Lucas 11
11
Conda e Jesús canseyan cocha tua' uc'ajti inte' taca e Dios
Mateo 6:9-15; 7:7-11
1Pues tama inyajr e Jesús war uc'ajti taca e Dios tama inte' lugar, y conda c'apa uc'ajti taca e Dios c'otoy inte' uyajcanuar tut xe' cay uyub'i tua' y che:
—Niwinquiraret, cansenon tua' cac'ajti taca e Dios b'an cocha cay uche e Juan xe' ajch'uymar taca uyajcanuarob', che uyajcanuar e Jesús era.
2Y che e Jesús:
—Conda c'ani ic'ajti taca e Dios, arenic cocha era y che:
Catata Dios xe' turet tichan,
catattz'i ac'ab'a xe' erach.
Lar tua' ic'otori tara tor e rum wacchetaca era.
Chen lo que ac'ani net tara tor e rum b'an cocha war ache tichan tut e q'uin.
3Ajc'unon xe' atz'acta tua' cac'uxi tama e día coner.
4C'umpen tacaron tama tunor camab'amb'anir b'an cocha war cac'umpa taca tunor tin e uche e mab'amb'anir capater.
Ira awacton tua' capijchna sino corpeson tama tunor uc'otorer e mab'amb'anir,
che e Jesús.
5Y de allí sutpa ojron e Jesús otronyajr y che:
—B'ijnunic nox jay ac'otoy inte' apiar tama o'tot uyuxin e acb'ar y matuc'a ayan tua' awajc'u uc'uxi, y tamar era i'xin tama uyotot inte' apiar y apejca cocha era y che: “¿Oo, war ca iwayan? ¿Ma ca tuc'a e pa' tab'a tua' awajq'uen chacojt ut? 6Porque yopa tama niotot inte' ajnajtir ajwara, y matuc'a tua' inwajc'u uc'uxi.” B'an tua' aware apiar. 7Y b'ijnunic jay o'jron e ajyum otot era macu y che: “Ira ac'apa atijres nipuerta, porque ch'arenix y warix inwayan nen y nimaxtac tacaren. Machi uyub'ien anchpa inwajq'uet lo que war ac'ajti era”, xe' tua' uyaret apiar era. 8Pero c'ani inwareox que motor que e ajyum otot era machi ani c'ani a'chpa tua' uyajc'u upiar lo que war uc'ajti umen que atzay uwira ub'ob', pero axin ixto a'chpa umen que war a'ru upiar taca inte' nuxi nuc tut upuerta. Y axin uyajc'u tunor lo que war uc'ajti era. 9Entonces c'ani inwareox era que c'ajtinic taca e Dios y jaxir axin uyajc'ox, sajcanic taca e Dios lo que war ic'ani tua' y ixixin itajwi, t'ojt'inic ut e puerta y axin apasc'a tiut. 10Porque tin e war uc'ajti taca e Dios axin uch'ami, y tin e war usajca axin utajwi, y tin e war ut'ojt'i ut e puerta axin apasc'a tut.
11’Y nox xe' tatab'irox, jay imaxtac uc'ajti ingojr pan tib'a, ¿iwajc'u ca ingojr tun? ¿O iwajc'u ca incojt chan conda imaxtac uc'ajti incojt chay? 12¿O iwajc'u ca incojt sinam conda imaxtac uc'ajti ingojr cum? 13Pues jay nox xe' ajmab'amb'anirox war isicb'a lo que imb'utz tua' iwajc'u imaxtac, y Catata Dios xe' turu tichan ¿machi ca axin uyajc'u Unawalir tunor tin e uc'ajti tacar? che e Jesús.
Conda e Jesús ulocse e mab'amb'an mein cay pojrna tamar
Mateo 12:22-30; Marcos 3:20-27
14Pues entonces e Jesús cay ulocse inte' mab'amb'an mein tama inte' winic xe' machi ojron umen que ch'ar e mab'amb'an mein era tama uyalma. Entonces conda e Jesús c'apa uyajnes ixin e mab'amb'an mein cay ojron e winic otronyajr. Y tunor e gente b'acta uwirob' lo que numuy era. 15Pero ayan tin e cay ojronob' upater e Jesús jaxob' taca y chenob':
—E winic era war ulocse e mab'amb'an mein tamar taca uc'otorer e Beelzebú xe' jax uwinquir e inmojr mab'amb'an meinob', xe' ojronob' e winicob' era upater e Jesús jaxob' taca.
