri shaꞌhuitopirinhuëꞌ, yonquipiso chachin nitotërin. Napoaton “Co natëmiatërinacohuëꞌ,” taꞌton, co inapita natërinhuëꞌ.
Currently Selected:
Juan 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.