Santiago 2
2
Yaꞌipi piyapiꞌsaꞌ nosoroaꞌhuaꞌ
1Quisocristo huaꞌanëntërinpoaꞌ. Inasáchin noya noya ninin. Ina imaramaꞌ niꞌton, ama iyaroꞌsaꞌ aꞌnapita nocancosohuëꞌ. Yaꞌipi piyapiꞌsaꞌ napopináchin nosorocoꞌ. 2-3Yosë chinotacaso marëꞌ niyontonpatamara, maꞌhuansoꞌ huëꞌpachina, paꞌyatëramaꞌ. Noyápiachin aꞌmorin. Naꞌa poꞌmoitëra oro quëran nininsoꞌ poꞌmorin. Ina nicatomaꞌ: “Huëquëꞌ iyasha,” itatomaꞌ, noyaquë chachin ahuënsëramaꞌ. Aꞌnaquënso nipirinhuëꞌ, co onpopinchin noyahuëꞌ aꞌmosahuaton huëꞌpachina, co onpopinchin noya niꞌnamahuëꞌ: “Inaquë huaniquëꞌ. Nohuantohuatan, noꞌpaquë tërantaꞌ huënsëquëꞌ,” itëramaꞌ. 4¿Coꞌta ina pochin nipatamaꞌ, co napopianachin nosororamahuëꞌ? Cancanënpoa quëran huarëꞌ Yosë niꞌsarinpoaꞌ nipirinhuëꞌ, co ina pochin yonquiramahuëꞌ. Co noyahuëꞌ yonquiramaꞌ.
5Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ. 6Canpitaso nipirinhuëꞌ, saꞌahua nininsopita co onpopinchin nosororamahuëꞌ. Maꞌhuanoꞌsasoꞌ nonpintatënënquëmaꞌ, ihuarinënquëmaꞌ. Aparisitërinënquëmaꞌ. Coisëquë shaꞌhuirapirinënquëmaꞌ. ¿Ina nipirinhuëꞌ paꞌyataramaꞌ ti? 7Quisocristosoꞌ nóya niponahuëꞌ, tëhuapi: “Co noyahuëꞌ inasoꞌ,” toconpi. Imarëhuaꞌ niꞌton, Quisocristo piyapinënpitanpoaꞌ canpoasoꞌ. Napoaton ama maꞌhuanoꞌsaꞌ naꞌcon naꞌcon paꞌyatocosohuëꞌ.
8Yosë quiricanën quëran noya noya pënëninpoaꞌ. “Quëmaora ninosororanso pochachin aꞌnapitantaꞌ nosorocoꞌ,” itërinpoaꞌ. Yaꞌipi piyapiꞌsaꞌ nosorohuatamaꞌ, noya nisaramaꞌ. 9Nipirinhuëꞌ, aꞌnasoꞌ nocanpatamaꞌ, co noyahuëꞌ nisaramaꞌ. Co Yosë natëramahuëꞌ niꞌton, oshahuanaramaꞌ. 10Yosë chachin pënëninpoaꞌ. “Noya natërai,” topiramahuëꞌ, piꞌpian tërantaꞌ co natëhuatamahuëꞌ, oshahuanaramaꞌ. Anaꞌintinquëmasoꞌ yaꞌhuërin. 11“Saꞌahuanpatamaꞌ, ama aꞌna sanapi monshitocosohuëꞌ,” tënin Yosë. Naporahuaton, “Ama piyapi tëpacosohuëꞌ,” tënin antaꞌ. Co monshihuanaponahuëꞌ, piyapi tëpahuatan, oshahuanaran. Co Yosë natëaranhuëꞌ. 12Quisocristo imapatëhuaꞌ, nasha nanan shaꞌhuitërinpoaꞌ. Nichaꞌërinpoaꞌ niꞌton, nanitërëhuaꞌ nóya nicacasoꞌ. Ina nanan chachin yonquiaton, aꞌna tahuëri Yosë coisë pochin nontarinpoaꞌ. Niꞌton, piyapi nosoroatomaꞌ, noya nicoꞌ, noya nontocoꞌ. 13Co piyapiꞌsaꞌ nosorohuatamahuëꞌ, ayaroꞌ tahuëri Yosëntaꞌ co nosoroarinquëmahuëꞌ. Napoaton “Yosë naꞌcon nosororinpoaꞌ,” taꞌtëhuaꞌ, aꞌnapita nosoroaꞌhuaꞌ. Ina quëran ayaroꞌ tahuëri co anaꞌintarinpoahuëꞌ.
