Colosenses 1

Imapisopita yonquiaton, nanan aꞌpatërinsoꞌ

1Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpatarainquëmaꞌ. 2Yaꞌipi imaramasopita Corosasëquë yaꞌhuaramasoꞌ, ninshitaranquëmaꞌ. Canpitantaꞌ Quisocristo imamiataramaꞌ niꞌton, Yosë noya niꞌninquëmaꞌ. Ina imaramaꞌ niꞌton, iyahuëi pochin niꞌnainquëmaꞌ. Inaora nohuanton, Tata Yosë naꞌcon catahuainquëmaꞌ. Asanocancainquëmaꞌ.

Imapisopita marëꞌ Yosë nontërinsoꞌ

3-4Canpita yonquihuatëinquëmara, naꞌcon Yosë nontarai. Inasoꞌ Sinioro Quisocristo paꞌpin. Cancanëma quëran huarëꞌ ina natëramaꞌ. Yaꞌipi Yosë piyapinënpitantaꞌ nosororamaꞌ, natantërai. Ina natantatoi, noya cancantërai. “Noya imarinënquën niꞌton, ‘Yosparinquën Sinioro,’ ” itërai. 5Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ. 6Noya nanan chachin yaꞌipi parti aꞌchinapi. Aꞌna parti aꞌna parti piyapiꞌsaꞌ natëtatonaꞌ, noya imasapi. Canpitantaꞌ noya imasaramaꞌ. Yaꞌnan natantapomaꞌ, natëramaꞌ. “Yosë nosoroatonpoaꞌ, inaora nohuanton, nichaꞌësarinpoaꞌ,” itërinënquëmaꞌ. Napotohuachinënquëmara, “Noꞌtëquën shaꞌhuitërinpoaꞌ,” taꞌtomaꞌ, natëramaꞌ. 7Ipapërasë aꞌchintërinquëmaꞌ, inaroꞌcoi nóya ninosororaisoꞌ. Quiya pochachin natëton, Quisocristo nanamën aꞌchinarin. Co quiyasoꞌ nanitëraihuëꞌ canpitataquë pacaꞌhuaisoꞌ niꞌton, ina aꞌparahuë aꞌchintinquëmaso marëꞌ. Co chirorinhuëꞌ aꞌchinacasoꞌ. 8Ina shaꞌhuitiirincoi. “Ispirito Santori catahuarin niꞌton, noya ninosoroapi,” itiirincoi.

9Naporo quëran huarëꞌ canpita yonquiatëinquëmaꞌ, Yosë nontërai. Nani tahuëriya nontatoi, itërai: “Quëmasoꞌ Sinioro tëhuënchachin anitotërancoi noꞌtëquën natëcaꞌhuainquënso marëꞌ. Corosasëquë imarinënsopita naꞌcon catahuaquëꞌ. Yaꞌipi nohuantëransoꞌ anitotëquëꞌ. Ispirito Santori catahuain noꞌtëquën yonquiꞌinaꞌ. 10Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën. 11Quëmasoꞌ, Sinioro, chini chiníquën nanantëran niꞌton, catahuaquëꞌ chiníquën cancanchinaꞌ. Maꞌsha onpohuachinaꞌ, catahuaquëꞌ noya cancantatonaꞌ, ahuanchinaꞌ. Aꞌnapitari aparisitohuachinaꞌ, catahuaquëꞌ ama noꞌhuiinasohuëꞌ,” itërai, Yosë nontatoi. 12Nani anoyacancantohuachinpoara, huëntonënquë chachin ayaꞌconinpoaꞌ. Huiꞌninpita pochin niꞌsarinpoaꞌ. Iporasoꞌ ina catahuahuachinpoaꞌ, tahuëri pochin cancantarihuaꞌ. Naporahuatëhuaꞌ, yaꞌhuërinquë chachin yaꞌhuëcontarihuaꞌ. Ina marëꞌ noya cancantatëhuaꞌ “Yosparinquën Sinioro,” itarihuaꞌ. 13Iráca sopai camairinpoaꞌ. Ina natëtëhuaꞌ, tashi pochin cancantopirëhuahuëꞌ, nani Yosë nichaꞌërinpoaꞌ. Co huachi sopai natëcasoꞌ yaꞌhuërinhuëꞌ. Yosë nohuanton, huiꞌnin huaꞌanëntërinpoaꞌ. Huiꞌnin naꞌcon nosoropirinhuëꞌ, isoroꞌpaquë aꞌpaimarin. 14Ina chiminin niꞌton, nichaꞌërinpoaꞌ. Oshanënpoaꞌ inquitërinpoa huachi.

