Efesios 3

Nanamën aꞌchinacaso marëꞌ acorinsoꞌ

1Napoaton isonahuato, canpita marëꞌ Yosë nontarahuë. Nisha piyapiꞌsanquëmaꞌ nipomarahuëꞌ, Quisocristo nanamën aꞌchintëranquëmaꞌ niꞌton, tashinan pëiquë poꞌmorinaco. 2Inaora nohuanton, Yosë chachin acorinco aꞌchintaꞌhuanquëmaso marëꞌ. Naꞌcon catahuarinco niꞌton, nanamën shaꞌhuiárahuë, natantëramaꞌ. 3Iráca quëran huarëꞌ Yosë yonquirin nichaꞌëinquëmasoꞌ. Napoaponahuëꞌ, co piyapiꞌsaꞌ anitotërinhuëꞌ. Iporaso nipirinhuëꞌ inaora nohuanton, anitotërinco niꞌton, nani piꞌpian ninshitëranquëmaꞌ. 4Ina nontohuatamaꞌ, Quisocristo nanamën anitotërincosoꞌ canpitantaꞌ nitotaramaꞌ. 5Iráca co iso nanan nitotopihuëꞌ. Iporasoꞌ Quisocristo acorincoisopita nitotërai. Pënëntonaꞌpiroꞌsantaꞌ nitotopi. Ispirito Santo anitotërincoi aꞌchinaꞌhuaiso marëꞌ. 6Naꞌa piꞌipi cotioroꞌsaráchin Yosë chinotopi. “Nichaꞌësaranquëmaꞌ,” itaton, Yosëri naꞌcon catahuarin. Iporaso nipirinhuëꞌ nisha piyapiꞌsanquëmantaꞌ catahuarinquëmaꞌ. Noya nanan natanatomaꞌ, Quisocristo imaramaꞌ niꞌton, canpitantaꞌ nichaꞌësarinquëmaꞌ. Napoaton aꞌna huëntoínchin pochin ninëhuaꞌ.

7Yosë nosoroatonco, acorinco ina nanan aꞌchinaꞌhuaso marëꞌ. Co acoincosohuëꞌ nipirinhuëꞌ, acorinco. Naꞌcon catahuarinco niꞌton, noya aꞌchinárahuë. 8Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato. 9Iráca Yosëri yaꞌipi maꞌsha ninin. Naporo chachin yonquirinpoaꞌ anoyacancantinpoaso marëꞌ. Napoaponahuëꞌ, co yaꞌipi piyapiꞌsaꞌ shaꞌhuitërinhuëꞌ. Ipora huarëꞌ anitotërinco niꞌton, shaꞌhuitëranquëmaꞌ. 10Naꞌcon Yosë yonquirinpoaꞌ. Ina nohuanton, oshaquëran aꞌnaya aꞌnayanpoaꞌ imarëhuaꞌ. Iporasoꞌ naꞌaquënpoaꞌ imapatëhuaꞌ, Quisocristo huëntonënquë yaꞌconëhuaꞌ. Inápaquë chiníquën nanantopisopitantaꞌ nicatënënpoaꞌ: “Ma noya Yosë yonquirin niꞌton, anoyacancantaton, huëntonënquë chachin ayaꞌconin paya,” tosapi. 11Iráca quëran huarëꞌ Yosë yonquirinpoaꞌ imacaso marëꞌ. Quisocristo oꞌmaton, huëntonënquë ayaꞌconinpoaꞌ. Inasáchin huaꞌanëntërinpoaꞌ. 12Ina imarëhua niꞌton, natëtëhuaꞌ, Yosë nontarihuaꞌ. “Anoyacancantërinpoaꞌ niꞌton, noya natanarinpoaꞌ,” taꞌtëhuaꞌ, co tëꞌhuatarihuahuëꞌ. Noya cancantatëhuaꞌ, ina nontarëhuaꞌ. 13Aꞌchintëranquëmaꞌ niꞌton, tashinan pëiquë poꞌmorinaco. Parisitapirahuëꞌ, chiníquën cancantocoꞌ. Canpitantaꞌ Quisocristo imacamaso marëꞌ parisitërahuë. Ina marëꞌ noya cancantacasoꞌ yaꞌhuërin.

Quisocristo nosororinpoasoꞌ

14“Ma noyacha Yosë yonquirinpoa paya,” taꞌto, isonahuato, Tata Yosë nontërahuë. 15Inasoꞌ yaꞌipinpoaꞌ huaꞌanëntërinpoaꞌ. Aꞌnaquën inápaquë yaꞌhuërapi. Aꞌnaquënpoantaꞌ isoroꞌpaquë chachin yaꞌhuëarëhuaꞌ. 16Napoaton canpita yonquiatënquëmaꞌ, Yosë nontërahuë. “Quëmasoꞌ Sinioro chini chiníquën nanantëran. Noya noyanquën niꞌton, imarinënsopita nosoroaton, catahuaquëꞌ chiníquën cancanchinaꞌ. Ispirito Santori achinicancain noya noya imainënquën. 17Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ. 18-19Inapohuachinaꞌ, Quisocristo nosoromiatërincoisoꞌ nitotapi. Piꞌiroꞌtëꞌ pancantërinsoꞌ, naporopitërinsoꞌ, inaparinsoꞌ, acoporinsoꞌ inapita co naninahuanhuëꞌ yonquirai. Inapochachin Quisocristo nosoromiatërincoisontaꞌ co nitotochináchinhuë nipirinhuëꞌ, nitotapi. Ina nitotohuachinaꞌ, yaꞌipi quihuítërancoisopita yaꞌhuëtapi. Yaꞌipi imapisopita ina yonquiꞌinaꞌ,” itërahuë.

20Tata Yosësoꞌ chini chiníquën nanantaton, yaꞌipi nanitaparin. Huaꞌyanën chachin nani yaꞌcoancantërinpoaꞌ niꞌton, noya catahuarinpoaꞌ. Nani tahuëri achinicancaninpoaꞌ niꞌton, cancanënpoa quëran huarëꞌ Yosë yonquiaꞌahuaꞌ. Ina nontohuatëhuaꞌ, “Catahuaco,” itohuatëhuaꞌ, naꞌcon catahuarinpoaꞌ. Naꞌcon nohuantopirëhuahuëꞌ, naꞌcon naꞌcon inasoꞌ nanitaparin nicacasoꞌ. Co nitotërëhuasohuëntaꞌ nanitaparin. 21“Ma noyacha Tata Yosëso paya,” itahuaꞌ. Quisocristo noya imapatëhuaꞌ, aꞌnapitantaꞌ nicatënënpoaꞌ, Yosë yonquiapi. Yaꞌipi piyapiꞌsari ina chinochinaꞌ. Ama onporontaꞌ ina naniantahuasohuëꞌ. Ipora quëran huarëꞌ inasáchin yonquiaꞌahuaꞌ. Amen.

Currently Selected:

Efesios 3: cbt

Highlight

Copy

Compare