Flm 1
1
Xk'eeb'al sahil ch'oolej
1Laa'in laj Pablo li wankin sa' tz'alam sa' xk'ab'a' li Kristo Jesus, wochb'een laj Timoteo li qiitz'in, nintz'iib'ak rik'in laj Filemón li raaro qab'aan ut qochb'een chi k'anjelak, 2jo' ajwi' rik'in li Iklees li nach'utlaak sa' li rochoch. Nintz'iib'ak ajwi' rik'in lix Apfia li qanab' ut rik'in laj Arkipo li xooxtenq'a chi kaw sa' xk'anjel li Yos.
3Chiwanq taxaq eerik'in li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist.
Laj Pablo nayoxink chiru li Yos
4Junelik ninyoxink chiru linYos naq yookin chajultikankil sa'eb' lintij, 5xb'aan naq nawab'i resil chanru nakara ut nakapaab' li Qaawa' Jesus, re rusilankil chixjunileb' laj santil paab'anel. 6Juntaq'eet laapaab'aal rik'in li qe laa'o. Nintz'aama b'i' naq chik'utunq a'an rik'in xnawb'al chixjunil li us li naru xb'aanunkil cho'q re li Kriist. 7At wiitz'in, k'ajo' naq xsaho'k ut xk'ojlaak linch'ool xb'aan laarahom, xb'aan naq nasaanak sa' xch'ooleb' laj santil paab'anel sa' aak'ab'a'.
Laj Pablo na'okenk chirix laj Onésimo
8Jo'kan utan, us ta wank inwankil sa' xk'ab'a' li Kriist re aataqlankil chi xb'aanunkil li uxk taaraj, 9ab'an nawaj relajinkil aawu sa' xk'ab'a' li rahok, laa'in laj Pablo, ak xikenaq linchihab' ut anaqwan wankin sa' tz'alam sa' xk'ab'a' li Kristo Jesus. 10Nintz'aama usilal chawu chirix laj Onésimo li walal li xinsiya sa' tz'alam.#10 Laj Pablo xsiya laj Onésimo sa' tz'alam naq kixtenq'a chi ok chi paab'ank (cf. 1 Ko 4,15; Gal 4,19).
11Junxil laj Onésimo maak'a' na'ok wi' chawu, a'ut anaqwan chaab'il aj k'anjel chik chawu jo'wi' chiwu laa'in.#11 Sa' aatinob'aal griego laj Onésimo naraj naxye: wank rusil chi b'aanunk chaab'il k'anjel. 12A'in tz'aqal ralal xk'ajol linch'ool, ut anaqwan nintaqla wi' chik aawik'in. 13Laa'in toj xwaj raj xkanaak wik'in re taak'anjelaq chiwu jo' aawuuchil naq toj wankin sa' tz'alam xb'aan li Chaab'il Esilal; 14ab'anan maak'a' xwaj xb'aanunkil chi ink'a' xb'enwa xwab'i k'aru nakak'oxla chirix, re naq ink'a' minb'ilaq aawu chi xb'aanunkil li usilal a'in, chi anchalaq b'an aach'ool.
15Mare a'in aj e naq xatxkanab' chaq laj Onésimo chiru jarub'aq kutan: re naq anaqwan taakanaaq chi junajwa aawik'in. 16Ut ink'a' chik jo' loq'b'il aj k'anjel, jo' b'an chik li naq'axok ru li loq'b'il aj k'anjel, jo' jun li qiitz'in q'axal raaro. Jo'kan ninra laj Onésimo laa'in. Ma toja' ta chik laa'at sa' xk'ab'a' naq aawiitz'in ut aj paab'anel.
17Jo'kan utan, wi nakaweek'a naq wankin sa' komonil aawik'in, chak'ulaq a'an kama' tz'aqal laa'in. 18Ut wi xmaakob'k chawu malaj wank xk'as aawik'in, k'e cho'q ink'as laa'in. 19Laa'in laj Pablo yookin chi tz'iib'ak rik'in wuq'.#19 Cf. Kol 4,18. Laa'in tintojoq re. Nawaj ajwi' xyeeb'al aawe naq laa'at wank aak'as chiwu: a'an laajunxaqalil yu'am. 20Yaal, at wiitz'in, b'aanu we li usilal a'in sa' xk'ab'a' li Qaawa'. Chak'ojob' taxaq inch'ool sa' xk'ab'a' li Kriist.
21Xintz'iib'ak aawik'in chi k'ojk'o li waanm naq taab'aanu li usilal a'in; ut ninnaw naq q'axal naab'al chik taab'aanu chiru li nintz'aama aawe.
Xchaq'rab'inkileb' laj paab'anel
22Jo'kan ajwi' chakawresi wochochnaal, xb'aan naq yookin chi xyo'oninkil naq sa' xk'ab'a' leetij chi'usilaaq taxaq eeru re tinwulaq eerik'in.
23Naxtaqla xsahil aach'ool laj Epafras,#23 Chirix laj Epafras: cf. Kol 1,7. li wech preexil sa' xk'ab'a' li Kristo Jesus. 24Jo'kaneb' ajwi' li wochb'eeneb' chi k'anjelak: laj Markos, laj Aristarko, laj Demas ut laj Lukas.#24 Chirix laj Markos: cf. Hch 12,12; Kol 4,10; 2 Ti 4,11. Chirix laj Aristarko: cf. Hch 19,29; 20,4; 27,2; Kol 4,10. Chirix laj Demas: cf. Kol 4,14. Chirix laj Lukas: cf. Kol 4,14; 2 Ti 4,11.
25Chiwanq taxaq eerik'in li rusilal li Qaawa' Jesukriist!
Currently Selected:
Flm 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.