Deuteronomio 30

Onporahuatonsona noya acoantaton catahuaantacaso yaꞌhuërinsoꞌ

1Naquëranchin Moisësëri israiroꞌsa nontaantarin: “Nani carinquëma shaꞌhuitëranquëmaꞌ. Sinioro noꞌtëquën natëhuatamasoꞌ, catahuamiatarinquëmaꞌ. Shiparimapitanta natëhuachinaꞌ, inapotarin. Napoaponahuëꞌ, coꞌsoꞌ ina natëhuatamahuëꞌ, ama huachi noya yaꞌhuëcamaso marëhuëꞌ shaꞌhuitatënquëma aparisitarinquëmaꞌ. Shiparimapitanta coꞌsoꞌ natëhuachinahuëꞌ, inapotarin. Yosë nohuanton inimicoroꞌsa minsërahuatënquëmaꞌ, noꞌpaꞌ quëtërinquëma quëran áquë nacionoꞌsaquë, quëpaponquëmaꞌ. Inaquë yacapatapoma pochin, canpitaso ipora napotëranquëmasoꞌ yonquiapomaꞌ. Shiparimapitanta inapotohuachina, cancan yonquiapona inahuantaꞌ. Canpita huayonamaso yaꞌhuërin. Yanatëtohuatamaꞌ, natëtaramaꞌ. Co yanatëtohuatamahuëꞌ, co natëtaramahuëꞌ. 2Mamanshiroꞌsa chinotapiramahuëꞌ, Sinioroíchin chinotaantahuatamaꞌ, noya niꞌsarinquëmaꞌ. Ipora camairanquëmasopita yaꞌipi cancanëma quëran nisahuaton, yaꞌipi huaꞌyanëma quëran natëantamaso yaꞌhuërin. Shiparimapitanta ina pochachin nicacaiso yaꞌhuërin. 3Inapohuatamaꞌ, co huachi Sinioro anaꞌintarinquëmahuëꞌ. Nosoroatënquëma noya acoantarinquëmaꞌ. Shiparimapitanta inimicoroꞌsari nisha nisha nacionoꞌsaquë ayanquëpirinahuëꞌ, Siniorori ayontoantarin. 4Paꞌpi áquë noꞌparoꞌsaquë inimicoroꞌsari ayanquëpirinahuëꞌ, Siniorori noꞌpanënaquë chachin naquëranchin quënantapon. 5Shimashonëna yaꞌhuërinquë chachin quënantapon. (Canpita yonquiatënquëma napoarahuë.) ‘Noꞌpanëna chachin quëtaantarahuato, noya yaꞌhuëantacaiso marëꞌ catahuantapo. Ca nohuanto canpita quëran naꞌcon naꞌcon huiꞌninpita, yaꞌhuëtaponaꞌ,’ itërinquëma Yosë. 6Naporoso canpoarëꞌ anoyatërinso cancanëmaquë chachin ninshitërëso pochin, acoarin. Inapotatënquëma natëtochináchin cancantamaso marëꞌ catahuarinquëmaꞌ. Yaꞌipi cancanëma quëran nisahuaton, yaꞌipi huaꞌyanëma quëran nosoroamaso marëꞌ inapotarinquëmaꞌ. Inapohuatamaꞌ, noꞌpaꞌ quëtërinquëmaquë, huaꞌqui tahuëri niꞌsaramaꞌ. 7Sinioronënpoasoꞌ Yosë niꞌton, yaꞌipi anaꞌintiinquëmaso shaꞌhuirinsoꞌ, inimiconëmasaꞌ anaꞌintapon. Co quëꞌyarinënquëmasopitasaꞌ inapotapon. 8Canpitaso nipirinhuëꞌ, Sinioroíchin, tahuërëtaantahuatoma chinotaramaꞌ. Camaitërinsopitanta ipora shaꞌhuitëranquëmasoꞌ, natëaramaꞌ. 9Inapohuatamaꞌ, maꞌpitaso ninamaquë catahuamiatarinquëmaꞌ. Napoaton, naꞌa huiꞌnama yaꞌhuëtarinquëmaꞌ. Pëꞌtahuanëmanta notohuaroꞌ naꞌapon. Shanëmapitanta notohuaroꞌ nitapon. Tëhuënchachin mini noya nicatënquëma catahuantarinquëmaꞌ. Iráca shimashonëmapita noya nicaton catahuarinso pochachin nitarinquëmaꞌ. 10Yaꞌipi Yosë camaitërinsopita, pënëntërinsopita, inapita iso quiricaquë nani ninshitërahuë. Inasáchin tahuërëtaantatomaꞌ, yaꞌipi cancanëma quëran natëcoꞌ. Nisahuaton yaꞌipi huaꞌyanëma quëran ina natëhuatamaꞌ, shaꞌhuitëranquëmaso chachin catahuarinquëmaꞌ.

