Romanos 1
1
Ri Pablo kuya pan rutzil kiwach ri hermanos e k'o Roma
1Ri'in in Pablo, in raj chak ri Qanimajawal Jesucristo. In k'u sik'im re kinu'an utaqo'n y ya'tal chwe kantzijoj ri Utzilaj Tzij re ri Dios. 2Wa' wa Utzilaj Tzij e ri ub'i'tisim lo ri Dios ojertan, yey e ri tz'ib'ital kan pa ri Santowilaj Uch'a'tem kuma ruq'alajisanelab'. 3Ri Utzilaj Tzij e ri kach'a't puwi Ruk'ajol ri Dios, ri Qanimajawal Jesucristo. Rire xalax wara che ruwachulew yey upeteb'em chike ri e ralk'o'al ri rey David. 4Yey ruma ri Santowilaj Ruxlab'ixel ri Dios, xq'alajinik ri Qanimajawal Jesucristo e Uk'ajol ri Dios echiri' ruk' unimal chuq'ab' xk'astaj lo chikixo'l ri ekaminaq. 5Ruma k'u Rire, xqak'ul ri sipanik re koju'an oj utaqo'n cha' uk'iyal tikawex pa taq ronoje ri tinamit che ruwachulew kakub'i' kik'u'x ruk' y kakikoj utzij y jela' kaloq'ox uq'ij rub'i'. 6Yey ralaq e alaq kuk'il ri esik'im cha' kak'oji' alaq puq'ab' ri Qanimajawal Jesucristo. 7Kintz'ib'an k'u pan che onoje alaq ri jeqel alaq pa ri tinamit Roma, ri lik k'ax kana' alaq ruma ri Dios y sik'im alaq cha' ku'an alaq re ri Dios. K'ulu k'u alaq ri unimal rutzil k'u'xaj y ri utzil chomal re ri Qaqaw Dios y re ri Qanimajawal Jesucristo.
Ri Pablo karaj ke'b'ina kuk' ri e aj Roma
8Nab'e na, ruma ri Qanimajawal Jesucristo, kantioxij che ri nu Dios uma onoje alaq, ma che ronoje luwar che ruwachulew lik katataj puwi ri kub'ulib'al k'u'x alaq. 9Ri Dios, ri kanloq'nimaj ruk' ronoje nuk'u'x echiri' kantzijoj ri Utzilaj Tzij re Ruk'ajol, Rire lik reta'am xaqi kankuxtaj alaq chwach echiri' kan'an orar. 10Kantz'onoj k'u che ri Dios chuya'a na chwe kine'b'ina uk' alaq juna q'ij we e karaj ri' Rire chwe. 11Ma lik kuaj kanwil wach alaq cha' kanto' alaq che ri b'inik silab'ik alaq chwach ri Dios y jela' lik katiki' alaq chi utz. 12Jek'ula' kaqanimarisaj qak'u'x chiqawach, ma ralaq y ri'in junam kub'ul qak'u'x ruk' ri Qanimajawal.
13Hermanos, lik kuaj k'ut keta'maj alaq, ri'in uk'iyal laj nuch'ob'om kuaj ki'nwila alaq re kanto' alaq cha' kak'iy alaq chwach ri Dios, jela' pacha' ri nu'anom kuk' ri jujun chik na e ta aj Israel. Pero k'amaja' ya'tal chwe kinopon uk' alaq. 14Ri'in lik kanna'o chinuwach k'o wi kantzijoj ri Utzilaj Tzij chike konoje; wa' e ri e tijotal pa ri ch'a'tem griego yey ri e aj naj na e tijotal taj, ri lik k'o keta'am yey ri na jinta k'o keta'am. 15Jek'ula' lik kacha wanima' che kin'ek pa ri tinamit Roma re kantzijoj ri Utzilaj Tzij che alaq.
Ruchuq'ab' ri Utzilaj Tzij
16Ri'in na kink'ix ta che ri Utzilaj Tzij, ma ruk' wa' kaq'alajin ruchuq'ab' ri Dios re keb'ukolob'ej konoje ri kekojow re; nab'e chike ri e aj judi'ab', tek'uchiri' chike ri na e ta aj judi'ab'. 17Ma ri Utzilaj Tzij kuq'alajisaj chiqawach su'anik kojk'oji' jusuk' chwach ri Dios, yey wa' e ruma ri kub'ulib'al qak'u'x ruk' Rire; ronoje k'u ri qak'aslemal chwach ri Dios e ruma ri kub'ulib'al qak'u'x. Ma jewa' tz'ib'ital kan pa Ruch'a'tem:
Ri e jusuk' chwach ri Dios,
k'o kik'aslemal ruma ri kub'ulib'al kik'u'x ruk' Rire Hab. 2:4
kacha'.
