Deut 1
1
Moisés itichunyenche Israel lhayis häp m'ayhay tä Lhawuk ifwenho p'ante lajchalis tä lhamel ihi Horeb
1Häp täja lhämtes häp Moisés tä ifwenho p'ante Israel lhayis tä ihi ts'anis, häp tewok Jordán lhip tä tumej hichä. Wok oyok, tä lhamel ihi honhat tä ifwache tewok, häp lhip tä tatayhlä Suf, wet hupuy tä lhey Parán tumej lhip elh wet hupuy tä lheyis Tofel, Pelaj, Alhotas, lhäy'e Chinaj Ka'tu, tumej lhip elh. 2Tälhe chenaj tä Horeb pajtha nichäte lhip tä lhey Kadés-barnea, häpe n'ow'ekyaj tä once ifwalas chik onukwe n'äyij tä ifwache chenhas tä lhey Seír.
3Tä tajyäme cuarenta nekchämis tä Israel lhayis yikch'oye honhat tä Egipto, häp iwel'a once wet ifwala tä ichun, Moisés ifwenho lhamel nilhokej m'ayhay tä Lhawuk ne'tek ifwenho. 4Lham pajche ikalhi Sehón, Amorreo lhayis laka rey tä lew'et Hesbón, lhäy'e Og, rey tä ihi Basán tä lew'et Astarot lhäy'e Edrey.#Núm 21.21-35
5Tä mälhyejtso, tä Israel lhayis ihi p'ante Jordán lhip tä tumej hichä, häp honhat tä Moab, Moisés iwo tesa tä ifwenho tähesna yämthilek lhamel iwoye. Wet yok:
6Lhawuk Dios tahuyhte n'oyehen tä olhamel oihihte Horeb wet yok, “Pitaj lewhäy tä lheyaywhäye chenajna. 7Athana chuma aka m'ayhay wet mähen, hoyaye chenhas tä ihi Amorreo lhayis kahonhat, wet äp hoyaye honhates tä tott'ahomche, häp honhat tä ifwache tewok Jordán, lhäy'e honhat tä chenhas, lhäy'e honhat tä w'awulhchä, lhäy'e lhip tä tapinhiye tä lhey Négueb, lhäy'e lewomek lhip, lhäy'e Canaán lhayis kahonhat, lhäy'e Líbano pajtha nichäte tewokitaj Éufrates. 8Olham tä Awukn'o pajche ow'en amhohen häp honhatna. Mähen wet chuma, a'en lewuhuya häp honhat tä ot'untejchehte olhämet häp atetsel Abraham, Isaac, lhäy'e Jacob, tä oyohtekwe, Ow'enla amhohen, lhäy'e ales tä lepes lheley.”
Hin'ol tä õyen n'okalelhthayajwosa
(Éx 18.13-27)
9Wet Moisés yok:
Ifwalastso ofwenhohte ajchalis tä oyok, “Tä ots'ilak, okalhihit'a chik otetshan amel. 10Tsi wujpey ales tä Lhawuk Dios hiw'en amhohen, wet athana ahäpe wichi tä wujpey, hätet iwoye katetsel tä ihi pule. 11¡Is chik Lhawuk tä häpe atetsel laka Dios yäm wujpey amel, inu'pe athana, wet is chik takäpfway amehen, mälhyej lhämet tä pajche iwoyej amehen!
12“Mälhyej tä oyäme, tä ots'ilak, okalhihit'ak otetshan nilhokej m'ayhay tä iyej amel. 13Tä mälhyejtso, is chik let'ukwe hin'ol tä ihanche m'akejen tä iyej amel tä letälhehen doce atetsel. Is chik häpe hin'ol tä hiw'enpe nilhokej m'ayhay, wet oyenla häpeya amel aka niyatey.”
14Mälhyejtetso olhämet. Wet lhamel nichulhte n'oho wet yok, “Is atichunhayaj.” 15Wet otchumahte elhpej hin'ol tä iyej lhamel tä tälhehen doce letetsel. Häpe hin'ol tä ihanche m'akejen wet äp hiw'enpe nilhokej m'ayhay. Wet ow'enhomchehte len'ohyajay häp lhamel yämthilek häpe wichi laka niyatey. Iyhäj oyente laka wichiya milpej, wet iyhäj oyen laka wichiya cienpej, wet iyhäj oyen laka wichiya cincuentapej, wet iyhäj oyen laka wichiya diezpej. Wet iyhäj oyen niyatey lech'otfwasa.
