1 Pedro 3
3
Soꞌyahuanoꞌsaꞌ pënëninsoꞌ
1-2Sanapiꞌsantaꞌ soꞌyahuachinaꞌ, soꞌinaꞌ natëinaꞌ. Aꞌnaquën quëmapiꞌsaꞌ co Yosë nanamën natëyátërapihuëꞌ. Inahuantaꞌ imacaiso marëꞌ soꞌinaꞌ noya natëinaꞌ. Noya nocomaꞌinaꞌ. Ama aꞌna quëmapi tëhuainasohuëꞌ. Yosë yonquiatonaꞌ, noya niinaꞌ. Noyasáchin nipachin, ina nicaton, soꞌiontaꞌ oshaquëran imapon nimara. Co saꞌini pënënpirinhuëꞌ, noya nininso marëꞌ: “Noya nanan imasarin,” tapon inantaꞌ. 3Ama imoyaroꞌsaꞌ nitapacasoráchin yonquicosohuëꞌ. Aꞌnaquën sanapiꞌsaꞌ ainëna tapacasoachin yonquipi. Oro quëran nipisoꞌ aꞌsontanpapi. Notohuaroꞌ miyo pëꞌpëpi. Paꞌton nininsopita aꞌmocaiso paꞌyatopi. Noyápiachin nitapacasoráchin yonquipi. 4Quisocristo imapatamaꞌ, ama aipi yaꞌnorinsoráchin yonquicosohuëꞌ. Noyápiachin cancantacamasoꞌ naꞌcon naꞌcon yonquicoꞌ. Yosë pochin yonquicasoꞌ yaꞌhuërin. Nitaparamasoꞌ co yaꞌhuëmiatarinhuëꞌ. Cancanënpoa quëran yonquirëhuasopitaso nipirinhuëꞌ, yaꞌhuëmiatarin. Napoaton imoyaroꞌsaꞌ sano cancantocoꞌ. Ama piꞌpian tërantaꞌ noꞌhuitocosohuëꞌ. Nóya cancantohuatamaꞌ, Yosë noya niꞌsarinquëmaꞌ. 5Iráca noya sanapiꞌsaꞌ Yosë natërinsopita ina pochin nipi. “Yosë catahuarinco,” taꞌtonaꞌ, inaíchin yonquipi. Soꞌinaꞌ noya natëtonaꞌ, noyápiachin cancantopi. 6Apraan saꞌin ina pochin ninin, Sara itopisoꞌ. Soꞌin noya natërin. “Camaihuachincora, natërahuë mini,” tënin. Canpitantaꞌ imoyaroꞌsaꞌ noya nipatamaꞌ, ina pochin cancantaramaꞌ. Noyápiachin cancantohuatamaꞌ, co tëꞌhuatochinachin cancantaramahuëꞌ.
7Canpitantaꞌ iyaroꞌsaꞌ, saꞌamaꞌ nosoroatomaꞌ noya ichiyaꞌhuëcoꞌ. Co canpita pochin chinipihuëꞌ niꞌton, noya nicatomaꞌ, sanoanan quëran nontocoꞌ. Inapitantaꞌ Quisocristo imapi niꞌton, canpitarëꞌquëma chachin Yosë huëntonënquë yaꞌconpi antaꞌ. Inapitantaꞌ nanpimiatapi. Ina yonquiatomaꞌ, saꞌamaꞌ noya nosorocoꞌ. Inapotohuatamaꞌ, Yosë nontohuatamaꞌ, catahuarinquëmaꞌ.
