Santiago 5
5
Maꞌhuanoꞌsaꞌ pënëninsoꞌ
1Maꞌhuanoꞌsantaꞌ co Yosë natëpisopitahuëꞌ pënëin. Aꞌna tahuëri canpitasoꞌ chiníquën parisitaramaꞌ. Ina yonquiatomaꞌ, sëtocoꞌ, naꞌnëcoꞌ. 2Yaꞌipi maꞌsha canaramasoꞌ chanatarin. Aꞌmoramasopitantaꞌ, noꞌsoni pëꞌyararin. 3Coriquinëmantaꞌ topinan quëran canaramaꞌ. Huaꞌna chiꞌchirotërinso pochin napoonin nisarin. Co canamiataramahuëꞌ. Canpitaora marëáchin coriqui yontonamaꞌ niꞌton, Yosë chiníquën anaꞌintarinquëmaꞌ. Pënquë parisitaramaꞌ. Naꞌa coriqui canapomarahuëꞌ, nani ayaroꞌ tahuëri yaꞌcaritëriarin. 4Piyapinëmapita nonpintëramaꞌ. Iminëmaquë asacatopiramahuëꞌ, co noꞌtëquën pahuërëtëramahuëꞌ. Inapitasoꞌ Yosëquë shaꞌhuirapirinënquëmaꞌ. Shanëmapita nitërinsoꞌ mapirinahuëꞌ, co pahuërëtëramahuëꞌ. Inapohuatamaꞌ, Yosë nitotarin. Inasoꞌ chini chiníquën nanantërin niꞌton, noꞌtëquën iꞌhuërëtarinquëmaꞌ. 5Isoroꞌpaquë nóya yaꞌhuëramaꞌ. Nani maꞌsha yaꞌhuëtërinquëmaꞌ. Capa cancantacasoáchin yonquiramaꞌ. Nani maꞌsha yaꞌhuëtopirinquëmahuëꞌ, Yosë anaꞌintarinquëmaꞌ. Ohuacaroꞌsaꞌ tëpacaso pochin nipon. Yatëparinsoꞌ co nitotatonahuëꞌ, coshatápirinahuëꞌ, tahuëri nanihuachina, aꞌnanaya huaꞌanëni huëcapairahuaton, tëparin. Inapochachin canpitasoꞌ noya yaꞌhuápiramahuëꞌ, aꞌnanaya ayaroꞌ tahuëri naniarin. 6Paꞌpi co noyahuëꞌ cancantatomaꞌ, noya piyapiꞌsaꞌ nonpinapiramaꞌ. Chiníquën aparisitopiramahuëꞌ, inapitasoꞌ co nanitopihuëꞌ iꞌhuërëtinënquëmasoꞌ. Napoaton, Yosë chiníquën anaꞌintarinquëmaꞌ.
Quisocristo noya ninacasoꞌ yaꞌhuërinsoꞌ
7Napoaton iyaroꞌsaꞌ aparisitohuachinënquëmaꞌ, noya ahuantocoꞌ. Aꞌna tahuëri Sinioro oꞌmantararin. Naporoꞌ yaꞌipiya noꞌtëquën anaꞌintarin. Niꞌcoꞌ. Shaꞌtohuatëra, co aꞌnaroáchin manëhuëꞌ. Oꞌnanpachina, oshaquëran papotarin. Oꞌnaantahuachina, cayarin. “Oshaquëran cayahuachin, mapatëhuaꞌ caꞌsarëhuaꞌ,” taꞌton huaꞌanëni ninararin. 8Inapochachin canpitantaꞌ noya cancantatomaꞌ, Sinioro oꞌmantacasoꞌ tahuëri ninacoꞌ. Nani yaꞌcaritëriarin. Napoaton ama sëtocosohuëꞌ. Chiníquën cancantocoꞌ. 9Ama piꞌpian tërantaꞌ iyaroꞌsaꞌ ninoꞌhuicosohuëꞌ, Yosë anaꞌintochinquëmaꞌ. Niꞌsárinpoaꞌ. Co huaꞌquiya quëranhuëꞌ oꞌmararin anaꞌintinpoaso marëꞌ. 10Niꞌcoꞌ iyaroꞌsaꞌ. Iráca pënëntonaꞌpiroꞌsaꞌ Sinioro nanamën aꞌchinpirinahuëꞌ. Pënëntohuachinara, aꞌnaquëni noꞌhuitonaꞌ, aparisitopi. Parisitaponaraihuëꞌ, ahuantopi. Co noꞌhuipihuëꞌ. 11Noya ahuantopi niꞌton, Yosëri nóya niꞌnin, tënëhuaꞌ. Copontaꞌ paꞌpi parisitërin, nitotëramaꞌ. Naꞌcon parisitaponahuëꞌ, chiníquën cancantaton, ahuantërin. Maꞌsha onpoaponahuëꞌ, Yosëri catahuarin noya noya pipicasoꞌ. Ina nohuanton, napoin quëran noya noya yonquirin. Yosë nosoroatonpoaꞌ naꞌcon catahuarinpoaꞌ, tënahuë. Napoaton chiníquën cancantatomaꞌ, ahuantocoꞌ.
