2 Reyes 19
19
Asiria copirno quëran chaꞌëpisoꞌ
1Cara huaꞌanoꞌsarisoꞌ, Asiria huaꞌani napotërinsoꞌ Isiquiasë shaꞌhuitonpi. Ina natanaton, co napion cancantërin. Inapoaton aꞌmorinso osharin. Ina quëran saꞌcatën aꞌmosahuaton, Sinioro chinotacaso pëiquë Yosë nontacaso marëꞌ paꞌnin. 2Coꞌhuara inaquë paꞌshátëraponhuëꞌ, Iriaquin, Sipina, corto huaꞌanoꞌsa masho masho nipisopita, inapita camairin: “Saꞌcatën aꞌmosahuatomaꞌ, Amosë huiꞌnin Isaiasë pënëntonaꞌpi niꞌconcoꞌ. 3Cantonpatamaꞌ iso pochin shaꞌhuitocoꞌ: ‘Iporasoꞌ co napion cancantarëhuaꞌ. Inimicoroꞌsa aparisitatënënpoaꞌ, taparo nitarinënpoaꞌ. Napoaton sanapi huaꞌhua iquitohuachina, co nanitërinsohuë pochin nisarëhuaꞌ. 4Sinioroso Yosënën niꞌton, yaꞌipi nitotërin. Asiria copirnori huaꞌanoꞌsa aꞌparinsopita quëran pinorinsontaꞌ, natanin. Maꞌcha ina natanaton anaꞌintërin naporini, noya niitonhuëꞌ. Quëmanta Sinioro nontëquë yaꞌhuëarëhuasoꞌ, catahuainpoaꞌ, tënin Isiquiasë,’ itoncoꞌ,” itërin.
5Napotohuachina, inapitaso paꞌpi. Isaiasë quënanconahuatonaꞌ, copirno naporinso shaꞌhuitonpi. 6Natanahuaton inasoꞌ: “Huaꞌanëma shaꞌhuitocoꞌ: ‘Asiria copirno piyapinënpita naꞌcon pinorinaco. Ama ina natanaton paꞌyanquësohuëꞌ. 7Ca nohuanton nanan natantarin. Ina natanaton, yaꞌhuërinquë paantarin. Inaquë nipachina, tëpapona huachi,’ tënin Sinioro,” itërin.
8Napoasoi Asiria copirnosoꞌ, Naquisi ninano patahuaton, Nipina ninano ahuëcaso marëꞌ pantarin. Asiria sontaroꞌsa huaꞌansoꞌ ina natanahuaton, sontaronënpitarë chachin inatohua panantarin. 9Asiria copirnoso inaquë niꞌsoꞌ, nanan natantërin: “Iquipito copirno Tiraca itopisoꞌ, ahuëinquënso marëꞌ huëꞌsarin. Cota huënton sontaroꞌsa catahuacaiso marëꞌ huëꞌsarin,” itopi.
Napotopisoꞌ natanaton, naquëranchin huaꞌanoꞌsa aꞌpaantarin. Isiquiasë copirno quirica quëpatacaiso marëꞌ, aꞌparin. 10Ninshitaton naporin: “Quëmaso Yosënën napotërinquën: ‘Ca nohuanton asiriaroꞌsasoꞌ, co minsëarinquëmahuëꞌ,’ itërinquën. Napotohuachinquëna, quëmasoꞌ ina natëran. Napotopirinquënhuëꞌ, ama natëquësohuëꞌ. 11Nisha nisha copirnoroꞌsari nisha nisha parti huaꞌanëntopirinahuëꞌ, Asiria copirnoroꞌsari ataꞌhuantëraꞌpiapi. Inpitasona ataꞌhuantacaiso yonquihuachinara, inapotëraꞌpiapi. Napoaton quëmantaꞌ: ‘¡Sinioro nichaꞌësarincoi quiyasoꞌ!’ Co taꞌcamaso yaꞌhuërinhuëꞌ. 12Iráca shimashonëhuëpitanta copirno yaꞌconpi. Inapitanta naꞌa ninanoroꞌsa ataꞌhuantopi. Inapitasoꞌ nisha nisha yosëroꞌsa moshapirinahuëꞌ, co inapitari nichaꞌërinhuëꞌ: Cosan ninanoꞌ, Aran, Nisihui, Tirasaro, inapita ninanoroꞌsa ataꞌhuantopi. (Tirasaroquësoꞌ, Piti-itin parti quëran huëcatona inaquë yaꞌhuëpirinahuëꞌ, ataꞌhuantopi.) 13Amatoquë, Arohuatoquë, Sihuaropaimoquë, Inanquë, Ipaquë, ¡inaquëpita copirnoroꞌsa huaꞌanëntopisoꞌ, nani taꞌhuantopi!” tënin ninshitaton.