Quisocristo chiminaton, nanan anoyatërinpoasoꞌ

15Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin. 16Yosë nohuanton, inarë chachin yaꞌipi maꞌsha ninin. Inápaquë yaꞌhuërinsopita, isoroꞌpaquë yaꞌhuërinsopita, inapita acorin. Aꞌnaquën quënanëꞌ. Aꞌnaquënso co quënanëhuëꞌ. Anquëniroꞌsaꞌ, inápaquë chiníquën nanantërinsopita, nisha nisha nininsopita, inapitantaꞌ ninin. Quisocristoíchin chinotacaiso marëꞌ yaꞌipiya yaꞌhuërin. Ina marëꞌ acorin. 17Coꞌhuara maꞌsha yaꞌhuëyátërasohuëꞌ, Quisocristo yaꞌhuërin. Ina nohuanton, piyapiꞌsaꞌ, maꞌsharoꞌsaꞌ, yaꞌipiya yaꞌhuërapi. Ipora huantaꞌ co yonquirinpoahuëꞌ naporini, yaꞌipinpoaꞌ taꞌhuanchitërihuahuëꞌ. Yaꞌipi maꞌsharëꞌquënpoa chachin taꞌhuanchitërihuahuëꞌ. 18Yaꞌipi imarëhuasopita aꞌna huënton pochin ninëhuaꞌ. Inaora nonën pochachin Quisocristo niꞌninpoaꞌ. Inasoꞌ motënpoa pochin nicaton, huaꞌanëntërinpoaꞌ. Inaꞌton chiminaponahuëꞌ, nanpiantarin. Napoaton yaꞌipinpoaꞌ inasáchin natëcasoꞌ yaꞌhuërin huachi. 19Quisocristosoꞌ Yosë huiꞌnin niꞌton, Yosë chachin antaꞌ. Co piꞌpisha tërantaꞌ pahuantërinhuëꞌ paꞌpin pochin nicacasoꞌ. Tata Yosë nohuanton, naporin. 20Iráca oshahuanëhuaꞌ niꞌton, yaꞌipinpoaꞌ Yosë inimicotopirëhuahuëꞌ. Yosë nohuanton, Quisocristo chiminin nanan anoyatinpoaso marëꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipiya nohuantërin anoyatacasoꞌ. Canpoa marëꞌ huënainën paꞌnin. Corosëquë chiminin niꞌton, co huachi Yosë inimicotacasoꞌ yaꞌhuërinhuëꞌ.

21Iráca canpitasoꞌ co Yosë yonquiramahuëꞌ. Co noyahuëꞌ cancantatomaꞌ, Yosë inimicotëramaꞌ. Co noyahuëꞌ ninamaꞌ. 22Iporaso nipirinhuëꞌ nanan anoyatërinquëmaꞌ. Quisocristo isoroꞌpaquë oꞌmaton, piyapi chachin nasitimarin. Corosëquë chiminin nanan anoyatinpoaso marëꞌ. Nanan anoyatatonpoaꞌ, anoyacancantërinpoaꞌ. Noyápiachin cancan quëtërinpoaꞌ. Oꞌmantahuachin, co anaꞌintarinpoahuëꞌ. Noya cancantacaso marëꞌ nanan anoyatërinpoaꞌ. 23Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Imapisopita catahuacaso marëꞌ Yosëri acorinsoꞌ

24Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë. 25Yosë acorinco imapisopita catahuaꞌhuaso marëꞌ. Canpitantaꞌ aꞌchintaranquëmaꞌ. Yaꞌipi nanamën aꞌchinaꞌhuaso marëꞌ acorinco. 26Iráca iso nanan co nitotopihuëꞌ. Iporaso nipirinhuëꞌ imarëhuasopita anitotërinpoaꞌ. Yonquirinso chachin anitotërinpoaꞌ. 27“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

28Napoaton Quisocristo nanamën aꞌchinárai. Yaꞌipi piyapi pënënárai. Noya yonquiatoi, aꞌchintarai Quisocristo imacaiso marëꞌ. Ina imapatamaꞌ, noya noya cancantaramaꞌ. 29Ina marëꞌ paꞌsápato, aꞌchinárahuë. Quisocristo chachin catahuarinco. Achinicancaninco niꞌton, chiníquën cancantato aꞌchinárahuë.

Currently Selected:

Colosenses 1: cbt

Highlight

Copy

Compare