Gálatas 5

Quisocristo ocoirinpoasoꞌ

1Quisocristo nichaꞌërinpoaꞌ inasáchin yonquiatëhuaꞌ noya cancantacaso marëꞌ. Ina imapatëhuaꞌ, catahuarinpoaꞌ noya nicacasoꞌ. Napoaton ama naquëranchin iráca pënëntërinsoꞌ imahuasohuëꞌ. Quisocristoráchin yonquiaꞌahuaꞌ.

2Ca Paonoco noꞌtëquën shaꞌhuitëranquëmaꞌ. Marca niacotohuatamaꞌ, co Quisocristoíchin yonquiaramahuëꞌ. Ina quëran co anoyacancantarinquëmahuëꞌ. 3Naquëranchin shaꞌhuitantaranquëmaꞌ. Marca niacotohuatamaꞌ, yaꞌipi cotio pënëntërinsoꞌ natëcasoꞌ yaꞌhuërin. 4“Noꞌtëquën natëhuatëhuaꞌ, Yosë noya niꞌsarinpoaꞌ,” topatamaꞌ, co Quisocristo imaramahuëꞌ. Yosë inaora nohuanton, nosoropirinquëmahuëꞌ, Quisocristo naniantohuatamaꞌ, co huachi catahuarinquëmahuëꞌ. 5Nipirinhuëꞌ, ina imapatëhuaꞌ, Ispirito Santo catahuarinpoaꞌ. “Quisocristoíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ, tënëhuaꞌ. Oshanënpoaꞌ inquitatonpoaꞌ, tëhuënchachin noyápiachin cancan quëtarinpoaꞌ. Ina ninarëhuaꞌ. 6Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

7Canpitaso noya imasapiramahuëꞌ, ¿inta nonpintatënquëmaꞌ, nisha ayonquirinquëmaꞌ? tënahuë. 8Co ina pochin Yosë aꞌchintërinpoahuëꞌ. Huëntonënquë ayaꞌconinpoaꞌ niꞌton, cancanënpoaquë nontarinpoaꞌ. Noꞌtëquën yonquicasoꞌ nohuantërin. 9Niꞌcoꞌ iyaroꞌsaꞌ. Pan nipatëra, piꞌpian ahuëpocatërinsoꞌ acotohuachinara, yaꞌipi sëꞌcotërin. Inapochachin piꞌpian tërantaꞌ nonpin nanan yonquihuatamaꞌ, co huaꞌquiya quëranhuëꞌ yaꞌipinquëmaꞌ nitapicancanaramaꞌ. 10Caso nipirinhuëꞌ natëranquëmaꞌ. Noꞌtëquën yonquiaramaꞌ, tënahuë. Sinioro catahuarinquëmaꞌ ama nisha nisha yonquicamaso marëhuëꞌ. Nipirinhuëꞌ, inso tërantaꞌ nisha aꞌchintohuachinquëmaꞌ, Yosëri anaꞌintarin. Chiníquën nanantopiriontaꞌ, nonpintohuachinquëmaꞌ, Yosëri anaꞌintarin.

11Aꞌnaquën nonpinapirinaco. —Paonontaꞌ quiya pochin aꞌchinin. “Marca niacotocoꞌ. Co iráca pënëntërinsoꞌ natëhuatamahuëꞌ, co Yosë noya niꞌsarinquëmahuëꞌ,” tënin Paonontaꞌ, toconpi. Co napopirahuëꞌ, nonpinapirinaco. Ina pochin aꞌchinahuë naporini, co cotioroꞌsaꞌ noꞌhuiitonacohuëꞌ. “Quisocristo corosëquë chiminin. Inasáchin imapatëhuaꞌ, anoyacancantarinpoaꞌ,” itërahuëso marëꞌ ipora huantaꞌ aparisitarinaco. 12Marca niacotacaisoꞌ naꞌcon naꞌcon yonquipi niꞌquëhuarëꞌ, yaꞌipi niyashitëtochinapi naporini, noya noya niitonahuëꞌ.

13Ina pochin, iyaroꞌsaꞌ, nontaranquëmaꞌ. Canpitasoꞌ Quisocristo nohuantërinquëmaꞌ. Nichaꞌërinquëmaꞌ ama huachi tëꞌhuarëꞌquëmaꞌ yaꞌhuëcamaso marëhuëꞌ. Co huachi yaꞌipi iráca pënëntërinsoꞌ imacasoꞌ yaꞌhuëpirinhuëꞌ, co Yosë nohuantërinhuëꞌ oshahuanacamasoꞌ. Quisocristo imapatamaꞌ, co noyahuëꞌ yonquiramasoꞌ naniantacasoꞌ yaꞌhuërin. Ninosoroatomaꞌ, nicatahuacoꞌ noya cancantacamaso marëꞌ. Aꞌnapita naꞌcon naꞌcon yonquicoꞌ. 14Iráca Yosë pënëntohuachina, ninosorocasoꞌ naꞌcon naꞌcon nohuantërin. “Quëmaora ninosororanso pochachin aꞌnapitantaꞌ nosorocoꞌ,” tënin. 15Ninoꞌhuihuatamaꞌ, paꞌpi co noyahuëꞌ nisaramaꞌ. Tanan niꞌniroꞌsaꞌ niquëtëpiso pochin cancantaramaꞌ. Nipinocasontaꞌ co noyahuëꞌ. Ina pochin nipatamaꞌ, niꞌcona yaꞌipinquëmaꞌ nitapicancantamaꞌ.

