Ek 1
1
Maak'a' rajb'al chixjunil li wank sa' ruuchich'och'
1A'an a'in raatin laj Ch'olob'anel, li ralal laj David, ki'awab'ejink sa' xb'eeneb' laj Jerusalén.
2Li qayu'am maak'a' na'ok wi'
-chan laj Ch'olob'anel-;
jo'ch'inal jo'nimal wank sa' ruuchich'och',
a'an maak'a' xyaalal ut maak'a' rajb'al!
3K'aru naqara chirix li tawasij ib'
ut li naqayal wi' qaq'e sa' li ruuchich'och' a'in?
4Wan yookeb' chi yo'laak anaqwan,
ut wan yookeb' chi kamk,
ab'an li ruuchich'och' wank chi junelik.#1,3-4 Eklo 14,18-19.
5Eq'la na'elk chaq li saq'e ut ewu na'ok wi' chik;
naxik sa' junpaat sa' li xna'aj
re naq taa'elq wi' chik wulaj.
6Wan naq li iq' na'apunk sa' xjayal xsak'leb' iq',
ut wan naq na'apunk chik sa' releb'l iq'.
Naxsutis rib' li iq',
ut naxik wi' chik sa' li na'ajej x'apunk wi' xb'enwa.
7Chixjunileb' li nima' neke'xik sa' palaw,
ut neke'sutq'iik wi' chik sa' li xyo'leb'aaleb'
re xik wi' chik sa' li palaw;
ab'an li palaw maajaruj nanujak.
8Jwal ch'a'aj xch'olob'ankil
naq ink'a' nak'ojlaak li qach'ool xb'aan chixjunil a'an.
Maajun natawaak chi ilok,
maajun natawaak chi ab'ink!
9Li k'aru xk'ulmank junxil,
taak'ulmanq wi' chik;
li k'aru xb'aanumank najter,
taa'uxq wi' chik.
Maak'a' k'aru toj ak' sa' ruuchich'och'!
10Wi wank junaq naxye:
“A'in relik chi yaal naq toj ak'”,
ab'an li k'aru nayeemank naq ak',
ak wank ajwi' chaq junxil chiqu laa'o.
11Ink'a' jultik qe jo'nimal xk'ulmank junxil,
chi moko eb' li poyanam chalkeb' re
te'jultiko'q reheb' li k'aru xqab'aanu laa'o.
Maak'a' na'ok wi' xsik'b'al naab'al li qana'leb'
12Laa'in laj Ch'olob'anel xinwank cho'q awab'ej re Israel aran Jerusalén. 13Rik'in li na'leb' k'eeb'il we xink'e inch'ool chi xpatz'inkil ut xtz'ilinkil rix jo'nimal nak'ulmank sa' ruuchich'och'. Ut xintaw ru a'in: q'axal aal li iiq a'in xk'e li Yos sa' qab'een re tqapaqo! 14Xink'e reetal naq chixjunil li nak'ulmank sa' ruuchich'och', a'an maak'a' rajb'al ut chanchan li chapok iq'.
15Li yokos ink'a' chik naru xtiikob'resinkil, ut li namajelo'k ink'a' naru rajlankil.
16Toja' naq xinye sa' inch'ool: “Wank inna'leb', ut cham naxik wi'; jwal nim inna'leb' chiruheb' chixjunil li xe'awab'ejink arin Jerusalén xb'enwa chiwu.#1,16-17 1 R 4,29-31; Eklo 47,14-19. Q'axal xintaw inna'leb' jo'wi' xseeb'al ink'a'uxl. 17Xink'e inch'ool re xnawb'al b'ar wank li choxahil na'leb' ut li xseeb'al k'a'uxl, jo'wi' li memil ut li jipil, ut xintaw ru naq a'in ajwi' chanchan li chapok iq'”, chankin sa' inch'ool. 18Xb'aan naq ani naxsik' naab'al li xna'leb', nawank ajwi' naab'al li xch'a'ajkilal; ani numtajenaq xseeb'al li xk'a'uxl, numtajenaq ajwi' li xrahilal.
Currently Selected:
Ek 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.