2 Croonicas 7
7
1Naa Salomoon tucuatasacari secojonutej, maniiri jiya cajiniocuaji tiquii. Pueyasorano catijiasocoriquiano puecoosano seya catijiaree puetunujuanaari. Pueya niquitiojosano seya catijiareejaariuhuaj. Jiyacaritij, Pueyaso shacantuuca cumaacaari secojojua tiajiniaaco cuhuataree. 2Naacuatej, pueyacuara Pueyaso secojonaa pueyari maja na naata tiuquitianu quiriquiaa secojojua tiajiniaaco. 3Naa puetunu Israel pueyajanaa niquishacari Pueyaso shacantuuca cumaaca roseyano secojojua tiajiniaratej, nojoriiri jiyacari Pueyaso na timitiatunura jacamaturee. Na jiniji rupueteturee jiyocuaari. Nojoriiri jiyacari naa na sequenuta Pueyaso maniniuhuaqueetaree: “Pueyasoori maniniajuhuanajaj. Na paniniuuri turetaaquiriquiano, quiriquianojuhuanaari.” Pueyaso secojojua tia cariiri puetunu mishiquiosanojanaa quijia shanohua cumaraacua casaata tee pueya quiriquiaacuajani.
4Na nuhuaji camarnu Salomoonri puetunu Israel pueyatajanaa na seya puecootequiaari Pueyaso jiyanooniuria nojori. 5Camarnu Salomoon puecootesanoori quiquiaari veintidos mil juunu, ciento veinte mil borreecohuanio.
Camarnu Salomoon, puetunu narta Israel pueyajaajanio, nojoriiri naa jiyacari jiyatetuquiaari saaja Pueyaso secojojuara cuno tia quiniuria.
6Jiyacaritij, puetunu pueyacuara Pueyaso secojonaa pueyajanaari na miishano cojetacoriquiaa. Naajuhuaj, supuetana Leviicuajinio caneno pueyaniqui, nojoriiri Pueyaso maniniuhuaqueetajara tariucuacaanu camarnu David jeecojotesano casaa jonenenuuriquiaa. Taquinionuuriquiaajaariuhuaj. Puetunu nojorijianaari nio jaaquejosano jaaquenuuriquiaa. Naa sequeyari: “Pueyaso paniniuuri quijiajuhuanajaj, naa pueyaracaanu quiriquianojuhuanaari.” Jiyacaritij, puetunu Israel pueyajanaari jaaquenuusacari nujuaturiquiaa. Pueyacuara secojonaa pueyari trompeta jonenenuuriquiaa pueya tacoji. Nio jaaquejosanoori tariucuacaanu camarnu David jaaquejosano quiriquiase.
7Secojojua tia cari quijiaari curosano canetaa. Salomoonri cuno jiyatequiaari Pueyasoranojuhuaj. Naacuatej, Salomoonri tii catijiateree nojori jiyanooshaanura pueya niquitiojosano tama nojori seyajaaja. Pueyasorano puecoosano seya shiyocua catijiaree tiijaariuhuaj. Broncejiniji na jeecatesano juhuacutuni, cunoori jiyacari puera shiitianiyojua quiriquiase. Naacuatej, majaari na naata jatiqui puetunu nio casaajanaa catijiasaanu quiriquiaa; juyaca, trigo cashojua, juyaca shiyocuajaajanio.
8Jiyacari nojori queranacununi, tarishiquiaariiri siete juuca Pueyaso catijiaja juhuacutu jiyatesaanura tojetaarucuajanaa saa Pueyasoraja. Cuno pueya, Salomoon rerejotaquiaari queranacunuucuani, nojoriiri pananu muetasamaji Hamat tiacajinijinio jiyocuara puetunu cuno jiyajinia quijia tiacacajinijinio pueya quiriquiase. Quiriquiaajaariuhuaj jiyacora pananu tiuquishacora Egipto jiya namiquiiquiumia neteja moo casaqueeji quijia pueyajuhuaj. Jiyanohua quiriaatia pueyari quiquiaari. 9Na nuhuaji nojoriiri socua niquiriyatu semaana queranacuquiaari. Cuno naa nojori queranacununi, cunoori quiquiaari nojori niishiriojonura nojori supuetanaari tariucuacaanu cariiquia jiyajinia nojori camarucuneetasacari suhuortucuajinia quijiaca quiquiaari. Naa nojori queranacununi, tama nojorijiaarijia na sesojoquiaari “Ruquetucua cariquioco quishacari.” 10Naa nojori queranacusacari jiyacaritij, cunoori tari veintitres juuca setiembre raca shocojosacari quiriquiaa. Jiyacaritij, camarnu Salomoonri puetunu tii nata quiniaa pueyajanaa jiyaramiquiquiaariuhua puetunu nojorijianaa cuaara nojori tiacacajinia quiojohuara. Naacuatej pueyari shuquiriaatia juhuajaniya quiojorohua. Pueyaso maniniuhuaqueetaturiquiohuari maninia na miiniuucua supuetana David, nojori camarnu Salomoon, puetunu narta Israel pueyajaajanio.
