Pr 1
1
A'an a'in xyaalal li hu a'in
1A'an a'in xyehom laj Salomón,#1,1 1 R 4,32; Pr 10,1; 25,1. ralal laj David, awab'ej re Israel,
2re xk'utb'al li chaab'il na'leb' ut tzolok,
re xtawb'al xyaalal li xninqal ru k'a'uxl,#1,2 Stg 1,5; 3,13-17.
3re xnawb'al li chaab'il b'e,
a' li tiikil ch'oolej, li chaab'ilal,
b'ar wank li us ut li ink'a' us,
4re naq wanq xk'a'uxeb'
li ink'a' neke'xnaw k'oxlak,
ut wanq xna'leb'eb' li toj saajeb'
re te'xk'oxla chi us k'aru te'xb'aanu.
5Li wank xna'leb' ut seeb' xk'a'uxl
naxk'e xch'ool chi rab'inkil,
ut chi jo'kan naxtaw xtz'aqob' li xna'leb' ut li xk'a'uxl,
6re xtawb'al xyaalal li xyehomeb' li wankeb' xna'leb',
jo'wi' eb' li muqmuukil ut jaljookil ru aatin
li ch'a'aj xtawb'al ru.
7Li roxloq'inkil li Qaawa' a'an xtiklajik li chaab'il k'a'uxl;#1,7 Job 28,28; Sal 111,10; Pr 9,10; 15,33; Eklo 1,14.
eb' li jip neke'xtz'eqtaana li tije'k ut li q'use'k.
I. LI XB'EEN XSEERAQ' LI CHAAB'IL NA'LEB' (1,8—9,18)
Maataaqe eb' laj takchi'
8At walal ink'ajol, ab'i laaq'usb'al xb'aan laayuwa'
ut maatz'eq chirix laach'ool laatijb'al xb'aan laana',
9xb'aan naq li raatin laana' laayuwa'
jo'kaq junaq koroon sa' laajolom,#1,8-9 Pr 6,20-21; Eklo 6,29.
jo'kaq junaq chaab'il q'ol chakux laa'at.
10Wi eb' laj maak te'raj aatakchi'inkil,
maapaab'eb', at walal.#1,10-16 Sal 1,1.
11Mare anchal te'xye aawe: “Kim chiqix,
qaramaq sa' b'e li maak'a' xmaak
re xkamsinkil chi maak'a' xyaalal.
12Qanuq'aqeb' chi yo'yo li tiikeb' xch'ool,
jo' li kamk naxb'aanu
reheb' li neke'xik sa' xjulel kamenaq.
13Chi jo'kan tqeechani k'iila paay chi sahil eechej,
tqanujob'resi li qochoch ut toob'ihomo'q.
14Kim chiqix ut tqawotz
li k'aru tqeechani”, cha'qeb'.
15At walal ink'ajol, maapaab' a'an,
matxik chirixeb' ut maataaqe li xb'eheb',
16xb'aan naq neke'xseeb'a rib'
chi xb'aanunkil li maa'usilal
ut chi xkamsinkil li ras riitz'ineb'.#1,16 Is 59,7; Ro 3,15.
17Maak'a' rajb'al xk'eeb'al li ra'al
wi eb' li kok' xul yookeb' xk'eeb'al reetal a'an.
18Ab'anan eb' a'an a' ajwi' li xra'aleb' yookeb' chi xkawresinkil,
neke'xk'uub' li xkamikeb'.
19A'an a'in li te'xk'ul
eb' li neke'atawank b'ihomal:
taasachq li xyu'ameb'
xb'aan li k'aru neke'xrahi ru.
Li xb'oqom li chaab'il k'a'uxl
20Li chaab'il k'a'uxl yo chi aatinak sa'eb' li b'e
ut na'ab'iik li xyaab' xkux sa' li k'ayiil.
21Nab'oqok b'arwi' neke'ch'utlaak li poyanam,
ut naxjap re chi xyeeb'al sa' rokeb'aal li tenamit:#1,20-21 Pr 8,1-3; Sab 6,12-16.
22“Laa'ex li maak'a' eena'leb',
jo' najtil chik teeraj wank sa' xmajelal leena'leb'?
Ut laa'ex li nekeq'etq'eti eerib',
jo' najtil chik texwanq sa' leeq'etq'etil?
Ex jip, toj jo'q'e teekanab' xtz'eqtaanankil li chaab'il k'a'uxl?
23Chek'ehaq reetal leetijb'al inb'aan,
ut laa'in tinhoy linmusiq' sa' eeb'een;
tink'e chetaw xyaalal li waatin.
24Ab'an xexinb'oq ut ink'a' xeraj wab'inkil;
xinye eere naq texchalq wik'in,
ut maajun sa' eeyanq xsumenk.
25Xetz'eqtaana b'an chixjunileb' li waatin
ut ink'a' xeraj xk'ulub'ankil linq'usum.
26Jo'kan naq laa'in ajwi' tinse'eq
naq taachalq li rahilal sa' eeb'een,
texinse'e naq taa'ok leexiw,
27naq li xiwak tox'elq jo' junaq kaqsut-iq',
naq li rahilal taachalq jo' li muqyax,
ut toxexxtaw li raaxiik' ut li rahil ch'oolej.
28“Toja' naq tineeb'oq,
ab'anan laa'in ink'a' tinchaq'oq;
tineesik', ab'anan ink'a' tineetaw.
29Xb'aan naq xetz'eqtaana li chaab'il k'a'uxl
ut ink'a' xeraj roxloq'inkil li Qaawa'.
30Ink'a' xeraj rab'inkil li waatin
chi moko xepaab' linq'usum.
31Jo'kan naq teek'ul reeqaj leeb'aanuhom
ut texnujaq rik'in leeyib' aj na'leb'.
32Eb' li ink'a' neke'xnaw k'oxlak neke'kamk,
xb'aan naq ink'a' neke'raj xk'ulb'al li xna'leb'eb';
ut eb' li jip neke'sachk
xb'aan naq ink'a' neke'xk'e xch'ool chi tzolok.
33A'ut li naxk'e xch'ool chi wab'inkil
taawanq xyu'am sa' tuqtuukilal;
sa taawanq ut ink'a' taaxiwaq xb'aan li rahilal”.
Currently Selected:
Pr 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.