Éxodo 32
32
1Israiroꞌsaso Moisësë huaꞌquirinso niꞌsahuatonaꞌ, Aaron paahuapi:
—Moisësë Iquipito quëran ocoipirincoihuëꞌ. ¿Intohuaso paꞌmara? Co nitotëraihuëꞌ. Napoaton catahuaincoiso marëꞌ, mamanshi nitocoi, itopi.
2—Saꞌamaꞌ, huiꞌnamapita, inapita oro quëran pëꞌtëhuëratë nipisoꞌ pëꞌtënpi. Ina nipachin maꞌparahuatoma quëshico, itërin Aaroni.
3Napotohuachina yaꞌipiya quëran quëpatopi. 4Aaronsoꞌ ina masahuaton, asoquirin. Nani soquihuachina huaꞌnatëquë sacataton, toroaꞌhuaya nonanin. Tënihuachina yaꞌipiya quëran nonca topi:
—¡Iso mini yosënënpoa Iquipito quëran ocoirinpoasoꞌ! topi.
5Ina niꞌsahuaton Aaronsoꞌ, toroaꞌhuaya nonaninsoꞌ notënanquë artaro nitërin. Nani tënihuachina chiníquën nonsahuaton shaꞌhuirin:
—¡Tashiraya Sinioro marëꞌ pita niahuaꞌ! itërin.
6Tahuëririnquë tashíramiachin capayatahuatonaꞌ, pëꞌtahuaroꞌsa tëpapi. Oshanëna marëꞌ itopisosoꞌ, yaꞌipi ahuiquitopi#32.6 Yaꞌipi ahuiquitopi topachinara: Co capacaiso marëꞌ anpiatona napopihuëꞌ. Oshanëna inquicaiso marëꞌ inapopi.. Nanan anoyatopiso#32.6 Nanan anoyatopiso marëꞌ topachinasoꞌ: Tomaquënáchin pochin ahuiquitopi. Noshinënsoꞌ caꞌpi. marëꞌ itopisonta tomaquën ahuiquitopi. Inaporahuatona coshatopi. Coshatatonaꞌ, oꞌosapi huachi. Naporapi quëran caniaritopi aꞌnaratipita co noyahuëꞌ nicatonaꞌ, capa cancantacaisoꞌ. 7Ina nicaton Siniorosoꞌ Moisësë itapon:
—Nohuaramarahuaton, piyapiꞌsa nimaquëꞌ. Inapitasoꞌ Iquipito quëran ocoipiranhuëꞌ, co natëtonacohuëꞌ nitapicancanpi. 8Pënënahuësopita naniantatonaꞌ, aꞌnaroáchin pëshonpi huachi. Oro asoquirahuatona moshacaiso marëꞌ, toroaꞌhuaya nonanpi. Ina chinotacaiso marëꞌ pëꞌtahuanëna tëparahuatonaꞌ, ahuiquitopi. Nani chinotahuatonaꞌ: “¡Iso mini yosënënpoa Iquipito quëran ocoirinpoasoꞌ!” toconpi, itërin.
9Ina tosahuaton, taantarin:
—Israiroꞌsa niꞌsápato: Tëhuënchachin inapitasoꞌ, co natantochináchinhuëꞌ cancantopi, tënahuë. 10¡Ama manta tëquësohuëꞌ. Isopita paꞌpi anoꞌhuitërinaco niꞌton, apiramiachin tiquichinaꞌi topirahuë! Inapita tiquirahuato, quëma shiparinpita quëran noya noya nacion ocoiarahuë, itërin.
11Moisësëso napoaponahuëꞌ, noyasha nontaton Sinioro itapon:
—Ama Sinioro napotëquësohuëꞌ, chiníquën nanantaton nani Iquipito quëran israiroꞌsa ocoiran. 12Inapita ataꞌhuantohuatan, iquipitoroꞌsa pinosarinquën: “Yosëso israiroꞌsa co quëꞌyarinhuëꞌ. Napoaton motopiroꞌsa parti ataꞌhuantacaso marëꞌ, isëran ocoirin, tosapi. Ina niꞌton, ahuantëquëꞌ. Ama inapita maꞌsha onpotëquësohuëꞌ. 13Piyapinënpita: Apraan, Isaco, Cacopo, inapita yonquiaton shinpita nosoroquëꞌ. ‘Caso Yosëco niꞌto, catahuaranquëmaꞌ. Shiparimapita tayora nápo naꞌapon. Iso noꞌpa chachin inapitari huaꞌanëntomiataponaꞌ,’ itëran. Ina yonquiquëꞌ,” itërin.
14Ina natanaton, Sinioroso co huachi nohuantërinhuë piyapinënpita maꞌsha onpotacasoꞌ. 15Ina quëran Moisësë oꞌmarin. Naꞌpitëaꞌhuaroꞌsaquë ninshitopinan Yosë pënëntërinsoꞌ quëmarin. Ina naꞌpitëaꞌhuaroꞌsasoꞌ, cato quëran chachin ninshitopinan. 16Inaso naꞌpitëaꞌhuaroꞌsaꞌ, Yosëri chachin taparahuaton, ninshitërin. Oꞌmananquë Cosoi marimantarin.
17Noncaropisoꞌ natanahuaton, Cosoiso Moisësë itapon:
—¡Israiroꞌsa chiníquën noncarorapi! ¿Quira nisamarai ti? itërin.
18—Ahuëtatona canatohuachinara, co ina pochin cantapihuëꞌ. Canahuachinarantaꞌ, co ina pochin naꞌnëpihuëꞌ. Noꞌpitona naporapi caso natanahuë, tënin Moisësë.
