Éxodo 20

Shonca nanan pënëntërinsoꞌ

1Yosë chachin pënëntaton naporin:

2“Ca Sinioroco huaꞌanëntaranquëmaꞌ. Iquipitoquë chiníquën asacatopirinënquëmahuëꞌ, nani ocoiranquëma huachi. Apira noya natëamacoso marëꞌ shaꞌhuichinquëma natancoꞌ.

3Casáchin Yosëco niꞌto, casáchin chinotoco.

4Ama manta nonanpisoꞌ nicatoma moshacosohuëꞌ: Inápaquë yaꞌhuërinsoꞌ, isoroꞌpaquë, acoporoquë, marëquë, co inaquëpita yaꞌhuërinso nonanatomaꞌ, moshacamaso yaꞌhuërinhuëꞌ. Ama manta mamanshi chinotocosohuëꞌ.

5Ama monshorahuatoma inapita moshacosohuëꞌ. Ama piꞌpian tëranta chinotocosohuëꞌ. Casáchin Sinioroco niꞌto, aꞌpitëranquëmaꞌ. Co natëhuatamacohuëꞌ, anaꞌintaranquëma huachi. Huiꞌnamapita, shiparimapita, huiꞌnama shinpitaquë huarëꞌ anaꞌintarahuë.

6Nosoroatomaco pënënanquëmasopita natëhuatamaso nipirinhuëꞌ, carinquëmanta nosoroaranquëmaꞌ. Shiparimanta nosoroarahuë. Huaranca shimapita huënton yaꞌhuëaquë huarëꞌ nosoroato catahuarahuë.

7Ama topinan quëran chinotocosohuëꞌ. Topinan quëran chinotohuatamaco, oshahuanaramaꞌ. Maꞌsona shaꞌhuihuatamaꞌ, ama nonpinatomaꞌ: ‘Yoscoarëꞌ,’ tocosohuëꞌ, anaꞌintotënquëmaꞌ.

8Nani simana aꞌna tahuëriraꞌ yonquiamacoso marëꞌ chinotocoꞌ.

9Saota tahuëri noya sacatocoꞌ.

10Tahuëririnquëso napoaponahuëꞌ, ca yonquiamacoso marëꞌ chinotaramaꞌ. Co naporoso sacataramahuëꞌ. Co huiꞌnamapita tëranta sacatarinhuëꞌ. Piyapinëmapita, pëꞌtahuanëmapita inapitanta co sacatacaiso yaꞌhuërinhuëꞌ. Co nisha piyapiroꞌsa tërantaꞌ, yacaparimasopita asacataramahuëꞌ.

11Saota tahuëri quëran yaꞌipi acorahuësopita tënirahuë. Inápaquë, isoroꞌpaquë, marëquë, inaquëpita yaꞌhuërinso tënirahuë. Tahuëririnquë chinotërahuë. Napoaton, ina tahuëri noya nicato, chinoto tahuëri acorahuë: Naporo tahuëri chinotatomaꞌ, casáchin yonquico.

12Tatama noya nicatoma natëcoꞌ. Mamamanta natëcoꞌ. Natëhuatamaꞌ, naꞌcon catahuaranquëmaꞌ. Canaan noꞌpaꞌ quëtohuatënquëmaꞌ, huaꞌqui inaquë noya yaꞌhuaramaꞌ.

13Ama piyapi tëpacosohuëꞌ.

14Nimapatamaꞌ, ama nitëhuananpitocosohuëꞌ.

15Ama manta ihuatocosohuëꞌ.

16Ama piyapi nonpinapicosohuëꞌ.

17Ama aꞌnapita maꞌshanën noyapatocosohuëꞌ: Saꞌinaꞌ, piyapinënapita, toronënaꞌ, moranënaꞌ, inapita co noyapatamaso yaꞌhuërinhuëꞌ. Co maꞌshanëna tëranta noyapatamaso yaꞌhuërinhuëꞌ,” itërin Yosëri israiroꞌsa pënënaton.

Israiroꞌsa paꞌyanpisoꞌ

18Noninsoꞌ, huiratërinsoꞌ, carniro pomon pihuipisoꞌ, inapita natanahuatonaꞌ, israiroꞌsasoꞌ paꞌpi tëꞌhuatopi. Oꞌcoriꞌ, pën, conaiꞌ, inapitanta quënanatonaꞌ, paꞌpi paꞌyanpi. Paꞌyanatona co nohuantopihuëꞌ yaꞌcaritacaisoꞌ. 19Napoaton Moisësë, itopi:

—Ama huachi Yosëso nonchincoisohuëꞌ. Chiminpatoi. Quëmari natanaton shaꞌhuitocoi natëi, itopi.

20—Ama paꞌyancosohuëꞌ, Yosë oꞌmarin tëniinquëmaso marëꞌ. Ina pochin yaꞌnotërinquëmaꞌ, ina tëꞌhuatatoma ama oshahuanamaso marëhuëꞌ, itërin.

21Israiroꞌsasoꞌ, aquëranchin notëapi. Naporoꞌ Moisësësoꞌ, Yosë noninsoꞌ natanacaso marëꞌ chitoro yara yaráchin nininquë yaꞌconin. Inaquë piyapiꞌsa shaꞌhuitacaso marëꞌ Yosëri nani maꞌsha pënënarin.

Onpoinsona artaro nicacasoꞌ shaꞌhuirinsoꞌ

22Siniorori, Moisësë itapon: “Apira shaꞌhuitaranquënsoꞌ, israiroꞌsa shaꞌhuitëquëꞌ: ‘Nani inápa quëran nontëranquëmasoꞌ natanamaꞌ. 23Ama mamanshi ca pochin chinotamaso marëꞌ nicosohuëꞌ. Oro, prata, co inapita quëran nicacaso yaꞌhuërinhuëꞌ. 24Chinotamacoso marëꞌ artaro yanipatamaꞌ, noꞌpa quëran nicoꞌ. Inaquë oshanëma marëꞌ pëꞌtahuanëmaꞌ tëparamasoꞌ, yaꞌipi ahuiquitocoꞌ. Nanan anoyatërëhuaso marënta tëparamasoꞌ, inaquë chachin piꞌpian ahuiquitocoꞌ. Insëquësona chinotamacoso huayonahuëquë inapohuatamaꞌ, noya niꞌsaranquëmaꞌ. Oꞌmarahuato, nani maꞌsha ninamaquë catahuamiataranquëmaꞌ. 25Naꞌpi quëran yanipatamasoꞌ, ama patëtopinan naꞌpi quëran nicosohuëꞌ. Huaꞌnaquë naꞌpi patëtohuachinara, co huachi artaro marëꞌ noyahuëꞌ. 26Naporahuaton, ina nipatamaꞌ, ama nanpënahuan nicosohuëꞌ. Piyapiꞌsa máquëma tëranta co noya imotëramasohuëꞌ niꞌchinquëmaꞌ, tënin,’ itëquëꞌ,” itërin.

Currently Selected:

Éxodo 20: cbt

Highlight

Copy

Compare