16Wet häp ifwalatso ofwenhohte niyatey tä oyämetso wet oyohtek, “Ch'ahuye wichi, tetshan m'ak tä lhamel iwatlä, häte tetshan lewit'äyhyajay tä iyej elhpej. Wet woyayeje m'ak tä is alhoho häp lhamel tä häpehen Israel lhayis lhäy'e wichi tä kahäpeya tä i'amejen. 17W'awlhatchä akalelhthayaj tä lewoyeje wichi, elh tä len'ohyaj ihi wok elh tä w'et m'ayek t'at. Yej nowaye lhamel, tsi Dios lakalelhthayaj t'at tä lewoye. Wet chik iche m'ak chik kahanayej lewoyneje, fwel n'oho wet olhamlak otetshan.”
18Ifwalatso ofwenhomche lhamel nilhokej m'ayhay tä is chik lewoye.
Israel lhayis lakachuhanyaj p'ante
(Núm 13.1—14.9)
19Wet Moisés äp tahuyej wichi wet yok:
Tä olhamel oyiktech'oye Horeb, wet otiyäje chenhas tä ihi Amorreo lhayis kahonhat, mälhyej tä Lhawuk Dios ne'tek owoye. Wet onukwe ts'anis tä wuj wet äp lhäy'e lhip tä ni'isa, mälhyej tä iyhäj amel lew'ente, pajte'tha olhamel onchäte Kadés-barnea. 20Wet tä olhamel oihihte, ofwenhohte wichi tä oyok, “Athana y'anchäte chenhas tä ihi Amorreo lhayis kahonhat, tä Lhawuk Dios hiw'en n'amhohen. 21Häp Lhawuk Dios hiw'en amhohen honhatna. ¡Mähen wet chuma, enay aka honhata mälhyej Lhawuk lhämet, häp lham tä häpe atetsel laka Dios! Yej ti amejen anowayhyaj, mat akhajyenhen.”
22Matkat ifwalatso lhamel iho n'oye wet ifwel n'oho tä yok, “Is chik iche hin'ol chik ichunlä n'amel yämthilek lhamel iyahinpe honhat. Wet chik tapil, lhamel ifwenla n'amhohen n'äyij chik y'anuhikwela lhäy'e hupuy chik y'achunkatlak y'atiyäjo.”
23Wet tä olätehte lhamel, oyok, “Is t'at.” Tä mälhyejtso, ot'ähi doce hin'ol tä iyej lhamel, weihalhapej hin'o tä tälhehen wichi tä tälhehen doce letetsel. 24Wet lhamel yikhen tä ihoye honhat tä chenhas. Wet tä nichäte p'ante tewok n'äyij tä lhey Eskol, wet ilunche t'at honhattso. 25Wet lhamel tachuma lhay tä ihi wet ichäj n'oyehen. Wet ifwel n'ohohen tä wuj tä is honhat tä Lhawuk Dios hiw'en n'ohohen.
26Mat wichi tek iwatläk ihoye, wet iwohiyet'a Lhawuk Dios lhämtes tä hiw'enho lhamel.#Heb 3.16 27Mat iwoye lhämtes tä tatayhlä Lhawuk tä ihiche lew'etes. Wet yok, “Lhawuk tek matche tä ihumin n'amel. Tä itonphä n'amel tä y'atälhe honhat tä Egipto, t'uhläk ilän n'amejen Amorreo lhayis yämthilek y'anofwej. 28Wet athana, ¿atsi honhat chik y'ahoye? Wuj tä lhanowayhyaj in'amejen tä y'aläte lhaka hin'ol tä tälhe honhattso tä lhamel yok, Wichi tä ihi honhat tä olhamel oyahne, wuj tä takhajayhen wet äp pites, inu'pe olhamel. Wet hupuy tä lhamel lew'etes lhäy'e lhip tä wus, wet n'olafwey tä lep'ot hupuy lhäy'e lhip tä atoschephä wet äp tach'opwayhen. Häte ow'en gigante Anak leles.”
