Marcos 1
1
Katzijon ri Juan Aj Ya'l Bautismo
(Mt. 3:1-12; Lc. 3:1-9, 15-17; Jn. 1:19-28)
1Wa' e jeqeb'al re ri Utzilaj Tzij re ri Qanimajawal Jesucristo, Ruk'ajol ri Dios. 2E xu'ana pacha' ri tz'ib'ital kan ruma ri q'alajisanel Isaías puwi ri ub'i'im lo ri Dios:
Ri'in kannab'esaj b'i chawach ri'at, ri waj chak aj tzijol we'in,
cha' kuyijb'a' ri b'e chwach pan rawoponib'al. Mal. 3:1
3Katataj uqul jun tzijonel kasik'in chupa ri luwar katz'intz'otik, jewa' kub'i'ij:
“Yijb'a' pana alaq ri b'e re ri Qanimajawal;
suk'upij alaq rub'e Rire” Is. 40:3
xcha'.
4Ri Juan katajin che uya'ik ri bautismo pa jun luwar katz'intz'otik. E kub'i'ij chike ri winaq kakitzelej kitzij chwach ri Dios, kakik'ul ri bautismo, y jek'ula' kakuytaj ri kimak. 5Ewi konoje ri tikawex e k'o pa taq ri luwar re Judea y konoje ri e k'o Jerusalem, xeb'el lo che utayik ri Juan. Kakitz'onoj k'u kuyb'al kimak chwach ri Dios, yey ri Juan kuya ri bautismo chike chupa ri nimaya' Jordán.
6Ek'u ruq'u' ri Juan 'anom ruk' rismal camello, y rupas ximil che rupa e jun tz'u'um. Yey ri kutijo e ri sak' y uwa'al kab' re upa taq juyub'.
7Jek'uwa' ri tzijonik ku'ano:
«K'o Jun katajin lo chwij más nim ruchuq'ab' chinuwa ri'in, ma na taqal tane chwe kinyuxi'ik re kankir ruwach ruxajab'. 8Paqatzij wi, ri'in xinya ri bautismo che alaq ruk' ya'; no'j ri bautismo kuya Rire che alaq, e ruk' ri Santowilaj Ruxlab'ixel ri Dios» kacha'.
Ri bautismo re ri Jesús
(Mt. 3:13-17; Lc. 3:21-22)
9Chupa taq k'u la' la q'ij, ri Jesús xel lo Nazaret, (wa' e jun tinamit re Galilea), y x'an k'u bautizar ruma ri Juan chupa ri nimaya' Jordán. 10Na jampatana xel lo ri Jesús pa ri ya', xrilo echiri' xjaqataj ruwa kaj y ri Ruxlab'ixel ri Dios pacha' juna palomax xqaj lo puwi'. 11Y xch'aw lo Jun chila' chikaj, jewa' kub'i'ij:
«At ri'at Nuk'ajol y lik k'ax katinna'o.
Lik kinki'kot chawe»
xcha che.
Ri k'amb'al upa ri Jesús
(Mt. 4:1-11; Lc. 4:1-13)
12Tek'uchiri', ri Jesús xk'am b'i ruma ri Ruxlab'ixel ri Dios pa jun luwar katz'intz'otik. 13Ri Jesús xk'oji' chila' cuarenta q'ij chikixo'l itzel taq awaj. Yey chupa taq la' la q'ij, lik xk'am upa ruma ri Satanás. Ik'owinaq chi k'u wa', ri ángeles xkijeq kakinimaj ri Jesús.
Ri Jesús kujeq kak'utun chwi rutaqanik ri Dios
(Mt. 4:12-17; Lc. 4:14-15)
14Echiri' ya'om chi ri Juan pa cárcel, ri Jesús xe'ek Galilea che utzijoxik ri Utzilaj Tzij re rutaqanik ri Dios, 15jewa' kub'i'ij:
«Xopon k'u ruq'ijol echiri' rutaqanik ri Dios xa naqaj chi k'o lo wi; tzelej k'u tzij alaq chwach ri Dios y kojo alaq ri Utzilaj Tzij» kacha'.
