Hechos 23

1Paono yaꞌconahuaton, huaꞌanoꞌsaꞌ notëërahuaton, itapon:

—Ipora iyaroꞌsaꞌ piꞌpian nonchinquëmaꞌ natanco. Huaꞌhuatapo quëran huarëꞌ noya ninahuë. Yosë niꞌsárinco, co mantaꞌ onporahuëꞌ, itërin.

2Naporo tahuëriꞌsaꞌ Ananiasë itopisoꞌ, corto huaꞌan chini chiníquën nanantërinsoꞌ nisarin. Inari huanipapisopita itapon:

—Ahuëanancoꞌ, itërin. Napohuachina, huaniparinsoari ahuëananin. Napotohuachina, Paonori itapon:

3—Quëmasoꞌ nonpintënquën. ¡Yosë ahuëarinquën quëmantaꞌ! “Moisësë pënëntërinsoꞌ natëto, anaꞌintarahuë,” taponahuëꞌ, ¿onpoatontaꞌ shaꞌhuitëran ahuëincosoꞌ? Moisësë chachin pënëninpoaꞌ ama topinan quëran piyapi ahuëcaso marëhuëꞌ, itërin.

4—Corto huaꞌan chini chiníquën nanantërinso nipirinhuëꞌ, ¿noꞌhuiton, nonapiran ti? itopi.

5—Coꞌchi iyaroꞌsaꞌ nohuitatorahuëꞌ, naporahuë paya. Tëhuënchachin Yosë quiricanën quëran pënëninpoaꞌ. “Co huaꞌanënpoaꞌ nonapicasoꞌ yaꞌhuërinhuëꞌ,” tënin, itërin Paonori.

6Cotio huaꞌanoꞌsaꞌ huëꞌpisopita co napopianachin yonquipihuëꞌ. Patoma satosioroꞌsaꞌ, patomasoꞌ, parisioroꞌsaꞌ. Ina yonquiaton, Paonori itantarin:

—Casoꞌ iyaroꞌsaꞌ, Parisioco. Shimashonëhuëpitantaꞌ parisioroꞌsa chachin. “Yosë ananpitaantarinpoaꞌ,” tënahuëso marëꞌ isopita shaꞌhuirapirinaco, itërin.

7Ina natanahuatonaꞌ, parisioroꞌsaꞌ, satosioroꞌsaꞌ, inahua capini ninoꞌhuipi. Nisha nisha yonquipi. 8Satosioroꞌsasoꞌ co natëtonaꞌpiroꞌsahuëꞌ. “Co Yosë ananpitaantarinpoahuëꞌ. Co huaꞌyanënpoaꞌ yaꞌhuëtërinpoahuëꞌ. Co anquëniroꞌsa tërantaꞌ yaꞌhuëpihuëꞌ,” toconpi. Parisioroꞌsaso nipirinhuëꞌ natëpi. “Huaꞌyanënpoaꞌ yaꞌhuëtërinpoaꞌ niꞌton, Yosë ananpitaantarinpoaꞌ. Anquëniroꞌsantaꞌ yaꞌhuërin,” topi. 9Napoaton ninontatonaꞌ, noncaroapi. Parisio maistroꞌsaꞌ huanirahuatonaꞌ, chiníquën nonpi.

—Iso quëmapisoꞌ noya, tënai. Co mantaꞌ onporinhuëꞌ. Anquëni noninsoꞌ natamara. Huaꞌyani aꞌna nontomara, tënin aꞌnaquën. Napohuachinara, satosioroꞌsaꞌ noꞌhuitopi.

10Chiníquën ninoꞌhuitonaꞌ, niahuërapi. Napoaton capitan huaꞌani sontaroꞌsaꞌ camairin.

—Maconcoꞌ tëpahuachinaꞌ, itërin. Napotohuachina, sontaroꞌsaꞌ paꞌpi. Paono osërëconahuatonaꞌ, sontaroꞌsaꞌ yaꞌhuëpiquë quëpaantapi.

11Naporoꞌ tashiꞌ Siniorori yaꞌnotimarahuaton, Paono itapon: “¡Ama tëꞌhuatonhuëꞌ, chiníquën cancantëquëꞌ! Quirosarinquë nanamëhuë nani shaꞌhuiran. Inapochachin Nomaquëntaꞌ paaton, shaꞌhuiantamasoꞌ yaꞌhuërin,” itërin.

Paono yatëpapisoꞌ

12Tahuëririnquë aꞌnaquën cotioroꞌsaꞌ chinotopi Paono tëpacaisoꞌ. “Ama huachi caꞌahuasohuëꞌ. Ama oꞌoahuasohuëꞌ. Paono tëpaquë huarëꞌ caꞌahuaꞌ. Co tëparihuarahuëꞌ caꞌpatëhuaꞌ, Yosë anaꞌinchinpoaꞌ,” nitopi. 13Catapini shoncayaꞌpi pochin napopi. 14Naporahuatonaꞌ, paatonaꞌ, cotio huaꞌanoꞌsaꞌ, ansianoꞌsaꞌ, inapita nontopi.

—Nani huachi anoyatërai. Co huachi coshataraihuëꞌ. Paono tëpaquë huarëꞌ coshataantarai. Yoscoarëꞌ tëpaarai, tënai. 15Napoaton capitan huaꞌan shaꞌhuitocoꞌ Paono quëntaꞌin. “Tashiraya yanontantarai noꞌtëquën nitotaꞌhuaiso marëꞌ,” itocoꞌ. Quiyaso nipirinhuëꞌ naꞌpitatoi, ninaarai. Yaꞌcaritohuachin, aꞌnaroáchin masahuatoi, tëpaarai, itopi.

