1 Samuel 17
17
David yafi Goliat
1Nantian Filisteofoan aton ranushumuafo ichanannifo Israelifo rutunainfono. Nan pushu rasi Soco Judá mai anoa Azeca ano ichanannifo. Ascan nan mai anunifo Efes-damimran ishon yoinifo. 2Ascan nantianri Saúl Israelifoan aton ranushumuafo ichanan huani chaimashta machi rafu nushmancayan inifo. Israelifo icano nushmancayan mai mispa ano Filisteofo icafo ini. 3Ascan Filisteo ranushumuafo machi futsa ano icafo ini. Israeli ranushumuafori machi futsa ano icafo ini. Israelifori mai mispa nushmancayan inifo. Filisteo ranushumuafo non Israeli ranushumuafo chaimanoashu ori rafunoashu oinonannifo.
4Ascaino Filisteofoan aton ranushumua futsan ahuun anu Goliat fasi uhuapacoin Israeli ointaifin catacatani. Ahuun cuya rafu non fusti metro. 5Ahuun cuno maiti maiya ini. Nan cuno ahuun anu bronceran huani. Ahuun cuno sahuutinin shofucumua ahuun ihuu cincuenta y cinco kilos. 6Ahuun cunopari ocuma rafu finushumucain ahuun puchihuuriri ahuun ashi cunocoin chainipa puchihuuri nutafain 7Ahuun ashin rushpi chai cushtocoin icaino ahuun cuno ahuun ihuu siete kilos cuana. Nocofunun futsan rucu cani ahuun cuno sapa nitunhuatiya tsomashomisi ashin chachinonma. 8Ascan Goliat nituaino Israeli ranushumuafo cunani ato yoiquin isca huashquin,
—¿Israelifoan, ahuuscaimun man ichanaincain manraca noco rutuicai? Unfin Filisteoquin. ¿Man Saúl ahuun oinmatifomun? Ascan fusti uqui fucahuun manmain ua rutuyamarai un mato rutuicai. Ascan fusti catoncahuun uqui onon. 9Ascan min caifoan ua rutuano nonfin Filisteofo non maton yonomatifo itiroquin. Ascan un min caifo rutuano manfin Israelifo noco yonomatifo ishquicai. 10Na shafata un mato yoi. Ascan ratoran futsa uqui musuquima uqui nichihuun. Non tapinon tsoanmain shuhuintiroquin, —ishon oi ashcafinin Goliat cunani.
11Ascaiton nicacaquin Saúl futan ahuun ranushumuafoan shinannifo isca huaquin, —¡Ohuashta! Non ahuusca huatiromaran, —ishon shinancani. Fasi ratucoincani taritarinifo. 12Nantian Isaí anifoshta Belén ano ica ini. Nantifi ahuun facu nocofunufo ocho ini. Furu chipocuton ahuun anu David ini. 13Furun iyoaton ahuun anu Eliab. Chipocun futsa ahuun anu Abinadab ini. Acachorinoaton ahuun anu Sama. Nan rafu non fustifin Saúl ahuun ranushumua iniquin. Saúl fu fonifo Filisteofo rutui focani. 14-15Ascan David furu chipocucoin Saúl pushu ano apa pushu Belén ano catacatapaoni apan chashoanfo cushushoshquin.
16Nan cuarenta osha finontan shafatifi Filisteo cuyamasoacoin Israeli ranushumuafoan aton ointaifin catacatapaoni ato musumashquin.
17Ascan shafa futsa Isaí furu David yoiquin isca huani, —Upashtan, nan trigo tsoi forusa muran fofain misi mucu rafuti min ochi ranan ranushumuafo muran icafo ato foshoriscatahuun. 18Ascashon aton ranushumua niaifori queso mucu rafuti foshotahuun. Ascan min nasoaitian min ua tapimatiro min ochifo sharamainquin. Ato yoihuu ua tsain fumanonfo. 19Min atoqui nocotiro Saúl yafi ahuun ranushumuafo machi rafu nushumancaya ahuun anu Ela anoa. Nanno Filisteofo rutushcaquin icaforan, —ishon Isaí furun David yoini.
20Ascan iyoconaino futsan chashoanfo cushuaino apan yonoa cuscan ahuun ochifo tushu foshoicai burropan catucamaqui cani. Israeli ranushumuafoan Filisteofo rutui foaifono David atoqui nocoquin nican oi ashcafinin yoinifo, —Non Filisteofo rutui canon, —ishon yoinifo. 21Ascan Israeli ranushumuafo yafi Filisteo ranushumuafo chaima oinonnancani rutunanpairianifo. 22Nantian David ahuarafo fushoa cuscan nan tushu yafi mafo cushumisi inantan ahuun ochi fu ranushumuafo icano ichoni. 23Iyoa rafu non fusti tsaincaino nan Filisteo pushu rasi Gat anoashu ahuun anu Goliat nantifi ahuun caifo ranushumuafo finoncoian afanan cashon ato asca huamisi cuscan Israelifo roani, —Mato ranushumua nocofunu futsa uqui nichihuun. Non tapinon ua rututiromainquin, —ishon cashu mutsama huaiton David nicani.
