Oseas 11
11
Piyapinënpita Yosëri nosororinsoꞌ
1Sinioro naporin:
“Israiro nacion ipora caniaritapon, huaꞌhuishin pochin ninin.
Naporo chachin cariso huiꞌnahuë pochin nicato, nosororahuë.
Iquipitoquë yacapatopirinhuëꞌ,
ina quëran pipicaso marëꞌ huiꞌnahuë përarahuë.
2Israiroꞌsaso naꞌaro përápirahuëꞌ,
naꞌcon naꞌcon aquënanpirinaco.
Inapitasoꞌ piyapinëhuëpita nipirinahuëꞌ,
mamanshi moshacaiso marëꞌ maꞌsha tëpapi.
Yonarin pochin nininsonta aꞌpërahuatona moshapi.
3-5Napopirinahuëꞌ,
cari chachin israiroꞌsa ira aꞌnotërëso pochin nitërahuë.
Huaꞌhuaroꞌsa iratacaso marëꞌ aꞌchintërëso pochin nitërahuë.
Sanapi huaꞌhuin nosoroaton paꞌpoyarin, nocomarin, napotërin.
Inapochachin carinta nitopirahuëꞌ,
co tahuërëtatonacohuëꞌ, aꞌporinaco.
Napopiso marëꞌ Iquipitoquë chachin paꞌmantaponaꞌ.
Naporahuaton asiriaroꞌsari huaꞌanëntapon.
6Ninanonënapitaquëntaꞌ, inimicoroꞌsari yaꞌcontatona ahuëaponaꞌ.
Noyá niacorapipirinahuëꞌ, ataꞌhuantaponaꞌ.
Maꞌpitaso nicacaisoꞌ yonquipirinahuëꞌ,
inari naꞌintarin taꞌhuantaponaꞌ.
7Piyapinëhuëpitasoꞌ, co yatahuërëtërinacohuëꞌ:
‘Yosëso chini chiníquën nanantërin,’ taponaraihuëꞌ,
co tëhuënchachin tëꞌhuatërinacohuëꞌ.
8Canpitaso israiroꞌsanquëmaꞌ.
Noꞌhuípiro mini nipiramahuëꞌ,
¡Co nanitërahuë aꞌpomiataꞌhuanquëmasoꞌ!
Atoma, Sipoin, inapita ninanoroꞌsasoꞌ,
co noyahuëꞌ nipiso marëꞌ iráca ataꞌhuantërahuë.
Inapita pochachin ataꞌhuantaꞌhuanquëmasoꞌ,
¡coꞌchi nanitarahuë paya!
¡Nosorochináchin cancantëranquëmaꞌ!
9Paꞌpi noꞌhuitopirahuë mini, ahuantarahuë.
Inapoato co ataꞌhuantantaponquëmahuëꞌ.
Caso Yosëco. Co piyapicohuëꞌ.
Noyasáchin nicato canpita huáncana nisarahuë.
Co ataꞌhuantaꞌhuanquëmaso marëhuëꞌ, oꞌmarahuë,” tënin. 10-12(-)
Currently Selected:
Oseas 11: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
