Salmos 27
27
Uhuun Ifoan ua chashapacufoanna shara nanfin uhuun Numamisicoinquin
1Uhuun Ifo Diosifin uhuun faro cuscaraquin. Uhuun chaca ua soashona un a fu nipanon. Uhuun Ifoanfin ua cushusharaquin un futsafoqui ratutiroma. Uhuun Ifoanfin ua numapacunacaquin. Uncai tsoaquin musutiroma.
2Nan yora chacafo ua noicasmamisifoan uqui fucashon ua rutupaishquin. Ua noicasmacaquin ua pacumapaicani. Ascafia nan ua chaca muran pacumapaiyaifofin nanfocaifin chaca muran pacucaniquin.
3Ascan ranushumuafori uqui fucashon ua tarati huayacunafo ua rutupaicani. Un muacai uhuun nomuran un musuima. Un icanoshon ranushumuafoan ua rutupaifiaifoannocai uhuun nomuran un muacai un musuima uhuun Ifoan ua cushusharano. Uhuun nomurancai un ratuima.
4Un niyoashu uhuun Ifoan pushu muran un ipai a oinpacushquin. Nanfin fasi sharacoinquin. Un shafatifi uhuun Ifo oinpai ahuun pushu muranshon oinquin ahuunoa shinanfafainshquin. Nan fusti un uhuun Ifo yocain ua ashonon.
5Un nanno a fu icano un chaca finonfiaiton uhuun Ifoan ua cushushara un ahuuscanonma. Nanno ua onushquin. Nanton ua toquirininhuan camaqui ua nichishquin ahua chaca uqui nocononma.
6Un icanoshon ua noicasmamisifoan ua tarati huayacufiashucai uquicai tsoa nocotiroma. Un cuya fomancayashon un ato ointiro. Ascan Ifon Diosin pushu murannoa un inafo rutushquin un uhuun Ifo ismashquin. Un unimaquin oi ashcafinin aichoran un huashquin. Ascatari un Ifo fanainshocain aqui unimaquin un manushoshquin.
7Uhuun Ifon, un mia cunaiton ua nicapun. Uhuun ramapaipun un mia cufiain cuscan ua cumapun.
8Ifon, uhuun nomuranshon min ua tsain yoiai cuscan un nicain, —Uqui ohuu un mi fu tsainon, —ishon mian yoiaiton un mia cuma isca huaquin, —Ifon, un miqui cai mi fu tsainshquin, —ishon un mia cumai.
9Ascan uqui onuyamahuu, Ifon. Unfin min oinmatiquin. Uqui sinaquin ua potayamahuu. Minfin mirus fusti ua ashosharamisiquin. Uhuun Diosin, minfin uhuun Numamisi fustiquin. —Un mi fu afanan ipaimaran, —ishon ua yoiyamahuu. Ua potayamapun.
10Uhuun upa futan uhuun uhua ua potacun uhuun Ifoan ua ihuishquin un a fu inon.
11Uhuun Ifon min amisi cuscan ua tapimahuu. Ua noicasmaifoan ua pacupaiquin ua manacaniquin. Min fain cayacafi ua iyohuu. Un min fain shara ano caiton ua tsoan ahuusca huanonma.
12Uhuun Ifon, ua cushuhuu ua noicasmaifoan ua tsoan achinonfoma. Nanfoan uhuunoa chani yoiafo isca huaquin, —Nanton chaca huaran, —ishon yoifiafocai uncai ahua chaca huama. Uhuunoa fasi tsain curush yoiafo ua chaca huashcaquin.
13Ua asca huafiafo mun tapian un niyoshon uhuun Ifoan ua asho sharai cuscan un oinshquin.
14Ascacun nocon Ifo funacaquima manasharacahuun. Ahuun curushhuunoashu maton nomuran ratuyamacahuun. Nocon Ifo funaquima mana sharacahuun.
Currently Selected:
Salmos 27: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