19Nani yaꞌcaritohuachina, toroaꞌhua nonanpisoꞌ, nansapisoꞌ, inapita niꞌquimarin. Paꞌpi noꞌhuitaton, naꞌpitëaꞌhuaroꞌsa motopi nanimarinꞌpaꞌ tëꞌyatahuaton, paꞌpaarin huachi. 20Ina quëran toroaꞌhua nonanpisoꞌ masahuaton pënquë tëꞌyatërin. Naporahuaton pëꞌsanin. Noꞌmo noꞌmoshin nipachina, iꞌquë opoitërin. Nani opoitohuachina, ina iꞌsha oꞌocaiso marëꞌ israiroꞌsa camairin.
21Ina quëran Aaron itapon:
—¿Maꞌta onpotërinquën isopita niꞌton, mamanshi nicaton napoin aoshahuanan? itërin.
22—Ama iya noꞌhuitëquësohuëꞌ. Israiroꞌsa co noyahuëꞌ cancantopisoꞌ, nani nitotëran. 23-24Huëcapairahuatonaco: “Moisësë Iquipito quëran ocoipirincoihuëꞌ, ¿Intohuaso paꞌmara? Co nitotëraihuëꞌ. Napoaton catahuaincoiso marëꞌ, mamanshi nitocoi,” itërinaco niꞌton: “Oro yaꞌhuëtohuachinquëmaꞌ, quëshico,” itërahuë. Ina quëran quëpachinara pënquë tëꞌyatërahuë, tëꞌyatohuatëra ¡Iso toroaꞌhuaya pipirin! toconin.
25Moisësëri niꞌpirinhuëꞌ, israiroꞌsaso noꞌpitonaꞌ, aꞌnaratipita paꞌpi co noyahuëꞌ nisapi. Aaroni atëhuërin niꞌton, inimiconënpitari tëhuayatochináchin nisapi. 26Napoaton, yaꞌhuëpiquë yaꞌconpitaquëchin huanirahuaton, chiníquën përatërin:
—¡Sinioro natëhuatamaꞌ, huëntaco isëquë! tënin.
Napohuachina, yaꞌipi nihuiroꞌsari paapapi.
27—Naporin Sinioro, chinotërëhuasoꞌ: “Aꞌnaya aꞌnayanquëma sahuëninëma macoꞌ. Paantarahuatomaꞌ, israiroꞌsa co noyahuëꞌ nisapisoꞌ, ahuëconcoꞌ. Yaꞌhuëpiquë yaꞌcontahuatomaꞌ, tëparaꞌpiacoꞌ. Iyama nisapirinhuëꞌ tëpacoꞌ. Amiconëmaꞌ, niyacaparamasoꞌ, inapitanta tëpacoꞌ,” tënin, itërin Moisësëri.
28Napotohuachina, anaꞌintacaiso marëꞌ nihuiroꞌsa paꞌpi. Cara huaranca quëmapiꞌsa pochin tëpapi. 29Naporoꞌ Moisësëri itapon:
—Ipora quëran huarëꞌ Yosë catahuamiatërinquëma huachi. Iyama nisapirinhuëꞌ, anaꞌintëramaꞌ. Huiꞌnamanta napotëramaꞌ. Co noyahuëꞌ nipiso marëꞌ anaꞌintërama niꞌton, Yosë nanan quëtërinquëma ina marëꞌ sacatacasoꞌ, itërin.
30Tahuëririnquë Moisësësoꞌ, yaꞌipi israiroꞌsa amatahuaton itapon:
—Canpitaso panca tëhuëatoma oshahuanamaꞌ. Iporasoꞌ naquëranchin Sinioro yaꞌhuëarinquë paantaꞌhuaso yaꞌhuërin. Oshanëma marëꞌ nontontaꞌi, tapona yainquitápirinquëmahuëꞌ, itërin.
31-32Inapoaton naquëranchin Moisësë motopiꞌpaꞌ panantarin. Inaquë Sinioro nontaton itapon:
—Tëhuënchachin piyapinënpita oshahuanpi. Mamanshi oro quëran nicatona moshapi niꞌton, oshahuanpi. Ina nipirinhuëꞌ, oshanën inquitaton, nóya niantaquëꞌ. Coꞌsoꞌ yainapotohuatanhuëꞌ, nininëhuë quiricanënquë#32.31-32 Quiricanënquë topachina: Nanpipisopita nininën acotërinso yonquiaton naporin. ninshitëransoꞌ tapiquë#32.31-32 Tapiquë topachina: “Pahuanpirinhuë chiminaꞌhuasoꞌ, chiminchaꞌin huachi,” taꞌton naporin., itërin.
33-34—Insosona tëhuëtatonco oshahuanpachin, inasáchin quiricanëhuë quëran tapiarahuë. Napoaton paꞌmaquëꞌ. Shaꞌhuitëranquënsoꞌ noꞌpaquë israiroꞌsa quëpaquëꞌ. Anquëninëhuë aꞌnotarinquën noꞌtëquën pacacaso marëꞌ. Napoaponahuëꞌ, anaꞌintaꞌhuaso tahuëri nanihuachin, anaꞌintarahuë. Co noyahuëꞌ nipiso marëꞌ noꞌtëquën anaꞌintarahuë huachi, itërin.
35Ina tosahuaton, Siniorori israiroꞌsa anaꞌintërin. Toroaꞌhua Aaroni nonaninsoꞌ moshapi niꞌton, chiníquën canio tëꞌyanantërin.
Currently Selected:
Éxodo 32: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
