Deuteronomio 28

Taa Pueyaso miiniutianiya na tojitiaashijiacani

58“Pueyanonaa, nio quia tojiri. Quiaa jaara nio nequesoreetujinia naajiotasano tojiyaquijia quiriquia, na miyaquijiajuhuaj, cunoori jiyanohua puereeta. Naajuhuaj, quiaa cocuaatia miya quiaa jaara quia Camarnu Pueyaso jiyaniquijia na rerequetenuta. Nojuacuajaari na shacantuuca cumaacajinia quijia. 59Naa na sequesano tojiyaquijia quia quiniuucuatej, nojuajaari quiocua jiyaronutaniya queraatia naquiya miiniu, quiocuajinio caneno pueyacuanio. Naa niaacua jiyaroriquiano tojeeca cusonuuri. Majaari na naata naarajosaanu quiniutianiya. 60Quiocua sanasaariquianojaariuhuaj noo naquiya miiniu Egipto jiyajinia quijiaca nata sanishaaquiaaricuaatej. Naa na niquiyanoquia, quiaari jiyanohua na puerequiaari. Cuno naquiya miiniuuri naa quiocua paaretasaariquiano pueyaracaanutej. 61Naajuhuaj, Pueyasoori socua tamaatiuucua cusonu jiyaronutaniya, socua naquiya miiniujuhuaj. Puetunu cunojuanaari maja nio naajioneejinia na pohuatasaanu. Quiaari naa puecasaariquianotej. 62Naacuatej Israel pueyanaa, niaari queraraqui quijia, serojosootej, juhua jiya cajiniocua quijia riyaja. Niaari naa juurajashojosaariquianotej, nia camarnu Pueyaso nia tojiyaquiniuucua. 63Naatej taa Pueyaso timitiaquiaari mijiria jiyanohua nia canesacaricuaanij, naajuhuaj nojuajaari naa timiniutianiyajuhuaj nia puequesacari, nia juurajashiniuucuajuhuaj. Naacuatej niaari ritia niaaarano Pueyaso niquitiosano jiyajiniji jayosaariquiano. 64Pueyasoori naa nia niyacariquiano puetunu jiyacajiniajanaatej jiya puequeetujiniara, jiya tamajiriajuhuaj. Niaari tii cuno jiyacajinia nia quishacari cuno taucuaca jiyanishano pueyasohuacuara jacamatujuaca quiriquiano. Cuno taucuaca jiyatesano na pueyasohuarani, cunoori naanajiniji quejasano casaa, saajiajiniji jeecasano casaajuhuaj. Cuno taucuaca jiyatesano na pueyasohuarani, cunoori nia niishishoo jeecojosano casaa, tariucuacaanu nia supuetanaa niishishoo jeecojosano casaajaariuhuaj.”

Currently Selected:

Deuteronomio 28: arl

Highlight

Copy

Compare