Deuteronomio 30
30
Israelifoan Diosi tanasharashu isharashcaquin
11Nocon Ifoan noco yonoa cuscacain curushma. Manfin atiroquin. 12Diosincai nai muranshon mato yonoama man nicanonma. Nanscaraquin man yoca cuana isca huaquin, —¿Tsoanmun nai muran Dios icano catiroquin nocon Ifo Diosin noco yonoa cusca nicashu nasocuratiro nocori tapimashquin noco yonoa cusca non anon? —ishoncai anori man yoitiroma.
13Ascataricai ununhuan ocuma futsashori nocon Ifo Diosin mato yoiama man nicanon. Nanscaracufin man yocacuanaquin isca huaquin, —Tsoanmun ununhuan pocufaitiroquin nocon Ifo Diosin noco yonoa cusca non nicanon. Ascashu afanan nocoqui nasocuratiro norifi non nicasharanon noco yonoa cusca non huanon, —ishocai man anori yoitiroma. 14—Ascatamarocon nocon Ifo Diosin mato yonoa cusca man aya. Mato yonoa cusca man yoitiro. Maton nomuranshon mato yonoa man man tapia. Nan mato yonoa cusca man anon, —ishon Moisés ahuun caifo nan Israelifo yoini.
15—¡Nicacapon! Na shafata un mato yonoa cusca man catontiro man isharaicai man ahua yopashquima. Iyamarai man isharayamaino man nai cuyoshquin. 16Un mato yonoa cusca nocon Ifo Dios noicoinfain mato yonoa cusca nantifi nanscacoincahuun. Diosin mato amapaiyai cusca man aiton mato shara huashoshquin manfin yora ichapacoin caiishquicain. Na mai shara ano matona iishquin. 17-18Ascafia maton nomuranshon nocon Ifo Diosihuunoa man afanan a shinanyamafain man nicacasmatan caifo futsafoan aton dioscoinma ramihuafo man ratoconun mai chachishon nan cufinshcaquin man asca huaiton un na shafata mato yoi iconcoin man nai futsushquin. Man unu Jordán pocufainicai nan mai ano iquishcaquin. Ascafia man nocon Ifo Diosi nicasharayamaiton nannocai man chai ipatiroma.
19-20Na shafatan un mato yoiai cusca nan nai murannoafo nocon Ifo Diosi fu icafoan nicaino yafi mai ano icafoanri nicaino un mato cayacafi yoiai cusca man catontiro man niisharatiro iyamarai man nai futsushquiai cusca man catontiro. Nocon Ifo Diosimain mato shara huashoshquin iyamarai mato chaca huashquicain. Natian uhuun yorafoan man niyoatian isharacahuun. Maton facufoya niisharacain nocon Ifo Diosi noicoinfain a nicasharafain a fu rafufafaincahuun. Nocon Ifo Diosihuunoashufin man niisharatiroquin. Upa Diosin nocon shunifo Abraham non Isaac non Jacob yoicoinni na mai shara ato inanshquin. Nocon Ifo Diosin matori na mai shara ano mato chai imasharashquinran, —ishon Moisés ato yoini.
Currently Selected:
Deuteronomio 30: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
