Éxodo 11

Iquipitoroꞌsa shoncaro anaꞌintërinsoꞌ

Iquipito paninanoꞌsa tëpacasoꞌ shaꞌhuitërinsoꞌ

1Naporo chachin Yosëri, Moisësë itaantapon: “Aꞌnaroíchin huachi Iquipito copirno, piyapinënpitarë chachin anaꞌintarahuë. Ina piquëran aꞌpaponquëmaꞌ. Inaora chachin nontaponquëma pipimiatamaso marëꞌ. 2Iporaso nipirinhuëꞌ, israiroꞌsa ayonquiquë iquipitoroꞌsa maꞌsha maꞌpainaꞌ. Yaꞌhuëpiso pirayan yaꞌhuëpisopita, paꞌton nininso maꞌsha natainaꞌ. Oro quëran, prata quëran, inaquëranpita nipisoꞌ maꞌpachinaꞌ,” itërin.

3Moisësëri shaꞌhuitërinso chachin, israiroꞌsaso maꞌsha natantacaiso marëꞌ paꞌpi. Paꞌpachinara, Yosë nohuanton iquipitoroꞌsa co noꞌhuitopihuëꞌ. Maꞌsona natantopisoꞌ quëtopi. Moisësënta tëꞌhuatatona noya niꞌpi. Copirno catahuapisopita huaꞌanoꞌsarinta ina pochachin Moisësë niꞌpi.

4-5Naporo Moisësësoꞌ, copirno itaantapon: “Sinioro naporin: ‘Yono tashi nisapasoꞌ, yaꞌipi Iquipito roꞌtë paꞌtarahuë. Iquipito paninanoꞌsa tëpaꞌhuaso marëꞌ napoarahuë. Yaꞌipi paninanoꞌsa chiminacaiso yaꞌhuërin. Quëma paninanëonta huaꞌanëntacaso catahuarinquënsoꞌ, chiminarin. Piyapinënpita paninanënanta chiminapon. Sanapiꞌsa pëꞌsantonaꞌpiroꞌsa paninanënanta napoarin. Co pëꞌtahuanëma yaꞌnan huaꞌhuatërinso tëranta chaꞌëponhuëꞌ. 6Iráca quëran huarëꞌ co onporonta ina pochin naꞌnëramahuëꞌ. Naporahuaton co onporonta ina pochin naꞌnëantaramahuëꞌ. 7Israiroꞌsaso nipirinhuëꞌ, co aꞌna paninanëna tëranta tëpapohuëꞌ. Co pëꞌtahuanëna yaꞌnan huaꞌhuatërinso tërantaꞌ, inapotapohuëꞌ. Napoaton inaquësoꞌ, co aꞌna niꞌnira tëranta naꞌnëponhuëꞌ. Ina quëran israiroꞌsa nosororahuësoꞌ, nitotarama huachi,’ tënin. 8Inapotohuachinquëmaꞌ, yaꞌipi catahuarinënquënso huaꞌanoꞌsaꞌ, paapaponaco. Paapatonaco isonahuatona moshaponaco: ‘Paquë huachi. Israiroꞌsanta quëpaquëꞌ,’ itaponaco. Naporo huarëꞌ isëran paꞌsarahuë,” itërin.

Noya noꞌhuitahuaton, Moisësë copirno pëinën quëran pipirin. 9Pipihuachina Yosëri, itapon: “Copirno napotopiranhuëꞌ, co natëarinquënhuëꞌ. Napoaton nanitarahuë iquipitoroꞌsa anaꞌintaꞌhuasoꞌ. Paꞌpi huëhuëpiro nininsopita maꞌsha aꞌnoto anaꞌintarahuë,” itërin.

10Moisësë, Aaron, inapita Yosëri camairinso chachin nipi. Huaraon niꞌtonënquë yaꞌipi paꞌpi huëhuëpiro nininsopita maꞌsha aꞌnopi anaꞌintacaso marëꞌ. Copirnosoꞌ, ina nicaponahuë tërantaꞌ, co natantochináchinhuëꞌ cancantërin. Siniorori ina pochin acorin niꞌton, co israiroꞌsa Iquipito quëran yaaꞌparinhuëꞌ.

Currently Selected:

Éxodo 11: cbt

Highlight

Copy

Compare