Números 27
27
Moisés niaifoi unuano Josué niaifo iishquin
12Ascano nocon Ifo Diosin Moisés yoini isca huaquin,
—Abarim machifo nan futsa mamaqui mapunyohuu. Nanrishon nan mai shara un min caifo Israelifo un ato inain cusca oinyohuu. 13-14Nan oianshu min ochi Aarón nani cusca minrifi man min nai. Tsoa istaipama ahuun anu Sin nan unu Meriba Cades anoshon un min caifofo yonoa cusca ua nicacasmacaquin uqui tsain chaca huanifo. Ascafia min ochi Aarón yafi un mato yononi cusca man ua nicacasmani. Nan unu anocai min caifofo min ato ismama unfin fasi sharaquin ahua chacacai u fu itiroma. Ascacun na mai shara anocai min iquitiromaran, —ishon nocon Ifo Diosin Moisés yoini.
15Nannori yoiaiton nicatan Moisés cumani,
16-17—Ifon, minfin nantifi yorafo nimaquin ninonfo. Ascacun nocofunu shara catonhuun uhuun caifoan aton niaifo inon ato raquira iyosharafain ato cushusharanon. Min yorafo aton cushumisi yopacani. Chashoanfo cushumisi maisi samamashta funotiro. Aton cushumisi yopacani. Nanscarifi ai uhuun yorafori cushumisi yopacani ato raquira iyofafainon, —ishon Moisés yoini.
18-19Ascaiton nocon Ifo Diosin cumani isca huaquin,
—Nunpan facu Josué mun catoan. Uhuun Yoshin Shara a fu rafumisi. Ascan Eleazar nan ahuun caifohuunshon ua cufinmisi non nantifi Israelifo icano Josué iyotahuun. Ascashon aton ointaifin Josué manmanhuun. Ascatan min Josué yoitiro nan min naitian naanfin mia cuscaran Israelifoan aton niaifo iishquiquin ato iyosharafain ato cushusharashquin. Nannori min yoiaiton min caifofoanri tapitirofo unmain aton Ifo Diosicun unfin Josué catoanquin aton niaifo funa inon. 20Ascano nantifi min yorafoan tapitiro min ato yonomisi cusca Josuéri ato yonoshquin. Ascan nan tapiafotian Josué ato yoishquiai cusca nicacointirofo. 21Ascatan un ato amapaiyai cusca Josué tapipai Eleazar ano catiro. Eleazar ahuun yorafohuunoa ua cufinmisiton ua yocashotiro. Ascano un Josué non ahuun caifo Israelifo amapaiyai cusca Eleazar Josué tapimatiro. Ascatari un chipo ato amapaiyai cusca Josué ahuun caifo Israelifo tapimatiro. Nan ato iyopaiquiri fotirofo. Ascatari nan ato ihuupaiyaiquiri futirofo. Nantonfin arus fusti ato yonotiroquin, —ishon yoini.
22Ascano nocon Ifo Diosin yononi cusca Moisés yafi Eleazar non nantifi ahuun caifofoan aton ointaifi Josué iyoni nan Diosin catoan cusca tapinonfo. 23Nan nocon Ifo Diosin yononi cusca Moisés ahuun mucu rafutan Josué manmanni. —Natianfin min nocon niaifo iishquicain nocon Ifo Diosin mia tapimai cusca min yorafo tapimashquin, —ishon Moisés Josué yoini.
Currently Selected:
Números 27: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