Konoje ri tikawex emakuninaq chwach ri Dios
18Lik kaq'alajin k'u ri royowal ri Dios echiri' ruq'atb'al tzij kape chila' chikaj pakiwi ri tikawex lik itzel kik'u'x chirij ri Dios y na jusuk' ta ri kib'inik kisilab'ik; ma ruma ri na utz taj kaki'ano, keb'u'an e latz'anel chike jujun chik cha' na kaketa'maj ta ri Q'ijsaq. 19Yey rike k'o keta'am puwi ri Dios, ma e Rire q'alajisayom wa' chike. 20Ma e janipa ri na kilitaj ta uwach che ri Dios, pacha' ruchuq'ab' na jinta utaqexik y runimal uwach Rire, wa' lik xq'alajin lo chwi ri jeqeb'al re ruwachulew ruma ronoje taq ri 'anatal ruma Rire. E uwari'che na usuk' taj we k'o junoq kub'i'ij: «Na jinta k'o weta'am puwi ri Dios.» 21Pero ri winaq tob' keta'am chik k'o jun Dios k'aslik, na kiya'om ta k'u ri' ri yakb'al uq'ij taqal che y na ketioxin tane chwach. Jek'ula' xsach ri kina'oj ma e kakich'ob' ri na jinta uchak; yey ruma wa' na kakimaj ta chi usuk' sa' ri utz y sa' ri na utz taj. 22Tob' kakib'i'ij lik k'o kina'oj, paqatzij wi lik na jinta k'o keta'am. 23Na xkiyak ta chi uq'ij ri Dios k'aslik, ri Jun na kakam taj; ma e xkijeq uyakik kiq'ij kik'axwach winaq xa kekamik y kik'axwach taq awaj kexik'ik' pa kaj, taq awaj kajib' kaqan yey taq awaj kecharar pulew.
24Ruma k'u la', ri Dios xeb'uya kan chupa ri ch'ulilaj mak y chupa ri kirayib'al na chom taj. Jek'ula' xkijeq xemakun chikiwach, xki'an ruk' ri kicuerpo ri lik k'ixb'al uwach. 25Wa' xkik'ulumaj ma xkik'aq b'i ri Q'ijsaq re ri Dios yey puk'axel e xkitaqej ri xa raq'ub'al. Ek'u xkiyak kiq'ij y xkiloq'oj janipa taq ri u'anom ri Dios; yey na e ta xkiyak uq'ij ri 'anayom re janipa taq ri k'olik, ri Jun lik taqal che kayak uq'ij na jinta utaqexik. Amén.
26Ruma k'u la', ri Dios xeroq'otaj kan chupa ri kirayib'al lik k'ixb'al uwach. Xu'ana nenare' ri ixoqib' xkijalk'atij rusuk' ri kirayib'al kuk' ri kachijilal y e xki'an ri na usuk' taj, ma xkijeq kakirayij kib' chikiwach e ixoqib'. 27Jek'ula' rachijab' xkijalk'atij rusuk' ri kirayib'al kuk' ri kixoqilal; xkitzaq k'u kib' che u'anik ri lik k'ixb'al uwach, ma xkijeq kakirayij kib' chikiwach, achijab' kuk' achijab'. Ruma k'u ri' e xkipetisaj lo ri royowal ri Dios pakiwi' y kik'ulum k'u ri tojb'al re ri ch'ulilaj mak ki'anom.
28Rike na xkaj taj kaketa'maj uwach ri Dios. E uwari'che Rire xeroq'otaj kan chupa ri sachib'al na'oj cha' jela' e kaki'an ronoje ri na usuk' taj. 29Jek'ula' e kiya'om kib' che u'anik janipa ri na jusuk' taj: wa' e ri kaketz'ab'ej uwa kiq'ij kuk' jujun chik na kik'ulel taj, ri kaki'an ri lik itzel uwachlib'al, ri e aj rayinel, ri itzel kik'u'x, ri k'ax kik'u'x chikiwach, ri e kamisanel, ri e aj ch'a'oj, ri e sokoso'nel, ri kaki'an k'ax chike jujun chik, 30ri e aj molot, ri e aj nuk'ul ch'a'tem, ri itzel kik'u'x chirij ri Dios, ri e aj yajanel ruk' itzel ch'a'tem, ri kaki'an nim che kib', ri kakitak'ab'a' kiq'ij, ri itzel uwach taq ri kakino'jij, ri na e ta kojol tzij ke kichu-kiqaw, 31ri na kakaj taj ketanik, ri na kaki'an taj sa' ri kakib'i'ij, ri na jinta k'ana rutzil k'u'xaj kuk', ri na e ta kuyul mak y ri na jinta k'ana k'axna'b'al k'u'xaj kuk'. 32Rike lik keta'am chi utz ri q'atb'al tzij re ri Dios pakiwi ri e aj mak, ma Rire ub'i'im lo wa': Janipa ri kakipalajij rutaqanik, lik taqal chike kekamik. Tob' k'u e u'anom ri', rike na xew ta kaki'an ri na utz taj, ma lik ne keki'kot che echiri' kakilo e k'o jujun chik kaki'an ke kuk'.
Currently Selected:
Romanos 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.