14Asiria copirno piyapinënpitari Isiquiasë quirica quëtopi. Maꞌparahuaton nontërin.
Nani nontahuaton, Yosë chinotacaso pëiquë paꞌnin. Inaquë nipachina, oporinahuaton Sinioro caposonën notënanquë aꞌnotoonin. 15Ina quëran Yosë nontaton: “Quëmasoꞌ Sinioro, Yosënquën. Israiroꞌsacoi chinotërainquën. Quiropinoꞌsa aipi, huaꞌanëntëranso shiranën yaꞌhuërin. Quëmariáchin yaꞌipi nacionoꞌsa ninan. Isoroꞌpaꞌ, piꞌiroꞌtëꞌ, inapitanta quëma nohuanton yaꞌhuërin. 16Asiria copirno ninshitaton pinorinquënsoꞌ natanquëꞌ. Quëmasoꞌ nanpirápiranhuëꞌ, napotërinquën. 17Tëhuënchachin mini Asiria copirnoroꞌsa nisha nisha nacionoꞌsa ataꞌhuantopi. 18Mamanshinënapitantaꞌ, pënquë aꞌpëraꞌpiapi. Inapitasoꞌ co Yosëhuë niꞌton, napotopi. Piyapiꞌsari naꞌpi quëran, nontë quëran, inaranpita nipi niꞌton, napotëraꞌpiapi. 19Quëmaso Sinioro, Yosënëhuënquën. Asiriaroꞌsa chiníquën nanantopirinahuëꞌ, inapita quëran nichaꞌëcoi. Inapotohuatancoi yaꞌipi nacionoꞌsa isoroꞌpaquë yaꞌhuërinsoꞌ, quëmaíchin Sinioronquën ninansoꞌ nitotapi huachi,” itërin.
20Naporoꞌ Isaiasëri, Isiquiasë shaꞌhuitacaso marëꞌ aꞌnara comision aꞌpatërin. Iso pochin taꞌcasoꞌ aꞌpatërin: “Yosënënpoa nontëransoꞌ, nani nataninquën. 21Iso pochin Siniorori Asiria copirno anitotërin:
‘Quirosarinquë yaꞌhuëpisopita nanon pochin nicatonaꞌ,
tëhuaponënquën Asiria copirno.
Tëhuatënën huësë huësë́taponaꞌ.
Ninanonëna patohuatan, napoaponaꞌ.
22¿Ca nipirahuëꞌ pinoranco ti?
¿Ca nipirahuëꞌ iquianantëranco ti?
“¡Co insonta minsëarincohuëꞌ!” taꞌton nocananco.
Caso Yosëco. Israiroꞌsa chinotërinaco.
Noyasáchin nipirahuëꞌ, napotëranco.
23Piyapinënpita quëran noꞌhuitonco naporan:
“Quira toronanoꞌsa co pichicasohuëꞌ yaꞌhuëtërinco.
Inapitaquë paato, motopiroꞌsa huiꞌnimotënꞌpaꞌ nanpërahuë.
Nipano motopi huiꞌnimotënꞌpaꞌ nanpërahuë.
Nonararoꞌsa inaquë panca panca nipisopita aꞌnërahuë.
Pino naranta noyanpinayanchin nipisopita napotërahuë.
Ina inápa motopiroꞌsaquë nanpërahuë.
Inaquë nararoꞌsasoꞌ, shaꞌpinan pochin yaꞌhuërin.
24Nisharoꞌsa yaꞌhuëpiquë posoroꞌsa ihuato oꞌorahuë.
Yaꞌipi Iquipito iroꞌsantaꞌ, iꞌnaitato ayanirahuë,” toconan.
25Quëmasoꞌ: “Caora nohuanto inaporahuë,” topiranhuëꞌ,
iporaso nitotëquë huachi.
¡Ca nohuanton, ina pochin ninan!
Iráca quëran huarëꞌ yonquirahuësoꞌ, nani nanirin.
Napoaton pairahuan ninanoroꞌsa nipirinahuëꞌ, ataꞌhuantëran.
Inapotahuaton naꞌpiroꞌsaꞌ, nararoꞌsaꞌ, inapitaraꞌ
yamo yamo toconin acoran.
26Ina ninanoroꞌsaquë yaꞌhuëpisopitasoꞌ, panpatoro pochin niconpi.
