2 Pe 1
1
Xk'eeb'al sahil ch'oolej
1Laa'in laj Simón Pedro, xmoos ut x'apóstol li Jesukriist, nintz'iib'ak rik'ineb' li xe'xmaatani li qaloq'laj paab'aal sa' xk'ab'a' li xtiikilal xch'ool li Jesukriist, a'an li qaYos ut aj Kolol qe. 2Chiwanq taxaq chi numtajenaq eerik'in li usilal ut li tuqtuukilal sa' xk'ab'a' xnawb'al ru li li Yos jo' ajwi' li Jesukriist, li Qaawa'.
Li xnimal xrahom li Yos
3Li xnimal xwankil li Kriist kixsi qe chixjunil li nak'anjelak sa' li qayu'am ut sa' li qapaab'aal, sa' xk'ab'a' xnawb'al ru li Yos li kib'oqok chaq qe rik'in li xloq'al ut li rusilal. 4Sa' xk'ab'a'eb' a'an xqamaatani chixjunil li kiyeechi'iik chaq chi junxilaj, a'an li q'axal nim ut loq', re naq chi jo'kan tex'eleliq chiru li maa'usilal li wank sa' ruuchich'och' xb'aan li yib' aj k'a'uxl, jo' ajwi' re textz'aqonq sa' li xyu'am li Yos.
5Sa' xk'ab'a' ajwi' a'an, yalomaq eeq'e chi xtz'aqob'resinkil leepaab'aal rik'in xchaab'ilal leeyu'am; chetz'aqob'resi leechaab'ilal rik'in li loq'laj na'leb'ak, 6li loq'laj na'leb'ak rik'in li taqlank sa' xb'een leetz'ejwal, li taqlank sa' xb'een leetz'ejwal rik'in li kawil ch'oolej, li kawil ch'oolej rik'in xloq'oninkil li Yos, 7li xloq'oninkil li Yos rik'in wank jo' eeras eeriitz'in eerib', li wank jo' eeras eeriitz'in eerib' rik'in li rahok.
8Wi wank li k'a'aq re ru a'in eerik'in ut chi numtajenaq, moko texwanq ta chi maak'a' rajb'al leeyu'am, chi moko chi ink'a' ta taa'uuchinq li xnawb'al ru li Jesukriist, li Qaawa'. 9Ani maak'a' li maatan a'in sa' xch'ool, a'an mutz' ut ink'a' saqenk na'ilok, ak xtz'eqom chirix xch'ool naq ke'ch'ajob'resiik eb' li xnajteril maak.
10Jo'kan utan, ex was wiitz'in, q'axal k'ehomaq eech'ool chi xkawub'resinkil leeb'oqb'al ut li xsik'b'al eeru xb'aan li Yos. Wi jo'kan nekeb'aanu, maajaruj text'ane'q. 11Chi jo'kan taateliiq cheru li okeb'aal sa' li xnimal ut junelik x'awab'ejihom li Jesukriist, a' li Qaawa' ut aj Kolol qe.
Li raatin li apóstol ut li raatineb' li propeet
12Jo'kan utan, maajaruj tinkanab' xjultikankil cheru li na'leb' a'in, us ta ak ch'olch'o cheru li xyaalal ut xaqxookex chi kaw sa' li yaal li wank eerik'in. 13A' yaal jo' najtil wanqin sa' li muheb'aal a'in,#1,13 Li muheb'aal a'an reetalil naq yal numelo arin sa' ruuchich'och' (cf. 2 Ko 5,1-5; Fil 1,23; 2 Ti 4,6; 1 P 1,1; 2,11). nink'oxla naq tento sa' inb'een rajsinkil ru leek'a'uxl rik'in xjultikankil cheru eb' li aatin a'in. 14Ninnaw naq chi seeb' tinq'ajq tinsutq'iiq, jo' tz'aqal xk'utb'esi chiwu li Qaawa' Jesukriist. 15Ut tinyal inq'e re naq chirix ajwi' linkamik tkanaaq sa' leech'ool chi junelik li xyaalal chixjunil a'in.
16Naq xlajqak'ut cheru li xwankilal ut li xk'ulunik li Qaawa' Jesukriist moko xqaye ta a'an jo' jun seeraq' li maak'a' rajb'al, chirix b'an naq ak xqil chaq tz'aqal rik'in qu li xnimajwal loq'al. 17Li Jesukriist kixk'ul rik'in li Yos Yuwa'b'ej li xnimankil ru ut xloq'al naq kitaqlaak chaq li aatin a'in toj sa' li xnimal xloq'al: “A'an a'in li walal raaro inb'aan; rik'in a'an nasaho'k linch'ool”. 18Laa'o koo'ab'ink re li xyaab' kuxej a'in li kichalk chaq toj sa' choxa, naq qochb'een chaq li Jesus sa' xb'een li santil tzuul.#1,18 Mt 17,1-8.
19Chi jo'kan q'axal chik paab'ajel cho'q qe li raatineb' li propeet. Us teeb'aanu wi teek'e eech'ool chi xk'ulub'ankil jo' nak'ulub'aak junaq saqenk nakutanob'resink sa' junaq na'ajej q'oqyink ru, toj reetal taahik'e'q li kutan ut taayo'laaq li kaq chahim#1,19 Li kaq chahim a'an reetalil li Qaawa' Jesus (cf. Ap 2,28; 22,16). sa' leech'ool.
20Ab'anan chetawaq xyaalal a'in xb'enwa: naq chixjunil li raatin propeet li wank sa' li Santil Hu maa'ani taaruhanq chi xch'olob'ankil xyaalal yal xjunes rib', 21xb'aan naq maajun raatin propeet kichalk ta yal sa' xch'ool junaq winq, kichalk b'an rik'in naq ke'wank winq eek'asinb'ileb' xb'aan li Santil Musiq'ej, ke'aatinak jo' kiyehe'k chaq reheb' xb'aan li Yos.
Currently Selected:
2 Pe 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.