Filipenses 2
2
Ri Dios xuyak uq'ij ri Jesús ma Rire xu'an ch'uti'n che rib'
1Ruma k'u k'o alaq puq'ab' ri Cristo, lik nimarinaq chi k'u'x alaq y b'ochi'im chi k'u'x alaq ruk' ri rutzil uk'u'x Rire. Ek'u ri Ruxlab'ixel ri Dios k'o uk' alaq y u'anom chi xa jun che alaq, yey k'ulum chi k'u alaq ri relej uk'u'x y ri k'axna'b'al uk'u'x ri Cristo. 2E uwari'che tz'aqatisaj ko alaq uwach ri nuki'kotemal ruk' wa': Chu'ana xa jun k'u'x alaq, xa jun ri rutzil k'u'x alaq y xa jun ri na'oj alaq chiwach alaq. 3Mak'o ma'an alaq xew re kak'oji' más wach alaq chikiwa ri jujun chik o re yakb'al q'ij alaq. Ri lik usuk' e 'ana alaq ch'uti'n che ib' alaq ruk' ri ka'an alaq y yaka alaq kiq'ij ri jujun chik. 4Na utz ta k'u ri' we k'o junoq e xew kutzukuj ri utz chirib'il rib', ma ri lik chirajawaxik wi e kutzukuj ri utz chike ri nik'aj chik.
5E chu'ana ri k'u'x alaq jela' pacha' ruk'u'x ri Qanimajawal Jesucristo.
6Rire na xu'an ta nim che rib';
tob' ne lik junam uwach ruk' ri Dios,
na xuch'o'jij ta ri taqal che.
7Tob' lik k'o uwach, xuya kan ranima' ri taqal che;
xu'an pacha' aj chak che rib' cha' keb'uto' taq ri tikawex.
Xu'an k'u tikawex.
8Echiri' junam chi uwach kuk' ri tikawex,
xu'an ch'uti'n che rib'.
Lik k'ut xukoj utzij ri Dios, ma xuya rib' pa kamik.
Yey wa kamik lik k'ixb'al uwach,
ma xkamisax chwa cruz pacha' junoq lik aj mak.
9Ruma k'u wa xu'an ri Jesús,
ri Dios e más xuyak uq'ij Rire chikiwa konoje ri lik k'o kiwach.
Xuya k'u che ri Jesús kaqab'i'ij “Qanimajawal” che,
ma rub'i' Rire e más k'o uwach chwa ronoje taq ri b'i'aj.
10Chwach k'u ri Qanimajawal Jesucristo
kakixukub'a' kib' konoje ri e k'o chila' chikaj,
ri e k'o che ruwachulew y ri e k'o chuxe' ulew.
11Y konoje k'ut kakib'i'ij “ri Jesucristo e Rajawal ronoje ri k'olik”,
y kakib'i'ij k'u wa' re yakb'al uq'ij ri Qaqaw Dios.
Qaq'alajisaj ri Q'ijsaq ruk' ri qab'inik qasilab'ik
12Ek'u ralaq, ri lik k'ax kanna' alaq, chwi petinaq loq, lik taqem alaq ri k'utunik re ri Utzilaj Tzij; 'ana k'u alaq wa' na xew ta echiri' in k'o uk' alaq, ma e más chirajawaxik kataqej alaq wa' wo'ora echiri' na in jinta uk' alaq. Ruk' k'u xi'in ib' alaq chwach ri Dios, e lik q'alajisaj alaq ri kolob'etajik alaq ruk' ri b'inik silab'ik alaq. 13Ma e ri Dios kuya che alaq kacha k'u'x alaq che u'anik ri utz chwach y e Rire ri kato'w e alaq che u'anik ri karaj Rire.