16Pero ayan otro inmojr winicob' xe' c'ani ani umajres e Jesús, y tamar era cay uc'ajtiob' tua' jay erer uyeb'ta watar inte' seña tut e q'uin. 17Pero e Jesús war unata tuc'a war ub'ijnuob' y tamar era ojron y che:
—Jay tunor e chinamob' lo que ayan yeb'ar uc'otorer inte' gobernador acay uxere ub'ob' axin, entonces ac'apa utijres ub'ob' tunor e chinamob' era. Y b'an ub'an tama inte' winic xe' ayan umaxtac, jay acay uxere ub'ob' umaxtac era, entonces intaca aloc'oy axin inte' intiob', y ac'apa tunor e familía. 18Y b'an ub'an tama uc'otorer e Satanás, jay axin uxere ub'ob' tunor tin e aquetpob' yeb'ar uc'otorer, ma cocha erer aq'uec'o uc'otorer y axin ac'apa atijrpa tunor. War inwareox tunor era porque nox war iware que nen war inc'ampes uc'otorer e Beelzebú tua' inlocse e mab'amb'an meinob'. 19Y jay nen war ani inc'ampes uc'otorer e diablo tua' inlocse e mab'amb'an mein, entonces b'an war uchiob' iwajcanuarob' tib'a ub'an. Pero chequer tut iwajcanuarob' tib'a que majax uc'otorer e Satanás lo que ac'ampesna tua' aloq'uesna inte' mab'amb'an mein. Y tamar era chequer que majax erach lo que war ixojron nipater que war ani inc'ampes uc'otorer e Satanás tua' inlocse e mab'amb'an mein tamarob'. 20Pero jay nen era war inlocse e mab'amb'an mein tamar taca uc'otorer e Dios entonces war che que war ixto achecta uchinam e Dios tiut.
21’Pues e Satanás era b'an cocha inte' winic xe' aq'uec'o xe' war ucojco tunor lo que ayan macuir uyotot. Y tamar era tz'ustaca turu macuir uyotot umener. 22Pero jay watar otronte' winic xe' más aq'uec'o b'an cocha nen xe' Uyunenen e winic, entonces e winic xe' más aq'uec'o uc'ani tua' ucucru e ajyum otot y ucachi uch'ab'u, y de allí erer axin apojrsan.
23’Tin e machi atzay uwiren war aq'uijna uwiren, y tin e machi utacren tua' inmorojse niwoveja, más war ac'apa upucujcse axin tunor, che e Jesús.
Conda sutpa ochoy otronyajr inte' mab'amb'an mein tama uyalma inte' winic
Mateo 12:43-45
24Y de allí ojron e Jesús otronyajr y che:
—Ayan inte' ojroner tama inte' winic xe' loc'oy ixin inte' mab'amb'an mein tamar. Y conda loc'oy ixin e mab'amb'an mein era, cay usajca inte' lugar tia' taquin tua' ajiri tamar, pero conda machi utajwi acay ayopa tujor que: “¿Tuc'a tua' machi insutpa inxin tama uyalma e winic tia' loc'oyen?” che e mab'amb'an mein jax taca. 25Entonces sutpa ixin tama uyalma e winic otronyajr y utajwi que quetpa e winic era b'an cocha inte' otot xe' galan uwirnar xe' bien ustab'ir y bien mesb'ir macuir. 26Entonces e mab'amb'an mein sutpa utares otro siete meinob' xe' más calapir uwirnarob' y ixin ochoyob' tama uyalma e winic era otronyajr. Y tamar era e winic más erpa, che e Jesús.
E tzayer xe' machi ac'apa
27Pues conda warto o'jron e Jesús tama tunor era cay ojron inte' ixic tujam e gente taca inte' nuxi nuc e che:
—¡Chojb'esb'ir ut e ixic xe' ucuxiet y xe' uch'ijrset net! che e ixic.
28Pero e Jesús che:
—¡Pero más chojb'esb'ir ut tin e uyub'i uyojroner e Dios y axin ac'upseyanob' tut! che e Jesús.