24Ascano Israeli ranushumuafoan nicacani fasi ratucoincani Goliatqui musucani ichonifo. 25Ascan Israeli ranushumuafoquin yoinannifo, —Nicapon nan Filisteo uhuapacoin yoimisi cuscan. Shafatifi noco yoimisi tsoamain a fu rutunantiroquin. ¿Saúl niaifoan yoia cuscan man man nicamun yoiquin isca huaiton? “Tsoan Goliat rutuafin un pui ichapacoin inaincai. Uhuun ainfacuri un inain ahuun ahuin inon. Non nantifi Israelifo faritifi pui yoca cuscan ahuun yorafo afanan non ato pui yocapacunacamaran,” ishon niaifoan yoiaran, —icashu Israelifo yoinannifo.
26Ascaino David chaima futsa niaton yocani, —¿Tsoan Filisteo rutuamun ahua niaifoan inainquin? Nan Filisteo noco fucash huaquin noco cashu mutsama huaino non rafipaitiro. Manfin Israelifoan ahuun ranushumuafia manfin nan Diosin ahuun yoraforiquin. Nocon Diosifin natian niaquin. ¿Ahuuscai na Filisteo Diospan ahuun yorayamafiashon noco tsain chaca huafain noco musumapaimun? —ishon David ato yoini.
27Nannori nicacatan ahuun yorafoan nan rama yoiafo cuscan yoiquin isca huanifo, —Min nica cuscan icon. Tsoan na nocofunu Filisteo rutuafin niaifoan nan inansharaiquin, —ishon David yoinifo.
28Ascan huaiton iyoaton Eliab nicain chipocun David ranushumuafo fu yoinonainno Eliab aqui sinacoinquin yoini,
—¿Ahuuscai min nuno oamun? ¿Natian tsoan na chashoan fustirasi cushuimun? Mun tapian min cacapaimisi. Min nomuranshon min shinanchacaifin. Rutunainfoan oinpai min oaquin, —ishon iyoaton Eliab yoini.
29—¿Ahuuscai min uqui sinaimun? ¿Un ato fu tsaintiromamun? —ishon David cumani.
30Ascan chaimashta shucucaitan futsafo yoca cuscan atori David yocani. Nan futsafoan cuma cuscan futsafoanri cumanifo. 31David yoiai cuscan nanno niafoan niaifo Saulqui chaninifo. Ascano Saúl futsa nichini David aqui onon. 32Ascano David Saúl yoiquin isca huani,
—Niaifon, nan Filisteon noco caifofoqui noco ratumapai. Un nantifi uhuun yorafo yoipai nan Filisteo cuyamasoaqui ratunonfoma. Unfin min oinmatiquin. Un na nocofunu cuyamasoaqui un catiro rutushquin, —ishon yoiaiton.
33Ascaiton Saúl cumani —Min na Filisteoqui catiroma rutushquin. Mincai ranushumuama. Minfin pushcoai fustiquin. Ascan Filisteo pushcohuinacahuanaitian futsafo rutuquin tapicoianquin, —ishon cumani.
34-35Ascaiton afanan David cumaquin isca huani,
—Niaifon, unfin min oinmatiquin. Un uhuun upan chashoanfo cushushomisi. Ascan masharo uhuapaton uhuun upan chashoan futsa foaiton un mufaintan uhuun chati un masharo cosha ahuun ashfa murannoa un chashoan tsucatan afanan chashoanfo muran ano un iyoa. Ascan nan masharonun ua pipaiyaiton un ahuun cotipan achishon un coshaino man naa. 36Masharo rafu ahuun anu leon yafi oso un rutua. Ascan nocofunu Filisteo Diospan ahuun yorama. Nan masharo rafu un rutua cuscan un nanri rututiro. Manfin ranushumuafo Diosinafoquin. Diosifin niaquin mato cushushquin. Ascafiaino Filisteon mato ratupai. 37Nocon Ifo Diosin ahuun curushhuunshon ua numa ua masharo rafutan rutunonma. Nan masharonunhuan mutsisipafiashon nocon Ifo Diosin ua ahuun curushu inainno ua masharonun piama. Ascan nan Filisteon cuyamasofia Upa Diosin numatiro ua rutunonma, —ishon David yoini.
Nannori yoiaiton nicaquin Saúl yoini, —Aqui catahuun. Nocon Ifo Diosi mi fu caiquin, —ishon yoini.
38Ascashon Saúl ahuun cuno maiti non cuno sahuuti David sahuumani. 39Nanfo nutafain nopuri ahuun ona muran nanuni. Nan cuno maiti yafi cuno sahuuti sahuushon mua fasi ihuucoin ayacain catiro inima. Ascashon yoini, —Niaifon, uncain min sahuutifo un fuya huatiroma. Ascan un Filisteo rutuicaquicai un afo sahuutiroma, —ishon yoini.
