1 Samuel 24
24
Tapi Saono tëpacaso co nohuantërinsohuëꞌ
(Nopo ninano quëran Tapi pipihuachina, oshaquëran saota pasa pochin sontaronënpita yaꞌhuëtërin. Inapitarisoꞌ, catahuacaso marëꞌ imapi. Saonori sontaronënpitarë chachin yaahuëaton imasárin niꞌton, itohua itohua yaꞌhuë yaꞌhuë́rantapi.) 1Aꞌna tahuëri Saonosoꞌ huiristinoꞌsa ahuëapon paꞌnin quëran, huënantarin. Naporoꞌ aꞌnari itapon: “Tapisoꞌ In-cati inotëroquë yaꞌhuëarin,” itërin. 2Natanahuaton Saonosoꞌ, cara huaranca sontaroꞌsa huayonin. Yaꞌipi Israiro huëntonoꞌsa quëran ina nápo huayonin. Inapitarë paꞌsahuaton Tapi sontaronënpitarë chachin yonípi. Natëtëroꞌsa paꞌpi huëhuëpiro nininquëpita yonípi.
3Paꞌsápaton Saonosoꞌ ohuicaroꞌsa ahuëꞌëtopiquë canconin. Ina yacaria motopi nanin yaꞌhuërin. Inaquë Tapi piyapinënpitarë chachin naꞌpirapirinahuëꞌ, Saonosoꞌ chiꞌchicaso marëꞌ yaꞌconin. 4Naporoꞌ aꞌnara piyapinëni sacaroënquë Tapi itapon:
—Niꞌquëꞌ. Ipora tahuëri chachin Sinioro shaꞌhuitërinquënsoꞌ nanirin: “Aꞌna tahuëri inimiconën maꞌsona nohuantëransoꞌ nitamaso marëꞌ quëtaranquën,” itërinquën, itërin. Napotohuachina Tapisoꞌ, oshaquëran paaparin. Paaparahuaton Saono aꞌmorinso huirotën yashitëtërin. 5Napoaponahuëꞌ, yashitëtërinso marëꞌ co noyahuëꞌ cancantërin. 6Ina quëran piyapinënpita sacaronquë itapon:
—¡Siniorori Saono huayonin copirno nicacaso marëꞌ! Napoaton carisoꞌ, co ina tëpaꞌhuaso nanitërahuëꞌ, itërin. 7Napotahuaton Tapisoꞌ, ama Saono tëpacaiso marëhuëꞌ piyapinënpita yaꞌcopirin. Inaso co manta yonquiaponahuëꞌ, ina quëran pipirin. 8Pipihuachina, Tapinta aꞌnaroáchin pipiintarin. Pipirahuaton chiníquën itapon:
—¡Api, api! itërin. Napotarinso natanaton, Saonoso tahuërëtërin. Naporoꞌ Tapiri noya nicaton, isonin quëran noꞌpaquë huarëꞌ monshomarin. 9Ina quëran itapon:
—Aꞌnaquën nonpinapitonaco: “Tapi yatëparinquën,” itërinën. Napotopirinënquënhuëꞌ, co inapita natëcamaso yaꞌhuërinhuëꞌ. 10Ipora tahuëri chachin nitotaran co carinquën yatëparanquënsohuëꞌ. Sinioro nani quëtërinco naninquë tëpaꞌhuanquënsoꞌ. Inaso nipirinhuëꞌ, co nohuantërahuëꞌ inapotaꞌhuanquënsoꞌ: “Siniorori huayonin niꞌton, apiso copirno yaꞌconin,” taꞌto naporahuë. 11Niꞌquë api. Aꞌmoranso yashitërahuësoꞌ, sëꞌquëárahuë. Yashitasoco nohuantërahuë naporini, tëpaꞌitënquënhuëꞌ. Napoaponahuëꞌ, co inapotëranquënhuëꞌ. Ina quëran nitotëquëꞌ, co manta yaonpotëranquënsohuëꞌ. Co aꞌnapita tëranta maꞌsha onpotiinënsoꞌ camairahuëꞌ. Co maquë tëranta tëhuëpirahuëꞌ quëmasoꞌ tëpaancoso marëꞌ, yonisáranco. 12Sinioro chachin noꞌtëquën shaꞌhuichinpoꞌ, inquënposona tëhuërësoꞌ. Inari chachin maꞌsha onpotërancoso marëꞌ iꞌhuërëchinquën. Caso napoaponahuëꞌ, co onporo tëranta tëpaponquënhuëꞌ. 13Iráca quëran huarëꞌ paꞌyatopi napocaisoꞌ: “Co noyahuëꞌ cancantopisopitaráchin co noyahuëꞌ nipi,” topi. Caso co ina pochin cancantërahuë niꞌton, co tëꞌhuataancoso yaꞌhuërinhuëꞌ. Co onporonta tëpaponquënhuëꞌ. 14Naporahuaton co caso máquëncohuëꞌ. Quëmasoꞌ copirnonquën nichinapon chachin pëinënquë huënsëyarápamaso yaꞌhuërin. Napopirinhuëꞌ, poꞌpin inotëroquë huëcaton tahuëri chiniaran. ¡Niꞌnira chimipitëꞌ, imincara, inapita co onporonta yonirëhuëꞌ! Inapita pochin nipirahuëꞌ, quëmaso yonitonco ainashitáranco. 15Napoaton Sinioro chachin noꞌtëquën shaꞌhuichinpoꞌ, inquënposona tëhuërësoꞌ. Inari chachin naporahuësoꞌ noꞌtëquën tantiainco. Inapotatonco quëmá quëran paꞌpoyainco, itërin.
16Tapiri tonitohuachina, Saonosoꞌ paꞌyanaton chiníquën itapon:
—¡Tapi chachin mini nontarinco! tosahuaton naꞌnëmiatërin. 17Ina quëran itapon:
—Quëma noꞌtë noꞌtëquënsoꞌ yonquiran. Carinquënso naꞌcon aparisitopiranquënhuëꞌ, quëmaso nosororanco. 18Ipora tahuëri anitotëranco noya yonquirapirancosoꞌ. Sinioro chachin nani quëtërinquën tëpaancosoꞌ. Napoaponahuëꞌ, co tëparancohuëꞌ. 19Inso tëranta inimiconën tëpachináchin quënanpachina, co onporonta nichaꞌërinhuëꞌ. Napoaton noya niꞌnancoso marëꞌ, quëmanta Sinioro noya niꞌinquën. 20Tëhuënchachin quëmasoꞌ, copirno yaꞌcoanan tënahuë. Ina yaꞌconpatan chiníquën nanantaran. Naporahuaton israiroꞌsantaꞌ, noya noya yaꞌhuëapona huachi. 21Iporaso shaꞌhuitoco: “Sinioro niꞌsárinco huiꞌnanpita, shiparinpita, inapita co tëpapohuëꞌ. Nininënapita ninshitopisoꞌ tapiatona naniantohuachinaꞌ, itoco,” itërin.
22Napotohuachina: “Sinioro niꞌsárinco co napoarahuëꞌ,” itërin Tapiri. Nani ninontohuachinara, Saonoso pëinënquë panantarin. Tapinta sontaronënpitarë chachin naꞌpipiꞌpaꞌ yaꞌcoantapi.
Currently Selected:
1 Samuel 24: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
