1 Samuel 18
18
Sauulri quera macaajia David quiniuucua na paraa shocotaja
6Naa David monu nuhuaji Goliattej, puetunu pueyajanaari jiyacari riujiuuquiaariuhua. Jiyacaritij, puetunu Israel pueya tiacacajinijinio maajipohuajanaari camarnu Sauul naacunuucua tohuareetaja na tiacajiniji. Cuno maajipohuari na timiniutia jaaquenuujua, nianujunuuriquiaajaariuhuaj. Pandero, platillo jiyanishano casaa piitiaturiquiaajaariuhuaj. 7Naa na jaaquenuunuta na nianujunuunutatej, maajipohuari naa Sauul, David maniniuhuaqueetariquiaaquij:
“Sauulri mil tahue moree, Davidri diez mil moreecujua.”
8Naa Sauul tojishacari maajipohua jaaquenuunutej, jiyanohua juaariiri. Sauulri naacua naa sequereequij:
—Davidri juhua diez mil coonu maniniuhuaqueetashiya. Janiyanaari saaja mil coonunijia. Cuaara nojori camarnu na jiyatetuura juhuari.
9Cuno juucajiniji, Sauulri saaja najiquia niquijia David.
10Tariqui saniniuujia, Sauul miitiariquiano sohuanu Pueyaso jiyarosanoori Sauulcua jeecanequiaari socua. Sauulri naacua sesequiaari. Na jiyaco neteyocuajaari, nareja tequejojuajaariuhuaj. Davidri jiyacari Sauul tojishocoriquiano na arpa taquiniojojuajuhuanajaj. Sauulri jiyacari na cashana cacariquiaa. 11Jiyacaritij David jiaree juucuaari. David seecutanu paniriquiaa juucua na tia sohuacaacuaraari. Juucua David pacutejoree jianuuri, saa capaja. Davidri saa nocuaji nianujureejaa.
12Sauulri David puerequiaari socuatej Pueyaso naacunuucua David. Majaari tari na naacunu quijia Sauul saniniuujia. 13Sauulri naacua na tiacoji na shiriquioquiaaritij maja tari tii na quiniuria. Miaquejonuucua na pueya maanu puerojoriquianora David jiyatequiaariiri. Davidri naacua na paraa miaquejonuucua, cuno pueya puerojojuatej. Na nuhuaji juhuajaniya riujiuujiohuari. 14Naa Pueyaso naacunuucua Davidtij, puetunu na miishanojanaari maninia quijia. 15Sauulri naacua na puerejatej, naa puetunu na miishanojanaa na tohuatenuucua maninia. 16Jiyacaritij, puetunu Israel pueyajanaa, nojoriicuajinio raquitiinio supuetana Judaacuajinio caneno pueyajuhuaj, puetunu nojorijianaari David timitiatujua. Nojori paraa miaquejonuucua nojori quiasacari, Davidcuajaari nojori puerojojua maninia. Nojori paraa nojori miaquejonu nuhuaji, puetunu nojorijianaari juhuajaniya riujiuujiohua.
17Tamonu juuca Sauulri naa David sequequiaari:
—Janiyari quia panitiaa seetanujuanaa cua pueyajinijinio nojori cumamaca quia quiniuriani. Quiaa jaara cua sequesano miiri quiyatu jiyapueratu Merab niquitiore juhuari quiajaniya quia niquiorano. Quiocua naacua pa camarnu Pueyaso paraa miaquejore cutaratej.
Sauulri naa David shiniujiuriquiaaquij juhua Filisteocuaca sotaja David quiniuria, paraa monura David, maja nojuaja. 18Davidri naa riucuaquiaari Sauultej:
—Camarnunaa, ¿janiyatee naa jiyaniijiajaniuhuaj janiya jaara camarnu camiano quirini? Puetunu parta Israel pueyajinijiniojuanaanij, janiyari samiritiasano pueyacuajinio muetano pueyanoni.