Pueyaso sequesacari Salomoon, Israel pueyari seetanujuanaa maninia miishaariquiano jaara na tojitiajaca quiri
11Camarnu Salomoonri tari tojetaarucuajanaa Pueyaso secojojua tia tucuataniquiaari, tama na quijiarano tiajaajanio. Puetunu cuno querajaa tiajiniaaco casaajanaa tucuataniquiaarijaariuhuaj teyonu na niishiriojoquiaari miiniucuajani. 12Jiyacaritij, Pueyasoori nocua muetaquiaari niucua. Naa na sequereeri: “Quia secojosano tojiriucuaacuajanijia. Nocuajinio cua riuriotacacuaja, nio quiaa tii nujuaratarucuaa secojojua tiani, tii pueya catijiajara na seya quiriano. 13Naacuatej, maninia quia niishirinio: Niaa jaara cua shocotejacara quiriohua, janiyari niaacua jiyaroriquiano tacareejonuni. Maruuri tojetaarucuajanaa niyaquiriquiano. Naajuhuaj, janiyari sequeru miaqueteriquiano cuhuariquiacajinia nia nataacuacani. Janiyari niaacua shanacuriquiano ritia pacujua cusonujaniuhuaj. 14Saniniuujia, cua saquiriojosano pueyani, cua pueya nia quiniuucua, niaari cua sesaatiaa. Niajaniya jaara shocoteyaquijiacara quiriohua, niaa jaara juhua naatujoori cua nenecojonuure cua jiyanooniuria niajaniya, niaa jaara seetanujuanaa cucua shiiniuquiutiare nia secojotusacari, janiyacuajaari nia secojosano tojiriquiano jiya cajiniocuajini niaa jaara seetanujuanaa tarinitiature sesa nia miijionuunu. Naajuhuaj, janiyajanaacuajaari sesa nia miijiosano jiyanooriquianoni. Janiya jaara naa maninia miiri niajaniyani, janiyari nia nataacuaca moritianiriquiano maniniajaniuhuaj. 15Quiarijiajiniji, janiyacuajaari niya nio tiaco cua pueya secojosano tojiriquianoni. 16Tama janiyajacuajaari nio tia saquiriojononi cua riuriotaca na quiniuucua. Na jiyaterucuaa pueyaracaanu tii cua sesa jiyaniquishaanura pueya secojosacari janiya. Majaari cua shocotenu quiniutianiya nio cua quiquio. Pueyaracaanu na niishiriquianocuajanijia. 17-18Naacuatej Salomoonnaa, quiaa jaara saaja maninia miijiojua quiri quiria taa quia shipininio David quiquiaaricuani, naajuhuaj, quiaa jaara quiarijia cua sequesano miijiojua quiriquia taa cua sequeree quiajaniyacuajanij, cunocuajaari maninia. Quiaa jaara naa cua sequesano tojijia quiriquiatej, janiyari quiara tohuateriquiano tariucuacaanu seetanujuanaa cua sequesano quia shipininio Davidni. Janiyacuajaari naa na sequenoni: ‘Quia niquiohuajinijinioni, pueyaracaanu nojorijinijinio supueriquianoori niquiriyatu narta Israel pueya camarnu quiriquiano.’ 19-20Saniniuujia, niaa jaara cucuaji carejere, naajuhuaj niaa jaara niaarano cua sequesano shocotere, nia tojiniu paniyaquiniuucua niaara cua naajioni, tama nia jeecojosano casamiicuara mojoquetacojuaca nia quiniuria, naa sacuaraatia miijiaca nia quiniuucuatej, janiyari niaarano cua niquitiosano jiyajiniji nia taanuuriquianoni. Naajuhuaj, janiyari nio tia niyarataniriquianoni, nojuhuana juhua secojonuujuarano cua jiyatesano cua quijiarano juucuani. Janiya tamonu jiyacajinijinio taucuaca tojetenutaniya niaacuarani puetunu niajaniyajanaa cuaara nojori rerequetesano quiiria pueyaracaanura. 21Naajuhuaj, nio secojojua tiaari jiyanohua timitiasano quijia juucua, saniniuujia, cuno tiaari na nujuatasaquiji juurequeriquiano na niyaratasaanuucua. Jiyacaritij, nocuma tajiniuhuataja pueyari nocuaji jiuujiateriquiano. Naa tama nequesoreetooriquianojaarijiatej: ‘¿Casaara naa Pueyaso miiriucuaa nio pueyacuaani na secojonuujua tiajaajanio?’ 22Naa riucuasaariquianoori: ‘Nojoriiri naa miishaarucuaaquij, nojori supuetanaa Pueyaso nojori samiritianuucua. Cuno Pueyasocuajaari nojori mashiquinio taucuaca Egipto jiyajiniji. Naa miishaarucuaajaariuhuaj, tama nojori jeecojosano casamiicuara jacamatujuaca nojori quiniuucua. Pueyasoori naacua nojori paraa shanacurucuaaquij naa taraatia nojori miishaanura.’”
Currently Selected:
2 Croonicas 7: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