Noya nicacasoꞌ yaꞌhuërin
14“Cantaꞌ Yosë imarahuë,” tapomarahuëꞌ, co noyahuëꞌ nipatamaꞌ, topinan quëran nonsaramaꞌ. Ina pochin cancantohuatamaꞌ, co chaꞌësaramahuëꞌ. 15Niꞌcoꞌ. Aꞌna quëmapihuëꞌ nipon, sanapihuë nipon Quisocristo imanaꞌpi, capa capacasoꞌ, capa aꞌmocasoꞌ nipachina, catahuacasoꞌ yaꞌhuërin. 16Co catahuarihuarahuëꞌ: “Noya yaꞌhuëquëꞌ. Ama sëhuënquësohuëꞌ. Ama tana natanquësohuëꞌ,” itapomarahuëꞌ, co aꞌmocaisoꞌ, cosharoꞌ, inapita quëtohuatëhuahuëꞌ, ¡topinan quëran napotarihuaꞌ! 17Inapochachin “Cantaꞌ Yosë natërahuë,” tapomarahuëꞌ, co piyapiꞌsaꞌ catahuahuatamahuëꞌ, topinan quëran nonsaramaꞌ. Co tëhuënchachin imaramahuëꞌ.
18Aꞌnaquëmaꞌ tapomaꞌ nimara: “Quëmasoꞌ ‘Yosë imarahuë,’ taꞌton, chinotëran. Caso nipirinhuëꞌ noya ninahuë. Quëmasoꞌ Yosë chinotaponahuëꞌ, co noya nipatanhuëꞌ, topinan quëran nonsaran. Caso nipirinhuëꞌ, noya ninahuëso marëꞌ natërahuësoꞌ yaꞌnoarin,” tapomaꞌ. 19“Aꞌnaíchin Yosë yaꞌhuërin,” ¿tënan ti? Noꞌtëquën nonan. “Yosë yaꞌhuarin mini,” topi sopairoꞌsantaꞌ. Ina nitotopi niꞌton, tëꞌhuatatonaꞌ, ropa ropatapi. Napoaponaraihuëꞌ, co Yosë imapihuëꞌ. Co napopiso marëꞌ Yosëꞌpaꞌ paꞌsapihuëꞌ. 20¡Coꞌchi noꞌtëquën yonquiranhuë paya! Co noya nipatanhuëꞌ, “Cantaꞌ imarahuë,” topiranhuëꞌ, topinan quëran nonsaran. 21Tata Apraan yonquiquëꞌ. Yosëri nontohuachina, “Ama huiꞌnan apiratocosohuëꞌ,” itohuachina, Isaco quëparin. Huiꞌnin niponahuëꞌ, co apiratërinhuëꞌ. Yosë chinotacaso marëꞌ yatëpapirinhuëꞌ, Yosërisoꞌ nichaꞌërin. ¡Natërinso marëꞌ Yosëri noya niꞌnin! 22“Yosë noꞌtëquën nontërinco,” taꞌton, Apraani natërin. Natëton, noya noya imarin. Co topinan quëran chinotërinhuëꞌ. Yaꞌipi cancanën quëran huarëꞌ natëton, noya imarin. 23Yosë quiricanënquë ninshitërin: “ ‘Yosë noꞌtëquën nontërinco,’ tëninso marëꞌ Yosëri noya niꞌnin,” tënin. “Inasoꞌ Yosërëꞌ nipayarin,” tënin antaꞌ. Noꞌtëquën naporin.
24Co topinan quëran nonacasoꞌ yaꞌhuërinhuëꞌ, tënahuë. Yosë natëtëhuaꞌ, noya nipatëhuaꞌ, noya imarëhuaꞌ. Ina marëꞌ Yosë noya niꞌsarinpoaꞌ. 25Inapochachin Nacapantaꞌ oshahuanaꞌpi niponahuëꞌ, Yosë yonquiaton, noya ninin. Cosoi aꞌparinsopita huëꞌpachinara, noya aꞌpairin ama inimicoroꞌsari tëpacaiso marëhuëꞌ. Ina quëran poꞌoana quëran catahuarin chaꞌëcasoꞌ. Ina marëꞌ Yosëri noya niꞌnin. 26Huaꞌyanënpoꞌ capa nipachina, co nanpirëhuëꞌ. Inapochachin topinan quëran nonpatëhuaꞌ, co noya cancantohuatëhuahuëꞌ, co Yosë natërëhuahuëꞌ. Chimipi pochin cancantatëhuaꞌ, co tëhuënchachin imarëhuahuëꞌ.
Currently Selected:
Santiago 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.