12Naꞌcon iyaroꞌsaꞌ yonquicoꞌ noꞌtëquënáchin nonacamasoꞌ: “Paꞌsarahuë,” topatamaꞌ, pacoꞌ. “Co paꞌsarahuëꞌ,” topatamaꞌ, ama pacosohuëꞌ. Nani tahuëri noꞌtëquënáchin nontohuatamaꞌ, co “Yoscoarëꞌ,” taꞌcasoꞌ yaꞌhuërinhuëꞌ. Coꞌni maꞌsha tërantaꞌ isoroꞌpaquë yaꞌhuërinsoꞌ aꞌpitatëhuaꞌ nonpinacasoꞌ yaꞌhuërinhuëꞌ. Napoaton nani tahuëri noꞌtëquën noncoꞌ, Yosë anaꞌintochinquëmaꞌ.
13Aꞌnaquëmaꞌ maꞌsha onpohuatamaꞌ, Yosë nontocoꞌ catahuainquëmaꞌ. Noya cancantohuatamaꞌ, Yosë cantanën cantatomaꞌ: “Yosparinquën Sinioro,” itocoꞌ. 14Aꞌnaquëmaꞌ caniohuatamaꞌ, ansianoꞌsaꞌ amatocoꞌ Yosë nonchinaꞌ. “Quisocristo catahuainquën,” taꞌtonaꞌ, piꞌpian tomaquë pashichinquëmaꞌ. Ina quëran Yosë nonchinaꞌ anoyatacaso marëꞌ. 15Yaꞌipi cancanëma quëran huarëꞌ natëcasoꞌ yaꞌhuërin. “Yaꞌipi Sinioro nanitaparan,” topachinaꞌ, anoyatarin. Oshahuanpachinaꞌ, inantaꞌ inquitarin. 16Napoaton maꞌsona tërantaꞌ co noyahuëꞌ nipatëhuaꞌ, imarëhuasopita capini nishaꞌhuitahuaꞌ. “Ina marëꞌ casoꞌ oshahuanahuë,” nitahuaꞌ. Itohuaran capini Yosë nontahuaꞌ anoyachinpoaꞌ. Yaꞌipi co noyahuëꞌ yonquirëhuasopita naniantohuatëhuaꞌ, chiníquën ina nontohuatëhuaꞌ, naꞌcon catahuarinpoaꞌ. 17Niꞌcoꞌ. Iniasë canpoa pochachin niponahuëꞌ, chiníquën Yosë nontohuachina, natanin. “Naꞌa piyapiꞌsaꞌ Sinioro co imarinënquënhuëꞌ. Quëma nohuanton, ama oꞌnainsohuëꞌ,” itohuachina, cara piꞌipi naꞌcon co piꞌpisha tërantaꞌ oꞌnaninhuëꞌ. 18Ina quëran Yosë nontantahuachina: “Quëma nohuanton oꞌnaantaꞌin,” itohuachina, oꞌnaantarin. Sharoꞌsaꞌ papotantarin. Napoaton canpoantaꞌ noyápiachin cancantatëhuaꞌ, chiníquën Yosë nontahuaꞌ.
19Noya iyaroꞌsaꞌ nipënëncoꞌ. Aꞌnasoꞌ noꞌtën nanan nitotaponahuëꞌ, nisha cancantohuachina, aꞌnaya aꞌnayanquëmaꞌ pënëncoꞌ noꞌtëquën yonquiantaꞌin. 20Natëhuachinquëmaꞌ, chiminpachina co parisitomiatapihuëꞌ. Yaꞌipi oshanënaꞌ Yosëri inquitarin. Pënënamaꞌ niꞌton, noyápiachin cancantantapi huachi. Ina yonquiatomaꞌ, nipënëncoꞌ. Nani huachi.
Santiaco
Currently Selected:
Santiago 5: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.