Ri Jesús keb'usik'ij kajib' e aj chapal kar
(Mt. 4:18-22)
16Echiri' kab'in ri Jesús chuchi' ri mar re Galilea, xeril pan ri Simón ruk' ruchaq' Andrés, e ri' kakik'aq ri ki atarraya chupa ri ya', ma rike e aj chapal kar.
17Ek'u ri Jesús xub'i'ij chike:
—Chixpetoq, chixterej lo chwij y ri'in kan'an chiwe ix aj molol tikawex#1:17 “Ix aj molol tikawex”: Ri chak xya' chike e kekitzukuj tikawex re keb'u'an utijo'n ri Jesús. Lc. 5:10 jela' pacha' i'anom lo chike ri kar —xcha'.
18Rike xkiya kan ri ki atarraya y xeterej b'i chirij.
19Xb'in k'u pan jub'iq' chik y xeril ri Jacobo ruk' ruchaq' Juan, ri keb' uk'ajol ri Zebedeo. Rike e k'o chupa jun barco y ketajin che uk'ojoxik ri ki atarraya. 20Ek'u ri Jesús xeb'usik'ij; ruma k'u ri', rike xkiya kan ri kiqaw Zebedeo kuk' ri kimokom chupa ri barco y xeterej b'i chirij.
Ri Jesús kukunaj jun achi k'o puq'ab' jun itzelilaj uxlab'ixel
(Lc. 4:31-37)
21Xeb'ok k'u pa ri tinamit Capernaúm. Y chupa ri q'ij re uxlanib'al ri Jesús xok pa ri sinagoga y xujeq kak'utunik. 22Y ri xetaw re lik xkam kanima' che, ma ruma ruk'utunik kaq'alajinik lik k'o uwach, na pacha' ta ri kaki'an raj k'utunel re ri tzijpixab'.
23Chupa k'u ri sinagoga k'o jun achi k'o puq'ab' jun itzelilaj uxlab'ixel. Wa' xujeq kasik'inik, jewa' xub'i'ij:
24—Lal Jesús, aj Nazaret, ¿su'chak ko'lmina ib' la quk'? ¿E la' lal petinaq re ko'lsacha la qawach? Ri'in weta'am lal chinoq, lal ri Santo K'ajolaxel re ri Dios —xcha'.
25Ek'u ri Jesús xuq'atej ri itzel uxlab'ixel, jewa' xub'i'ij che:
—¡Match'a't chik! Chatelub'i che la'chi —xcha'.
26Ri itzelilaj uxlab'ixel xuk'aq la'chi pulew y lik ko xujab'aja'; yey kasik'inik xel b'i che la'chi.
27Konoje k'u ri tikawex lik xkam kanima' che y kakitz'onob'ej taq chikiwach:
«¿Sa' wa'? ¿Sa' chi k'ak' k'utunik wa'? Ma k'o ne puq'ab' kataqan pakiwi itzelilaj uxlab'ixel y wa' kakikoj utzij» kecha'. 28Y na jampatana, pa taq ronoje ri luwar re Galilea xe'ek utzijoxik janipa taq ri ku'an ri Jesús.
Ri Jesús kukunaj ruchu-uji' ri Pedro
(Mt. 8:14-15; Lc. 4:38-39)
29Echiri' ri Jesús kuk' ri Jacobo y ri Juan xeb'el b'i chupa ri sinagoga, xeb'ek chirocho ri Simón y ri Andrés. 30Ek'u ruchu-uji' ri Simón k'o chwa uwarab'al, k'o aq' chirij. Xkitzijoj k'u ri' wa' che ri Jesús. 31Ewi ri Jesús xqib' ruk' la yewa', xuchap ruq'ab' y xuto'o cha' kayaktajik. Na jampatana k'u ri' xik'ow ri aq' chirij rixoq y xujeqo keb'unimaj.
