Éxodo 13

1-16(-)

Yosëri chachin israiroꞌsa quëparinsoꞌ

17Iquipito copirnori israiroꞌsa aꞌpahuachina, Yosëso yonquiaton naporin: “Israiroꞌsa noꞌtën ira quëpatohuato, huiristinoꞌsa parti cancoanpi. Canconpachinaꞌ, huiristino sontaroꞌsari yaahuëapon. Ina tëꞌhuatatonaꞌ, Iquipitoquë chachin paꞌmantahuachinaꞌ,” tënin. Ina yonquiaton co ina irataquëchin quëparinhuëꞌ. 18Ichipëshonahuaton, conicaiso marëꞌ Quëhuaiꞌ marë#13.18 Inasoꞌ marë naporo tahuëriꞌsaꞌ: “Shiꞌshinamatëro marë” itopi. parti quëparin. Inotëro parti ira paꞌninso paꞌtopi.

Sontaroꞌsa pochin, israiroꞌsa Iquipito quëran pipipi. 19Yapipipona pochin, Moisësëri aꞌnara camairin Cosi nansëquën quëpacaso marëꞌ. Inaso iráca coꞌhuara chimiyantëraponhuëꞌ, iinpita shaꞌhuitërin: “Tëhuënchachin aꞌna tahuëri catahuainpoaso marëꞌ Yosë oꞌmararin. Ina nanihuachin, nansënëhuëpita Canan parti quëpamaso yaꞌhuërin,” itërin. Iinpitari naporo aꞌpanipi niꞌton, shinpitari quëparapi huachi.

20Israiroꞌsasoꞌ, Socoto parti quëran pipirahuatonaꞌ, Itan ninanoaꞌhuaquë canconpi. Canconahuatonaꞌ, inaquë chinotopi. Ina ninanoaꞌhua quëran huarëꞌ, inotëro parti caniaritërin. 21-22Yosëri israiroꞌsa co piꞌpian tëranta patërinhuëꞌ. Tahuëri nipachina, chitoro naporopi nininso quëchitërarin. Tashi nipachinantaꞌ, ina chitoro chachin pën pochin huënarataton pacacaiso aꞌnotërarin. Napoaton onpohuachina, tashirë chachin noya paꞌpi.

Currently Selected:

Éxodo 13: cbt

Highlight

Copy

Compare