Ascashon pucani. 40Ascatan shorifaintan shushanaquinoa mucu fustiti toquiri fiitan ahuun noshati muran nanuni. Ahuun rusfi toquiri potati muran fusti nanufain chashoan cushumisiano ahuun poquitiya Goliat ano cani. 41Ascan Goliat oaino ahuun oinmatinin ahuun cuno nituhuati escudo cuscaran curushcoin pia yafi ashi iquinonma tsomashonano funaiquimashta David shinain chaima oni. 42Goliat David oinquin oian pushcoshta ahuun fuso sharashta. Ascacun Goliat ahuun nomuran shinan, —Na pushcocai ahuamaran, —icashu aqui cashupaini. 43Ascashon Goliat David yoini isca huaquin,
—¿Min shinanmun un pashnacun min uqui poquitiya oa? —ishon yoini.
Ascan ahuun diosifo nan rami huafohuunshon Goliat Davidqui tsain chaca huani. 44Afanan Goliat yoini,
—Nuri ohuu. Natiafin un mia rutuicai min nami cotocotofo pimafain yoinafori un pimaicai, —ishon Goliat yoini.
45Ascaiton David cumani, —Min uqui oa nopu yafi ashi tsomashu. Ascan unfin nocon Ifo Diosihuunoashu miqui oaquin. Nanfin Israelifoquin nocon Diosin. Ahuun curushhuunshon ahuamamishti huatirofiacun min shinan ahuun yorafo cushuama. 46Ascan na shafata nocon Ifo Diosin ahuun curush ua inainno un mia rutufain mia tushtui. Na shafatan min ranushumua Filisteo un nantifi maton caya cotocotofo non yoinafo ato pimai. Ascan manifotiton tapitirofo Israelifo fu Diosin ica. 47Ascan nopu yafi ashi ascarafocai nocon Ifo Diosin yopaima ahuun yorafo numashquin. Ascan rutunainfoan nocon Ifo Diosin apaiyai cuscan rato futsan shuhuinmatiro. Ascan na shafata min non min caifo nantifi nocon Ifo Dioshuunshon non mato rutuqui futsairan, —ishon David yoini.
48Nannori nicatan Goliat chaima oaino David aqui ichoni. 49Ascan aqui ichotan ahuun noshati murannoa toquiri fini. Ahuun rusfi toquiri potati finifoantan toquirinin Goliat fumanan tsacani. Ascaino Goliat pacuni. 50Ascan David toquiri yafi rusfi potati fustiyafiashon Filisteo cuya masocoinfiacun rutuni. Nopu maisifiashon David Goliat rutuni. 51Ascan David ichotan Goliat racacun nopu ahuun ona murannoa tsucatan ahuun tushtuni.
Asca huatan Filisteofoan oianfo aton yora Goliat David man rutua. Rato futsacai aton caifo murannoa Goliat cuscarama. Goliat cuyamasoa mutsisipacoin nantifi finoncoian. Ascan nan oincani Filisteofo fasi ratucoinnifo. Ratucoincani nasofuracani ichoriscanifo. 52Ascaiton Israelifoan oincani fasi oi ashcafinin yoinifo, —¡Aicho! Goliat man naaquin. Non Filisteofo rutunoncahuun, —icashon oi ashcafinin yoinifo. Ascatan ato mufaincatan ato rutupacunifo. Filisteo ichapacoinfo Israelifo futan Judáfoan ato rutunifo. Nan mau faihuan ahuun anu Saaraim ano yafi Gat non Ecrón ano Filisteofo rutuafono aton cayafo racani.
53Ascano ato rutuquin anaititan Israelifo nasonifo nan Filisteofo icafoanno aton ahuara sharafo finifo. 54David Jerusalén pushu rasi ano Goliat ahuun mapo foni. Ascan ahuun ashi non ahuun nopu non ahuun chati ahuun pano pushu muran huani.
55Ascan David Goliat ano caiton Saúl oinquin Israeli ahuun ranushumua niaifoan ahuun anu Abner yocani isca huaquin,
—Abner, ua tapimahuun. ¿Na pushco David tsoan facumun? —ishon yocaiton.
56—Niaifon, uncai tapiamaran, —ishon Abner cumaiton.
—Ascan ua tapimacahuun, —ishon niaifo Saúl yoini.
57Ascan David nan Filisteo Goliat ahuun mapo tsomano Abner David Saulqui ihuuni. 58Ascaiton Saúl David yocani,
—¿Pushcoshtan, ua tapimahuun min upa tsoamainquin? —ishon yocaiton.
David cumani,
—Uhuun upa anufin Isaiquin. Belén pushu rasi anofin icaquin, —ishon cumani.
Currently Selected:
1 Samuel 17: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
