1 Samuel 10
10
Samuel jiyatesacari Sauul Israel pueya camarnu na quiniuria
1Samuelri jiyacari shiyocua pataree. Sauul nacaacoji na totareeri. Na nujuureeri. Naa na sequereeri:
—Pueyasoori quiarijia quia jiyateree na saquiriojosano Israel pueya camarnu quia quiniuria. Quiaari nojori puerojoriquiano nia shocua quijiaca nia paraa miaquejonuucua. Quiaa jaara naa miiritij, niaari panaatia quiriquiano na nuhuaji. Saniniuujia, seetanujuanaa quia niishiniuria Pueyasoori quiarijia quia jiyateree na saquiriojosano pueya camarnu quia quiniuria, quiaari naacunujusaanutaniya. 2Naacuatej niiquiji quia quiasacariuhua quiaari querajaa pueya naacunutaniya Selsa tiacajinia supuetana Raquel jama shuriucua. Cunoori supuetana Benjamiincuajinio caneno pueya jiyajinia. Nojoriiri naa quia sequenutaniyaquij: “Canaacuaja tari riuriataquerohua quia pajesano burrohuani. Quia quecuaja tari noojia cajitiriohua. Saniniuujia niaacua tacayano cutara. ¿Casaacuatena quia tarishiyanij?” 3Socua na tacoji, Tabor tuhuananujiniji nujuaja naana carini, quiaari tii naacunutaniya jiuujianaraca pueya. Nojoriiri Betel tiacajinia quiojiya tii Pueyaso na secojotunura. Niquiriyatu nojorijinijinioori jiuujianaraca chivo niquiohua poya. Tamonuuri jiuujianaraca pan poyajuhuaj. Tamonuuri shoquejinia mishinishano vino caaca nitiaacujua. 4Cuno pojori jaara niquitiuri quiajaniya, quia saruhuataturiquianoori. Jiyacari quia niquitiotunutaniya querajaa panri. Quiocua na maserenoj. Majaari na ruuretanu. 5Na nuhuaji quiaari Pueyaso quijia tiacajinia tiuquiniutianiya tee Filisteocuaca soldadohua maanu quiyacuajani. Cuno tiacajinia quia tiuquishacari, quiaari Pueyaso sequenu panishano caminiujiunia maanu naacunutaniya secojojua tiajiniji rosetohuano. Nojoriiri juhua saseenuta Pueyaso sequenu panishano caminiujiuniutianiya Pueyaso Sohuanu cumaquishacari nojori. Nojori puetariquianoori salterio taquinionaa, pandero piitianaa, naajua jonenunaajuhuaj, arpa taquinionaanio. 6Jiyacaritij, Pueyaso Sohuanuuri quiocua niniutianiya. Quiaari naacua saseenutaniyaquij. Quiaari jiyacari juhua nojorijia Pueyaso sequenu panishano caminiujiuniutianiyajuhuaj. Jiyacaritij, quia niishitiajaari jatanishaanutaniya. 7Naa quiarijia cua sequesano jaara quiara tohuatere, quiocua maninia miiri taa quia miiniu paniyacuajanij. Pueyasocuajaari quiata quiya. 8Cuno nuhuaji, quiocua cua puetaare Guilgal tiacajinia. Janiyari na nuhuaji tii quia coquenutaniyani cua quiasacari Pueyasora seya catijianuucua. Noo seya cua catijianurajuhuaj, pueya niquitiojosano sesa na miitiushanoocuara puecoosocoriquianotej. Quiocua tii quishii cucuaji siete juuca, janiya cuaara quiocua tiuquishiijaatijiaj. Janiya jaara quiocua tiuquishiini, janiyari jiyacari quia sequeriquianoni casaa quia miiniutianiyanij.
9Sauul rupatesacari Samueljiniji na quianuhuara, Pueyasoori jiyacarijia noojia jatanirii. Cuno juucajanij, puetunujuanaari Sauulra tohuatequiaari taa Samuel sequequiaari nojuacuajani. 10Naacuatej, Sauul jaara tiuquishiiquiaari Gabaa tiacajinia na jiyaraajiata, Pueyaso sequenu panishano caminiujiunia pueya maanuuri na naacuturee. Cuno pojoriiri Pueyaso Sohuanu saseetesano quiriquiaa. Jiyacaritij, Pueyaso Sohuanuuri Sauulcua niquiaari. Sauulri naacua saseequeequij. Naacua Pueyaso sequenu panishano caminiujiuriijaariuhuaj. 11Naacuatej, Sauul niishijiaca pueya niquishacari naa Sauul caminiujiyano Pueyaso sequenu panishano jaarajaaja Pueyaso sequenu panishano caminiujiuniaa pueyatatej, tama nojorijiaarijia naa sequetooquiaari:
—¿Casaa Cis jiyanishano niyanu tojetareecuaani? ¿Sauulteeri jaarajaaja Pueyaso sequenu panishano caminiujiuniajaniuhuaj?
12Tamonuuri naa niyacutereejuhuaj. Naa sequereeri:
—¿Taquiya niishishoo nojori que?
Naacuatej nio sequesanoori quiarijia naa supueree pueratej: “¿Sauulteeri Pueyaso sequenu panishano caminiujiuniajuhuaj?”
13Sauul saseenu tajiyatenu nuhuaji, nojuajaari Pueyaso sequenu panishano caminiujiuniu tarnitiaree. Quiaarohuari. Na tiajinia tiuquishuhuari. 14Na camaari naa nequesotaree Sauul na jiyaraajiataja:
—¿Tee nia quiaarucuaani?