Aparisitërinënpoasoꞌ
8Yaꞌipinquëmaꞌ noya niniꞌtomaꞌ, yaꞌhuëcoꞌ. Aꞌnaquën sëtohuachinaꞌ, noya nontocoꞌ ama aquëtëꞌ sëchinasohuëꞌ. Noya cancantohuachinaꞌ, canpitantaꞌ noya cancantocoꞌ. Imaramaso capini ninosorocoꞌ. Ninosoroatomaꞌ iyaroꞌsaꞌ nicatahuacoꞌ. Ama ninocancosohuëꞌ. Canpitantaꞌ imoyaroꞌsaꞌ, noya ninontocoꞌ. 9Piyapiꞌsaꞌ maꞌsha onpotohuachinënquëmaꞌ, ama iꞌhuërëtacamasoꞌ yonquicosohuëꞌ. Pinopachinënquëmaꞌ, ama canpitarisoꞌ pinocosohuëꞌ. Noya nontocoꞌ. Naporahuaton, Yosë nontocoꞌ inapitantaꞌ catahuain. Imapatëhuaꞌ, ina shaꞌhuitërinpoaꞌ aꞌnapitantaꞌ nosorocasoꞌ. Napohuatëhuaꞌ, Yosë noya catahuarinpoaꞌ. 10Iráca quiricanën quëran itërinpoaꞌ:
“Noya yaꞌhuëcamasoꞌ nohuantohuatamaꞌ, noyasáchin noncoꞌ. Ama insontaꞌ nonpintocosohuëꞌ. Inapohuatamaꞌ, noya cancantatomaꞌ, noya yaꞌhuaramaꞌ.
11Yaꞌipi co noyahuëꞌ yonquiramasopita naniantatomaꞌ, nóya nicoꞌ. Sano piyapi nicatomaꞌ, ama insontaꞌ noꞌhuicosohuëꞌ. Aꞌnapitantaꞌ catahuacoꞌ noya niniꞌtonaꞌ yaꞌhuëꞌinaꞌ.
12Noya nipatamaꞌ, Sinioro aꞌpaiarinquëmaꞌ. Ina nontohuatamaꞌ, natanarinquëmaꞌ. Nipirinhuëꞌ, co noyahuëꞌ nipatamaꞌ, co Sinioro tahuërëtarinquëmahuëꞌ,” tënin.
13¡Noyasáchin nipatamaꞌ, co aꞌnapita yaiꞌhuërëtarinquëmahuëꞌ! 14Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ. 15Yaꞌipi cancanëma quëran Quisocristo yonquicoꞌ. Inasoꞌ huaꞌanëntërinpoaꞌ niꞌton, chinotocoꞌ. Nani tahuëriya chiníquën cancantatomaꞌ, yonquicoꞌ Quisocristo nanamën shaꞌhuicamaso marëꞌ. Ina quëran “¿Onpoatomataꞌ imaramaꞌ?” itohuachinënquëmaꞌ, aꞌnaroáchin noꞌtëquën shaꞌhuitaramaꞌ. 16Ama noꞌhuitë pochin chiníquën shaꞌhuitocosohuëꞌ. Sanoanan quëran pënëncoꞌ. Yosë yonquihuatamaꞌ, noya shaꞌhuitaramaꞌ. Quisocristo imaramaꞌ niꞌton, noyasáchin nicatomaꞌ, noyápiachin cancantocoꞌ. Ina quëran pinopirinënquëmahuëꞌ, “Coꞌta noya nisapi. Quëmarisoꞌ nonpinapiran,” itarin aꞌnarintaꞌ. Itohuachina, pinotonaꞌpisoꞌ tapanarin.
17Co noyahuëꞌ nipatëra, parisitacasoꞌ yaꞌhuërin. Aꞌna tahuëriso nipirinhuëꞌ Yosë nohuanton, imarëhuasopitantaꞌ parisitarëhuaꞌ. Noya nipirëhuahuëntaꞌ, piyapi aparisitarinënpoaꞌ. Ina pochin parisitacasoꞌ Yosë nohuantërin. 18Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin. 19Ina pochin nanpiantaton, paꞌnin chimipiroꞌsaꞌ yaꞌhuërinquë. Inaquë tashinan pëiquë yaꞌhuapiso pochin nininsopita nanan shaꞌhuitonin. 20Inapitasoꞌ iráca Noi nanpisoꞌ, paꞌpi co noyahuëꞌ cancantopi niꞌton, ina nohuanton, Noi pënëntárin. Pënëntopirinhuëꞌ, co yanatëpihuëꞌ. Yosësoꞌ co aꞌnaroáchin anaꞌintërinhuëꞌ. Noi panca nancha nicasoꞌ, ninarapirinhuëꞌ, co natëpihuëꞌ niꞌton, anaꞌintërin. Ipora huantaꞌ parisitapi. Noisoꞌ nancha tinirahuaton, yaꞌconin. Naporoꞌ posayaꞌpíchin iiꞌ quëran chaꞌëpi. 21Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ. 22Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.
Currently Selected:
1 Pedro 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.