14Janipa ri ka'an alaq, ma'an alaq ruk' yaj o ruk' ch'a'oj 15cha' jela' lik jusuk' ri b'inik silab'ik alaq chwach ri Dios y jek'ula' na jinta k'o katz'aqaw chi' alaq y kaq'alajin k'u ri' alaq saqil ralk'o'al ri Dios, ma lik alaq junwi chikixo'l taq ri winaq na e ta jusuk' yey itzel kik'u'x. Jek'ula' ri', ku'an alaq pacha' taq ri ch'umil lik kewon pa ri q'equ'malil re ruwachulew 16echiri' kaq'alajisaj alaq ri Q'ijsaq kuya k'aslemal. Jek'ula' echiri' kak'un tanchi ri Cristo, ri'in kanna' jun ki'kotemal na jinta k'o wi, ma lik k'o xutiqoj ri nub'inik y ri nuchak uk' alaq. 17Ek'u ri'in na kamb'isoj taj tob' ne kinkamisaxik y katuruw k'u ri nukik' pacha' juna qasa'n chwach ri Dios, ma wa' e kutz'aqatisaj ri qasa'n re ri b'inik silab'ik alaq ya'om chi alaq puq'ab' ri Dios ruma ri kub'ulib'al k'u'x alaq ruk'. Lik k'ut kinki'kot uma onoje alaq ma lik ya'om ib' alaq che uloq'nimaxik ri Qanimajawal. 18Y jek'ula' kuaj kaki'kot onoje ralaq wuk'.
Ri koponib'al keb' raj chak ri Dios chila' Filipos
19We e karaj ri' ri Qanimajawal Jesucristo, kantaq b'i tan ri Timoteo re ke'rila alaq y jek'ula' ri wanima' kaki'kotik echiri' rire kuk'am lo rason alaq. 20Na jinta chi k'u junoq lik junam ruk'u'x wuk' pacha' ri Timoteo, ma rire lik uya'om uk'u'x che alaq. 21Ma e taq ri tikawex xew kakitzukuj ri kakaj rike y na e ta keb'ok il che ri karaj ri Qanimajawal Jesucristo. 22Ilom chi k'u alaq ri utzilaj chak u'anom ri Timoteo, ma lik inuto'om che utzijoxik ri Utzilaj Tzij. Rire u'anom pacha' nuk'ajol ma chakuninaq wuk' jela' pacha' ku'an juna ala ruk' ruqaw. 23Ek'u uwari'che lik kuaj kantaq b'i ri Timoteo uk' alaq, we xq'alajin na sa' ri ka'an chwe wara, we kinel b'i o kinkanaj pa cárcel. 24Yey kub'ul ne nuk'u'x ki'nwila tan wach alaq, we e karaj ri' ri Qanimajawal.
25Kanch'ob' k'ut lik chirajawaxik kantaq tanchi ub'i uk' alaq ri hermano Epafrodito, ri xtaq lo alaq wuk' re kinuto' che taq ri kajawax chwe. Rire junam chakuninaq wuk' y junam qatijom k'ax pa ruchak ri Dios. 26Rire lik karaj chik karil wach onoje alaq, ma xreta'maj tom chi alaq echiri' lik xuchap yab'il. Lik k'u kub'isoj wa', ma laj paxinaq k'u'x alaq che ri xuk'ulumaj. 27Paqatzij wi rire xuchap yab'il, xa jub'iq' chi xraj laj xkamik, pero ruma k'u ri k'axna'b'al uk'u'x ri Dios na xopon ta chupa ri kamik. Jek'ula' ri Dios xuto'o yey lik xinuto' ne ri'in, ma we ta e la' xkam na, ri' lik kuriq rib' ri nub'is. 28Ruma k'u wa' lik kuaj kantaq b'i tan ri Epafrodito uk' alaq cha' jela' kaki'kot alaq che echiri' kil tanchi alaq uwach. Y ruma k'u wa ki'kotemal alaq, kapaktaj ri nub'is ri'in che alaq. 29We xopon tanchi rire uk' alaq, k'ulu alaq ruk' ki'kotemal chupa rub'i' ri Cristo. Lik tak'ab'a' alaq uq'ij, ma e taqal ri' chike konoje ri e jela' pacha' rire. 30Ma rire laj xkamik ruma ri kachakun chupa ruchak ri Cristo; xuya k'u ranima' kuk'ulumaj wa' cha' kinuto' ri'in wara. Y jek'ula', rire lik xolu'ana pak'axel ralaq janipa ri kajawax chwe ri'in.
Currently Selected:
Filipenses 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.