Hechos 9

Saono imarinsoꞌ

1Saonoso nipirinhuëꞌ noꞌhuitárin. Quisoso imapisopita noꞌhuiton, yatëparin. Napoaton corto huaꞌan chini chiníquën nanantërinsoꞌ nontonin. 2“Quirica ninshitoco piyapi macaꞌhuaso marëꞌ. Tamascoquë quëparahuato, niyontonpiso pëiꞌ huaꞌanoꞌsaꞌ quëtarahuë. Inaquë nasha nanan imapisopita quënanpato, masarahuë. Quëmapiꞌsaꞌ tonporahuato, isëquë chachin quësarahuë. Sanapiꞌsaquë huarëꞌ masarahuë,” tënin Saono. Napohuachina, quirica ninshitahuaton, quëtërin. 3Ina quëran Tamascoquë paꞌnin. Yaꞌcaritërahuasoꞌ, aꞌnaroáchin inápa quëran huënaráchin huënaráchin aꞌpintërin. 4Noꞌpaquë anotahuaton, inápa quëran nontërinsoꞌ natanin.

“Saono, Saono, ¿onpoatontaꞌ aparisitaranco?” itërin.

5“¿Inquëntaꞌ quëmasoꞌ, Sinioro?” itërin Saonori. “Ca Quisosoco, aparisitarancosoꞌ. 6Iporasoꞌ huanirahuaton, ninanoquë paquëꞌ. Inaquë shaꞌhuitarinënquën maꞌsona nicamasoꞌ,” itërin.

7Caꞌtaninsopitasoꞌ paꞌyanatonaꞌ, co mantaꞌ topihuëꞌ. Nontërinsoꞌ natanaponaraihuëꞌ, co insontaꞌ quënanpihuëꞌ. 8Saono huaniintarahuaton, niꞌtopirinhuëꞌ, co huachi quënantërinhuëꞌ. Napoaton aꞌnapitari sëꞌquërahuatonaꞌ, Tamascoquë quëpapi. 9Cara tahuëri co quënantërinhuëꞌ. Co mantaꞌ caꞌninhuëꞌ. Co mantaꞌ oꞌorinhuëꞌ.

10Ina ninanoquë chachin aꞌna quëmapi yaꞌhuërin, Quisoso imarinsoꞌ. Ananiasë itopi. Yosë nohuanton, co huëꞌëponahuëꞌ, huaꞌnarëso pochin niꞌnin. Nontërinsontaꞌ natanin. “Ananiasë, ¿yaꞌhuaran?” itërin Quisosori. “Yaꞌhuarahuë Sinioro,” itërin inarintaꞌ.

11“Huanirahuaton, noꞌtëquën cachi itopiquë paquëꞌ. Inatohuaꞌ Cotasë pëinën yaꞌhuërin. Inaquë aꞌna quëmapi Tarsoquë yaꞌhuërinsoꞌ yacapatarin. Inasoꞌ Saono itopi. Apira inasoꞌ nontarinco. 12Inantaꞌ huaꞌnarëso pochin nani quënaninquën. Quëmari sëꞌhuarayaconpatan, quënantaantapon,” itërin Quisosori.

13Ananiasëso nipirinhuëꞌ co yapaꞌninhuëꞌ. “Ina quëmapisoꞌ Sinioro, paꞌpi co noyahuëꞌ, topi natantërahuë. Quirosarinquë quëma imarinënquënsopita chiníquën aparisitërin. 14Corto huaꞌanoꞌsaꞌ chiníquën nanantopisopitari nanan quëtërin isëquëntaꞌ piyapiꞌsaꞌ macacaso marëꞌ. Nontërinquënsopita tonporahuaton, tashinan pëiquë yapoꞌmorin,” itërin Ananiasëri.

15“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ. 16Nanamëhuë aꞌchininso marëꞌ naꞌcon parisitapon. Inantaꞌ cari anitotarahuë,” itërin Quisosori.