Ispirito Santo catahuarinpoasoꞌ

16Ispirito Santo natëcoꞌ catahuainquëmaꞌ, tënahuë. Ina catahuahuachinquëmaꞌ, co noyahuëꞌ yonquiramasoꞌ naniantaramaꞌ. Inapita naniantatomaꞌ, nóya nisaramaꞌ. 17Ispirito Santo noyasáchin ayonquiinpoasoꞌ nohuantopirinhuëꞌ, ipora huantaꞌ co noyahuëꞌ yonquirëhuaꞌ. Ispirito Santoso nipirinhuëꞌ pënëninpoaꞌ ama ina pochin cancantacaso marëhuëꞌ. Co noyahuëꞌ yonquihuatëhuaꞌ, co nanitërëhuahuëꞌ Ispirito Santo natëcasoꞌ. Catoꞌ cancan pochin yaꞌhuëtërinpoaꞌ. Itohuara capini nipatëtatë pochin nipi. Noya cancantacasoꞌ nohuantopirëhuahuëꞌ, canpoara co nanitërëhuahuëꞌ noya nicacasoꞌ. 18Cancanënpoaquë Ispirito Santo nontërinpoaꞌ maꞌsona noya nicacasoꞌ. Ina natëhuatëhuaꞌ, co huachi iráca pënëntërinsoꞌ camairinpoahuëꞌ. Ispirito Santo nohuantërinso chachin yonquiarihuaꞌ.

19Piyapiꞌsaꞌ inahuara co nanitopihuëꞌ Yosëíchin yonquicaisoꞌ. Co noyahuëꞌ yonquipisopita nitotërëhuaꞌ. Co noyahuëꞌ yonquihuachinara, co noyahuëꞌ nipi. Yamonshihuanpi, taparoꞌ nonpi, sanapi sëꞌhuachinachin cancantopi. 20Co noyahuëꞌ yonquihuachinara, mamanshi moshapi, pënotopi, co nanan anoyatopihuëꞌ, co napopianachin yonquipihuëꞌ. Aꞌpitatonaꞌ, aꞌnaroáchin noꞌhuitopi, nipinopi. Aꞌna huënton aꞌna huënton co noyahuëꞌ ninicatonaꞌ yaꞌhuëpi. Nisha nisha yonquiatonaꞌ, yaꞌhuëpi. 21Co noyahuëꞌ yonquihuachinara, aꞌnapita maꞌshanënpita noyapatonaꞌ, noꞌhuipi. Noꞌpipi, pitaroꞌsaquë caꞌmiatopi, oꞌomiatopi, aꞌnaratipita nipi. Iráca pënënanquëmaꞌ. Iporantaꞌ pënëantaranquëmaꞌ. Inapohuatamaꞌ, co Yosë huaꞌanëntërinquë yaꞌconaramahuëꞌ. Ina pochin nipisopita co Yosëꞌpaꞌ pantarapihuëꞌ.

22Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ. 23Ispirito Santo natëhuatëhuaꞌ: “Casoꞌ noya noyaco,” co tëcarihuahuëꞌ. Sano piyapi nicarihuaꞌ. Co noyahuëꞌ nicacasoꞌ yonquipirëhuahuëꞌ, ina catahuarinpoaꞌ naniantacasoꞌ. Inapohuatëhuaꞌ, Yosë noya niꞌsarinpoaꞌ. Co pënëinënpoasoꞌ yaꞌhuaponhuëꞌ. 24Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ. 25Ispirito Santo yaꞌcoancantatonpoaꞌ, catahuarinpoaꞌ noya nicacasoꞌ niꞌquëhuarëꞌ, maꞌsona tërantaꞌ shaꞌhuitohuachinpoaꞌ, noya natëahuaꞌ.

26Ama noya ninëhuaso marëꞌ aꞌnapita nocahuansohuëꞌ. Ninocanpatëhuaꞌ, aꞌnaroáchin ninoꞌhuiarihuaꞌ. Itohuara capini ninoyapatëhuaꞌ, ninoꞌhuiarihuaꞌ. Ama ina pochin cancantahuasohuëꞌ.

Currently Selected:

Gálatas 5: cbt

Highlight

Copy

Compare