1 S 1
1
Laj Elkaná ut lix Ana
1Kiwank jun li winq aj Suf, yo'lajenaq Ramatáhin sa' xtzuulul Efraín, aj Elkaná xk'ab'a', ralal laj Yeroján, ralal laj Toju, ralal laj Suf, aj Efraín. 2Laj Elkaná kiwank wiib' rixaqil: jun x'Ana xk'ab'a', ut li jun chik xPeniná. A'in wan chaq xkok'al, ab'an lix Ana maak'a' re. 3Li winq a'an rajlal chihab' nataqe'k chaq sa' li tenamit chi loq'onink ut yeechi'ink mayej chiru li Nimajwal Yos aran Siló, b'arwi' wankeb' li wiib' chi ralal laj Elí, aj Jofní ut aj Pinjás xk'ab'a'eb', aj tijeb' chiru li Qaawa'.
4Naq nawulak xkutankil li mayejak, laj Elkaná naxk'e re lix Peniná li rixaqil ut reheb' li ralal xk'ajol jo'k'ihal li mayej xk'ulub'eb'; 5ab'an lix Ana natz'aqk li k'aru jwal chaab'il, xb'aan naq q'axal raaro xb'aan laj Elkaná, us ta li Qaawa' ink'a' kixk'e chi alank. 6Jo'kan naq k'ajo' naq nahob'e'k xb'aan lix Peniná li rech ixaqilb'ej: xik' na'ile'k ut nach'i'ch'i'iik, xb'aan naq xma'al ixq.
7Jo'ka'in nak'ulmank rajlal chihab': naq neke'xik sa' rochoch li Qaawa', lix Ana nak'ehe'k xrahil xch'ool xb'aan lix Peniná; nayaab'ak ut ink'a' chik naraj wa'ak. 8Ut laj Elkaná li xb'eelom naxye re: “Ana, k'a'ut naq nakatyaab'ak ut ink'a' nakatwa'ak? K'a' naq ra sa' laach'ool? Ma ink'a' tab'i' q'axal usin chiru lajeeb'aq chi alalb'ej?”.
9Sa' jun kutan, chirix naq ak kiwa'ak ut ki'uk'ak aran Siló, kixaqliik lix Ana ut koxk'e rib' chiru li Qaawa'. K'ojk'o laj Elí laj tij sa' li xchunleb'aal, chire rokeb'aal li rochoch li Qaawa'. 10K'ajo' xrahil li xch'ool lix Ana! Ki'ok chi yaab'ak ut chi tijok, 11ut kixye re li Qaawa': “At Nimajwal Yos, chawil taxaq xtoq'ob'aal ru laamoos ut chinjultiko'q taxaq we! Wi taak'e junaq ink'uula'al teelom, laa'in tinq'axtesi aawe chiru chixjunil li xyu'am ut ink'a' taab'esmanq li rismal”,#1,11 Nm 6,5. chan.
12Jwal najt roq li tijok kixb'aanu lix Ana chiru li Qaawa', ut laj Elí yo chi xk'eeb'al reetal li xtz'uumal re. 13Lix Ana xjunes rib' yo chi aatinak: nach'emch'otk, na'eek'ank li xtz'uumal re, ab'an ink'a' na'ab'iik li xyaab' xkux. Jo'kan naq sa' xch'ool laj Elí naq taakalaaq: 14“Toj jo'q'e taanume'q laakalajik? Maawuk' chik b'iin!”, chan laj Elí.
15Ut lix Ana kixsume: “Ink'a', wa. Ink'a' xin'uk'ak b'iin chi moko k'a' chik chi ha'il li nakaltesink. Q'axal ra sa' inch'ool ut yookin chi xteeb'al li waanm chiru li Qaawa'. 16Maak'oxla naq laa'in jun li ixq ink'a' us inna'leb'. Xb'aan xrahil ut xyot'ik linch'ool yookin chi tijok anaqwan”, chan.
17Kichaq'ok laj Elí ut kixye: “Ayu sa' tuqtuukil usilal ut li xYos laj Israel chik'ehoq ta aawe li k'aru xapatz'”. 18“B'anyox aawe”, chan li ixq. Ut chirix a'an koho sa' li xb'e, kiwa'ak ut ink'a' chik kiraho'k sa' xch'ool.
Li xyo'lajik laj Samuel
19Jo' wulajaq chik ke'wakliik toj eq'la, ke'xloq'oni ru li Qaawa' ut chirix chik a'an ke'sutq'iik sa' rochocheb' aran Ramá. Laj Elkaná kiwank rik'in lix Ana li rixaqil, ut li Qaawa' kirusila li ixq. 20Kikanaak chi yaj aj ixq ut naq kiwulak xq'ehil, kiwank jun xk'uula'al, aj Samuel kixk'e cho'q xk'ab'a', xb'aan naq kixye: “Laa'in xinpatz' re li Qaawa'”.
21Chirix chik a'an laj Elkaná li xb'eelom koho Siló rochb'een chixjunil li xjunkab'al re xpaab'ankil li xyeechi'om jo'wi' re mayejak chiru li Qaawa' jo' na'uxmank rajlal chihab'. 22Ab'an lix Ana ink'a' koho, xb'aan naq kixye re li xb'eelom: “Naq akaq xmaq'mank chi tu' li k'uula'al, toja' naq tinxik chi xq'axtesinkil chiru li Qaawa'. Ut aran taakanaaq chi junajwa”.
23Kichaq'ok laj Elkaná li xb'eelom: “B'aanu li k'aru us nakak'oxla ut kanaaqat toj taamaq' xtu' li k'uula'al. A' taxaq li Qaawa' chixb'aanu li k'aru xyeechi'i”, chan.
Jo'kan naq li ixq kikanaak sa' rochoch ut kixtu'resi li xk'uula'al toj reetal kixmaq' chi tu'. 24Ut naq kixmaq' chi tu', kixk'am chirix. Kixk'am ajwi' oxib' saaj wakax, jun chakach chi k'aj ut jun kuk chi b'iin, ut kiroksi li xk'uula'al, chi toj kach'in, sa' rochoch li Qaawa' aran Siló. 25Toja' naq ke'xkamsi jun li saaj wakax ut ke'xk'am li k'uula'al chiru laj Elí. 26Ut lix Ana kixye: “Chinaawab'i, wa'. Relik chi yaal naq laa'in li ixq li koltijoq chak'atq arin chiru li Qaawa'. 27Xintz'aama naq tixk'e we li k'uula'al a'in, ut li Qaawa' xk'e we li xintz'aama chiru. 28Jo'kan naq anaqwan tinq'axtesi re li Qaawa' chiru chixjunil li xyu'am. Rehaq li Qaawa' jo' najtil yo'yooq”.
Toja' naq laj Elí kixhupub' rib' ut kixloq'oni ru li Qaawa'.
Currently Selected:
1 S 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.