17Ina natanahuaton, Ananiasë paꞌnin. Cotasë pëinënquë yaꞌconconahuaton, Saono sëꞌhuaconin:

—Iya Saono. Sinioro Quisoso iraquë yaꞌnotërinquënso shaꞌhuitërinco niꞌton, huëꞌnahuë. Ina nohuanton, apira noya niꞌtaantaran. Naporahuaton, Ispirito Santo noyá yaꞌcoancantarinquën, itërin.

18Naporo chachin sami shaꞌhuëtë pochin nininsoꞌ, yaꞌpirin quëran anotërin. Aꞌnaroáchin noya niꞌtaantarin. Ina quëran huaniintarahuaton, aporihuanin. 19Nani coshatahuaton, chiníquën cancantaantarin. Huaꞌquimiachin inaquë Quisoso imapisopitataquë yacapatërin.

Saono yaꞌnan pënëntërinsoꞌ

20Shiarahuaton, cotio niyontonpiso pëiquë paꞌsahuaton, pënëntarin. “Quisososoꞌ Yosë huiꞌnin,” itahuaton, naꞌcon aꞌchinarin. 21Yaꞌipi piyapiꞌsaꞌ natanahuatonaꞌ, ina nohuitatonaꞌ, paꞌyanpi.

—¿Coꞌna isohuëꞌ Quirosarinquë yaꞌhuapon Quisoso imapisopita chiníquën aparisitërin? Isëquëntaꞌ huëꞌnin imapisopita macacaso marëꞌ. Tonporahuaton, corto huaꞌanoꞌsaquë quëpararin, topiraihuëꞌ. Niꞌquëchi. Nani aꞌchinarin inantaꞌ, topi.

22Saonosoꞌ chiníquën cancantaton, nóya aꞌchinarin. “Tëhuënchachin Yosëri Cristo aꞌpaimarin. Inasoꞌ Quisoso chachin. Yosë quiricanën quëran noꞌtëquën anitotërinpoaꞌ,” taꞌton, naꞌcon aꞌchintërin. Cotioroꞌsaꞌ inaquë yaꞌhuëpisopita nisha nisha yonquiatonaꞌ, co nanitopihuëꞌ aꞌpanitacaisoꞌ.

Saono chaꞌërinsoꞌ

23Napoaton huaꞌqui quëran cotioroꞌsari tëpacaisoꞌ yonquipi. 24Yatëpapisoꞌ natanaton, Saono co huachi aꞌninquëchin paacasoꞌ nohuantërinhuëꞌ. Nani tahuëri ninanoꞌ yaꞌcoanaquë cotioroꞌsari ninarapi tëpacaiso marëꞌ. Tashirë chachin ninarápi. 25Aꞌna tashiso nipirinhuëꞌ, imapisopitari huëcatonaꞌ Saono quëpapi. Ninano pairapipi quëran anohuaramapi. Nantipi pochin nininquë anohuaramahuachinara, paꞌnin huachi.

Saono Quirosarinquë paantarinsoꞌ

26Quirosarinquë canconahuaton, Quisoso imapisopita yaꞌhuëpiquë paꞌpirinhuëꞌ. “Co tëhuënchachin Quisoso imamarahuëꞌ, shaꞌhuirapihuachinpoaꞌ,” taꞌtonaꞌ, tëꞌhuatopi.

27Pirnapiso nipirinhuëꞌ natërin. Natëton, Saono quëparin caꞌtanoꞌsaꞌ nontacaso marëꞌ. “Saono ira paꞌtasoꞌ, Quisoso quënanin. Nontërinsontaꞌ natanin. Tamascoquë chiníquën cancantaton, Quisoso nanamën shaꞌhuirin,” itërin. 28Ina quëran caꞌtanoꞌsataquë Saono yacapatarin. Imapisopitarëꞌ nipayatonaꞌ, paꞌsapi. Inaquë co tëꞌhuatonhuëꞌ, Sinioro nanamën shaꞌhuirárin. 29Aꞌnaquën cotioroꞌsasoꞌ Crico nananquë nonpi. Saonori chiníquën pënënpachina, noꞌhuitonaꞌ, yatëpapi. 30Yatëpapirinahuëꞌ, imapisopita natanahuatonaꞌ, Sisariaquë quëpapi. Inaquë quëparahuatonaꞌ, Tarsoquë aꞌpapi.