Napoatona paꞌpi tëꞌhuatërinën. Tëꞌhuatatënën paꞌpi taparo nipi.
Panpatoro nasha paporinsoꞌ huaꞌtërëso pochin co manta chinipihuëꞌ.
Socatë pëipitëquë, pacatoro paporinso pochin niconpi.
Inanpi pacatorosoꞌ, piꞌiri co oshatarinhuëꞌ ahuitapon.
Ina pochin quëmarintaꞌ, inapita minsëcasoꞌ co oshatëranhuëꞌ.
27Intohuasoꞌ paꞌpatan, nani nitotërahuë.
Maꞌsona nipatanantaꞌ, yaꞌipi nitotërahuë.
Noꞌhuimiatërancosontaꞌ, nitotërahuë.
28Noꞌhuitomiatëransoꞌ, nocantomiatëransoꞌ, inapita nitotërahuë.
Ina nitotato, yoꞌnananëhuë quëran aꞌtënitëtaranquën.
Cahuario huaꞌnanan acatëntohuatëra, noya ótëërëꞌ.
Inapotatë pochin nitohuatënquën, naporo huarëꞌ natëaranco.
Huëꞌnansotaquëchin apayantaantaranquën,’ itërin,” tënin.
29Ina quëran Isaiasësoꞌ, Isiquiasë paaparin.
Quënanconahuaton iso pochin shaꞌhuitërin:
“Inaporëꞌpotaꞌma nica,” topatan, isopoarinquëran inapocaso nitotaran:
Cato piꞌipi trico inaora paporinsoꞌ caꞌsaramaꞌ.
Ina quëran niantarinquësoꞌ, canpitaora shaꞌtatoma nitërinsoꞌ masaramaꞌ.
Oparotohuatamaꞌ, nitërinsoꞌ caꞌsaramaꞌ.
30Cota huëntonquë quëparitopisopitasoꞌ,
sharoꞌsa itëhuanatona nitërinso pochin nisapi.
31Co yaꞌipi Quirosarinquë yaꞌhuëramasopita taꞌhuantaramahuëꞌ.
Naꞌamiachinquëma chaꞌësaramaꞌ.
Siniorosoꞌ yaꞌipi nanitaparin.
Paꞌpi aꞌpitatonpoa napotarinpoaꞌ.
32Asiria copirnonta yonquiaton, Sinioro naporin:
“Co Quirosarinquë yaꞌcoaninhuëꞌ.
Co aꞌna shinërë tëranta aꞌpaponhuëꞌ.
Co iscotonënquë naꞌpiton ahuëtarinhuëꞌ.
Paira nanpëtacaso marëntaꞌ, co noꞌpaꞌ nanpënan nicaponhuëꞌ.
33Paꞌpachina, huëꞌshirinso ira chachin paꞌtonantapon.
Co Quirosarinquë yaꞌconaponhuëꞌ.
Ca Sinioroco napotaranquëmaꞌ.
34Cari chachin iso ninano paꞌpoyato nichaꞌësarahuë.
Piyapinëhuë Tapi natërinco niꞌton, napoarahuë.
Ca napoarahuë niꞌton,
inapotaꞌhuanquëmaso yaꞌhuërin,” tënin Sinioro, itërin.
35Naporo tashi chachin Sinioro anquëninëni paꞌsahuaton, Asiria sontaroꞌsa tëpaconin. Pasa posa shonca aꞌnatërápo huaranca tëpachanin. Tahuërihuachina nanpipisopitaso niꞌpirinahuëꞌ, chiminpisopita naꞌcon naꞌcon quëhuënantapi niꞌpi. 36Ina nicaton Asiria copirnosoꞌ, tapatacaisoꞌ camaitërin. Nani tapatohuachinara, huaꞌanëntërinso ninanoquë panantapi. Inaso ninanoꞌ, Ninihui itopi.
37Aꞌna tahuëri Asiria copirnosoꞌ, Nisoroco mamanshi moshapiso pëiquë yaꞌconin. Ina moshaso chachin cato huiꞌninpitari huëcapairahuatona tëpapi. Inapitasoꞌ Atëramirico, Sarisiri, inapita. Paꞌpina tëparahuatonaꞌ, Ararato parti taꞌapi. Chimipicosoꞌ, aꞌnanta huiꞌnin yaꞌhuëtërin Isaraton itërinsoꞌ. Inari paꞌpin yaꞌhuërëtaton, Asiria huaꞌanëntaantarin.
Currently Selected:
2 Reyes 19: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