11Isopita ipora camaitërinsopita, co coꞌchachin sacaihuëꞌ natëcasoꞌ. Yaꞌipi noya natëtochináchin ninin. 12Co inápaquë yaꞌhuërinhuëꞌ. Napoaton: ‘¡Canpoanta natëcaso marëꞌ inápaquë macontarahuatona anitochinënpoaꞌ!’ Co taꞌcaso yaꞌhuërinhuëꞌ. 13Co marë aquëtëran yaꞌhuëarinhuëꞌ. Napoaton: ‘¡Canpoanta natëcaso marëꞌ marë aquëtëran macontarahuatona anitochinënpoaꞌ!’ Co taꞌcaso yaꞌhuërinhuëꞌ. 14Yosë camaitërinsopitasoꞌ, co áquë yaꞌhuëarinhuëꞌ. Nani yonquinëma quëran nitotërama niꞌton, natëcoꞌ. Naporahuaton ina chachin nanamëma quëraonta nanitërama shaꞌhuicamasoꞌ.

15Yaꞌipinquëma noya natancoꞌ: Ipora tahuëri quëtaranquëma huayonacamaso marëꞌ. Noyasáchin nipatamaꞌ, noya nanpiaramaꞌ. Yaꞌhuërëꞌ co noyahuëꞌ nicacasoáchin cancantohuatamaꞌ, co noya nanpiaramahuëꞌ. Chiminamaso yaꞌhuërin. 16Ipora shaꞌhuitëranquëmasopita natëtomaꞌ, Sinioro nosoromiatohuatamaꞌ, noya yaꞌhuëaramaꞌ. Pënëntërinsopita, camaitërinsopita, aꞌchininsopita, inapita natëcoꞌ. Inapita natëtoma ina nonanpatamaꞌ, huaꞌqui tahuëri niꞌsaramaꞌ. Naporahuaton naꞌa huiꞌnamapita yaꞌhuëtarinquëmaꞌ. Sinioronënpoaso Yosë niꞌton, yaꞌconarama noꞌpaquë, noya catahuamiatarinquëmaꞌ. 17-18Napoaponahuëꞌ, yaꞌipi iso shaꞌhuitëranquëmasopita, co natëtatomarahuë nisha nisha mamanshiroꞌsa moshahuatamaꞌ, ipora oraquë chachin shaꞌhuitaranquëmaꞌ: Tëhuënchachin co noyataramahuëꞌ, itëranquëmaꞌ. Cortaniiꞌ pëntontatoma noꞌpaꞌ mapomarahuëꞌ, co huaꞌquiya quëranhuëꞌ inimicoroꞌsa huëꞌsahuatonaꞌ, tiquiarinënquëmaꞌ. 19Ipora tahuëri chachin huayonacamaso marëꞌ shaꞌhuitëranquëmaꞌ. Noya nanpiamasohuë nipon, chiminamasohuë nipon. Yosë catahuainquëmasohuë nipon, anaꞌintiinquëmasohuë nipon. Sinioro natëtoma noya nanpicamasoꞌ huayoncoꞌ. Shiparimapitanta ina chachin huayoinaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin. 20Sinioronënpoasoꞌ Yosë niꞌton, inasáchin cancantatoma nosorocoꞌ. Nosoroatoma noꞌtëquën natëcoꞌ. Inapohuatamaꞌ, huaꞌqui tahuëri noꞌpaꞌ quëtarinquëmaquë, yaꞌhuëaramaꞌ. Nani shimashonëmapita Apraan, Isaco, Cacopo, inapita: ‘Caso Yosëco niꞌto, shiparimapita iso noꞌpaꞌ quëtarahuë,’ itërin,” tënin Moisësë.

Currently Selected:

Deuteronomio 30: cbt

Highlight

Copy

Compare