19Saniniuujia, jaara tari quiquiaari Sauul niquitionu juuca David neyatu Merab necorano, Sauulri saaja Adriel jiyanishano niquitioree cuno neyatu. Cuno Adrielri Meholaa tiacajinijinio quiriquiase.
20Sauul niyatu tarajanu Mical jiyanishanoni, nojuajaari David paniriquiaa cutara. Sauul jaara numootesaaquiaari taa neyatu paniriquiaa Davidnij, timiriiri. 21Naa na sapojonuta neyatu panitiariquiaacuaja Davidri. Sauulcuajaari tama niishiriojoriquiaajaaja nojuajaari Filisteocuaca miaquejonuucua na jiyaronutaniya, tii na paraa monura David. Jiyacaritij, Sauulri socua naa pacutequiaari David sequenutej:
—Janiya quiarijia cua camianora quia jiyatenutaniyani.
22Na nuhuaji, Sauulri na seya rootaquiaari naa nojori sequenura Davidtij: “Pa camarnu jiyanohua quia panitiaa neyatu. Puetunu nera poonijionaa pueyajanaari quia paniyajuhuaj, camarnu camiano quia quiniuria.” Niocua naa sequerenotej.
23Sauul seyari puetunu naa Sauul sequesanojuanaa Davidra caminiujiutiuquiaari. Davidri saaja naa riucuaquiaari Sauul seyatej:
—¿Casaa nia jiyaniyaruhuarini? ¿Juhuajaniya quiniutiiri naa camarnu camiano quiniuniquitij? ¿Naa casamiijiu, samiritiasano juhua janiyaja, jiyanoteeri na naata camarnu camiano quiniuni? Maja.
24Sauul seyari jiyacari Sauul pohuataree taa David sequeree nojorinij. 25Taa Sauul miaquetenu paniriquiaa Filisteocuaca Davidcuajanij, nojuajaari naacua naa na seya riucuareequij:
—Quiria David nia sequeture: “Majaari cua paniniu quiyatu sami, casami na niquitiojonura janiya, naatej, taa pa niishiya miiniucuajani. Janiya cutaraari na panitiaani, cuaara cua paraa Filisteocuaca shoyara quiria juhuari. Jaara nojori shoori, cuaara quiria rerateera cien cua paraa sapiquianacoocua. Janiyacua naacua niishiri seetanujuanaani, na puecooreequi.”
26Naacuatej, Sauul seyari Davidra caminiujiuquiaari naa Davidrano camarnu Sauul sequesanotej. Davidri timirii naa na tosaanuucuatej. Naacua tama na cuaqueyajaaja tarinitiareeri camarnu Sauul camiano na quiniuria. Majaari na tarishiniu quiquiaari juhuacarijia na tohuatenura camarnu sequesano. 27Naacuatej Davidri ritia narta pueya puetaquiaari Filisteocuaca miaquejonuucua. Jiyacari dosciento Filisteocuaca shooquiaariiri. Cuno na puecoosano dosciento Filisteocuaca sapiquianacoocua reratequiaari camarnu Sauulraari, camiano na quiniuria. Sauulri jiyacari neyatu Mical niquitioree David niquiorano.
28Sauul niquiniuucua, maninia na niatanuucuajuhuaj, Pueyasoori seetanujuanaa David naacuriquiaa. Naajuhua, neyatu Micalri David paniriquiaajuhuaj. 29Naacuatej, Sauulri socua jiyanohua David puerequiaari coteenujiniji. Sauulri naacua na paracara David jiyatequiaari cuaara shaajequiaarijaatijiaj. 30Sauulri socua pueya maapue jiitiaja David puerojosano maanujiniji. Filisteocuaca jaara nijioquiaari Israel pueyata na miaquetoojonuucua, David puerojosano maanuuri socua na paraa puecoojuaca quijia cutara narta maapuejiniji. Naacuatej, puetunu pueyajanaari David rerequetetiuyaquijia.
Currently Selected:
1 Samuel 18: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