Uc'ajtiob' e gente xe' mab'amb'an tua' achecta watar inte' seña
Mateo 12:38-42; Marcos 8:12
29Pues entonces conda e sian gente era war umorojse ub'ob' tuyejtz'er e Jesús cay ojron jaxir y che:
—E gente xe' turob' tara tor e rum tama e tiempo era mab'amb'an porque iraj iraj war uc'ajtiob' tanib'a tua' uwirob' watar inte' nuxi seña tut e q'uin tua' unatob' jay nen ayan uc'otorer e Dios tacaren. Pero machi tua' achecta más seña tutob' sino que jax taca tua' aquetpa e seña lo que cay uche e profeta xe' turu tama e onian tiempo xe' uc'ab'a Jonás. 30Porque chequer tut e gente tama e onian chinam Nínive que eb'etna tari e profeta Jonás umen e Dios, y b'anen nen ub'an. Porque c'ani aquetpa chequer tut tunor e gente xe' turob' tara tor e rum coner que nen xe' Uyunenen e winic eb'etna tarien umen e Dios. 31Pero conda watar e juicio e Dios axin umorojse tunor tin e ajmab'amb'anirob' tama inte' taca lugar tua' ub'ijnu uwira lo que cay uchiob'. Y tama e día era c'ani achpa e ixic xe' c'otori ani tama inte' nuxi lugar teinxejr b'ana xe' tua' uc'aye e gente xe' turob' tor e rum coner, porque jaxir tari tama inte' lugar xe' más innajt tara tor e rum tua' uyub'i unatanyaj e Salomón, pero turu tiut nox era inte' xe' más nuxi winic que e Salomón pero nox machi c'ani ixc'upseyan tamaren. 32Y tin e turob' ani tama e chinam Nínive tama e onian tiempo c'ani achpob' tama e juicio tua' uc'ayob' tunor e gente xe' turob' tara tor e rum coner, porque tin e turob' tama e chinam Nínive sutpa uch'amiob' uyojroner e Dios lo que arob'nob' umen e Jonás, pero turu era tiut nox inte' xe' más nuxi winic que e Jonás pero nox machi c'ani ixc'upseyan tamaren, che e Jesús.
Unac'ut inte' b'an cocha inte' janch'aquenar xe' aquetpa tama ucuerpo
Mateo 5:15; 6:22-23
33Pues entonces ojron e Jesús y che:
—Mamajchi utz'ajpes inte' lámpara tua' umuqui tia' ma chequer nien tua' uwab'u macuir inte' b'ejt, sino utz'ajpes inte' lámpara tua' uwab'u tichan tia' tua' ujanch'acnes tut tunor tin e o'choyob' macuir e otot era. 34Y unac'ut inte' lar tacar inte' janch'aquenar tama ucuerpo inte', y tin e imb'utz unac'ut erer ixto e'ron. Pero tin e ajmuac unac'ut machi e'ron. Y b'an ub'an tin e axin uch'ami niwojroner, tunor nicanseyaj c'ani aquetpa chequer tut. Pero tin e machi uch'ami niwojroner machi tua' unata tuc'a war che tunor nicanseyaj era, y aquetpa mucur tunor era tut. 35Pues tin e war uyusre uch'ami tunor nicanseyaj aquetpa b'an cocha inte' winic xe' b'ut'ur uyalma taca e janch'aquenar. Cojconic e janch'aquenar lo que ayan tacarox tua' machi atajpa y tua' machi asutpa incsib'aner tiut. 36Pues tin e war uyusre uch'amiob' nicanseyaj era larob' tacar ingojr otot xe' matuc'a e incsib'aner tamar umen que ch'ur inte' c'ajc tz'ajpesb'ir, y b'anox nox ub'an jay matuc'a e mab'amb'anir tama iwalma, erer inata tuc'a war che tunor lo que erach, che e Jesús.
Conda e Jesús uc'aye e fariseob' y e ajcanseyajob' tama uley e Moisés
Mateo 23:1-36; Marcos 12:38-40; Lucas 20:45-47
37Entonces conda c'apa ojron e Jesús pejcna umen inte' fariseo tua' axin awe' tama uyotot. Entonces ixin e Jesús esto tama uyotot e fariseo era y ochoy turuan tor e mesa. 38Pero e fariseo cay b'acta uwira que e Jesús machi war uche e rito tama uc'ab'ob' lo que uc'aniob' utata viejob'irob' conda c'anix awe' motor que e Jesús war upoqui uc'ab'ob' iraj iraj. 39Pero che Cawinquirar:
—Nox xe' fariseox war ipoqui upat inte' ch'eu o upat inte' plato pero macuir war aquetpa calapir, porque machi war ipoqui. Y b'an iwalma nox ub'an, motor que war iyates tunor ipeyejo pero macuir iwalma war ib'ijnu tamar taca e tumin y war iwajc'u iwerir tunor lo que war uyusre. 40Ajq'uecranerox, ¿machi ca inata que e Dios xe' cay uche tunor ucuerpo e winicob' jax taca xe' uche tunor uyalma e winicob' ub'an? 41Ustanic iwirnar b'ajxan y de allí erer iwajc'u tin e tzajtaca utob' lo que ayan tama ich'eu y lo que ayan tama iplato. Y jay b'an iche, axin aquetpa pocb'ir tunor iwalma.