Ri Jesús keb'ukunaj uk'iyal yewa'ib'
(Mt. 8:16-17; Lc. 4:40-41)
32Echiri' b'enaq chi ri q'ij e ri' kayub'ub' chik, xek'am lo chwach ri Jesús konoje ri yewa'ib' y ri e k'o pakiq'ab' itzel uxlab'ixel. 33Y konoje ri tikawex re ri tinamit xet'iqi' chuchi' ri puerta re ri ja. 34Ek'u ri Jesús xeb'ukunaj uk'iyal yewa'ib' che uk'iyal uwach taq yab'il y xeb'eresaj b'i uk'iyal itzel uxlab'ixel; pero na xuya ta luwar chike kech'awik ma rike keta'am china Rire.
Ri Jesús kak'utun pa taq ri luwar re Galilea
(Lc. 4:42-44)
35Lik anim tan echiri' lik k'a q'equ'm, xwa'lij b'i ri Jesús, xel k'u b'i chupa ri tinamit y xe'ek pa jun luwar katz'intz'otik cha' ku'ana orar. 36Ek'u ri Simón kuk' ri rachb'i'il xeb'ek che utzukuxik.
37Echiri' xkiriqo, xkib'i'ij che:
—Konoje ri winaq kakitzukuj la —xecha'.
38Ek'u Rire xub'i'ij chike:
—Jo' che utzijoxik ri Utzilaj Tzij pa taq ri luwar e k'o lo xa naqaj, ma e nuwach ri' in petinaq Ri'in —xcha chike.
39Xeb'ek k'u ri', y ri Jesús katzijon chupa taq ri sinagogas che taq ronoje ri luwar re Galilea yey keb'eresaj k'u b'i itzel uxlab'ixel.
Ri Jesús kukunaj jun achi k'o ri yab'il lepra che
(Mt. 8:1-4; Lc. 5:12-16)
40Xopon k'u ruk' ri Jesús jun achi k'o ri yab'il lepra che y xuxukub'a' rib' chwach. Lik xelaj k'u che, jewa' xub'i'ij:
—We ka'aj ko la, josq'ij la ri nucuerpo che wa yab'il —xcha'.
41Ek'u ri Jesús xjuch' ka'n uk'u'x che rachi yewa'. Xuchap pana ruk' ruq'ab' y jek'uwa' xub'i'ij che:
—Kuaj, chu'ana b'a chom ri' racuerpo —xcha'. 42Xew k'u xuk'is ub'i'xikil wa', xa pa joq'otaj ri yab'il xsachik y rachi xkunutajik.
43Ek'uchiri', ri Jesús xuk'isb'ej ruch'a'tem ruk' y lik xupixab'aj, 44jewa' xub'i'ij che:
—Chatape', mak'o matzijoj che junoq. Jat chwach raj chakunel pa Rocho Dios cha' rire karilo na jinta chi lepra chawe. Y ruma rajosq'ikil, chaya'a k'u chwach ri Dios ri qasa'n xtaqan kan ri Moisés che,#Lv. 14:1-32 cha' kaq'alajin chikiwach ri tikawex at kunutajinaq chik —xcha'.
45No'j la'chi echiri' xe'ek, lik xujeq utzijoxik ri xu'an ri Jesús che y jek'ula' lik xtataj wa' kuma ri winaq. Ruma k'u ri', na utz ta chik kok ri Jesús chiwachil pa ri tinamit; xujeq k'u kakanaj kan chinimanaj che ri tinamit pa taq luwar katz'intz'otik. Na ruk' ta k'u ri', uk'iyal tikawex re ronoje luwar xeb'opon ruk'.
Currently Selected:
Marcos 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.