Sauulri na riucuaree:
—Canaa tashuquioono burro pajenuucua quiaarucuaani. Canaa na riuriataqueyaquishacari, canaari Samuel nequesotanuucua tajitiamacuaa socuani.
15Na camaari naa Sauul riucuareequij:
—¿Taa Samuel sequeree niajaniyarinij? Quenaaja cua pohuatareja.
16Sauulri na cama riucuaree:
—Samuelcuajaari seetanujuanaa canaa sequerucuaa canaa pajesano burrohuacuaja tari riuriataquesaarohuacuaa.
Saniniuujia, Sauul cutaraari maja na cama na pohuatanu quirii Samuel sequesano nojuaja, nojuajaari tariucua camarnurano saquiriojosano quiriquiaa.
17Na nuhuaji, Samuelri puetunu Israel pueyajanaa masuuquiaari Mizpaa jiyanishano jiyaconaja tuhuananuucua nojori rerejonura tii nojori maniniuhuaqueetanura Pueyaso. 18Samuelri tii rerejono pueya sequequiaari naatej:
—Pa supuetana Israel Pueyasocuajaari naa sequeyaquij cuarta Israel pueyanaa: “Janiyacuajaari nia paraa taucuaca Egipto jiyajinijinio nia jaatianoni. Naa cua miiniuucua niajaniyatej, janiyari Egiptojinijinio taucuacaacuaji naquiya nia miitiasaanujiniji nia mashiquinioni. Naajuhuaj janiyari tamasaca jiyajinia quijiaca nia paracaajiaca taucuacaacuaji nia cojuanojaniuhuaj.” 19Quiarijia saniniuujia, niaari pa Pueyasojuanaa samiritiareecujua, noo cantecuaja taraatia naquiya nia miishaanujiniji niaacua taraajenoni. Naacuatej, niaari tari na shocoteree nia masenuucua nia camarnurano cuaara jiyatesaaria tama nia jiitiariquianojuaaja. Quiarijianij, puetunu doce Israel niquiohua maanuucuajinio caneno pueyajanaa cuaara rerejoora niya Pueyaso niquiara. Maninia nia raquitiijiore, na niishishaanura cana niquiohuacuajinio caneno pueyateja niajaniyani.
20Jiyacaritij, Samuelri puetunu supuetana Israelcuajinio caneno maapuejanaa sequeree nocua nojori cateconunura. Samuelri jiyacari saajia naajiosano saquitinirii maninia na niishishaanura teyano supuetana Israel niquiohua maapuejinijinioteja camarnura saquiriojosaanutaniyani. Saajia naajioori saaja supuetana Benjamiin manuucuara tacatesee. 21Samuelri naacua supuetana Benjamiin niquiohuacuajinio caneno pueya sequeree saa jiya nojorijia rerejonura. Samuelri saajia saquitiniriohuacuhuaj. Saajiaari supuetana Matri jiyanishano niquiohuacua tacatesee. Saajiaari saquitinishaarohuacuhua. Matri jinianu Sauulcua tacateseeri, Quis niyanuucuatuhuaj. Naacua niishishareeri Quis niyanu Sauulqui camarnu quiriquiano. Sauulri naacua tiijia ritia pajesaareequij. Majaari tii na quiniu quiriquiaa. 22Samuelri naacua Pueyaso nequesotareequij Sauultee tii tari nojori tajinia quiriquiaajuhuaj. Pueyasoori ritia Samuel toree, Sauulcuajaari tari tii quiriquiaacuaja. Tiijia casami tajinia jamaariquiaari. 23Pueyari nocua netucuatuquee. Na jamaashaquiji na tohuatetuseeri. Sauul jaara pueya tacoji nujuatesaaquiaari puetunu narta pueyajanaa niishiniuria nojuaja, puetunu nojorijinijiniojuanaari saaja Sauul numueecuaji pueetacojua. 24Samuelri puetunu tii quiniaajanaa nequesotaree:
—¿Niaatee nia camarnurano Pueyaso saquiriojosano niquirii tari? ¡Puetunu Israel pueyajinijiniojuanaanij, majaari quenaaja tamonu quiniu juhua nojuaja!
Puetunu tii quiniaa narta pueyajanaari jatiqui mariyataa naa na jaacatatureequij:
—¡Nojuaja cuaara pueyaracaanu pa camarnu quiiriaqui!
25Jiyacarijiatej, Samuelri pueya toquiaari taa camarnu miiniutianiyani nojori na jiitiasacari. Pueya na numootesano naajiotaree naajioneejiniaari. Na nuhuaji cuno naajio niataquiaari Pueyaso secojojua tiajiniaari. Naa na miiniu nuhuajitij, Samuelri puetunu pueyajanaa sequequiaari nojori cuaara quiojohuara na tiajiniohua. 26Jiyacaritij, Sauulri na tiajinia quiacuhuajuhuaj Guibeaa tiacajinia. Pueyasoori jiyacari noojiaqueya cumamaaca pueya jiuujiajinia toree, nojori cojiniuria Sauul. 27Saniniuujia rimiaacatujuriiri naa sequeturee Sauultej nojuaja na samiritiatunuucua:
—¿Jiyanoquinio naasucuate pocuaji tacuna? ¡Shij!
Naa na samiritiatunuucua Samueltej, cuno pojoriiri maja quenaaja na casaajiniji na ritiuniu quiquiaari Sauul na niquitiotusocoriquiano. Sauulri saaja sanaa nojori tojiriquiaa.
Currently Selected:
1 Samuel 10: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