42’Tzajtaca iut nox xe' fariseox. Nox war iche diezmar tama tunor lo que ayan tib'a. War iche diezmar tama e hierba buena y tama e ruda y tama tunor e sian cajr. Pero machi war iturb'a ib'a tua' iche lo que erach, y machi war iturb'a ib'a tua' iyajta ut e Dios. Y jaxto era xe' más ayan ani uc'ampib'ir tua' iche. Pero ira iwacta tua' iche diezmar taca e Dios b'an cocha war iche.
43’Tzajtaca iut nox xe' fariseox, porque nox war isajca e turtar xe' más galanic tua' ixturuan tamar tama e sinagoga. Y war iyusre tua' ixc'ajna umen e gente tama e calle.
44Tzajtaca iut nox xe' ajcanseyajox tama uley e Moisés y nox xe' fariseox, ajq'uecranerox. Nox larox cocha inte' mujr tua' inte' chamen que machi e'rna y que motor que war axana e gente tujor, pero ma erer unatob' tuc'a ayan macuir, che e Jesús.
45Entonces ojron inte' ajcanseyaj tama uley e Moisés y che:
—Conda awareon cocha era, intran ticoit conda coyb'i, che e ajcanseyaj tama uley e Moisés era.
46Pero e Jesús che:
—Tzajtaca iut nox xe' ajcanseyajox tama uley e Moisés ub'an, porque intran icanseyaj tama uley e Moisés tut e gente. Pues nox b'anox cocha inte' winic xe' war uyajc'u inte' nuxi tercio xe' imb'ar tua' acujcha axin, pero nien imb'ijc machi war itacre nox tua' erer a'chpa tacar, y b'an icanseyaj tut e gente.
47’Tzajtaca iut nox, porque war iche umujrob' e onian profetob' tua' itattz'i utob', pero jax taca itata viejob'irob' tib'a xe' ixin uchamsiob'. 48Y tamar era chequer que intera ib'ijnusiaj taca tunor lo que cay uchiob' itata viejob'irob'. Jaxirob' ixin uchamsiob' e onian profetob', y nox war iyustes umujrob'.
49’Y tamar era Cadiosir uyareon taca unatanyaj y che: “C'ani inweb'ta axin cora profetob' y cora apostolob' tua' uchecsuob' niwojroner tut e gente axin. Pero tujam tin e war inweb'ta axin ayan tin e tua' achamesna y ayan tin e tua' ayob'orna”, che Cadiosir. 50Y c'ani inwareox era que tunor tin e turob' tor e rum coner uc'ani tua' utoyob' uyeror tama tunor uchamesnarob' e profetob' xe' turuanob' ani tara tor e rum. 51Y b'an tama uchamesnar e Abel xe' yob'orna b'ajxan esto uchamesnar e Zacarías xe' chamesna tuyejtz'er e templo tut e altar tia' apurutna e arac. Y tamar era c'ani inwareox otronyajr que nox xe' turox tara tor e rum coner uc'ani tua' itoyi uyeror tama tunor uchamesnarob' e winicob' era.
52’Tzajtaca iut nox xe' ajcanseyajox tama uley e Moisés, porque nox war imuqui uyojroner e Dios tut e gente axin, y nox machi war ixcano, y nien machi war ic'ani tua' acanuob' e inmojr gente ub'an, che e Jesús.
53Entonces conda e Jesús c'apa ojron cocha era, cay q'uijnob' meyra tunor e ajcanseyajob' tama uley e Moisés y tunor e fariseob' upater e Jesús, y tamar era cay uyub'iob' meyra ojroner tua' e Jesús tua' uwirob' jay erer uq'uijnesob' ani. 54Y war usicb'ob' tuc'a tamar tua' utuch'iob' e Jesús tut e ley.
Currently Selected:
Lucas 11: caa
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.