31Ina quëran Quisoso imapisopita noya yaꞌhuapi. Co huachi insoari tërantaꞌ aparisitërinhuëꞌ. Cotia parti, Cariria parti, Samaria parti, inaquëpita sano yaꞌhuatonaꞌ, noya noya imasapi. “Sinioro chiníquën nanantërin,” taꞌtonaꞌ, nóya natëpi. Ispirito Santori catahuarin niꞌton, aꞌnapitanta imasapi.

Yosë nohuanton Pitrori Iniasë anoyatërinsoꞌ

32Pitroso nipirinhuëꞌ nisha nisha parti paꞌsarin imapisopita nicacaso marëꞌ. Nitaquë canconpachina, imapisopita niꞌconin. 33Inaquë aꞌna quëmapi quënanconin, Iniasë itopisoꞌ. Posa piꞌipi canioton, quëhuënárin. Apia niꞌton, co nanitërinhuëꞌ huanicasoꞌ.

34—Iya Iniasë, Quisocristo anoyatarinquën. Huanirahuaton, pëꞌsaraꞌhuaya tapaquë huachi, itërin Pitrori.

Napotohuachina, aꞌnaroáchin huanirin. 35Inaquë yaꞌhuëpisopitari niꞌpi. Saronaquë yaꞌhuëpisopitarintaꞌ niꞌpi. Napoaton naꞌa piyapiꞌsaꞌ iráca yonquipisopita naniantatonaꞌ, Quisocristo imapi.

Yosë nohuanton Tapita ananpitaantarinsoꞌ

36Copëquë aꞌna sanapi Tapita itopisoꞌ yaꞌhuërin. Crico nananquë Torëcasa itopi. Inantaꞌ Quisoso imarin. Noya sanapi niꞌton, saꞌahuaroꞌsaꞌ nosoroaton, nani tahuëri catahuarin. Pahuantohuachinara, maꞌsha topinan nicanarin. 37Naporoꞌ ina sanapi caniorahuaton, chiminin. Nonën paꞌmorahuatonaꞌ, inapa paꞌcotëꞌ nininquë acopi. 38Pitrosoꞌ Nitaquë yaꞌhuarin, natantopi. Co aquëyahuëꞌ niꞌton, catoꞌ quëmapi aꞌpapi. Canconahuatonaꞌ, “Manóton huëquëꞌ,” itopi.

39Napoaton Pitro inapitarëꞌ paꞌnin. Canconpachinara, inapa paꞌcotëquë quëpantapi. Inaquë naꞌa quëyoronoꞌsari tahuirapitahuatonaꞌ, naꞌnëtopi. Aꞌmopisopita Tapitacoꞌ iꞌhua pipitërinsoꞌ saꞌahuaroꞌsaꞌ quëtacaso marëꞌ aꞌnotopi. 40“Yaꞌipinquëmaꞌ pipicoꞌ Yosë nontëriꞌi,” itohuachina, paꞌpi. Nani paꞌpachinara, isonahuaton, Yosë nontërin. Ina quëran nonën tahuërëtahuaton, itapon:

—Imoya Tapita, huënsëquëꞌ, itërin.

Aꞌnaroáchin niꞌtiintarin. Pitro quënanahuaton, huënsërin. 41Pitrori maimirarahuaton, ahuanirin. Ina quëran imapisopita, quëyoronoꞌsaꞌ inapita përarin. Huëꞌsahuatonaꞌ, nanpirin quënanquipi. 42Yaꞌipi ninanoquë nahuinin. Naꞌa piyapiꞌsaꞌ Quisoso natëpi. 43Inaquë huaꞌquiꞌ Pitro yacapatërin. Simon itopisoꞌ pëinënquë yacapatërin. Simonsoꞌ, shaꞌhuëtëꞌ tapanaꞌpi.

Currently Selected:

Hechos 9: cbt

Highlight

Copy

Compare