16Paono apiaꞌhuainso nipirinhuëꞌ, yatëpapisoꞌ natantërin. Inasoꞌ, oshin huaꞌhuin. Natantahuaton, sontaroꞌsaꞌ yaꞌhuëpiquë paaton, Paono shaꞌhuitërin. 17Shaꞌhuitohuachina, aꞌna capitan amatërin.

—Iso huiꞌnapi huaꞌanënquë quëpaquëꞌ nanan shaꞌhuichin, itërin.

18Napohuachina, huaꞌanënquë quëparahuaton, itonin:

—Sontaroꞌsaꞌ yaꞌhuëpiquë Paono amatërinco. “Iso huiꞌnapi huaꞌanënquë quëpaquëꞌ nanan shaꞌhuichin,” itërinco niꞌton, quënahuë, itërin.

19Capitan huaꞌani matanparahuaton, amashamiachin quëparin ama piyapiꞌsari natanacaiso marëhuëꞌ.

—¿Maꞌtaꞌ yashaꞌhuitërancosoꞌ? itërin.

20—Cotio huaꞌanoꞌsaꞌ nani chinotopi Paono amatacaiso marëꞌ. “Tashiraya Paono quënantaquëꞌ nontantaꞌii. Naporinsoꞌ, aquëtë huarëꞌ yanitotërai,” itarinënquën. 21Nipirinhuëꞌ, ama natëquësohuëꞌ. Catapini shonca naꞌcon piyapiꞌsari chinotopi tëpacaiso marëꞌ. Poꞌoana quëran ninarapi tëpacaiso marëꞌ. Co huachi coshatapihuëꞌ. Co oꞌosapihuëꞌ. Paono tëpai huarëꞌ coshatacaisoꞌ yonquipi. Iporasoꞌ quëma ninarinën nohuantopiso chachin nitamasoꞌ, itërin.

22—Shaꞌhuitërancosoꞌ api, ama insontaꞌ shaꞌhuitëquësohuëꞌ, itahuaton huiꞌnapi aꞌparin.

Paono aꞌna parti quëpapisoꞌ

23Ina quëran catoꞌ capitanoꞌsaꞌ amatërin.

—Apira maꞌsha tapacoꞌ Sisariaquë pacacamaso marëꞌ. Cato pasa sontaroꞌsaꞌ shaꞌhuitonquëꞌ paꞌinaꞌ. Cahuarioquë paꞌnaꞌpiroꞌsantaꞌ canchisë shonca quëpaquëꞌ. Nansahuanoꞌsaꞌ cato pasa quëpaquëꞌ. Yaꞌipi tapatëquëꞌ yayonotashirahuasoꞌ pacacamaquëmaꞌ. 24Catoꞌ cahuario quëpacoꞌ Paono paacaso marëꞌ. Noya aꞌpairahuatomaꞌ, huaꞌan Huirisë quëtoncoꞌ, itërin. 25Ina quëran quirica ninshitërin huaꞌan quëtacaiso marëꞌ.

26“Sinioro huaꞌan Huirisë. ¿Noyanquën quëmantaꞌ? Ca Craotio Nisiasëco ninshitaranquën, niꞌquëꞌ. Quëmasoꞌ chiníquën nanantëran niꞌton, piꞌpian shaꞌhuichinquën. 27Iso quëmapi aꞌpataranquën, cotioroꞌsari mapisoꞌ. Yatëpapirinahuëꞌ, quënanahuato, sontaroꞌsaꞌ aꞌparahuë osërëtacaiso marëꞌ. Inasoꞌ Noma piyapi niꞌton, osërëtërahuë. 28‘¿Maꞌmarëtaꞌ shaꞌhuirapipisoꞌ?’ taꞌto, cotio huaꞌanoꞌsaquë quëparahuë nitotaꞌhuaso marëꞌ. 29‘Cotio pënëntërinsoꞌ co natërinhuëꞌ,’ toconpi. Inaíchin shaꞌhuirapipi. Co mantaꞌ onporinhuëꞌ. Co chiminacasoꞌ yaꞌhuërinhuëꞌ. Coni tashinan pëiquë tërantaꞌ poꞌmocasoꞌ yaꞌhuërinhuëꞌ. 30Ina quëran cotioroꞌsaꞌ chinotopi tëpacaisoꞌ, natantërahuë. Napoaton aꞌnaroáchin aꞌpatëranquën. Cotioroꞌsantaꞌ nani shaꞌhuitërahuë yaꞌhuëranquë paatonaꞌ shaꞌhuirapicaiso marëꞌ. Nani huachi,” itërin, ninshitaton.

31Ina quëran sontaroꞌsasoꞌ natërahuatonaꞌ, Paono quëpapi. Tashiꞌ nipirinhuëꞌ, Antipatërisëꞌpaꞌ quëpapi. 32Tahuëririnquë sontaroꞌsasoꞌ yaꞌhuëpiquë panantapi. Cahuarioquë paꞌnaꞌpiroꞌsaichin Paono quëpapi. 33Sisariaquë canconahuatonaꞌ, quirica huaꞌan quëtonpi. Paonontaꞌ yoꞌconpi. 34Huaꞌansoꞌ quirica nontahuaton, itapon: “¿Inso partitaꞌ huaꞌhuatëransoꞌ?” itërin. “Sirisia parti huaꞌhuatërahuë,” itërin Paonori.

35—Shaꞌhuirapirinënsopita canquihuachinaꞌ, yaꞌipiya natanarahuë, itërin. Ina tosahuaton, sontaroꞌsaꞌ camairin Paono quëpacaiso marëꞌ.

—Huaꞌan Irotisë pëinënquë quëparahuatomaꞌ, aꞌpaicoꞌ taꞌahuachin, itërin.

Currently Selected:

Hechos 23: cbt

Highlight

Copy

Compare