29Wet olham onchulho wichi wet oyok, “Yej nowayhen. 30Lhawuk Dios ichunla ahilähen chik lhekhen. Lhamlak tatayhlä atayhfwas, mälhhiyeja iwoye täjnaj lew'en tä lheyayhi Egipto 31lhäy'e tä lheyayhi ts'anis. Lhawuk Dios tachum amehen, hätet iwoye hin'o tä itsok lhäs kwey. Aitsok t'at tä lenekche n'äyij pajtha lenämhen kana.”
32Matkat wichi kamaj ikachuye Lhawuk Dios,#Heb 3.19 33häp lham tä ichunpejlä lhamel wet t'ukwepej honhat tä is yämthilek iwo lakasthawetahi. Wet tä honatsi itäj t'at tä hin'älitche n'äyij yämthilek lhamel inukwe. Wet tä ifwala pule t'at tä ichunlä wet ipäyne n'äyij tä is chik inukwe.
Lhawuk itiyej lewäk häp Israel lhayis
(Núm 14.20-35)
34Tä Lhawuk iläte wichi tä ni'isachehen lhämtes, wuj tä lewäk ihi. Wet hit'unhatche lhämet tä yok, 35“Häp wichi tä ni'isahenna, wohit'ala elh tefwajni chik hiw'enla'pe honhat tä is tä ofwenhohte letetsel. 36Ts'ilakhila Jefone lhäs Caleb tä hiw'enla'pe, lhäy'e leles tä lepes lheley. Tä lham nileya n'oyej, ow'enhihola lhamel häp honhat tä lham pajche t'äspe.”
37Häte lhamel tä tamen n'oyej tä Lhawuk iti n'oyej lewäk wet yok, “Häte am tek letiyäjihola honhattso. 38Mat hach'otfwa Josué, Nun lhäs, häpkhilek tiyäjo. Tä mälhyejtso khajyen, tsi lhamlak hiw'enhomche honhat häp Israel lhayis. 39Wet amel ales tä kamaj nhanache honhatej tä lefwetajay atayhfwas isohla amejen, lhamenlak tiyäjo honhattso. Tsi olhamlak ow'enho lhamel yämthilek lhayen lewuhuya. 40Mat amel äpilche han'äyij tä letälhche, wet nukwe ts'anis tä letiyäje Lewomekchät.”
Israel lhayis iwohiyet'a Lhawuk lhämet wet letayhfwas ikalhi
(Núm 14.39-45)
41Wet wichi nichulhte n'oho wet yok, “Och'isukyaj ihi wet ottayhlä Lhawuk. Mat athana olhamel oyikhen, nemhit onowayhen, owohla oka'tshayaja mälhyej tä Lhawuk ne'tek olhamel owoye.”
Wet tä lhamel iwoyetso, iwo takwelheleya, fwetaj häpe t'at m'ak tä ni'thaya yämthilek ihoye honhat tä chenhas. 42Mat Lhawuk ifwel n'oho wet yok, “Fwenho Israel lhayis, ok, Yej lhekhen tä lefwetaj lewoyay aka'tshayaja. Yej alew'enho atayhfwas yämthilek ikalh amhihen wet ailänhen, tsi olham nemhit oi'amejen.”
43Wet ofwenhomche lhamel täjtso, mat lhamel iwohiyet'a wet tatayhlä Lhawuk lhämet. Wet tä lhaichäjwethä, fwetaj ihoye t'at chenhastso. 44Wet Amorreo lhayis tä lew'etes chenhastso, lhamel tatayhlä wet ihänwethä, hätet iwoye masawos tä wujpe. Wet ikalhi lhamel wet ilänhen tä ihi Seír, pajtha nichäte lhip tä lhey N'otäyhyaj. 45Wet iyhäj tä tapil, lhamel tafwchehchä tä ihi tä Lhawuk tatache, mat nemhit tach'ahuye lhamel. 46Wet häp tä tamenej tä wujpe nekchämis tä amel tä ahäpehen leles lheyayhi t'at honhat tä Kadés.
Currently Selected:
Deut 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.